تعتيم إعلامي من جديد

[بحلم ببكره]

الدستور
قام الفريق أحمد شفيق رئيس وزراء حكومة تسيير الأعمال باالاتصال شخصيا بإدارة قناة دريم مساء أمس الجمعة لقطع بث إعادة حلقة برنامج "واحد من الناس" التي ظهر فيها الكاتب الصحفي إبراهيم عيسى مع الإعلامي عمرو الليثي مساء الجمعة، وذلك بعد 45 دقيقة من إعادة بثها، بعدما تم بث الحلقة على الهواء مباشرة مساء الخميس.
وفوجئ المشاهدون بقطع حاد لحديث إبراهيم عيسى في الحلقة، ثم أذاعت القناة بعدها مجموعة من الأغاني عن ثورة 25 يناير قبل أن تبث حلقة قديمة من برنامج العاشرة مساء، دون أي توضيح أو اعتذار عما حدث وعن قطع حلقة برنامج "واحد من الناس" في منتصفها فجأة.
وأكدت مصارد أن الفريق أحمد شفيق قد طلب من إدارة دريم قطع بث إعادة الحلقة بدعوى أنه "لا يجوز نقد رئيس وزراء مصر" وأن عيسى هاجمه بشدة، بعدما طالب باستبعاده لأنه جزء من نظام مبارك، قائلا إنه كان رئيسا للوزراء عندما وقعت مذبحة يوم الأربعاء في ميدان التحرير يوم 2 فبراير واعتبر عيسى أداء شفيق حينها بأنه آية من آيات الفشل الحكومي.
-----

[Dr/HULK]

ابراهيم عيسى مش عشان كان بيشتم فى الرئيس يكون مهم للدرجة دى

الدستور جريدة مشكوك فى مصداقيتها عند ناس كتير

وعلى فكرة قناة دريم نفسها صاحبها هو واحد من الحرس القديم للحزب الوطنى يعنى مش لازم يكون رئيس الوزراء هو المسئول عن ده

[juman]

الدستور جريدة مشكوك فى مصداقيتها عند ناس كتير

مش ممكن ده كان ليها شعبيه جامده جدا وعند كل الطبقات وخصوصا قبل ما ابراهيم عيسى يسيبها وراجع مبيعاتها. وعلى فكره ابراهيم عيسى من الشخصيات اللى بحترمها جدا واحلى حاجه فيه ان اللى فى قلبه على لسانه .(بس ما تسمعلوش لما يكلم فى الدين)

[بحلم ببكره]

الدستور جريدة مشكوك فى مصداقيتها عند ناس كتير

نفسي أعرف حاجة يا دكتور

إيه في البلد بيعجبك؟؟

[m_pharmacist89]

وارد جدا يكون اللى عمل الموضوع ده قاصد يزود الفتنة بين الشعب وحكومة تسيير الاعمال بحيث انه يخلى المظاهرات تستمر وتستمر حالة الانفلات الامنى الموجود فى البلد

ووارد جدا يكون احمد شفيق هو اللى ورا الكلام ده برضه مهو مش ملاك وغير كده الراجل كان فى القوات الجوية وصديق للريس السابق فممكن يكون هو اللى عمل كده بس لو فكرنا وياريت حد يجاوبنى على سؤالى ليه يعمل كده وليه يقطع بث حلقة اساسا متعادة؟؟؟؟

وغير كده وكده البلد بقت مليانة اشاعات وارد جدا تكون الحقيقة موجودة وسط الاشاعات بس احنا مش قادرين او انا على مستوى شخصى الضعيف مش قادر اعرف ايه الحقيقة بالظبط وربنا يستر فى الايام اللى جاية لان الواحد اصبح غير متفائل بالمرة

[Dr/HULK]

نفسي أعرف حاجة يا دكتور

إيه في البلد بيعجبك؟؟

ههههههههههههههههههه

لسه مفيش كتير اوى يعنى

المشكلة فى الثورة انها مسكت فى الفرعيات وسابت الاساسيات
الدولة دى ملهاش نهضة غير بالتعليم
والا هنحتاج تغيير 80 مليون مصرى عشان نتغير بجد

بس بصراحة ابراهيم عيسى مبيعجبنيش رأيه واللى كنت مستغرب منه انه لما بيغلط فى النظام بالطريقة دى هما سايبينه ليه مع ان شخصية زى حمدى قنديل او الداعية عمرو خالد او حتى الشيخ يوسف القرضاوى
مكنش مسموح ليهم الدخول لمصر

ابراهيم عيسى وبعض المعارضين كانوا من الناس اللى بتقوى النظام مش بتضعفه

[بحلم ببكره]

ليه يعمل كده وليه يقطع بث حلقة اساسا متعادة؟؟؟؟

نفس السؤال سألته لنفسي

[Dr.A7med]

الدستور جريدة مشكوك فى مصداقيتها عند ناس كتير

حاسب من خلال القانون .. والمفروض ما يبقاش في أي قنوات تانية
افرض ان الدستور دي بتنشر أخبار كذابة .. افرض ان ابراهيم عيسي ده عميل .. في قانون .. زمن التعليمات ده انتهي
.. واللي حصل ده قمة المهزلة

[juman]

ابراهيم عيسى كانوا سايبينه ! امال المؤامره اللى حصلت للدستور دى ايه؟ والقضيه اللى كانت لابساه عن مرض الريس دى ايه؟ بس هو عنيد وعامل نفسه مبيفهمش!

[Dr/HULK]

حاسب من خلال القانون .. والمفروض ما يبقاش في أي قنوات تانية
افرض ان الدستور دي بتنشر أخبار كذابة .. افرض ان ابراهيم عيسي ده عميل .. في قانون .. زمن التعليمات ده انتهي
.. واللي حصل ده قمة المهزلة

ماشى معاك فعلا ان اللى حصل ده مهزلة بس فى نفس الوقت اتاكد منين ان دى تعليمات

مفيش اى قناة فى العالم بتتعامل بحيادية الا فى اتجاهات معينة

والبلد دلوقتى بصراحة بقت مضروبة فى كل حاجة
يعنى محدش يتكلم عن الاعلام المصرى او يضعه فى الاعتبار فى الفترة دى

فى العالم فى 3 حاجات اذا تمكنت منها تمكنت من العالم

التعليم والاعلام والاقتصاد
واحنا معندناش ولا واحدة منهم

-----

ابراهيم عيسى كانوا سايبينه ! امال المؤامره اللى حصلت للدستور دى ايه؟ والقضيه اللى كانت لابساه عن مرض الريس دى ايه؟ بس هو عنيد وعامل نفسه مبيفهمش!

انا بتكلم انه كان من اساليب تقوية النظام

بطريقة انه كان بيديهم مبررات لاظهار انهم اللى مظلومين
يعنى ازاى يتكلم ان الرئيس بيموت وبعد كده نلاقيه فى التليفزيون زى الضبع؟؟؟

ونلاقى بقى الاغانى الوطنية عن الرئيس و....و,... واشتغالات التليفزيون المصرى وتبدأ الناس تتعاطف مع الرئيس

وعلى فكرة مش معنى انى مش برتاح للشخصية دى انه وحش
دى حرية شخصية
بس هو بالنسبة ليا مش مصدر ثقة انى اخد منه خبر لا اكتر ولا اقل