مطالب الفرقه الثالثه

[da_mysterous]

بسم الله الرحمن الرحيم
انا تقريبا لغايه دلوقتى قدرت اعرف ان فى ناس كتير من اسلوب الكلام مش هتقدر تيجى الاجتماع( بتاع يوم الخميس اللى الكليه ان شاء الله هتعمله عشان تجتمع مع الطلبه لمناقشه طلبات الطلبه )بحكم مكانها البعيد عن المنصوره وكان اقتراح اننا نقدم ورقه ونقول هيا ديه طلباتنا ....
الطلبات تقريبا بناء على رغبات الطلبه اللى شاركوا ف الراي ...اعذرونى انا بتكلم عن الناس اللى شاركت بس عشان هما اللى شاركوا مع ان الغريب ان فى نسبه كبيره من المشاهده ف الموضوع طيب الناس كسلت تقول ولا ايه ......
المطالب هي:-

1-معامله الطلاب بشكل لائق يتماشى معهم فى كونهم دكاتره للمستقبل
2- تغيير سياسه الكليه من حيث ....
أ-الاستماع للطلبه
ب-الشكل والسعر والمضمون للكتاب الجامعى
ج- تقبل سياسه النقد بصوره طبيعيه مع الاعتبار ان الطلبه سيلتزمزن بالادب

3-الحفاظ على راحه الطلبه من حيث:-
أ-وجود جدول صحيح وييتماشى مع الطلاب ومع القدرات الذهنيه والاستيعابيه للطلبه
(يعنى مايبقاش فى يوم عندي فيه الجدول من 8 الصبح لغايه سته بالليل ويوم تانى عندي فيه محاضرتين )
ب- توفير كرسي لكل طالب ف كل معمل ...راحه فعليه بين كل محاضره مش كلام وخلاص موجود ف الجدول منين كاتب المحاضره من 9-10 واللى بعدها 10-11 طب العشر دقايق دوول فين ....؟!..؟!
ج- تحديث المناهج الدراسيه واساليب التدريس وطريقه وضع الكتاب اللى بيبقى محشى معلومات وخلاص (يعنى مثلا انا احفظ ليه اوريجين ف الفيتو ...انهاء مبدا البصم بقى
مش التعديل ف اسلوب الامتحان ويبقى الطلبه والكثير من الدكاتره متعرفش النظام يبقى ازاى
د- النظر فى اخطاء الترم الاول من ناحيتين ....طريقه وضع الامتحانات ....طريقه وضع السؤال ...طريقه توزيع الدرجات (ماينفعش ابقى ماشى على نظام الامريكان اللى....اربعه غلط تشيل صح وانا اعمل سؤال واحده صح تشيل واحده غلط )
ه- عقد دورات تدريبيه وورش عمل بين الطلبه والدكاتره (مش عيب ابدا لما اتكلم مع الدكتور ويفهمنى ويناقشنى ويا تقنعنى... ويا... اقنعك)
ويبقى فى فعلا تدريب صيفى مرتبط بالكليه مش عيب يعنى مش اجيب ورقه مختومه من الصيدليه ان انا اتدربت طبعا الموضوع ده انا اللى هستفاد بيه وانا اللى هثقف نفسي وانا اللى هستفاد عشان لو متدربتش للاسف هيبقى ولا كانى درست حاجه ....!!!
4-وجود ممثل من كل مجموعه وليس من كل فرقه (اتنين من كل فرقه) على اتصال بالكليه.... ووجود دكتور مسؤل عن كل فرقه للتواصل معها والسماع لمطالبها

5- تفعيل الدور الاجتماعى ف الكليه

6- تغيير سياسه الكثير من الاقسام ف التعامل مع الطلبه (خاصه قسم الصيدلانيات )

7-تحديد مواعيد زمنيه مسبقه لكلا من الامتحانات سواء كانت (شيتات -عملى نظرى)
على ان ....
أ-يراعى الفارق الزمنى المناسب بين كل ماده وفتره كافيه بين امتحانات الشفوى والنظرى وميحصلش زي اللى حصل الترم الاول (80 امتحان شيت ف فتره صغيره وقبل النظرى )

ب-وان يراعى ف الامتحانات والمناهج الترابط الواضح(يعنى ماينفعش يبقى النظرى ف وادي والعملى ف وادي تانى )
ج- ان تكون الامتحانات الشفويه عادله من حيث توزيع الدرجات ومن حيث الدكاتره (الشفوى طبعا اساس الكوسه عندنا ف الكليه )

1- البت فى نظر ماده الصيدلانيات من حيث:-
التحقيق مع الدكتور حمدي بشان القرارات التعسفيه التى قام بعملها ضد طلبه الفرقه الثالثه والدليل
(اول سكشن امتحن عملى الماده ف الترم الاول )
(درجات الطلبه ف الماده......بيتهيالى الكليه لازم تفسر الدرجات ديه ..... )
(عدم مراعاه الظروف الخاصه لبعض الطلبه فى عدم تمكنهم ف حضور ميعادهم وعده السماح لهم بالحضور ف اي سكشن ثانى ...مع العلم ان التاخير لمده دقيقه يتم طرده وحرمانه من دخول السكشن ...!)

