صح ...ماسونى
بسم الله الرحمن الرحيم
بقلم : محمد جمال الفقي
===============
...
الناس اللي صدقت ان ملايين المتظاهرين بيجيلهم وجبات كنتاكي و 200 يورو يوميا (يورو.. ها ..مش مصري عشان طبعا يقولك ان الخوا..جات بيمولونا ) و أكتشفوا إنهم مضحوك عليهم
سبحان الله هما نفس الناس اللي صدقت إن الإخوان هما اللي بيحركوا الثورة و هما اللي عايزين الحكم ..و ظهر مسيحين و شباب علماني و مسلمين و مسلمين إخوان و ملحدين و سلفيين كله في المظاهرات و إكتشفوا إنهم مضحوك عليهم
سبحان الله ..هما نفس الناس اللي صدقوا ان فيه كتائب من حماس و مسلحة كمان في قلب ميدان التحرير و قالك أوعى تنزل التحرير عشان هايكون فيه ضرب نار و قنابل و تفجيرات و إحتمال المسيخ الدجال يطلع من مجمع التحرير..و برضو إكتشفوا إنهم مضحوك عليهم
سبحان الله ..هما نفس الناس اللي صدقت إن قادة الثورة أجانب و جابلك فيديو و صورتين لأجانب متعاطفين مع المتظاهرين و موجودين معاهم في التحرير ..و طبيعي يكونوا سياح أو صحفيين ..و واحد عبقري طلع يقولك انهم بيوزعوا منشورات بالإنجليزي ..على أساس أن الشعب المصري كله خريج الجامعة الأمريكية و بربنط انجليزي و نسيوا ان احنا بنتكلم العربي مكسر أصلا ..ياراجل اتقي الله في ودانك ...و في الآخر اكتشفوا ان كل ده كذب و انهم إضحك عليهم ..
سبحان الله ..هما نفس الناس اللي قالك ان عناصر من حزب الله مدربين جيدا في إيران لإحداث بلبلة في مصر ..أصلا بلبلة دي كلمة أبيحة ..مايصحش يا جدعان ..بلبلة و ايران ايه بس ..و لما إكتشفوا ان المتظاهرين مصريين ولاد ستيين مصريين عرفوا إنهم إضحك عليهم
سبحان الله هما نفس الناس اللي صدقت إن فيه بوراج أمريكية دخلت قناة السويس للسيطرة عليها ..على أساس إن قناة السويس دي ترعة مثلا و احنا شوية فراخ ...أمريكا تسيطر على القناة على أساس ايه ..و مين اللي قال أن القناة خرجت عن السيطرة ؟؟ هو إحنا في حرب أهلية ؟؟ ولا إيه مش فاهم ؟؟ و على أساس إن أمريكا داخله صالون بيتهم ..الجيش المصري هايقولهم اتفضلوا القناة قناتكم ..و دخلوا كده من غير طلقة تتضرب حتى
أمريكا يا مؤمنين كانت مرعوبة على عرش الحليف الأول ليها في الشرق الأوسط ..و حاولت تهدي الأمور..مش معقول هاتولعها هي و تعلن حرب على أقوى دولة عسكريا في الشرق الأوسط ..مش لعبة هي ...و المهم ان الناس دي برضوا إكتشفوا إنهم اضحك عليهم
ثورة ايه دي يا جدعان اللي توحد أمريكا مع الإخوان مع الملحدين مع الجواسيس مع حزب الله مع حماس ؟؟ ايه المعجزااااات دي ؟؟
المهم ..هما نفس الناس اللي قالت إن البرادعي جاسوس و عميل و انه هو اللي ساعد على ضرب العراق ..و نسيوا ان البرادعي قالها قدام قادة العالم أجمع في الأمم المتحدة أن العراق خالية من أسلحة الدمار الشامل ..و فيه مقاطع فيديو كتير على اليوتيوب بتأكد الموضوع ده ده لو محدش بيقرأ كتب أو مقالات أو مكنش متابع أخبار وقتها أو مواليد 95
و نسيوا أن اللي فتح قناة السويس لضرب العراق هو حسني مبارك ..و اللي أعطى معلومات دقيقة عن العراق كان حسني مبارك طبقا لوثائق ويكلكس ..و اللي قفل المعبر على الغزاويين في فلسطين عشان يموتوا و حماس تنتهي كان حسني مبارك ..و الأمر بالحرب على غزة طلع من القاهرة بحضور أحمد أبو الغيط ...نسيوا كل ده و قفشوا في البرادعي ...
