واجبنا في المرحلة القادمة

[Dr.A7med]

بسم الله الرحمن الرحيم .. بداية أحب أهني كل زمايلي واخواتي علي النصر الرائع لشعب مصر الحر وإرادته اللي خلت الحديد يلين بإذن الله وحده وبفضله وكرمه
ثانيا وده الأهم .. وأنا راجع من الاحتفالات المبهجة وماشي للبيت فكرت كتير جدا في دورنا كشباب يعتبر صفوة البلد في المرحلة القادمة .. ودورنا يتلخص في كلمة بسيطة وسلسة للغاية .. الإيجابية
دلوقتي مصر محتاجة لايدينا عشان نبنيها ونعليها .. لازم نشارك كلنا في نهضة البلد .. وبداية المشاركة دي هي الإيجابية وعدم السلبية .. والناس كلها شافت ان الروح الإيجابية في شعب مصر أنجبت ثورة يقول الخبراء بالفعل أنها من أعجب وأرقي وأعظم الثورات علي الإطلاق مش علي مستوي مص بس.. عشان كدة عايزين نعاهد بلدنا بالإيجابية .. والإيجابية دي لها أمثلة كتير جدا صعب حصرها هنا .. لكن في أدوار كتير المفروض نقوم بيها .. أنا مثلا عمري ما شاركت في انتخابات .. بس أعتقد انه هيبقي من العار وبكرر من العار علي أي مواطن مش هيشارك في الانتخابات القادمة بداية من المحليات وبركز علي المحليات لأنها بالفعل مهمة جدا وامتدادا لمجلس الشعب والشوري واختيار رئاسة الجمهورية والاستفتاءات اللي تتعلق بأي اجراءات دستورية أو فيما يخص تقرير مصير البلد .. رجعت البيت قلتلهم والله اللي مش هيشارك بعد كدة هيبقي ليا معاه موقف .. وبالفعل اتفقنا اننا في أي انتخابات جاية نروح كلنا ونشارك .. والمفروض كل واحد فيكم يبدأ في الكلام ده في بيته ويبقي ايجابي مع أهله ويطلب منهم المشاركة ..
من ضمن الحاجات كمان فكرت ان لازم احنا كصفوة وناس توصف بحدة الذكاء ورقي التفكير لا بد اننا يكون لينا دور في صناعة مستقبل البلد .. بمعني اننا لازم نكون فاعلين في الحياة السياسية والاجتماعية القادمة .. لازم نثقف نفسنا .. لازم نقرأ كتير ونتابع اللي بيحصل في بلدنا .. لازم يكون لشريحة مننا نشاط سياسي يعبر عن وجهة نظره في كيفية تطوير البلد
غير كدة كمان أنا بطالب كل زمايلي بالإيجابية في الأمور البسيطة اللي في مجموعة بتعبر عن مستوانا كبلد .. مثلا النظافة .. لازم نحافظ علي نظافة البلد .. مفيش مكان ترمي فيه الزبالة اتفق مع الناس في الشارع بتاعك أو العمارة علي مشروع للمحافظة علي نظافة المكان وتجميله ..
نقطة كمان مهمة .. السفر للخارج .. معروف انه غالبا الخبرات اللي بتسافر للخارج هي الخبرات الأقوي في مصر .. معلش خليك في بلدك وابني فيها وعلي وهي بإذن الله هتقدرك وهتديك حقك .. لازم يا جماعة نفكر كتير قبل ما نسافر بره .. بلدنا محتاجة وقفة مننا عشان نساعدها ونبنيها ..
مثال كمان .. المعاملات مع الشرطة .. الشرطة دول ممكن يكون أخويا .. ابن عمي أبويا وهكذا عشان كدة لازم يبقي في تطور في العلاقة بيننا وبينهم بما يسبب للمواطن شعور بالأمن لما يشوف الشرطي مش شعور بالقلق أو الخوف .. والعلاقة دي ممكن تكوينها من خلال الإيجابية .. لما تشوف شرطي فاسد اتكلم .. لما تشوف السواق بيدي رشوة لعسكري المرور ما تسكتش .. قوله حرام .. قوله هاخد نمرتك وهشتكيك .. خليك إيجابي .. اعرف حقوقك وواجباتك .. وشوفوا كلمة لا للظلم عملت ايه .. خلاص لازم نفضل نقولها طول الوقت ولازم نبقي ايجابيين ونعترض علي كل حاجة غلط
رسالتي يا جماعة لكل اخواتي وأحبابي وزمايلي اللي بتربطني بيهم علاقة ود وحب واحترام حتي مع الاختلاف اللي ممكن يكون شديد في بعض الأوقات .. رسالتي دي من منطلق احساسي بأهميتنا كصيادلة .. دورك كصيدلي وشخص من الشرائح المتعلمة تعليم راقي في مصر مش يخصك لوحدك .. نباهتك وفكرك وتعليمك وثقافتك كل دول نعمة من ربنا مش بيعطيهالك عشان تتفاخر بيها .. بيعطيهالك عشان تفيد بيها بلدك .. في ناس مش بتعرف تقرأ وكتب .. في ناس لا تفقه شيء ومفيش عندها أي خلفية ..وطبعا لمستم ده في مواقف كتير .. لما احنا نبقي سلبيين أكيد مش الناس دول هما اللي هيحددوا اتجاه البلد .. وغير كدة احنا مسؤولين عن تثقيف الناس دي وتعريفها بدورها وواجبها في بلدها .. مسؤوليتنا تمتد لأبعد بكتير جدا من محيطنا الشخصي .. البلد دي زي ما خدنا منها لازم نديها .. خلاصة رسالتي هي الإيجابية
شكرا