مع العلم انه مع الاحترام الكامل لسيادته اجمعت الاغلبيه من الطلب على عدم رغبتهم الفعليه فى تدريس سيادته لنا ف الترم الثانى او فى الفرقه الرابعه لو كان فى عمر ان شاء الله

2- البت فى امر ماده البيو اساي من حيث...
أ- درجات الامتحان
ب- عدم التزام واضع الامتحان بالسيستم المقرر به نظام الجوده
ج-طريقه وضع الاسئله(مش عيب لما الدكاتره تاخد دورات تدريبيه ف كيفيه وضع الامتحان اذا كان لا يوجد لديهم الخبره )

3- بشأن امتحان الفارما يراعى النظر فى امتحان الدكتوره واضعت جزء ال :ENDOCRINE
وذلك نظرا لما قامت به الدكتوره من وضع اسئله غير مفهومه ف الامتحان وعند سؤالها ف لجنه الامتحان ترد وتقول الامتحان مفسر نفسه ....!

(مع العلم انا اللى مقدم الاقتراح لسه الى الان لم احصل على النتيجه بس الاستماع الى الاراء هو الذى توصل بي الى ذلك

4- الغاء ومعاقبه كل من يتم الوصول الى حق غير حقه او مكان غير مكانه بطريقه غير شرعيه (م الاخر الكوسه اللى بتحصل ف الامتحانات الشفوى )

5- التاكيد على وجود جدول زمنى واضح ومعلن من اول يوم ف الدراسه بشان كلا من :-
1- الجداول الدراسيه (مع مراعاه كل مابها من عيوب لم يتم تعديلها للاسف...!) وتشمل الجدول الدراسي وجداول المعامل.... وجداول الامتحانات التحريريه مع مراعاه الفارق الزمنى الملائم بين كل ماده ونظيرتها ..وبين الامتحانات العملى والامتحانات النظرى .....
بالنسبه لجداول الامتحانات التحريريه يتم وضع الوقت الزمنى المحدد للامتحانات
مثلا (الامتحانات هتبقى من يوم 1-7 لغايه 25-7 على ان يتم وضع جدول مبدئى للامتحانات ويقوم الطلاب بالاستفتاء على الجدول المقترح وفى عدم موافقه الطلاب على الجداول يتم ارفاقها لممثلى الدفعه ويتم التنسيق التام بين ممثلى الدفعه ويجتمعوا ويضعوا الشكل النهائى للجدول بناء على راي الاغلبيه )
بصراحه اللى حصل الترم الاول ف الامتحانات كان لا يرضى احد فجاه اكتشفت اداره الكليه انه فى يوم اجازه ف نص الامتحانات ...!
6- بما ان السكاشن ستصبح كل اسبوع اذن لاحاجه من مزاحمه الطلبه على محاضره شرح عملى ويتم شرح عملى الماده ف الوقت المحدد للعملى
7-(( ولو ان الطلب ده مربوط بسياسه اعلى من سياسات الكليه)) وضع نظام امتحان صيفى تكميلى للطلبه المحملين بالمواد

ديه مطالب الفرقه الثالثه اتمنى اكون قدرت الخصها لو حد عنده مطلب زياده يقوله....
ديه كده ورقه مبدئيه للشكل اللى ان شاء الله ناوى اقدمه......
نرجو الاستفتاء وابداء الراي ......

[bedos]

الغا الواسطه التذبذب في الجدول وتغيره الف مرا الايام قبل كل امتحان الوقت مش كافي الدرجات اللي علي الكتب واجبار الطببه علي الشرا فيه حاجات كتيرة مطلوبه وحاجات اكتر متكتبتش

[روميساء]

اذا سمحت يا دكتور زود كمان اعاده النظر فى تصحيح ماده الصيدلانيات للفرقه التالته لان الظلم فيها كبيييييييير جدا وده حرام

[عاشقة الجنان]

انا رايحة الكلية حالا ان شاء الله ادعولنا ربنا ييسر النتيجة

[zidane]

شكرا يادكتور علي الموضوع ده ولو سمحت ممكن ازود موضوع اسعار الكتب الخياليه اللي بنسمعها كل سنه حراام ياجماعه اللي بيحصل فينا ده بجد ده يرضي مين بس قولوي .اكيد فاكرين كتاب علم النفس اللي كان ب40 جنيه اللي مغلفينه (بورق اللحمه)تعرفو طلع بكام الكتاب ده من المطبعه بتاعته ب8جنيه ارجو الوضع يكون احسن بعد كده .وتبقي فين بقي مجانيه التعليم اللي بيقولو عليها دي.