(للعلم بس أنا مابحبش البرادعي لأني عندي شعور أنه لا يصلح لحكم مصر ولو لفترة انتقالية حتى )
بس الحق يقال هو أول من نادى للثورة على النظام و إحداث تغيير و هذا يشهد له ..و ماحدش ينسى انه مصري و ليه حق في البلد دي زيه زي أي حد ..بس أنا مابحبوش بشنبو ده ...المهم نرجع للناس اللي بيضحك عليهم ..بعد كل الكلام ده اكتشفوا انهم مضحوك عليهم ..بس في ناس قافشه لسه في البرادعي مش عارف ليه ..بس كلها كام يوم و يكتشفوا انهم اضحك عليهم
سبحان الله و لا إله إلا الله ..هما نفس الناس اللي صدقت إن وائل غنيم عميل و(( ماسوني)) و مدسوس و متجوز أمريكية (طبعا اللي متجوز أمريكية في نظر البعض يبقى عميل ..مع ان نص الناس دي نفسها تتجوز أمريكية ) و عنده تقوس و غازات ...و كل ده بسبب تيشرت من (جيوردانو و حظاظه ) الراجل عايش في الإمارات و دي فعلا موضه و أنا أشهد عليها لأني موجود في الإمارات..
و بالنسبة للنظرية المستحدثة بتاعة الناس دي.. أنك ممكن تعرف ميول شخص السياسية و الدينية من لبسه ..يبقى ولا مؤاخذه أي حد بيلبس من (أرماني) يبقى ولا مؤاخذة (بيتبسط) عشان أرماني (بيتبسط) و أي واحد يلبس تيشرت عليه علم أمريكا ..يبقى جاسوس .. و أي واحد يلبس فانلة رونالدو يبقى لاعيب كورة أو قريب رونالدو ..و أي بطيخ في أي حاجة
نسيبنا من التيشرت و الفنلة الحمالات و ناخدها بالعقل كده ..ينفع واحد ماسوني شباب الفيسبوك يكتشفوا انه ماسوني و قادة القوات المسلحة اللي قعدوا معاه مايعرفوش ؟؟ ينفع واحد ماسوني شباب الفيسبوك يفضحوه و المخابرات العامة اللي هي أقوى جهاز حاليا في المنطقة ..تسيبو يعدي من تحت اديها ؟؟ هيصه هي ؟؟
و بعدين مع احترامي للجميع ..اللي يقول على وائل ماسوني ..أنا متأكد أنه ما كلفش نفسه أصلا يعمل بحث على أهداف الماسونية على الجوجل ..لأنه لو عنده ربع فكرة عن الماسونية هايعرف ان اللي وائل بيعمله و معاه شباب كتير يمكن أحسن منه و أنشط منه ...ضد كل مبادئ الماسونية ..
لأن الماسونية من أهم أهدافها الحفاظ على الدولة اليهودية و إفناء كل الديانات الباقية و الدول المعادية ..و هل حسني مبارك معادي لهم ؟؟ ده ابن خالتهم يا جدعان ..ده بيبعلهم الغاز أرخص ما احنا بنشتريه ..ده كانوا مرعوبين وقت الثورة و بيضغطوا على أمريكا عشان تدعم مبارك ضد الثورة ..لأان ده ضهرهم و هو اللي حامي حدودهم ..تدمير أنفاق و غلق معابر و جدار عازل ..ده بتاعهم يا جدعاااااااااااااان ..بتاعهم ...المهم يومين تلاته كده و هايعرفوا انهم اضحك عليهم تاسع و عاشر
أنا بس بطلب منهم قبل ماتتفقع مرارتي و حاجات تانية ..((ممكن تبطلوا يضحك عليكوا شوية ؟؟ *************** ))
الثورة نجـــحت.. و مبارك بح ..و الظلم بح و الفساد بح و الواسطة بح و العمالة بح و الخيانة بح و الذل بح و قلة القيمة بح و الفضايح ظهرت و الحرامية اتعرفوا ...بطلوا يضحك عليكو..انزلوا الشوارع و إعملوا حاجة تفيد البلد ..نضفوا البلد ..صلحوا اللي اتخرب و اتكسر ..فكروا في حاجة تفيد البلد ..شوفوا مطالبكم ايه و اعرضوها على الحكومة أو شباب الثورة و هما يعرضوها على الحكومة و قيادة الجيش ..
