** أشعار العامية المصرية ** .. للرائع / صلاح جاهين .. موضوع يومي متجدد

[M.Hegazy]

الفهرس

1. الشاي باللبن .

2. زي الفلاحين .

3. بحري .

4. بكرة أجمل من النهاردة .

5. شوفي قد إيه .

6. أغنية إلى ذكرى صديق .

7. فاطمة .

8. بكائية ( نزل المسيح ) .

9. أهل الهوى .

10. ميلاد .

11. الليلادي .

12. اللي جرى لجميلة .

13. على الربابة .

14. بكائية .

15. قصاقيص ورق .

16. المرافعة .

17. باليه .

18. تراب دخان .

19. في الربيع .

20. روحانية .

21. مرحب .

22. سيد درويش .

23. بكائية إلى ناظم حكمت .

24. السوناتات .

25. كلام إلى يوسف حلمي .

26. المقابر .

27. بكائية إلى جون كيندي .

28. فنان .

29. التعلب و العنب .

30. العُرْس .

31. الذئب و الحمل .

32. غنوة برمهات .

33. قصيدة .

34. أنغام سبتمبرية .

35. أمر الله .

36. صديق عمري .

37. الدرس انتهى .

38. عناوين جرانين المستقبل .

39. شدوان .

40. الأمير .

41. أرض مصرية .

42. على اسم مصر .

43. على اسم مصر ( الجزء الثاني ) .

44. بوابات الرحيل .

45. المطبعة .

46. إلى اللقاء .

47. الموتى .


المواضيع سيتم نشرها تباعا .. و يمكن للجميع الرجوع للفهرس لسهولة الوصول للموضوع .. و ذلك من خلال الضغط على رابط الموضوع أعلاه ..

اتمنى ان الجميع يستفيد و يستمتع .. بنكهة مصرية عامية رائعة للرائع صلاح جاهين ..

تحياتي للجميع ...

و دمتم بود ..

Dr.M.Hegazy

[M.Hegazy]

.. الشاي باللبن ..

أربع إيدين على الفطار ..

أربع شفايف يشربوا الشاي باللبن ..

و يبوسوا بعض و يحضنوا نور النهار ..

بين صدرها و صدره و بين البسمتين ..

و يحضنوا الحب اللي جمعهم سوا على الفطار ..

و يحضنوا الشمس اللي بتهز الستار ..

و تخش بين الخيوط و بعضها مع الهوا ..

للأوضة ترسم نفسها على أرضها ..

على البساط اللي اشتروه مع الجهاز ..

على الغرام اللي اشتروه من غير تمن ..

و على القزاز ..

و يشربوا الشاي باللبن ..

في فنجالين ..

على الفطار أربع إيدين ..

و دبلتين ..

بيصحوا قلبي كل ليلة في المنام ..

و بيكتبولي بلون منور فزدقي ..

على الهوا الاسود و على الجفن اللي نام ..

كلمة " ســـــــــــــــــلام " ..

اغسطس 1952

[DR.BIBO]

انا بحب كل اعمال صلاح جاهين انا بقرا دلوقتى كتاب فيه ازجاله الصحفيه
بجد عبقرى فى كل افكاره واعماله
متابعة معاكو ان شاء الله

[M.Hegazy]

منورة يا دكتورة بيبو و إن شاء الله الموضوع يعجبك ..

[M.Hegazy]

.. زي الفلاحين ..


القمح مش زي الدهب

القمح زي الفلاحين

عيدان نحيلة جدرها بياكل في الطين

زي اسماعين

و محمدين

و حسين أبو عويضة اللي قاسى و انضرب

علشان طلب

حفنة سنابل ريها كان بالعرق

عرق الجبين

القمح زي حسين .. يعيش ياكل في طين

أم اللي في القصر الكبير

يلبس حرير

و السنبلة

يبعت رجاله يحصدوها من على

عود الفقير

نوفمبر 1951

[M.Hegazy]

.. بحـــــــــري ..

آخر النهار هفهفت نسمة على المية
بعودا ليام على الجدعان و عليا
يا صيادين القاروص صيد القاروص غيّة
رمي الشبك ع السمك يلزم له خفية

طرحت طرحة لقيت في الطرحة جنية
حلت شعورها و عقدتهم على عنيا
و نزلتني القرار صرخ الشبار فيا
إرمي الشبك ع السمك يا واد بحنية

لأدق على الباب و أقول للحلو يا جاري
رمي الشبك صنعتي و الصبر ده كاري
أصبر على الرزق لما تمتلي بحاري
و أصبر على العشق لما تنطفي ناري

يا ميت ندامة على اللي البحر ما اداله
مفتوح عليه الحنك و الكف مادّاله
عدّى الشطوط و الخطوط اللنش عدى له
غفر السواحل يا صاحبي مستعداله

أنا مذهبي الصبر و اصبر حتى على تاري
و اطعم شباكي و صناري بصباري
أنا اعوم على الصبر لما أوصل لأوطاري
و الصبر دا مركبي و القلع و الصاري

أكتوبر 1954

[صاحبة القلم الحائر]

بجد توبيك رائع جدااااااا جداااااااااا
أنا بحب أشعار صلاح جاهين اوى
بحس انه بيتكلم عن كل حاجة جوانا
ولازم كل يوم أصبح على المنتدى بحاجة
من أشعاره جزاك ربى خيرا

[M.Hegazy]

و جزاكم الله خيرا مثله يا دوك عبير .. منورة التوبيك و المنتدى و الأدبي بحاله ..