عقول جذابه .. (1) التخطيط الاستراتيجى

[A.karam]

بسم الله الرحمن الرحيم

كنت فى يوم مسافر اسكندريه وكانت السماء صافيه لدرجه انك ممكن تحسن انك شايف الكون كله من حواليك .. وفى الطريق بدأت ابص من الشباك وافكر ازاى ان ربنا خلق الكون حوالينا بالاتساع الرهيب ده وازاى اننا بندمر طموحاتنا واحلامنا بادينا .. ازاى يبقى الكون حوالينا واسع كده وتكون عقولنا ضيقه وطموحاتنا محدوده كده !!

هل سبق لك انك صحيت من نومك وقضيت طول يومك ولم تفعل شيئا يذكر؟ كتير مش كده ؟
هل سبق ان ذهبت فى رحله دون ان تحدد الى اين ستذهب؟ تفتكر ده ممكن اصلا؟
هل عمرك مشيت من غير ما تكون عارف رايح فين؟ بغض النظر عن كونك ممكن تعملها لو مكتئب او عايز تنتحر !!!

كنت واقف فى يوم ببص من بلكونه بيتنا على الشارع وكان اليوم فيه رياح شديده ولاحظت على الارض كان فيه ورقه مرميه .. الهوا كان بيشيلها ويوديها فى كل اتجاه بدون اى هدف محدد ..

احنا كده برضه .. لو مش عارف انت رايح فين ومحدد اهدافك كويس هتبقى زى الوريقه دى فى وسط يوم عاصف .. شويه هواء يجيبوك يمين وشويه يودوك شمال ..
يقال ان القدره على وضع الاهداف والتخطيط لتحقيقها هى اهم مهاره ضروريه للنجاح فى الحياه ..

الموضوع ده بيتكلم عن التخطيط الاستراتيجى strategic thinking
وهنتكلم فيه بالعربى العامى علشان يبقى اقرب لينا واسهل للفهم .. اما اللى محتاج تفاصيل اكتر او يحب يقرأ اكتر فممكن اقوله على شويه مراجع بالانجليزى يقرأ فيها .. يعنى للى يحب تفاصيل اكتر ...


اول واهم نقطه فى الموضوع ده هى القدره على وضع الاهداف المبنيه على رؤيه محدده للحياه .. وده هيكون اول موضوع نتكلم فيه


طيب يعنى ايه اهداف وليه الناس مش بتحط اهداف لحياتها ؟؟


الهدف يعنى شئ معين عايز توصله .. قد يكون منصب معين .. لو لوحه معنيه تخلصها لو انت فنان .. مبنى معين تخلصه لو انت مهندس معمارى .. مقطوعه موسيقيه معينه تخلصها لو كنت موسيقار .. وغيره ويكون الوصول للشى ده فى وقت معين هو تحقيق للهدف ده !

يعنى لو فكرت انك عايز تخلص جزء معين من ماده معينه علشان عندك امتحان بعد يومين وحطيت له وقت علشان تخلصه وقدرت فعلا تخلصه يبقى انت كده حققت هدف ؟؟ اكيد طبعا ..

يعنى كل انسان مننا ممكن يكون له اهداف مختلفه عن الاخرين ... طبعا !

طيب هو ينفع حد ميكونش عنده اهداف ؟ مستحيل طبعا لان اى حاجه بتعملها فى الدنيا وتحققها هى بمثابه الوصول لهدف خططت له لا اراديا .. يعنى الانسان بيتولد ومعاه استراتيجيه كامله للوصول لاهدافه ... تخيل انت بقى !

بس المشكله ان الناس مش بتحط اهداف بعيده المدى متماشيه مع هدف اكبر وده اللى هنتكلم عنه ...

Goals are the fuel in the furnace of achievement.
Brian Tracy, Eat that Frog


بس تفتكروا ليه الناس مش بتخطط لبكره ؟؟ ليه الناس بتفكر فى امبارح بس وبتقلق من بكره .. ؟؟
منتظر اسمع آرائكم ...



best wishes
Dr. Ahmed Karam
Human Resources Trainer (Pharmacist-Care organization), NLP certified Practitioner.