و خلوا بالكم ..الحزب الوطني مانتهاش ..و رجال الأعمال و الحزب مش هايسكتوا .دي قضية حياة أو موت بالنسبة ليهم ..شغالين تشكيك و طعن في شباب الثورة و أهدافهم
يا جماعة هو خلاص يعني ..لازم كل واحد يعمل حاجة يبقى مدفوعله و جاسوس و عميل ؟؟ هو مفيش حد وطني خلاص في نظركم ؟؟؟؟خلاص ؟؟ كله بيتحرك بالفلوس ؟؟ كله بايع بلده ؟؟ اتقوا الله ...اتقوا الله ..اتقوا الله في مصر و شباب مصر ..و خلونا نعمر البلد اللي اتنهبت و اتخربت و بقت أسفل سافلين..و سيبكوا من وائل غنيم ..و لو عندك حاجة تفيد بلدك ..روح اتكلم مع شباب الثورة و قولهم انا عايز كذا و كذا ..حاسس انك مكنش ليك دور ؟؟ لو سكت هايكون موقفك أحسن من انك تشكك في ناس شريفة ...عشان التاريخ بيتكتب دلوقتي ..و هايبقى شكلك خره قدام عيالك لما الناس تقول عليك كنت بتشكك في أبطال الثورة ..غيران منه ؟؟ عشان شاب خنفس هو و شوية عيال اصحابه غيروا شكل مصر ؟؟؟ معلش ياعم تعالى على نفسك و متشتمش فيه ..إعمل انت حاجه أحسن منه ..إتحرك ..روح أنضم و شوف الماسونيين دول بيعملوا ايه ..مش هايقولولك لأ ..و هايتكلموا معاك و هايفهموك و تفهمهم ولو طلعوا زي مانت بتقول ..يبقى أعداء الوطن ..سيبك من الفيسبوك ..مش هايوقفهم ..لم شوية عيال و روح اقتلهم ..لكن ماتبقاش شاب تنح و تطلع اشاعات وانت مش عارف هي صح ولا غلط .و لو طلعت صح برضوا انت مابتعملش حاجه توقف الغلط ..راشق على الكيبورد وخلاص ..أنا عن نفسي اتكلمت مع واحد فيهم و ناس مثقفة و عاقلة و فاهمه هي بتعمل ايه ..فوقوا بقى
و في النهاية لو الماسونية و الخيانة هي إني أطالب بالحرية و الديموقراطية و العدالة الإجتماعية و محاربة الفساد و الفقر و الجهل و القمع و السرقة و التزوير و النهب و قلة
القيمة ..يبقى أنا مـــاســـوني(كده و كده) ...خــــايـن
وحسبي الله ونعم الوكيل
Wael Ghonim Team Work
طبعا المقال منقول
ونقلاه بالحرف الواحد
مغيرتش فيه ولا كلمه
ده عشان بس محدش يعلق على بعض الالفاظ اللى فيه
بس طبعا مش نقلاه عشان خاطر وائل غنيم ولا عشان ادافع عنه
بس عشان الناس تبطل تنقل الاشاعات
وتعرف ان فى جهد كبير اوى بيتعمل عشان الرد على الاشاعات دى
فياريت نوفر جهودنا بقى للبلد دى
والناس اللى فاكره انها هتضرب الثوره فى مقتل عن طريق التشكيك فى وائل غنيم
وائل ده مجرد فرد واحد
والثوره دى مش بتاعته
دى ثورة شعب
شورتنا احنا
ووالله لو وائل ده مجوسى حتى
وكان السبب فى كل اللى حصل ده
برده هنقوله شكرا
هنقوله انت صح
-----
وده رد وائل نفسه
رسالة لكل الشباب: أولا أنا باشكر كل الناس اللي بتنتقدني. فيه ناس بعتتلي ايميلات انتقادات واتصلت ببعضهم واتأسفت عن الخطأ لو ارتكبته. عايزين ننسى شوية فكرة الإنسان اللي مش بيرتكب غلطة. يعني مش عشان وائل غنيم أو غيره عمل غلطة يبقى وحش بس المهم إن اللي يعمل غلطة يكون عنده شجاعة الاعتذار والناس يكون عندها شجاعة تقبل الاعتذار.
