عمرها حصلتلك دى؟

[SHYMAA]

رجعتلكو تانى بموضوع برده تانى وياريت نتكلم بصراحه
فى البدايه سؤال بس اكيد اجابته مش بتاعة تامر حسنى واللا انتو رايكو ايه؟
المهم السؤال هوه :
عمرك حاولت تتصرف على غير طبيعتك؟
يعنى كاره قوى اللى انت عليه وعايز تتغير
فتبدا تعمل حاجات مختلفه عنك
يعنى رحله فى شخصيه جديده
طب لو ما عجبتكش الرحله دى
هتعمل ايه؟ هتدور على شخصيه جديده تعيش بيها؟واللا هترجع تانى للى انت كنت عليه؟
طب لو حاولت ترجع بعد طبعا ما عملت حاجات كتير غلط فى الرحله دى هتعمل ايه؟
هتعتذر عن كل اللى حصل ؟واللا هتسيب الايام تنسى اللى حواليك اللى انت عملته؟
طب لو اعتذرت اكيد هتبقى مبسوط وراضى عن نفسك بس اكيد فيه ناس تانيه هتحاول ترجعك تانى اكيد طبعا هنسيبهم وهندور على ناس تانيه
نحاول نعيش دنيا صح معاهم وبيهم

ده كانت تجربتى واللى قفلت بيها صفحه قديمه
وان شاء الله بحاول افتح صفحه جديده اتمنى يكون مفيهاش اخطاء كتير لانى بجد عايزه ارتاح
ادعولى اثبت على كده
احسن حاجه فى الرحله دى انى طلعت باصدقاء بجد زى اخواتى واكتشفت ان فى ناس تانيه ما ينفعش يكونو اصدقاء يعنى بتوع كلام وبس
واكيد طبعا الناس اللى زعلتهم ورجعت اعتذر لهم
طلعو اجدع منى وقبلو الاعتذار وباتمنى نكون اصدقاء

ياللا عايزه رايكو فى الحكايه دى
ولو عمرها حصلتلك ياريت نقول وكلنا نستفيد من اخطاء بعض

[ELANDALEEB]

بجد وبكل صراحة ان بحب نفسى كتير كتير كتير اوى اوى اوى وبحب شخصيتى اوى اوى وكمان بعتز بيها وبفتخر انى كدة .... بجد ياشيماء انا مع اى حد بتصرف بطبيعتى جدا جدا وعمرى ماحاولت ادارى نفسى وراء قناع زائف ومؤقت وبعد كدة تتضح الصورة الحقيقية ..... يمكن اصحابى اتعودوا منى على كدة عارفين انى بتصرف بشخصيتى الحقيقية ودايما مشاعرى مقروئة لاى حد .... اى حد يشوفنى يعرف انا ازاى وكدة ليه ... اكيد فيه حاجات غلط فى شخصيتى بس بحاول على قدر الامكان انى اتجنبها ..... وبكتسب الخبرة دى من الدنيا والتجارب اللى مريت بيها ..... بجد انا مريت بتجارب كتيرة اوى واتعرضت لأيام وحشة وايام ممتعة بس على قد مابقدر اتعلمت منها حاجات كتيرة .....
بجد انا احب ان اكون شخصية مثالية ومحبوبة ورومانسية ..... احب اكون طيب وحنون ..... احب انى اكون محبوب من الناس ومن اصدقائى .... وبرده احب التميز وان اكون مختلف .... اثبت وجودى فى المكان اللى انا فيه .... الفت النظر واكره الجاهل .....
بتمنى من ربنا انه يجعلنى ضيف خفيف على الدنيا وعلى قلوب الناس .... مش بحب اكون تقيل على اى حد مهما كان .... بس برده مش بفرط فى اللى بتمناه ابدا ابدا مهما كان ..... اصرارى عنيد جدا جدا .... بتحدى نفسى وبتحدى الدنيا والواقع والمجتمع ..... ساعات برسم لنفسى دنيتى اللى بتمناها .... وتصديقينى بجد بعيش جوا الدنيا دى احلى اوقات السعادة ....
بس مؤخرا اصبحت مشتت فى حاجات كتيرة ومش قادر اتخذ قرارات فيها ومش عارف احسم امور لابد من حسمها .... بدأ الشك يوصل لقلبى من ناس كتير كانو قريبين منى ومش عارف دلوقتى هما قريبين ولا لأ ...
شيماء .... ممكن اكون خرجت عن الموضوع بس بجد كنت اتمنى اتكلم والحمد لله اتكلمت معاكى فى الموضوع .... ياريت اكون خفيف على قلبك ....وبجد ميرسى على التوبيك الرائع ده

ده كانت تجربتى واللى قفلت بيها صفحه قديمه
وان شاء الله بحاول افتح صفحه جديده اتمنى يكون مفيهاش اخطاء كتير لانى بجد عايزه ارتاح
ادعولى اثبت على كده
احسن حاجه فى الرحله دى انى طلعت باصدقاء بجد زى اخواتى واكتشفت ان فى ناس تانيه ما ينفعش يكونو اصدقاء يعنى بتوع كلام وبس
واكيد طبعا الناس اللى زعلتهم ورجعت اعتذر لهم
طلعو اجدع منى وقبلو الاعتذار وباتمنى نكون اصدقاء

ان شاء الله هثبتى على كدة ياشوشو .... وهتفتحى صفحة جديدة كلها حب وتسامح وسعادة وصفاء ....وربنا يوفقك ياشيماء
مع خالص تحياتى
عندليبووووووووووووووو

[أمــ هـنـد ــة الله]

اممممم لا بصراحه انا مش حصلتلى حاجه زى دى

انا ببقى مثلا بشوف شخصيه حلوه بس باخد منها اللى يخلينى احسن لانى لو اخدتها بكل ما فيها هاخد الوحش معاها ....

