شرح مواد اولى يارب يفيدكم
الحمد لله يادكاتره اعدادى عدت وكنا فيها مع بعض الف مبروك للى نجح والى شال ماده ميزعلش لعله خير عسى ان تكرهو شيئا وهو خير لكم
ومكملين معاكوا فى اولى باذن الله ويارب نكون افضل من اعدادى
نبذه عن مواد اولى
___________________
العقاقير :
-------------
كنا قايلين فى اول السنة اللى فاتت ان كل ماده درسناها ليها اهمية فى المستقبل وخلصنا اول سنة الحمد لله ودخلنا على اولى والمفروض نعرف ماده زى النبات دى هتفيدنا ازاى فى اولى .. فى اولى هناخد كل جزء وهندرسه مع اجزاء المنهج يعنى السنة دة هندرس الـ leaf من حيث الشكل الخارجى بتاعها (Morphology) يعنى هندرس اوراق لأشجار كتير بتستخدم فى صناعة العقاقير الطبية ونتعرف على الشكل الخارجى لكل ورقة وازاى نتعرف عليها وملمس الورقة ولونها وتعرجات الورقة ونوع الـ stipule والحاجات دى وهندرس كمان تصنيف الورقة زى ما درسنا فى الـ (Taxonomy) وقبل ما نبدأ فى الاناتومى درسنا حاجات زى الـ tannin , fixed oil, volatile oil , starch , هندرسها برده فى العقاقير وفى كل سنة عندها لانها هى الـ (active constituents ) المواد الفعالة اللى موجوده فى كل ورقه من الورق ده وهندرس تركيب الاناتومى بتاع الورقة يعنى الـ T.S نوع ال stomata , hair , endodermis , وفى منها حاجات كتير هتدخل بعد كده فى حاجه اسمها key element هى الحاجات المميزة اللى بنعرف بيها النبات من تحت الميكرسكوب وطريقة التعرف على النبات ده كمان عن طريق التفاعلات الكيميائية .. وفى الاخر هناخد حاجتين اولها dusting powder ودى سهلة جدا عباره عن اهم البودر اللى بنستخدمها فى الطب واشهرها بودرة التلك وهندرس حاجه خاصة بالعقاقير اللى بنستخلصها من الحيوانات زى زيت كبد الحوت والصبغات اللى بنستخلصها من الحشرات )ودى ساعات بندرسها فى الترم الاول وساعات بناخدها فى الترم التانى.
الترم التانى طبق الاصل من الترم الاول بس بدل ما هناخد leaf هناخد Wood , Flower , bark
هتسالونى واحنا هنكون فاكرين حاجه من اعدادى ؟! هقول مش هتفتكروا حاجه بس اول محاضرة فى السنة هتبقى مقدمة للجزء اللى هندرسه وخصوصا المورفولوجى وممكن حاجات فى الاناتومى.
امتحان النظرى : مختلف عن النبات اختلاف جزئى يعنى هو هيبدأ يسالكم فى اسئلة مجمعة حاجات كتير ف المنهج اكيد هندرس مثلا حاجات بتستخدم انها تعالج مرض معين بيجمعوا الادوية دى ويسالوا فيها او يطلب منا نتعرف على كذا نبات عن طريق الحاجات المميزة للنبات وممكن كمان يكون عن طريق شكل المورفولوجى واسئلة تانية كتير يعنى من الاخر المادة محتاجه مذاكرة كتير وحفظ كتير لانها بتتنسى بسرعة وكمان عشان نعرف كل حاجه عنها ونعرف نربط بين العقاقير دى.