الرد على الإشاعات عملية مرهقة جدا وبتستنزف طاقة بس نظرا لأني كنت شخص محدش يعرفه وفجأة ظهر على السطح وكل الناس شايفاه فأنا مقدر إن ناس كتير بتقلق. وعشان كده أنا هارد لأوضح مواقفي وأرد على كل الشائعات. ويا ريت تصدقوني لأني مش باكذب وكل كلمة باقولها هي الحقيقة اللي ملتزم بيها أمام ربنا.
[1]
زوجتي أمريكية أسلمت قبل سنة كاملة من مقابلتي ليها عن اقتناع وبعد قراءة كتب كتيرة عن الإسلام. زوجتي كانت مسيحية قبل إسلامها وزوجتي ملتزمة بتعاليم الإسلام أو بمعنى تاني زوجتي مسلمة أحسن مني ألف مرة. محجبة وبتصلي وبتصوم وبتربي الأولاد على احترام الدين.
[2]
أنا حضرت مظاهرة 25 يناير مش زي ما الناس بتقول إن محضرتهاش. وعندي صور وفيديوهات ممكن أبقى أنزلها. كنت مع المهنيين أمام دار الحكمة ورحت التحرير. وحضرت جزء من المجزرة بتاعة بالليل.
[3]
أنا مدير التسويق في الشرق الأوسط وشمال أفريقيا في جوجل واختصاصاتي هي الدول العربية فقط من الجزائر لحد الخليج. وحاليا أنا في إجازة عن العمل وتم سحب كل ما له علاقة بالعمل مني وده من تاريخ بداية الثورة. الشركة بتاعتي مكانتش تعرف حاجة عن الصفحة ومكانوش يعرفوا إني نازل أتظاهر. وجوجل مالهاش أي علاقة باللي حصل.
[4]
أنا مقدمتش على أي جنسية في حياتي غير المصرية. وده مش عشان أي حاجة إلا إني باحب بلدي وكنت رافض فكرة الجنسية المزدوجة لأني فخور إني مصري مش علشان أنا عميل وهما طلبوا مني للتخفي إني مقدمش على الجنسية زي ما بعض الناس بتقول.
[5]
أنا وعدت الناس بالانسحاب بمجرد تحقيق الأهداف. وأنا فعلا هانسحب بس الاهداف متحققتش. أنا لن يكون لي أي اشتراك في الحياة السياسية المصرية بس كمصري محدش يقدر يمنعني من المساهمة في تنمية المجتمع وتطوير التعليم وتشجيع السياحة ومساعدة الاقتصاد. ده اللي أنا باعمله دلوقتي عشان ده أهم بكتير أوي من اسقاط النظام السابق. أنا دلوقتي مركز على مبادرات لتنمية المجتمع لأن هو ده المهم حاليا تعليم المجتمع وتطويره.
[6]
موضوع الحديث مع الوكالات الأجنبية: أنا فعلا قلت مش هاتكلم معاهم وفضلت لأيام طويلة مش باتكلم معاهم رغم إن كل يوم بيجيلي منهم أكتر من عشرين مكالمة وزيارة في البيت. وظهرت في السي إن إن لسبب واحد هو إن اللواء عمر سليمان طلع على قناة إي بي سي الأمريكية بيقول للأمريكان إن المصريين غير مؤهلين للديموقراطية وإن الإخوان اللي عملوا المظاهرات فكان لازم أرد عليه ومظهرتش بعدها نهائيا في أي وسائل إعلام. لكن بعد انتهاء الثورة ظهوري في وسائل الإعلام ضروري لتوضيح صورة شباب الثورة وتقديم فكرة ايحابية عنهم. ودلوقتي محدش هيزايد خلاص. فقرار عدم الحديث ده كان مرهون بوقت الثورة واتكسر مرة واحدة بس بناء على اللي حصل مع عمر سليمان. ولازم نفهم ان القرارات ممكن تتغير لو الظروف اتغيرت.
[7]
أنا كتبت موقفي من التدخل الأجنبي بكل وضوح وقلت إن الحكومات الغربية لازم تفهم إن المصريين مش بينضحك عليهم وإن الحكومات دي بتدور على مصالح شعوبها بس وطلبت منهم عدم التدخل في شؤون مصر. ولو حصل أي محاولة للتدخل الأجنبي هنكون كلنا كشباب للثورة مستعدين نضحي بدماءنا عشان نحمي بلادنا من أطماع الأجانب.
