ويبقي الحال كما هو عليه ... ولا يزال الميدان كما هو !

[*Jessy*]

السلام عليكم ورحمه الله وبركاته

بعد تنحي مبارك من الرئاسه ... وأصبحت السلطه في يد الجيش ...

كلنا دار في فكرنا حاجات كتيره أوي قولنا يا تري ده انقلاب ده ولا ايه ؟

يا تري الجيش فعلا هو اللي ضغط علي مبارك ولا ايه ؟؟

ياتري هيبقي فيه أحكام عرفيه ولا ايه ؟؟

وطبعاااااااااااااااااااا كلنا كنا عارفين ان خلاص المظاهرات بقي انفضت وكل واحد هيروح بقي لبيته وناس كتيره اتقفت انها تنظف الشوارع وبالفعل النهارده فيه ناس نزلت وطبعا ده شيء جميل ومتوقع من المصريين ...

بس يبقي هنا السؤال ... الناس دلوقتي اللي في ميدان التحرير عاوزين ايه بقي !!!!!!!!!!!!؟؟؟

عاوزين طبعا المطالب تتحقق وكلنا معاهم في كده بس ماننساش كلامهم أما قالوا مش هنمشي غير بعد ما الرئيس يمشي .. طب دلوقتي الرئيس مشي ... مامشيوش ليه بقي ؟؟؟

ولا الناس تقول أحنا مش بنثق في الحكومه وطبعا مابقاش حد بيثق فيها لانها كانت مش قد كلمتها في أي حاجه ..

بس علي الاقل نبقي أحنا بقي قد كلمتنا .. ويبقي كلنا كلامنا واحد وماشيين علي مبدأ الاصلاح وليس الهدم ..
لان الهدم مش عاوز وقت ممكن تهدم في ثانيه ... لكن البناء محتاج وقت

وبالطريقه دي البلد هتخسر أكتر وأكتر وأكتر ... والثوره اللي قامت وحققت حاجات كتيره جدا هتبوظ

أنا هنا بفكر معاكوا بصوت عالي مش بقول رأي ولا حاجه ...

تفتكروا بجد الناس اللي في التحرير لغايه اللحظه دي مستنيين ايه ؟؟؟؟؟؟


وربنا يحفظ بلدنا وشعبها يارب ....

[Nayroz]

كلنا دار في فكرنا حاجات كتيره أوي قولنا يا تري ده انقلاب ده ولا ايه ؟

اللى حصل ده مش انقلاب عسكرى .. مش ده مفهوم الانقلاب العسكرى ..
يبقى انقلاب عسكرى امتى .. لما يكون كل اللى حصل من بداية يوم 25 الجيش هو اللى بداه زى اللى حصل فى ثورة 23 يوليو
لكن ثورة 25 يناير .. ثورة شعبية خالصة .. بلا موجه سوى المطالبة بحقوقنا المشتركة المشروعة .. ولانها مشروعة حماها الجيش .. بعد كدة كان لازم الجيش يحمى شرعية الثورة اللى هى نابعة من شعبها و يحافظ على الدولة
فبالتالى ضغط على الحكم لترك السلطة استجابة لصوت الوطن .. اللى خرج فى كل شوارع مصر ..
فده ما يعتبرش انقلاب ...
( رايى الشخصى )

يا تري الجيش فعلا هو اللي ضغط علي مبارك ولا ايه ؟؟

اكيد ...

ياتري هيبقي فيه أحكام عرفيه ولا ايه ؟؟

ما هى موجودة من زمان وبيتعمل بيها .. بس هتفضل موجودة لحد الوضع ما يهدى بس .. و بعد كدة ان شاء الله هتتعدل ..

تفتكروا بجد الناس اللي في التحرير لغايه اللحظه دي مستنيين ايه ؟؟؟؟؟؟


وربنا يحفظ بلدنا وشعبها يارب ....

امين يا رب العالمين
اعتقد ان الناس النهاردة فى التحرير متواجدة للاحتفال .. حتى لو هيستمر كام يوم ايه المشكلة
من حقهم .. وفى فعلا منهم كان عامل حملة نظافة فى الميدان .. شىء حضارى و مشرف بجد ..
بس ممكن يفضلوا متواجدين بعد الاحتفال لمطالبات و كدة مش عارفة بصراحة ..

[ضياء القلب]

اللى فهمته تقريبا الناس لسه موجوده لان فيه مطالب بالافراج عن المعتقلين فى السجون
وخاصه المعتقلين السياسيين

[بحلم ببكره]

أقول لك ليه يا دكتورة..

ودا من كلام دار مع المنسق للعام للائتلاف هناك وأحد أعضاء الكتلة البرلمانية للإخوان السابقة..

بس قبل ما أقول السبب عاوز أوضح حاجة

يا جماعة بالله عليكم قبل ما نفسر اي حاجة تخص الموضوع بتاعنا دا من أول ما بدأ لغاية دلوقتي نفكر في حاجتين.. هل أنا ملم بالظروف السياسية المحيطة ولا جاي لسه أهتم دلوقتي بالتالي في حاجات غايبة عني فبستغرب حاجات بتحصل نتيجة جهلي بالأمور .. ودي ظهرت قوي في الفترة اللي فاتت..