العملى : بندرس فيه عينات Powder من الـ Leaf ونعمل عليها اختبارات تحت المكرسكوب عشان ندرس المكونات اللى فيها ونعرف شكل الـ T.S القطاع العرضى فى الورقة والـ Key element اللى بتبان تحت المكرسكوب وده حاجه مميزة لكل نبات عن التانى
امتحان العملى : بيبقى عباره عن كذا امتحان فى امتحان spots كبرنا على كلمة شرايح ودى بيجيبولنا شرائح نتعرف عليها تحت الميكرسكوب ونعرف اسم العينة او اسم الـ key element الموجود فيها. وتانى حاجه بيبقى فى powder معينة بنحضرها بتفاعل كيميائى هندرسه فى العملى ونحطها تحت الميكرسكوب ونعرف هيا دى نبات ايه ونكتب كل scheme كاملة عنه
ثانيا : الكيمياء العضويه :
درسنا السنة اللى فاتت مقدمة للعضوية وانواع التفاعلات اللى بتمشى عليها اغلب التفاعلات الكيميائية وزى ما خدنا فى عضوية الثانوية العامة برده الـ alkane , alkene , alkyne , alcohol هندرسهم تانى بتوسع وازاى نسمى المركبات دى زى نظام الـ IUPAC و الاسامى الشائعة وهندرس انواع التفاعلات اللى خدناها سواء تفاعلات اوى طرق تحضير واسامى تفاعلات جديدة وخاصة لكل نوع بالميكانيزمات بتاعها ودول اكبر 4 فروع فى الترم الاول وفى معاهم شوية حاجات كمان هى الـ thiols , Ether , alkyl halide وبرده نفس نظامها بالظبط وكذلك فى الترم التانى Aldehydes & Ketones وCarbohydrates و Carboxylic acids و drevatives of carboxylic acids وAmines و Amino acids والترم التانى طويل لازم تتعب فيه فى المذاكرة وخصوصا فى الحاجات اللى لازمة فيها متابعة شديدة فى المذاكرة عشان بتشبه بعضها زى جزء وCarbohydrates وهندرس تكوين الاحماض الامينية اللى هي بتدخل فى تكوين البروتين اللى الجسم بيحتاجه وممكن كمان فى اجزاء معينة بيبقى طالب اهم الاستخدامات الطبية.
امتحان النظرى : زى ما شوفنا امتحان اعدادى كان عامل ازاى امتحان العضوية على طول محتاج واحد فاهم لو فهمت هتعرف تحل لو حفظت هتتوه زى ما ناس كتير تاهت السنة اللى فاتت وخصوصا دلوقتى اسامى التفاعلات الكتيرة واسماء المواد اللى بتساعد على التفاعل .. فلازم تفهم بعنى تفهم .. الامتحان بيبقى عباره عن اختيارى واكمل المعادلات وتسمية ونبذه مختصرة عن تفاعل معين و اكمل الحاجه الناقصة فى الميكانيزم وكمان بيبقى فى اسئلة مستوى محتاجة اللى فاهم يحلها بس .
العملى بقى هو هواه السنة اللى فاتت بس هيختلف اختلاف بسيط .. احنا السنة اللىى فاتت كنا بنفضل نشتغل فى المركب لحد ما نعرف المركب ده بيحتوى على عناصر معدنية ولا لا بس السنة دى هندرس كمان التفاعلات الخاصة اللى مبطلعش الا لمركب معين فلما اعمل التفاعل ده ويظهر معايا كده يبقى عرفت المادة اللى موجوده اسمها ايه واستركشرها عامل ازاى.
امتحان العملى : لا يختلف عن شغل العملى خالص .. يعنى معك عينة
Unknown تجرب عليها كل الحاجات اللى درستها فى اعدادى وكمان الحاجات اللى فى التفاعلات الخاصة يبقى انت مطلوب منك بعد ما تخلص ده هتكتب الاسكيمة كاملة لان الورقة بتيجى فاضية وتبدأ تملاها وتكتب فى الاخر اسم العينة وعلى كل حاجه بتكتبها بتاخد درجات حتى على الاسكيمة نفسها حتى لو كتبت اسم العينة غلط بس الخطوات صح بتاخد درجات.
