بيت العيله ياترى حل ولا مشكله ؟؟؟؟؟؟

[summer breeze]

السلام عليكم ورحمه الله وبركاته
ازيكم ياعضاء المنتدى يارب تكونوا بخير وربنا موفقكم في الصيام طبعا النهارده عاوزين نتناقش سوا في قضيه اجتماعيه ساخنه هي قضيه الزواج في بيت العيله طبعا في ظل الظروف الاقتصاديه الطاحنه اللي بيعيشها المجتمع المصري في الوقت الحالي اصبحت من اهم العقبات اللي بتواجه اي اتنين بيبتدوا حياتهم سوا مشكله السكن نظرا للاسعار الخياليه للشقق دلوقتي سواء كانت تمليك او ايجار ولذلك برزت على السطح مره اخرى دعوه باحياء الماضي واللجوء الى السكن مع العيله وهو مايراه الكثير من الشباب الان الحل الامثل لهذه المشكله
ودلوقتي بقى عاوزين نتناقش سوا بموضوعيه في المحاور التاليه ايه رايك كشاب وكبنت في مبدا السكن مع العيله كمبدا عاوزين نعرف اذا كنت (ي) مؤيد(ه)ليه واذا كنت (ي) معارضه يبقى ليه برضه
وكمان هل كلمه السكن مع العيله تعني دائما السكن مع عيله الشاب يعني مش وارد ان الولد والبنت يعيشوا في بيت اهل البنت هل دي فكره غريبه ولا ممكن تتقبلوها وهل انت كشاب ممكن تطلب من خطيبتك انكم تسكنوا مع اهلها وهل هي هتقبل ولا ده شيء يجرح كرامتك
اذا كنت (ي)من المؤيدين لمبدا السكن مع العيله فهل ترى انه كله ايجابيات ولا انت عارف(ه) مقدما ان هتبقى في مشاكل كتيره انت هتتعرضلها ؟ ولو في مشاكل متوقعه ادينا امثله
اذا ماكنش قدامك اي فرصه انك تجيب شقه وامكانياتك مش سامحه نهائي وبتحب واحده جدا وهي كمان بتحبك ورحت قلتلها ظروفك وطلبت منها انكم تسكنوا مع عيلتك فرفضت في الحاله دي هيكون ايه موقفك منها وهل هتعتبر انها اتخلت عنك وباعت اللي بينكم علشان الماديات ولا هتقدر وجهه نظرها وتحاول تحلاقي حل بديل ؟ وكمان انتي لو كنتي بطله الموقف ده هتوافقي تكملي مع خطيبك ولا هترفضي ؟
هل في قرايبك او الوسط المحيط بيك حد عاش تجربه الزواج والسكن مع العيله ياريت توصفولنا التجربه وهل هي ناجحه ام فاشله من وجهه نظركم ؟
دي كانت المحاور اللي اتمنى انكم تاخدوها بعين الاعتبار في ردودكم وطبعا اي حد عنده حاجه زياده تثري النقاش وتزيد من الفائده ياريت ميبخلش بيها علينا مستنيه ردودكم واراؤكم في الموضوع ودمتم سالمين

[wh_kaboo]

ازيك يا سمر يسعدنى ان اكون اول واحد يرد على الموضوع الحيوى ده وياربت الكل يشارك فيه

[summer breeze]

يا اهلا بيك يا دكتور وليد الموضوع نور بدخولك ومستنيه رايك في الموضوع

[wh_kaboo]

انا بالنسبة ليا فى ظل الظروف الاقتصادية الحالية بقى صعب على اى شاب انه يجهز بيت زوجية زى الاول لانه علشان يجهزه ده يبقى خراب بيوت زة ما بيقولوا .....
بالنسبة للبنات انا ارى ان الفكرة صعبة التقبل كل واحدة تقول عايزة بيت صغير احس فية كانى ملكة لو كان حتى اوضة وصالة .....
اما بالنسبة للشباب ممكن تكون الفكرة مقبولة علشان يريحوا انفسهم بس المفروض ان الجواز ده يبقى من المراحل المتاخرة فى تفكير الشاب يعنى لازم يشوف مستقبلة الاول ويشوف شغلانة ممكن تعيشه مستريح دون الاعتماد على الاب ....

