مناقشة فيما يخص الاستفتاء

[بحلم ببكره]

بسم الله الرحمن الرحيم

انتهي يوم الاستفتاء علي خير والحمد لله

كان يوم أثبت للجميع عظمة الشعب المصري

كان يوم عيد فعلا

تعالوا هنا نتناقش فيما يخص الاستفتاء من حيث كافة الجوانب

النتيجة .. توابعها .. دلالاتها علي مستقبل البلد

أيا كانت النتيجة

كفاية إننا كلنا مرحبين بيها أيا كانت سواء بالموافقة أو الرفض


وتعالوا نبدأ بكل واحد يقول لنا أكتر حاجة اتعلمها النهارده



ومستني نقاشات مثمرة

ورونا الهمة


وكل استفتاء وانتم طيبين
-----
المؤشرات الأولية لنتائج محافظة الدقهلية

90% ,,,,,نعم

[Aésmaïl]

وتعالوا نبدأ بكل واحد يقول لنا أكتر حاجة اتعلمها النهارده

بعيدا عن الإيجابيه لانى عمرى مكونت سلبى ..
دنا طلعت فى انتخابات عـز الأخيره .. 95 % D: .. يبقى مش هطلع فى دى ..

بس بجد حاجه جميله النهارده .. انى اشوف ناس غير مسيسه طالعه النهارده
وبتحاول تفهم وبتسأل يعنى ايه الماده دى .. وبتعمل ايه ؟ وايه أثرها وتوابعها ..
ارجو ان الشعب المصرى كلو يبقى فاهم سياسه كويس ,,
ويبقى على علم بمجريات الأمور ..
ويفضل متابع على طول مش مجرد سحابه صيف او زوبعه فنجان وكل شيىء ينتهى ..

لسه ليه امنيه واحده بس .. يارب تتحقق بكره ..
انى اشوف الكل متقبل النتيجه .. وياريت اشوف الميادين فاضيه ..
مفيش حد بيتظاهر عشان الغلبه لـ " نعم " او " لأ " ..


ويارب البلد تتحسن ..
وتحط رجليها على اول سلمه فى مشوار التقدم نحو الأفضل ...

[Dr.A7med]

أنا قلت لا .. النتيجة لو طلعت نعم هعتبر نفسي قلت نعم وهنسي كل اعتراضاتي عليها وهبني علي كل الإيجابيات اللي كنت شايفها فيها ... وأنا بجد حزين من الدعوات للتظاهرات المليونية وغيره لأن كدة هنلوث التوب الأبيض اللي عملناه امبارح

[بحلم ببكره]

جميل يا دكتور أحمد

وكلام عاقل جدا

وبالنسبة للمظاهرات فلو حصلت من أي من الفريقين فهيخسر كتير قوي قوي دا غير إن أساسا مش من حقه لأنها مش باب الحرية بقي .. دا هيبقي اعتراض علي نتيجة استفتاء مفيش ولا واحد يقدر يشكك في نتيجته

[Dr.A7med]

المظاهرات دي لو اتعملت باسم أي تيار سياسي يبقي بينسف نفسه بنفسه

[lost*soul]

انا قلت لا ومقتنعه جدا بيها والى استفدته النهاردة وشفته ولمسته ان الاخوان كانو يستاهلو الى بيحصلهم واقفين ستات ورجاله كل الى يقابلوه يقولولو قول نعم لانك لوقلت لا الماده 2 من الدستور هتتغير منهم لله هيضيعو دم الشهداءوهيهدمو مصر طلعو كربونه من احزب الوطنى مكن االوطنى افضل واظلمه لو شبهته بالاخوان

[الشفق الباكى]

لا اله الا الله

الحمد لله انا اول مرة اصوت كان امبارح
وقلت نعم
وموافقه على اى نتيجه هتظهر سواء بالرفض او الموافقه
اما حكايه الناس اللى واقفه تقول اكتبوا ايه او ماتكتبوش ايه
فاكيد كل انسان عنده رأيه الخاص بيه ومش هيغيرة لمجرد ان حد قاله اعمل كده

