حب للأبد

[صاحبة القلم الحائر]

أبدأ وأقول بعشق ترابها وهواها

ليا قلب واحد عمره ما حب سواها

لفيت وشوفت كتير وبحن لنيلها وسماها

هيمانة أنا فيها وكل أملى رضاها

منايا أشوفها عروسة واحقق كل مناها

اضحى بروحى ولا اسمع فى يوم بكاها

حلفت بكل غالى اكون دايما معاها

فى الفرح صديقة وفى الجرح اكون دواها

ظروفها لو طالت شوية اكيد هنشوف ضحاها

مستعجلين ليه عليها دى شابة فى عز صباها

صابرة على جروحها وعايشة بكل أساها

رافضة تبيع دم شبابها اللى سال ع الارض فداها

واخده بالها من زهورها لجل ما يفوح شذاها

اسم مصر عالى فى كل الدنيا والكل بيلبى نداها

هدية ربنا لينا ان نعيش فى ضل سماها

لا هعيش فى غير ارضها وعمر قلبى ما ينساها

هيجى يوم نشوف بسمتها ونلمس بايدنا هناها

أبعد مهما أبعد أكيد بتمنى لقاها

جمعوا أول حرف من كل بيت

[Dr_Cinderellaaaaa]

ما شاء الله .. جميلة جدااااااااااااااا بجد يا عبير
أنا معجبة بفكرة (أول حرف من كل بيت) ..
بحبها جدااااااااااااااا ..
دمتى مبدعة متألقة يا بيرو ..
كل سنة وانتى طيبة يا قمر ..

[الملاك الضاحك]

ايه الجمال ده كله
بجد حاجه فى منتهى الروعه والجمال كعادتك

جمعوا أول حرف من كل بيت
اللهم احفظ مصر وأهلها

صح ولا ايه ؟؟
فين هديتى بقى عشان حلتها

روعه يابنتى والله وموهوبه
دمتى مبدعه وبالتوفيق
تحياتى

[M.Hegazy]

ما شاء الله يا دوك عبير .. ممتعة و رائعة .. و تصلح للطرب .. لها وقع خفيف على السامع .. و على القاريء لها وقع جميل .. مقطوعة موسيقية جميلة يا دوك في حب أرض الكنانة .. حفظ الله مصر و أبناءها و جعلنا الله و إياكم من بناتها و حماتها ..

تم إضافة القصيدة لفهرس ( أجمل ما قيل في الثورة و حب مصر ) ..

http://www.pharma-board.com/board/sh...ad.php?t=20494

تقبلي مني خالص الشكر و التحية و التقدير ..

Dr.M.Hegazy

[محمد فهمي]

ماشاء الله حضرتك ملتزمة بأول الحروف والقافية وكمان إعطاء معني للأبيات...حاجة جميلة بجد..

"هيجي يوم نشوف بسمتها ونلمس بإيدنا هناها"

إن شاء الله..ولو مشفناش إحنا ...يشوف أبنائنا بإذن الله

[العيون الضاحكة]

طبعا فى حب أرض الكنانة كتبوا كتير
بس بالروعة دى مقرأتش كتير

جميلة يا عبير جدا .....وفكرة أول حرف من كل بيت جديدة وروعة

دمتى مبدعة ..بارعة ...متالقة.

[WHITE HEART]

ما شاء الله عليكى يا عبير بجد كل يوم بتثبتى انك شاعرة موهوبة بالفطرة
دمتى ودام عطاء قلبك يا حبيبتى
تقبلى مرورى يا جميل

[E.Raafat]

حب الوطن نعمة ربنا يدمها علينا جميعا ,,, مبدعة بشعرك الخفيف المتميز

[ahmedofegypt]

قليل أوى لما يشدنى شعر بالعامية .. بس بصراحه كلماتك و احساسها و صدقها شيئ مميز جداً و روح حضرتك اللى فرضت نفسها على الكلمات اعطتها رونقاً و جمالاً ...

و عجبتنى اوى فكرة أول حرف من كل بيت .. بجد تسلم ايدك يا دكتورة ..

ربنا يحفظك و يبارك فى حضرتك ..

تقبلى مرورتى و تحياتى

[صاحبة القلم الحائر]

طبعا بعتذر عن التأخير فى الرد
متشكرة جداااااااااا على الردود الجمييلة دى
ويارب دايما اكون عند حسن ظنكم
جزاكم ربى خيرا