احترام القوانين

[آيه محمد]

السلام عليكم ورحمه الله وبركاته

بصراحه مش عارفه ابدأ ازاي
بس اللي اعرفه ان الدوله وضعت قوانين عشان ننظم حياتنا

انا بتكلم من واقع امثله
الرفيس بيحمل الفرد ب 50 قرش
والسبب اننا في العيد
طيب لو رفضت تدفع غير اللي الدوله حددته؟
حد يقدر يلومك
كمان لو السواق تمادي تبلغ عنه ولا لأ؟

الموضوع مش فلوس خالص احنا بنصرف كتير يوميا
الموضوع بينحصر في جشع الناس
ولو انا وافقت ادفع المره دي نص جنيه المره الجايه هتكون جنيه
يعني دي زي جس نبض

انا عن نفسي بلغت عنهم لان ده السبب في تأخرنا اننا بنستهون بأقل الاشياء وبنعديها

الطمع عمي قلوب الناس
كل واحد شايف مصلحته وبس
في البيت عندي شايفين اني هبهدل نفسي
كمان بقطع رزق واحد غلبان
بس انا رأيي ان الغلبان ميطمعش
وميستقواش علي اللي اضعف منه
اما اني هتبهدل فدي مش فارقه معايا لان دي شهاده ربنا هيحاسبني عليها
لاني مقدرتش اغير غير بلساني
وانا محبش اكون مؤمن ضعيف مهما كانت العواقب

ايه رأيكوا؟
انا صح ولا غلط ولو انت مكاني هتعمل ايه؟

[خادم أبى القاسم]

جزاك الله خيرا...أفضل الجهاد قول الحق لدى سلطان جائر..والحق أحق أن يوضع فى نصابه

[Amira Said]

انا بحييكي على ايجابيتك بجد بالرغم ان مش كلنا نقدر نعمل زيك
و انا عن نفسي مش عارفة لو اتحطيت في موقف زي ده هعمل ايه
بس بجد ما شاء الله عليكي، ربنا يباركلك

[summer breeze]

ازيك يا ايه كل سنه وانتي طيبه وعيد جميل وسعيد عليكي موضوعك النهارده بصراحه صعب جدا الاجابه عليه او الرد فيه لان مساله احترام القانون دي ثقافه شعوب واحنا شعوب لم تتربى على احترام القوانين ودي من علامات هلاك الامم زي مالرسول عليه الصلاه والسلام قال فيما معناه (انما اهلك الذين من فبلكم انهم كانوا اذا سرق فيهم الغني تركوه واذا سرق فيهم الضعيف اقاموا عليه الحد ) وده هو الحاصل في الوقت الحالي ومحدش يقدر ينكره طول مافيه وسايط ومحسوبيات وسلطه ونفوذ في ايد ناس فاسده ومفيش قوانين بتنظم اي حاجه اللي طايل حاجه بياخدها ويجري وبدل الدوله سابت الناس تعمل كده وخلت صاحب المال يتحكم فيمن هم اقل منه مينفعشي نيجي احنا نهدد صاحب المال بالدوله لانها هي اللي ادته الحريه دي اصلا وبالتالي انا مقدرشي ابلغ عن بتاع الاتوبيس ولاعن بتاع التاكسي ولا البقال ولا الجزار ولا اي حد من دول هو دا رايي اللي كنت اتمنى ما اقولهوش ابدا عن بلدي بس للاسف هو دا واقعنا المرير وملناش حد نشتكيله غير ربنا عسى الله ان يصلح لنا الاحوال

[dr/samr]

إذا كان رب البيت بالدف ضارب فشيمة أهل البيت كلهم الرقص
اذا كان الناس شايفين الناس الكبيره بتاعتهم بيعملووا كده هما هيقولوا لا ليه
وموقفك جميل اوي من نحيه انك تبلغي .. لان طبعا لو كل واحد حط تسعيره علي مزاجه هتبقي هيييصه بقي
وبكره نركب السرفيس بخمسه جنيه..وعلي عينك ياتاجر...
دا كفايها التاكسي اللي بركبه ب اتنين جنيه ويركب جمبي عشرين واحده كمان...
م الاخر لو الللي بيعمل كده لقي اللي يعدله....مش هيفكر اصلا انه يزودها ولو لمجرد شلن ...

توبك هايل يا ايه وعرض لفكره اجمل بجد..جزاكي الله كل خير ياجميل

[lost*soul]

والله برافو عليكى

القوانين تعملت لنظم بيها حياتنا

واحنا اتعودنا نسكت عان كده ضاع حقنا وداما سكتين يبقى نستاهل والى لو اتكلمنا كام مينا هيتكلم

[Dr nour]

ايه رأيكوا؟

انا صح ولا غلط ولو انت مكاني هتعمل ايه؟

فعلا انتى صح وبحييكى على ايجابيتك دى ولكى منى كل الاحترام والتقدير على موقفك ده
ولو انا مكانك للأسف أقصى حاجه ممكن أعملها هى الكلام وبس ...............مش عارفه امتى كلنا نقدر نوقف ونقول لأ ................لازم نغير الأوضاع دى....................للأسف سلبيتنا متحكمه فينا وكل اللى نعمله مجرد كلام وده لو اتكلمنا أصلا ...............وده سبب الأستغلال اللى بنتعرضله

[Mohamed Al Gohary]

اللى يسرق النهارده ربع جنيه من واحد ماشى .. هو ده اللى هيختلس ويسرق الملايين لما يكبر او منصبه يكبر .. الحكايه حكايه تربوية ..

والشيطان ديما بيبدا مع الانسان بالحاجه الصغيره فالاكبر فالاكبر ..

شكرا على الموضوع ..

[آيه محمد]

والله انا بشكركم علي ردودكم الجميله
وانا دلوقتي حاسه اني فعلا عملت حاجه صح
لان معظم الناس كانوا ضدي في التصرف ده
بس الحمد لله لقيت حد متفق معايا

واللي كنت بفكر فيه كمان لما دكتور الشابوري قال اللي هيتأخر دقيقه مش هيدخل المعمل
مع ان الدقيقه مش هيكونوا لحقوا عملوا حاجات كتير
بس عشان اللي هيتأخر مره دقيقه هيتأخر المره التانيه عشره
يعني هيتمادي في الغلط

تحياتي للجميع