والحمد لله التغيير بيكون للاحسن .......

موضوع جميل يا شيماء ...وبرده ساعات الواحد بياخد حاجات ممكن تكون غلط بس بيرجع تانى لطبيعته

وربنا يثبتك يارب

[احمد شبند]

قال تعالى ( افمن كان ميتا فاحييناه وجعلنا له نورا يمشى به فى الناس كمن مثله فى الظلمات ليس بخارج منها )

فو الواحد اتغير من الحالة الاولى للتانية يبقى الحمد لله اكبر خير لكن ولو التحول للفتور فاكيد انا كدا الحالة التانية فبحاول اخرج منهاااااااااااا.............

[dry_tears]

بيقولو ان الشخصية القوية
تكمن فى كيفية تطويرها الى الاحسن والى الافضل ودة طبعا مشبنقدر نحققو طول الوقت
لكل شخصية طبيعتها المميزة لها ولا توجد شخصية خالية من نقاط قوى بل نقطة واحدة تكفى لجعلك مميز
وتاخذنا الحياه معها تطحننا وتطوينا ونضطر احيانا الى تصرفات لانرضى عنها ويبقى الاعتزار والاعتراف بالخطا من ارفع اوسمة الاخلاق
احيانا كثيرة نظن اننا تغيرنا واننا فقدنا طبيعتنا النقية ولكن كل هذا قشور يجب ان نتخلص منها لكى نحمى جوهرة الروح
وليس من العيب ان نتعلم من الاخرين لماذا لاناخد منهم اجمل ماعندهم وياخذو منا اجمل ماعندنا...
مافيش انسان يقدر يعيش بشخصية غير شخصتو دة محال لكن ماذا لو تصالح الانسان مع نفسه وحاول بناء هذه الشخصية من جديد وتطويرها الى الافضل ..اقول انه لو استطاع ذلك فليس هنالك حاجة ان يبحث عن اخرى..

[* Esraa_resala *]

شكرا ياشماء على الموضوع

عجبنى جدا انك طرحتى الموضوع ده عشان بضايق جدا لما بقابل ناس احس انها بتتصنع الكلام ومش بتعيش

على طبيعتها او تلاقيها معاكى بشخصيه ومع حد تانى بشخصيه تانيه من الاخر شخص ملون

بجد الشخصيات ده بحس انها قليله الثقه بالنفس جامد او بيحب دايما يشوف الناس كلها حباه فبيعامل

كل واحد بشخصيته

فيارب بجد يرزقنا الشخصيه السويه و طبعا مانتكبرش ابدا ان احنا نغير اى حاجه حاسين انها غلط فى

شخصيتنا لان نص الشخصيه تربيه والنص التانى مكتسبه من الخبره والناس الى بنتعامل معاهم او بمعنى

اصح( اصحابنا )

[آيه محمد]

بصراحه عمري ما تصنعت في شخصيتي
بس للاسف بعض الناس البعيده عني بتاخد فكره تانيه خالص
وده من ايام كنت صغيره
وناس كتير بعد كده اعترفولي بالموضوع ده واعتذرولي
بقول ده جايز لاني شديده في المعامله جدا وجد

عموما ربنا يثبتك ان شاء الله
وتعيشي حياه احسن من الاول بكتير

[SHYMAA]

شكرا ليكو يا جماعه على المرور
بس التحول فى الشخصيه اللى انا بقصده كان علشان اغير حاجات مش بتعجب الناس
وبعدين اقتنعت انى مهما عملت برده الناس مش بيعجبها حاجه
كنت بحاول اكون زى العندليب رومانسيه شويه لكن دى كانت مشكله كبيره خاصة انى عكس كده خااااااااااااااااااااااااااااااااااااااالص

[Joker]

بس للاسف بعض الناس البعيده عني بتاخد فكره تانيه خالص

سبحان الله
ده بيحصل معايا انا كمان
وانا شايف فعلا ان الواحد مينفعش غير انه يعيش علي طبيعته
اللي بيحاول يتقمص دور مش دوره ده انا مش بحبه لأن بحس منه بعدم الرضا
انما طبعا لو الواحد شايف في نفسه حاجة مش كويسة وممكن يغيرها للأحسن يبقي كويس ومش عيب
وده مش هيبقي تغيير في شخصيته
لأن دايما الانسان بفطرته كويس
وتعديله لأشياء في حياته للأحسن هيبقي كأنه رجوع للطبيعة اللي ربنا خلقنا عليها


تحياتي علي الموضوع الشيق والجذاب

[محمد سمير]

انا عن نفسى بحب اكون دائما على طبيعتى وما بحبش التكلف فى الكلام والتظاهر بحاجات مش فيا وبحاول دائما اغير نفسى للاحسن ولو واحد صاحبى اوى قلى انت الواجب ما كنتش الواجب تقول الكلمه دى او تعمل كده فى الموقف ده مثلا بسمع كلامه على طول طالما تاكدت انى غلطان انا بجد ببقى مضايق من الانسان اللى بيتصنع فى الكلام وفى افعاله ومش على طبيعته الواجب كل واحد فينا يكون على السريره والفطره ولا يكون متكلفا ابدا وان يحاول ان يصلح من نفسه للافضل لان ما فيش حد فينا كامل بجد التوبيك رائع ياشيماء تسلم دماغك