تاني حاجة.. هل أنا شاركت في اللي حصل في أرض الميدان ..

طب ليه؟؟ ,, لأن المشاركة بنفسي غير إني أتفرج وأعلق وأقيم .. فرق كبير جدا جدا أقلها في استيعاب ردود الفعل وتوقعها


أرجع لموضوعنا

الناس قايلة من فترة إنها لم مبارك يمشي هتسيب "تمثيل رمزي" للملايين اللي كانت في الميدان..
عشان كدا العدد اقل بكتير

طب التمثيل دا لازمته إيه؟؟

يحافظ علي شعلة الثورة زي ما هي لأن لسه بقية المطالب متحققش منها حاجة

حد أخد باله (ومش عاوز أقلق حد ..) ... ليه الجيش مجبش سيرة حل البرلمان...

مفيش إفراج عن المعتقلين ليه؟؟

كلها علامات استفهام غير مفهومة..

طب أقول حاجة كمان

النهارده تم اعتقال 15 واحد من ميدان التحرير علي يد الجيش من عند المتحف المصري

مش عارف في إيه؟؟

بس أتمني إن الناس تدرك إن الموضوع لسه مخلصش وأتمني إن ميكونش في حاجة في الخفاء بتدبر

"تفاءلوا بالخير تجدوه"

[NeScaFE]

الناس دى مش هتمشى غير لما مطالبها تتحقق وهما اصدروا بيان بمطالبهم

عاوزين الغاء قانون الطوارىء والافراج عن المعتقلين السياسين ..ده اول طلب

فى بقى باقى الطلبات بس عاوزة وقت معتقدش انهم هيفضلوا موجودين لحد اما تتنفذ

او ممكن يمشوا ومجموعة حزبية منهم هيا اللى هتفضل كل جمعة موجودة تتابع المطالب

لو الجيش لغى قانون الطوارىء وافرج عن المعتقلين فى وقت سريع بيتهيالى عدد كبير

منهم هيمشى ..ياريت بس مش يماطل زى الحكومة

[محمد_على_سلام]

يا جماعة القاعدة فى التحرير عجبتهم وعلشان كده هما مستمرين

[*Jessy*]

امين يا رب العالمين
اعتقد ان الناس النهاردة فى التحرير متواجدة للاحتفال .. حتى لو هيستمر كام يوم ايه المشكلة
من حقهم .. وفى فعلا منهم كان عامل حملة نظافة فى الميدان .. شىء حضارى و مشرف بجد ..
بس ممكن يفضلوا متواجدين بعد الاحتفال لمطالبات و كدة مش عارفة بصراحة ..

تحليلك منطقي واكيد رأي يحترم طبعا

هما قالوا أن لو الرئيس مشي وده أكبر مطالبهم المفروض بقي هيروحوا ويشوفوا الحكومه هتحقق باقي المطالب ولا لا

بس دلوقتي السلطه بقت في أيد الجيش أما نشوف الجيش هيعمل ايه ؟؟

شكرا علي المرور

[yojeena]

يا جماعة بالله عليكم قبل ما نفسر اي حاجة تخص الموضوع بتاعنا دا من أول ما بدأ لغاية دلوقتي نفكر في حاجتين.. هل أنا ملم بالظروف السياسية المحيطة ولا جاي لسه أهتم دلوقتي بالتالي في حاجات غايبة عني فبستغرب حاجات بتحصل نتيجة جهلي بالأمور .. ودي ظهرت قوي في الفترة اللي فاتت..


"تفاءلوا بالخير تجدوه"

اتفق معاك في النقطه

نفس الناس اللي بتشكك في اي حاجه يعملها اللي في التحرير هما هما

و لما نلاقيهم جابوا نتيجه نتحول 180 درجه!!!!!!

لازم نثق في الناس دي و نحطهم علي راسنا كمان


لكن انا مش معاك يا دكتور ان في حاجه بتدور في الخفاء حتي لو احتمال قليل

اجمل حاجه في الثورة انها مسحت اي حد بيحاول يظهر في الصورة

الثورة من الشعب و الي الشعب بكافة فئاته و الجيش هو الضامن

[بحلم ببكره]

عمر ما يكون الهدف من البقاء هو الاحتفال يا دكتورة وإلا كانت الناس روحت مش تبات في الميدان


البقاء لحين ظهور حسن النية زي حل البرلمان أو الافراج عن المعتقلين وخصوصا الـ 15 معتقل بتوع النهارده

وبالنسبة للمطالبة اللي بتحتاج وقت فعاوزين جدول زمني بالتنفيذ

[star]

هو مش قالوا هيرجعوا الميدان زي الاول ويشيلوا الخيام وكده ؟أنا بجد مبقيتش فاهماهم