[N!CE_@ngel]

ده ممكن لان المجتمع اللي احنا فيه مش بيساعد حد
زي ما يكون بيقتل اي فكر جديد بس في عقول
كتيره اوي كويسه ولو المجتمع بيمد لهم يد العون ما كوناش وصلنا
لكده بس المجتمع مش بيصرف علي العقول قد ما بيصرف علي
المظاهر بس انا شايفه ان لو كل واحد حط هدف ليه وحاول انه يوصله وسعي وراه بجد ان شاء الله ربنا يوفقه بس احنا لازم نبدا من نفسنا ونحاول حتي ولو باهداف بسيطه علشان نوصل لاهدفنا الكبيره
شكرا يا د/احمد علي الموضوع

[د. سعيد شمعه]

موضوع جميل فعلا د. احمد
.
بس يمكن البيئة اللي بنعيش فيها هي السبب ؟؟؟؟
يمكن كل ما نبدأ مشوار ما نقدرش حتى نبدأه ؟؟؟
العراقيل كتير جدا و المصاعب أكبر ؟؟؟؟؟؟
ما فيش حد أصلا بيشجعنا على التفكير بالطريقة دي ..
بالعكس يمكن يضحكوا علينا ؟!!!!!
و بعدين الموضوع أصلا متعب و مجهد عشان نعمل خطة ...
هل فعلا العائد يستحق العناء ؟؟؟؟

[هووبة]

جزاك الله خيرا د/أحمد
موضوع شيق وجميل

بس تفتكروا ليه الناس مش بتخطط لبكره ؟؟ ليه الناس بتفكر فى امبارح بس وبتقلق من بكره .. ؟؟

يمكن لأن الناس بتخاف من الفشل؟؟؟
ويمكن بيعتقدوا أنهم لو عاشوها بالبركة كده هيكون الوضع أسهل؟؟؟
ويمكن لأنهم شافوا تجارب فاشلة فبيقولوا معقول إحنا يعني اللي هنقدر نجيب الديب من ذيلة(ننجح يعني)؟؟؟
ويمكن ميعرفوش يعني إيه تخطيط وبالتالي مش متوقعين إيه هي مزاياه؟؟؟

Dr.Heba magdy
Pharmacist-Care organization

[BoNbOoNa]

جزاكم الله خيرا .. عجبتني طريقة العرض اوي

بس تفتكروا ليه الناس مش بتخطط لبكره ؟؟ ليه الناس بتفكر فى امبارح بس وبتقلق من بكره .. ؟؟

منتظر اسمع آرائكم ...

لو اي واحد وقف مع نفسه للحظات في يومه و فكر في امبارح و بكره .. حاجة من الاتنين
1- انه يحمد ربنا علي الحاجات الكويسة و يستغفره من الاخطاء اللي عملها و يحاول يعوض ما فاته و يصلح خطأه انهاردة قبل بكرة ....... يعني تفكير يؤدي الي مجهود
2- كل حاجة حوليه شايف الجانب السلبي فيها بس و بالتالي يكون عنده احباط و مفيش عنده امل لا انهاردة ..ولا بكرة... وبالتالي مش هيتحرك من مكانه ... يعني تفكير يؤدي الي خمول
و يمكن في ناس بتفضل الراحة و الخمول و الكسل حتي لو علي حساب طموحها و اهدافها
" الهروب هو السبب الوحيد في الفشل ، لذا فإنك لا تفشل طالما لم تتوقف عن المحاولة "

[dr_sho0osho0o]

اولا بحييك يا دكتور علي طرح الفكرة

بس تفتكروا ليه الناس مش بتخطط لبكره ؟؟ ليه الناس بتفكر فى امبارح بس وبتقلق من بكره .. ؟؟
منتظر اسمع آرائكم ...

رأي ان مبقاش حد بيحب المغامرة أو المخاطرة
يعني كلنا بنفكر بمبدأ عصفور في اليد خير من عشرة علي الشجر
يعني الماضي احنا عارفينه سواء حلو او لا بس عارفينه
لكن المستقبل مجهول ايه اللي هيحصل بكرة منعرفش
بنفضل نستني يجي بكرة ونتعامل ونتكيف معاه
بدل ما نكون مخططين ومتوقعين ايه اللي هيحصل
انا راي ان ده غلط يعني من غير التفكير في حاجة جديدة
نعملها ممكن نكون صحيح هنغامر بس علي الاقل
هنخلي بكرة مختلف عن امبارح وبالتالي يكون للحياة لازمة
بدل ما نعيش يوم يودينا ويوم يجبنا واحنا ولا أكنها حياتنا
احنا اللي ربنا وهبهلنا عشان نعيشا في عبادته و
نخرج منها فايزين مش نعدي علي الدنيا ولا أكننا جينا أصلا

اسافة علي الاطالة وشكرا مرة تانية علي الموضوع الرائع ده

[A.karam]

بسم الله الرحمن الرحيم

اولا احب اشكركم على مشاركتكم ...