الكيمياء التحليليه :
============
مختلفة اختلاف كبير عن تحليلية اعدادى هناك كنت بدرس ازاى اعرف تركيب الماده اللى فى ايدى دى عن طريق انواع المركبات اللى موجوده فيها وانها بتدى ايه لما احط عليها السائل ده لو لون يبقى المادة دى كذا لو اختلفت تبقى مش هيا.
السنة دى هناخد ازاى احدد تركيز مركب معين انا عارف هو بيتكون من ايه عن طريق انى بعمله تفاعل مع ماده معينة وعند نقطة واحده مفيهاش اختلاف بيتغير لونه لو كان ملون او شفاف او بضيف عليه ماده تلونه لو كان سائل شفاف مبيتحولش مع المادة اللى بضيفها وتعتبر المادى دى عملى عن انها نظرى لان الاتنين حاجه واحده يعنى اللى بتدرسه فى العملى هو هواه اللى بتدرسة فى النظرى العملية دى اسمها titration باستخدام سائل انا عارف تركيزه وعارف تكوينه وبحطه على السامبل عن طريق السحاحة لحد ما بوصل للنقطة اللى بختلف عندها اللون وتبقى اسمها نقطة النهاية وابدا شوية حسابات بسيطة اعرف منها تركيز المادة اللى معايا والترم الاول بعمل titration لسامبل Aqueous , non-aqueous والترم التانى نوعين تانين وبيبقى مطلوب منى التطبيقات اللى استخدمنا فيها المادة سواء فصلنا بيها مواد تانية او استخدمناها فى صنع حاجه جديدة.
العملى سهل جدا مش محتاج حاجه محتاج انك تنبته اول يوم كويس عشان الملاحظات فى الشغل وبينزل اسكيمة الكلية عشان نعرف نشتغل بيها لانى مبحفظش طريقة الخطوات بيبقى طالب منى اعرف الـ end point بس وفى الامتحان لو طلعت صح باخد الدرجة لو غلط بدرجة كبيرة بقل الا فى حدود .2 فوق او تحت.
المواد الطبيه :
----------------
من اسمها يبان انها خاصة بكلية طب يعنى هندرس فيها الحاجات اللى الادوية بتأثر عليها فى جسم الانسان وهى منقسمة لـ physiology و anatomy و histology وهندرس الترم الاول الفسيولوجى ومعنى كلمة الفسيولوجى هو دراسة وظائف الاعضاء وبينقسم الى جزء كلية الصيدلة وده فيه الجهاز العصبى المركزى والغدد وجزء طب وده بيبقى فيه الاجهزة الوظيفية للجسم وهى الجهاز الهضمى و الجهاز التنفسى و الجهاز الاخراجى والجهاز الدورى وفائدة كل عضو ووظيفته الحيوية.
والترم التانى هندرس الهستولوجى اللى هو علم دراسة اشكال الخلايا وانواعها بالصبغيات تحت الميكرسكوب وانواع الخلايا اللى بحيط بعظام الانسان وانواع العضلات وجزء الاناتومى اللى هو تشريح جسم الانسان (نظرى فقط) يعنى هنعرف كل عضو فى جسم الانسان بيتكون من ايه العظام وكل عظمة بتتكون من ايه والمفاصل وتركيب العظام الداخلى
الامتحان بتاعة بيبقى عباره عن نظام جديد فى الكلية هو اختيارى من الشورت نوت يعنى بيحتاج الواحد يكون مجمع المنهج وفاهم هو بيتكلم عن ايه بس المنهج سهل ومحتاج تركيز فى المذاكرة ومحتاج تركيز على الاسئلة الهامة اللى بيقفولها الدكتور فى المحاضرة.
فى امتحان عملى بسيط عباره عن اسبوتس وده بيبقى عليه 10 درجات كل سنة ممكن يبقى هستولوجى كله وممكن يبقى اناتومى وهستولوجى بسكشن مراجعة واحد ومفيش امتحان شفوى ليه فى الترمين.