[8]
بالنسبة للتضارب في موقفي ليلة الخميس (قبل تنحي الرئيس بيوم) وتصوير بعض وسائل الإعلام لموقفي ليلة الخميس بإني باطالب الناس بالرجوع لبيوتهم: أولا ندائي للناس كان قبل سماع خطاب الرئيس اللي كان كل مصر افتكرت خلاص إنه اتنحى. ده كان غلط مني فعلا وكان لازم أنتظر الخطاب قبل التعليق بس على فكرة الغلط ده وقع فيه أكبر رؤساء العالم وهو أوباما لأن الشائعات كانت قوية بتنحي الرئيس. وبعد ما الرئيس اتكلم أنا ما أعلنتش موقفي إلا تاني يوم الصبح. وأعلنته بكل قوة في قناة العربية وقلت إننا كشباب أقوى وهنفضل نطالب بحقوقنا لحد ما ناخدها.
[9]
بعد إعلان تنحي الرئيس كأي شاب تعرض لظلم شديد كان عندي مشاعر غضب وفرحة ورغبة في التشفي وده كان برضه غلط. بعد أقل من ساعة قررت إني أتراجع عن الموقف ده لأنه مش موقف نبيل وقررت إني أحذف كل رسالة سخرية كتبتها لأن في النهاية احنا معملناش الثورة دي لتصفية الحسابات إحنا عملناها عشان كلنا بنحلم بمصر أحسن.
[10]
فيه ناس بتحاول التشكيك في وائل غنيم عن طريق التشكيك في جوجل. أولا وائل غنيم مش جوجل وائل غنيم هو موظف في شركة جوجل زي ما حضرتك تبقى موظف في بنك أو شركة عادية. خدوا بالكم من النقطة دي جدا لأن فيه ناس بتحاول تهاجمني من خلال جوجل. وعلى فكرة مشكلة الترجمة في جوجل مشكلة معروفة وموجودة في لغات كتير وليها سبب علمي وهو إن ترجمة جوجل بتعتمد على تقنيات بتسبب أحيانا في أخطاء عدم دقة والإسرائليين نفسهم بيلاقوا أخطاء زي دي في الترجمة من انجليزي لعبري. فيا ريت ناخد بالنا.
[11]
أقسم بالله العظيم مش عايز أي حاجة منك يا مصر. أنا بس عايزك بخير
رسائل أخيرة للشباب:
- أنا باراعي ضميري .. بجد مش باعمل أي حاجة تخليني مانامش بالليل .. هافضل دايما بيحركني دافع الوطنية وحب البلد والخوف على ولادها .. ممكن أرتكب أخطاء بس هاسمع نصايحكم وهاصلح أخطائي وأعتذر عنها بشكل رسمي.
- وائل غنيم مش رمز ... وائل غنيم هو شخص عادي جدا زيه زيكم وحاول يكون ايجابي وربنا استخدمه في تحقيق حلم المصريين وكان ليه دور بسيط جدا زي ما ربنا بالظبط استخدم مئات الشهداء وآلاف المصابين وملايين المصريين. يا ريت بلاش التركيز على شخصنة الثورة في شخص وائل غنيم لأني مجرد واحد عادي.
- أنا خلال 20 يوم عديت بظروف صعبة جدا .. أول مظاهرة في حياتي .. وشعور بالخطر على حياتي .. وبعدين اختطافي .. وبعدين نايم متغمي العين وايدي متكلبشة لمدة 12 يوم .. وبعدين خرجت عشان أكون من المشاركين في المظاهرات .. وبعدين تحصل مشكلة الضغط على الناس وخطابات الرئيس .. كل الوقت ده مكنتش بانام كويس .. فيه 3 أيام أنا نمت فيهم ساعة واحدة بس. فطبعا الضغط ده كله تسبب في أخطاء كتير وفي إن شخصيتي تكون عصبية على غير العادة. أرجو تسامحوني لأن دول كانوا أصعب عشرين يوم في تاريخ مصر كله بدون أي مبالغة.
- شخصيا مسامح كل واحد شك وبيشك وهيشك في نوايا وائل غنيم لأني مقدر إن فيه انعدام للثقة عشنا فيه كتير في مصر ولأن برضه مش كل الناس لازم تثق في كل الأشخاص ولأن وائل غنيم بشر وهيفضل يرتكب أخطاء.
أرجوكم سامحوني وأرجو إني أكون وضحت موقفي
رد مع اقتباس
المشاركة الأصلية كتبت بواسطة محمد سمير