اما بالنسبة ليا انا لا افكر فى الزواج الا بعد قترة طويلة اكون كونت فيها نفسى وما احسش انى هجرج نفسى لما اتقدم لاى بنت علشان الجواز ويقعد ابوها وامها يقولوا الشقة والجهاز والشبكة و ...... والحاجات دى كلها ....
ويقعدوا يقولولك ان بنتى مش اقل من بنت فلان ولا بنت علان احنا عايزين وعايزين وعايزين .....
ولا ابه مش ده اللى بيحصل وهيحصل ؟؟؟؟؟؟

[summer breeze]

اما بالنسبة ليا انا لا افكر فى الزواج الا بعد قترة طويلة اكون كونت فيها نفسى وما احسش انى هجرج نفسى لما اتقدم لاى بنت علشان الجواز ويقعد ابوها وامها يقولوا الشقة والجهاز والشبكة و ...... والحاجات دى كلها ....
ويقعدوا يقولولك ان بنتى مش اقل من بنت فلان ولا بنت علان احنا عايزين وعايزين وعايزين .....
ولا ابه مش ده اللى بيحصل وهيحصل ؟؟؟؟؟؟

انا عارفه يادكتور ان ده بقى تفكير كتير من الشباب دلوقتي يعني يصبر شويه لحد لما يكون نفسه ويكون مستعد لمسؤوليه كبيره زي الزواج وفتح بيت مستقل لكن النقطه يادكتور حضرتك مش ممكن تشوف انك لو سكنت مع عيلتك هتوفر وقت كبير من عمرك وتقدر تتجوز في سن اصغر وخصوصا في حاله لو كان الشاب مرتبط ببنت هيبقى صعب انها تستناه فتره طويله لحد لما يعمل الكلام ده كله احب اسمع رايك يادكتور ؟ وكمان راي الشباب والبنات

[wh_kaboo]

انا عارفه يادكتور ان ده بقى تفكير كتير من الشباب دلوقتي يعني يصبر شويه لحد لما يكون نفسه ويكون مستعد لمسؤوليه كبيره زي الزواج وفتح بيت مستقل لكن النقطه يادكتور حضرتك مش ممكن تشوف انك لو سكنت مع عيلتك هتوفر وقت كبير من عمرك وتقدر تتجوز في سن اصغر وخصوصا في حاله لو كان الشاب مرتبط ببنت هيبقى صعب انها تستناه فتره طويله لحد لما يعمل الكلام ده كله احب اسمع رايك يادكتور ؟ وكمان راي الشباب والبنات

انا عايز اسال سوال انتى قصدك بيت العيلة يعنى اوضة فى شقة ؟؟؟؟ ولاشقة فى بيت كبير ؟؟؟

[wh_kaboo]

المهم انا رأى مش هيختلف اصل ما فيش بيت من غير مشاكل وجى هتبقى عيشة مش لذيذة
الجواز اهم حاجة فيى الاستقرار

[Dr nour]

أزيك ياسمر ياحبيتى وأهلا برجوع مواضيعك اللى دايما بتناقش مواضيع هامه

رايك كشاب وكبنت في مبدا السكن مع العيله كمبدا عاوزين نعرف اذا كنت (ي) مؤيد(ه)ليه واذا كنت (ي) معارضه يبقى ليه برضه

أنا عن نفسى مش موافقه على مبدأ السكن مع العيله وعندى أسبابى
1- لازم هيكون فى مشاكل ..........والمشاكل يفضل لها أثر فى النفس مبيرحش أبدا
2-مهما كانت العيله اللى هسكن معاها طيبه وهتراعى ربنا فى تعاملها معى وكمان مهما حاولت ارضائهم
أكيد هيبقى فى مشاكل..........لأن مهما كان هما مش عيلتى
عيلتى ممكن تتقبل منى أشياء وتصرفات لكن عيله زوجى مش هتتقبله
كمان عمرى مهما قدرت أراعى ربنا فى معاملتهم مهيستحملونى
وكمان ماهما كانوا بيعملونى كويس ما هستحملهم زى بنتهم
وكمان أنا مش ضامنه العيله اللى هسكن معاها هيكون نظامها ايه وتفكيرهم ايه وازاى هيعملونى
كمان المشكله بتكتر لما يكون ده هو ابنهم الوحيد..............أنا عارفه المشاكل دى كويس
وكمان أنا حابه انى يكون فى صله موده ورحمه ومحبه وتفاهم مع عيلتى الجديده .............وده هيبقى صعب جدا لو سكنت معاهم
على فكره ممكن فى بعض الحالات تقدرى تعيشى فى بيت عيله سلام بدون مشاكل............بس مش كل العائلات كدا............كمان أنا معرفش نصيبى هيكون ايه

وكمان هل كلمه السكن مع العيله تعني دائما السكن مع عيله الشاب يعني مش وارد ان الولد والبنت يعيشوا في بيت اهل البنت هل دي فكره غريبه ولا ممكن تتقبلوها وهل انت كشاب ممكن تطلب من خطيبتك انكم تسكنوا مع اهلها وهل هي هتقبل ولا ده شيء يجرح كرامتك