[dr.hamed]

احنا محتاجين نطور عضو هيئة التدريس الاول

مش معنى انه كان مجتهد وجاب امتياز انه قادر على التدريس او يبقى معيد
ابسط حاجة لازم يتعمله كورس تربوى في اسس التدريس وعلم النفس وطريقة التعامل مع الطالب واسس ايصال المعلومة
لكن مع احترامى للجميع بردو
عضو هيئة التدريس هو ناتج المنظومة التعليمية الفاشلة
يعنى من صغره بياخد دروس وكورسات ودخل الجامعة صم الكلمتين وجاب امتياز وداانعكس على اسلوبه فى التدريس ودا اللى بنشوفة... الكل بيركز على الحفظ من غير فهم
المعيدة بتدخل في شرح العملى او الدكتور في المحاضرة يقرا اللى معروض على البروجيكتور قراءة وهو دا التدريس
طب ماروح البيت اقرا براحتى ما انا بعرف اقرا
وكمان بلاش نتضحك على نفسنا ونقول الكورسات مش عارف ايه ونحاربها

انا عن نفسي مخدتش اى كورس من اعدادى
بس اعتقد عيب لما يبقى خطاب الكلية كله بيحارب الدروس وعايز ينهض بمستوى التعليم
وجميع ابناء الدكاترة بياخدو كورسات ويمكن في جميع المواد ., ميصحش ...كدا مفيش مصداقية واى حد هيفم على طول ان الجودةوالكلام دا كله .....اونطة

فى الاول والاخر دى وجهة نظر

[lavandula]

انا رايحة الكلية حالا ان شاء الله ادعولنا ربنا ييسر النتيجة

طمنينا بقى لما ترجعى ان شاء الله

[dareen]

ياريت فعلا حد يبص للمطالب دى ويحققهالنا وبعدين جدول الامتحان ده من ضمن المشاكل ازاى يعنى الطبية اللى بيدرسها 5 دكاترة قبلها يومين والاساى قبله 5 ايام!!!!!!!!!!!!!!!!!!!!! كل حاجة مش الجدول بس لازم تتغير

[dr.sara22]

وممكن برده تحديد مدة زمنية ما بين كل مادة والتانية فى جدول الامتحان يعنى مثلا لا تقل عن 3 أيام

_ دا صيدلة اسكندرية اللى التقديرات عندهم سهلة وكل حاجة بسيطة لما العميد خلى المدة بين كل امتحان وامتحان 3 ايام رفضوا لغاية ما العميد خلاها 4 ايام_

ومتكنش الحجة فى عدم تنفيذ أى طلب ::الجودة:: أعتقد الجودة لازم تكون فعلية وزى ما بنسمع ان المستفيد الاول منها الطالب عايزين نحس بدى


وتحديد ميعاد واااااضح لظهور النتيجة والالتزام بيه


وتواصل اعضاء هيئة التدريس مع الطلبة فى المنتدى


ونقطة بالنسبة لقسم الصيدلانيات : الطالب اللى بيتأخر دقيقة أو أقل عن ميعاد السكشن مش بيدخل السكشن وبدون النظر لأى ظروف والغريب بقى انه بيمنع من دخول أى ميعاد تانى .. دا حتى لو قال هحضر عشان استفاد واتاخد غياب برده بيترفض هذا العرض ... الموقف دا محصلش معايا بس حصل فى سكشنى أكتر من مرة ..... فدا حراااااااام


ولو افتكرت حاجة تانية هبقى أقولها

[Dr.A7med]

أحب أضيف حاجة .. كتب قسم الميكرو مستفزة بكل ما تحمل الكلمة من معني .. بحس بالإهانة كطالب لما بشوفها سواء في تانية أو في رابعة .. وخصوصا كمان انها من أغلي الكتب في الكلية
لما يجيبوا شوية مراجع وحتي ما يكلفوش نفسهم يكتبوا ويحطولنا تصوير في الكتب وده حصل معانا والآخر أدفع التمن ده كله دي حاجة مالهاش عندي غير معني واحد " ابتزاز الطالب" بمعني انك هتدفع تمن العشر درجات دول يا مش هتاخدهم