الا اذا هو اقتنع بالرأى الااخر

[لؤلؤه النيل]

الحمد لله امبارح كان يوم جميل جدا
اول مره اشوف مشاركه بالشكل ده
مصر كلها كانت بتشارك
حتى والدى ووالدتى اول مره يشاركوا كان امبارح
واحلى حاجه ان الشعب المصرى كل اللى كان يهمه هو مصلحة مصر
ومحدش بيجبر حد ولا حد بيزعل حد لان رايه مخالف ليه

واحلى مافى الموضوع برده القوات المسلحه ووجوهم البشوشه
وترحيبهم بينا
بجد امبارح كان عيد لمصر
وايا كانت نتيجة الاسفتاء فده هيكون راى الاغلبيه
ولا صوت يعلو فوق صوت الاغلبيه
وبجد لو حد عمل مظارات يبقى بيموت نفسه
لانه هيخسر الشعب كله
وهيكون عدو الديمقراطيه
-----

انا قلت لا ومقتنعه جدا بيها والى استفدته النهاردة وشفته ولمسته ان الاخوان كانو يستاهلو الى بيحصلهم واقفين ستات ورجاله كل الى يقابلوه يقولولو قول نعم لانك لوقلت لا الماده 2 من الدستور هتتغير منهم لله هيضيعو دم الشهداءوهيهدمو مصر طلعو كربونه من احزب الوطنى مكن االوطنى افضل واظلمه لو شبهته بالاخوان

لا حول ولا قوة الا بالله
على فكره يادكتوره انا كل اللى كنت بشوفهم من معارفى كنت بقولهم قولو لا
وافضل اتناقش معاهم فيها وغالبا كنت بقدر اقنعهم
كده ابقى كربونه من الوطنى ؟؟؟ وبفرض على الناس رايى واستاهل اللى يجرالى
وصاحبتى دخلت الاستفتاء وانا كنت مستياها برا كل اللى حواليها يقولولها قولى لا
وهيا برده قالت نعم كده يبقو بيفرضوا عليها رايهم
يادكتوره احنا كنا بنتناقش
وعلى فكره ناس كتير فعلا كانت رايحه مش عارفه هتقول ايه
لكن رايحه عشان تشارك وخلاص
فيها ايه لما نتكلم مع الناس دى ونبين لهم وجهة نظرنا ونبين لهم مخاوفنا
والايام جايه يادكتوره وهنشوف الاخوان بجد
وساعتا نبقى نحكم عليهم بس هيكون حكم موضوعى

[meramar]

كان يوم جميل جدا
انا شوفت لجان كتيير
العدد كبير جدا ...الناس واقفه ف الطابور بال3ساعات علشان بس تقول رأيها
ناس كبيره ف السن جدا ومن كل الطبقات ورفضوا انهم يطلعوا قدامهم وفضلوا مستنيين دورهم
ست كبيره بقولها تعالى اطلعك تقفى ف الاول ..لقيتها بتقول لا احنا بعد 25 يناير!
بجد مكنتش مصدقه ان دول مصريين
اول مره احس انى فخوره انى مصريه
صحيح فيه ناس مكنتش فاهمه هى اختارت على اساس ايه ..بس كفايه حرصهم على انهم يوصلوا صوتهم
موضوع الاخوان والكلام ده ...فيه تهوييل فظيع وتشويه متعمد
محسسنى ان الاخوان كانوا واقفين بسيوف وسكاكين بيقولوا للناس قولوا نعم
انا كنت بسمع وبقرأ على النت عن تجاوزات ف لجنة كذا وان الاخوان بيعملوا ايه ويجبروا الناس والكلام ده
ف ثانيه بكون ف اللجنه دى مش بشوف اى حاجه من الكلام ده!
اكيد فيه تجاوزات ..بس المبالغات اكتر

[dr_smile]

مش عارفة اقول ايه
انا اكيد زعلانة لأنى كنت مقتنعة برأيى (و مازلت) وشايفة ان هو اللى فيه مصلحة البلد
لكن على أى حال خلاص اللى الاغلبية اختارته هو اللى لازم يمشى
يللا مبروك لكل اللى قال نعم