فعلا السكن مع العيله يعنى دائما السكن مع عيله الشاب
ومفيش شاب هيقدر يتعايش مع أسره البنت.............بالعكس ده لو حصل هتزيد المشاكل أضعاف أضعاف
لان الشاب هيحس أنه مقيد الحريه ..........مش هيشعر بالقياده بتاعته

اذا ماكنش قدامك اي فرصه انك تجيب شقه وامكانياتك مش سامحه نهائي وبتحب واحده جدا وهي كمان بتحبك ورحت قلتلها ظروفك وطلبت منها انكم تسكنوا مع عيلتك فرفضت في الحاله دي هيكون ايه موقفك منها وهل هتعتبر انها اتخلت عنك وباعت اللي بينكم علشان الماديات ولا هتقدر وجهه نظرها وتحاول تحلاقي حل بديل ؟ وكمان انتي لو كنتي بطله الموقف ده هتوافقي تكملي مع خطيبك ولا هترفضي ؟

ايه المشكله ان احنا نبدأ حياتنا بشئ بسيط وبعدين هنقدر نحقق كل شئ احنا عايزينه ...........ان شاء الله
عاوزه أحكى موقف..........حصل حقيقى
كان فى شاب ظروفه بسيطه جدا جدا اتقدم لفتاه حالتها الماديه كويسه
طبعا الأهل رفضوا وبعد محاولات تمت الموافقه
تصوروا الفتاه دى اتجوزت بأيه
اتجوزت فى قوضه وكل ما تملكه سرير وحصيره وبوتاجاز
الامر اللى كان يجعل أهلها يستهزؤن منها ...........ولكنها كانت راضيه
ومرت السنوات والآن تصوروا حال الفتاه دى بقى ايه
القوضه بقت عماره ..............وعندها جميع كل شئ............وربنا مباركلها فى أولادها

هل في قرايبك او الوسط المحيط بيك حد عاش تجربه الزواج والسكن مع العيله ياريت توصفولنا التجربه وهل هي ناجحه ام فاشله من وجهه نظركم ؟

بعضهم كانت فاشله جدا ..............وتحولت الأسره الى أعداء والحياه بقت جحيم بجد
ولكن فى قصه ممكن أحكيها
هى مش سكن عيله يعنى الزوج هو الابن الوحيد لوالدته تعلقه بيها تعلق غريب جدا زائد جدا..........ممكن يكون مرضى جدا والاب متوفى
الابن متزوج فى شقه مش شقه العيله بس والدته عايشه معاه فى شقته...........والحياه مستقره جدا ومفيش مشاكل

[summer breeze]

بشكرك يا دكتور وليد على رايك وعلى دخولك اكتر من مره ويارب اشوف رايك ومناقشاتك الحلوه في الموضوع بالنسبه لسؤالك

انا عايز اسال سوال انتى قصدك بيت العيلة يعنى اوضة فى شقة ؟؟؟؟ ولاشقة فى بيت كبير ؟؟؟

والله يادكتور دي نقطه متروكه لتقدير كل واحد لان لو في حد في الريف يبقى بتهيالي هيبقى الموضوع بالنسباله قوضه في بيت العيله اما لو حد مثلا عنده شقه في عماره بباه يبقى هيتناول الموضوع من الناحيه دي يعني كل واحد يتكلم بناء على ظروفه ورؤيته للموضوع
ويلا الموضوع لسه في اوله عاوزه اسمع اراؤكم

[summer breeze]

أزيك ياسمر ياحبيتى وأهلا برجوع مواضيعك اللى دايما بتناقش مواضيع هامه

اهلا بيكي يانور ياحبيبتي الموضوع زاد نوره بدخولك وبردك الجميل وكل موضوع بيستقي اهميته من ردودكم ومناقشاتكم ويارب الموضوع ينال اعجابكم جميعا

اذا ماكنش قدامك اي فرصه انك تجيب شقه وامكانياتك مش سامحه نهائي وبتحب واحده جدا وهي كمان بتحبك ورحت قلتلها ظروفك وطلبت منها انكم تسكنوا مع عيلتك فرفضت في الحاله دي هيكون ايه موقفك منها وهل هتعتبر انها اتخلت عنك وباعت اللي بينكم علشان الماديات ولا هتقدر وجهه نظرها وتحاول تحلاقي حل بديل ؟ وكمان انتي لو كنتي بطله الموقف ده هتوافقي تكملي مع خطيبك ولا هترفضي ؟

ايه المشكله ان احنا نبدأ حياتنا بشئ بسيط وبعدين هنقدر نحقق كل شئ احنا عايزينه ...........ان شاء الله

نور حبيبتي عاوزه افهم ردك ده معناه انك هتتراجعي عن موقفك وتقبلي تعيشي في بيت العيله ولا هتقوليله نبدا حياتنا بحاجات بسيطه جدا مستنيه التوضيح ياجميل ومستنيه ردودكم واراؤكم في الموضوع