الصيدلانيات :
---------------
اول مادة هتحسسك انك بقيت صيدلى لانه اول مرة هتحضر دوا فى الكلية .. المادة كلها سواء الترم الاول او الترم التانى بتتكلم عن ازاى اصنع الادوية وازاى اعبئها واخزنها وبستخدم ايه فى صناعة الادوية وايه الحاجات اللى بضيفها على قرص الدوا .. تلاقى القرص مثلا مكتوب عليه 250 مج ويقولك فى البامفليت بتاعه انه بيحتوى على المادة الفعالة بحوالى 20 مج مثلا طب بقيت الوزن ده موجود فيه ايه وازاى مبيأثرش على صحة الانسان طب فرضا لو عندى اكتر من حاجه ممكن اضيفها للدوا ده ومتاثرش على الانسان اختارها ازاى بحيث انها تدى اقوى فعالية او اقوى قبول للدوا من ناحية المريض هتلاقى ان المادة بتوفرلك معلومات عن الدوا اول مرة تعرفها هتلاقى الدوا فى الاخر بيتكون من drug اللى هو الماده الفعالة اللى بتأدى السبب اللى انا استخدمتها هيا بالذات عشان اصنع الدوا ده وهتعرف ان المادة الفعالة دى لازم تكون دايبة فى حاجه اسمها vehicle فرضا هيكون الماء أو ماء الينسون او ماء الورد حسب ما يكون له قابلية مع الدوا وهتلاقى كمان ان الدواء ده عشان يدوب فى المذيب محتاج شوية حاجات زى مثلا مكسبات الطعم والرائحة اللى لازم تكون من مصادر طبيعية ومواد تساعد على الذوبان ومواد تانية تساعد على تأين الدواء عشان يدوب بين ايونات الماء.
الترم الاول بقى هناخد شوية تعريفات بسيطة وبعدها شوية حسابات كده ازاى احسب جرعة او ازاى حدد كمية الدواء اللى تدوب فى المذيب .. هناخد تركيب الأقراص tablets و ادوية الشرب solution و الفوار Powder و الكبسولات المحلول المعلقcolloidal اللى بيترج قبل الشرب و المحاليل الغير متشابهة زى اللى فيها ماء وزيت مثلا Suspensions.
الترم التانى شوية حسابات تانية وفى جزء عربى بسيط جدا وبيلم درجات بسهولة بيتكلم عن اشهر العلماء اللى ساهموا فى مجال الصيدلة واشهر اعمالهم وهتاخدوا حاجه اسمها incomptability يعنى المشاكل اللى قابلتنا فى تحضير الادوية وازاى نتغلب عليها وهناخد الادوية اللى بتتبلع oral solution و... وهناخد اللبوس Suppositories والادوية خارج الجيم زى المراهم والكريمات واللبخات والمس.
العملى هتاخدوا فيه ازاى اكون الدوا والاضافات اللى هضيفها وازاى اكتب البامفليت بتاع الدوا وهنحضر شوية تحضيرات بسيطة كده وهى دى نقس امتحان العملى.
مادة لذيذة بتتفهم بسهولة فتتحفظ بسهولة فركزوا فيها لانها من اهم المواد اللى بيطلب فيها تقدير كويس فى شغل شركات الادوية.
علم النفس :
--------------
من المواد اللى هتحبوها فى الكلية وتتمنوا انها تتكرر تانى ودى بتبقى عباره عن كذا موضوع من المواضيع اللى خدها اللى خد علم النفس فى الثانوية العامة زى الانتباه والادراك والنوم والدوافع و... وهى مادة ترم تانى بس ومن 50 درجة ومفيهاش لا شفوى ولا عملى وبتعتبر نص مادة بس ده برده ميخليش الواحد يستهين بيها.
__________________________________________________ _____
ملف ورد
http://www.mediafire.com/?1t2j4mc5w145wcc
================================================== ==
بالتوفيق للجميع
ُEasy Success Team
We Make Success Easier
.gif "Fop (28)")
رد مع اقتباس
المشاركة الأصلية كتبت بواسطة Mohamed7755