د. N!CE_@ngel .. عندك حق .. الناس اللى حوالينا كتير بيحاولوا يحبطونا ويرجعونا لورا لكن من امتى كان فيه حد ناجح ولقى النجاح ده فى الشارع وهو ماشى ؟؟!!

من امتى كانت الحياه سهله وممكن انك توصلى لاى حاجه فيها بسهوله ؟؟

د. سعيد .. مشاركه حضرتك شرفتنى .. اشكرك ..

د. هبه .. فعلا الافكار اللى حضرتك طرحتيها ناس كتير بتفكر فيها وهنرد عليها حالا باذن الله

د. BoNbOoNa .. وجزاكم الله خيرا لتشريفك للموضوع ...

يمكن ناس كتير بتفكر بالطريقه التانيه بس اتمنى ان الموضوع ده يساعد الناس انها توصل للتفكير بالطريقه الاولى ..

.
.
.

زى ما حضراتكم تفضلتوا وقلتوا ان فيه اسباب كتير بتخلى الناس تفكر انها تعيش اليوم بيومه من غير اى تخطيط او تفكير .. مش بس فى بكره .. انما فى اى حاجه اصلا ...

التفكير هيوصلنى انى اتعب يبقى افكر ليه ؟؟؟!!!

ودى اهم الاسباب اللى مش بتخلى الناس تحط اهداف ....

1. انهم مش جادين فى حياتهم .. واخدين الحياه باستهتار .. كل اللى بيعملوه انهم بيتكلموا مش بيشتغلوا .. الدنيا شغل اكتر منها كلام .. "الافعال اعلى صوتا من الاقوال" ..
2. شخص غير مسؤل عن حياته .. حد شاف مسلسل حماده عزو !! الانسان ده مش قادر يقبل مسؤليه حياته .. مستنى امه انها هتحل له كل مشاكله .. يبقى هو هيخطط ويحط اهداف ليه ؟! "يأنتخ" وخلاص زى ما كلمات الاغنيه بتقول !!
3. شخص يظن انه لا يستحق او ان هذه هى نظرته لنفسه .. يظن انه لا يستحق النجاح .. "انا فيا كذا وكذا وكذا .. تفتكر واحد زيى ممكن ينجح فى حاجه ؟؟!!" ده هو اللى بيقول كده ! تفتكر ترد عليه وتقوله ايه ده ؟؟ هنقول كتير بس استنوا للاخر ..
4. او شخص لا يدرك اهميه التخطيط ولا يرى فوائده .. ميعرفش يعنى .. يبقى نعرفه !!! ولا ايه ؟
5. شخص لا يعرف كيف يضع اهدافا لحياته .. نعلمه ازاى يخطط وساعتها هيبقى زى الفل بس هو يشاور واحنا جاهزين ..
6. الخوف من الفشل وعدم تحقق الاهداف .. يعنى حد يكون جرب انه يحط اهداف ومقدرش يلتزم بيها ويحققها يقوم يكسل ويقول انا مش بعرف احط اهداف .. وده مش بس فى الاهداف .. ده فى كل حاجه .. لما تجرب حاجه وتلاقيها منفعتش او كان المقابل سلبى يبقى طبعا هتبطل تعملها تانى .. مع انها ممكن تكون حاجه مهمه او ايجابيه ويكون المقابل السلبى او عدم النجاح كان له اسباب تانيه خالص !!!

على الرغم انه لو استمر فى وضع الاهداف والسير عليها هيكون ناقصه التخطيط السليم فقط لكى يحقق هدفه وان وضع الاهداف وعدم تحقيقها افضل بكثير من عدم وضع اهداف من الاساس ..!!

"اكبر الفاشلين فى التاريخ هم اكبر الناجحين"
"ليس هناك فشل ولكن هناك تجارب وخبرات"
"اذا فشلت كما تظن فمرحا .. لقد دفعت للتو ضريبه نجاحك فان حاولت مره اخرى وفشلت ايضا فمرحا مرحا .. فان نجاحك كبير لدرجه ان ضريبته كبيره ولكن غير طريقتك فى الوصول الى هدفك فقد تكون مخطئا فى هذه الطريقه وحاول مره اخرى"
7. الخوف من نقض الاخرين والاستهزاء .. خاصه فى وسط الشله .. هقولهم بحط اهداف وكلام من ده هيضحكوا عليا .. ده لو مكانوش عملوا كده فعلا لانهم شافوك بتقرأ موضوع زى ده ..!!

هكذا هو الحال دائما بالمستهترين .. اما حال الماهرين والناجحين فهو غير ذلك تماما ..!!

حد عنده اسباب تانيه يقولنا عليها .....

وفى المشاركه القادمه اهميه الاهداف والتخطيط وبعض الوسائل التى قد تساعدك ... فانتظرونا



تحياتى
د. احمد كرم
Human Resources Trainer (Pharmacist-Care organization), NLP certified Practitioner

-----

dr_sho0osho0o اشكرك على تشريفك للموضوع وعلى مشاركتك القويه ..

زى ما قلتى ان كتير من الناس بتفكر بطريقه متحفظه .. ليه افكر فى بكره مش لما يبقى يجيى ابقى افكر فيه .. احنا الصح نفكر فى اللى عارفينه .. اللى هو امبارح !!!

هل الكلام ده صح ؟؟ مش عارف ..بس اللى اعرفه حاجه واحده ..

امبارح ده ماضى .. حصل خلاص .. يبقى مش هفكر فيه ومش هخليه ياخد وقتى غير لما اكون عايو اتعلم منه بس .. انما انى اشغل نفسى بيه فده تضييع وقت ..

اما عن المستقبل فده انا اللى بحدد شكله هيبقى ازاى وده كله بايد ربنا .. انا النهارده زى ما خططت امبارح وهيبقى بكره زى ما هخطط النهارده ...

اما عن الناس اللى بتقول ان المستقبل بايد ربنا وهو سبحانه وتعالى عنده علم الغيب يبقى اوجع دماغى ليه ...

هقولك توجع دماغك ليه ..

هل انت تعرف الغيب ؟ لأ طبعا .. طب يبقى بالتاكيد متعرفش ربنا كاتب لك ايه بكره صح ؟؟ صح ..
جميل اوى .. لغايه كده هل ربنا امرك بانك تستنى بكره لما تيجى ومتعلمش حاجه فى دنيتك علشان انت متعرفش الغيب ولا أمرك انك تفكر وتتحرك وتستغل وتيسب الباقى والنتيجه لربنا ؟؟

تفتكر هل الصح انك تقعد متواكل وتستنى الرزق ؟؟ ولا تتوكل وتشوف ربنا هيعملك ايه ؟؟

فى الحقيقه انت متعرفش انت مستقبلك فيه ايه انما تعرف انت عايزه ازاى .. لان زى مانت هتخطط هيكون مستقبلك وهيكون ده هو اللى ربنا كاتبه لانك ببساطه متعرفش هو كاتبلك ايه !!!

اما بخصوص القلق من بكره فده غير منطقى وغير مبرر .. اقلق من حاجه محلصلتش .. تعرفوا .. فى كتاب دع القلق وابدأ الحياه بيقول ديل كارنيجى: ان اكثر من 90 % مما تفكر فيه وتقلق بشأنه لا يحدث اطلاقا ... تخيلوا انما كل اللى بنحصل عليه هو المرض والتعاسه .. بل احيانا بنخسر اشخاص بنحبهم لاننا مش بنقدر نبادلهم الحب ده فى الوقت اللى بنكون قلقانين فيه !!!!

مفيش اصلا اى سبب منطقى للمرض الخطير اللى اسمه القلق اللى بيسبب معظم مشاكل العالم ..

اشكرك د. dr_sho0osho0o على تشريفك للموضوع

[dano_90]

بس تفتكروا ليه الناس مش بتخطط لبكره ؟؟للاسف فيه شريحة كبيره من الناس عايشين يومهم وخلاص ...ممكن ده عدم طموح او جهل او كسل او... ليه الناس بتفكر فى امبارح بس وبتقلق من بكره .. ؟؟حقيقى انا لاحظت الموضوع ده كتير اوى دايما نفضل نندم على امبارح وكل اللى حصلنا فيه ..مع ان ده غلط لان التفكير ده ممكن يعوق مستقبلناوانا شايفه انك لو فشلت ف تحقيق حلم او هدف ..تخلى فشلك يدفعك للنجاح ..اما القلق من بكره ده مطلوب والا لو الانسان اطمئن يبقى هيتكاسل عن السعى وراء اهدافه ..فبردو ممكن نخلى خوفنا من بكره ده دافع للنجاح ...._____________________________ميرسى على التوبيك الرائع ...