تقييم عملى العقاقير..رأيك يهمنا

[yhiya amen]

السلام عليكم ،



أولا بقول لكل دفعة سنه تانيه كل سنه وانتم كلكم طيبين وبصحه وسعاده ، وربنا يوفقكم فى امتحانات

العملى وفى النظرى

كمان ونشوفكم السنه الجايه فى سنه تالته بالتقدير اللى تحبوه ، أنا فعلا كنت سعيد أنى كنت معاكم

السنه دى لأنكم فعلا ناس ملتزمين وعلى قدر المسئوليه.




النقطه التانيه اللى عايز اتكلم فيها أنى حابب اسمع تعليقاتكم العملى طول السنه (المعامل وتجهيزاتها , الميكروسكويات

،الشرح فى المعمل ولا المدرج , طريقة الشرح ، الشيتات، الامتحان ونظامه ، أى حاجه مش عجباكم عندنا فى العملى ، هل

تحب تضيف حاجه أو تعدل فى حاجه فى practical course..... يا ريت الكل يقول رأيه بصراحه علشان نطور من نفسنا ولا

غضاضه على أى رأى ...... ممكن تسلمولى رأيكم ده مكتوب يوم سكشن المراجعه أو تكتبوه هنا عادى ومفيش مشكله

خالص على أى comment .


&

[muna7assan]

شكرا جزيلا د.يحيى .. جزاكم الله كل خير عنا

بالنسبه لعملى العقاقير السنه دا كان الحمد لله كويس .. التيرم الاول كان الشرح فى المدرج والشغل بسيط والامتحان منظم .

التيرم التانى بصراحه كان متعب بالنسبالى .. الشرح فى المعمل للأسف ما استريحتش ليه فى قسم العقاقير .. حضرتك شرحت لينا سكشنين كانوا فوق الممتاز ما شاء الله .. بس باقى السكاشن للأسف كانت متعبه !

أفضل بعد كده ان العقاقير تتشرح زى الاول على مرتين للدفعه كلها ونبقى كلنا عارفين نفس الكلام .

[محمد مصطفى علي السلاموني]

أنا الصراحة نظام العقاقير من حيث الامتحانات الترم ده كان عاجبني جدا من حيث مواعيد الشيتات والمراجعة .
يعني الاربع اللي فات كان امتحان الشيت والاربع الجاي المراجعة على العملي ...وياسلام بقى لو الاربع اللي بعده يبقى الامتحان

[DR DOOLA]

كويس بصراحه احنا عندنا دكتوره ولاء كفاءه بصراحه بس ليا سؤال
هو اللى محضرش الشيت الاخير ده هيضيع ليعه كام درجه؟

[salsabyla]

رأيي الشخصي : اولا أنا من محبي مادة العقاقير جدااااا
ثانيا : الشرح كان كويس الا حد ما لآن كان وقته قليل والمحتوي صغير
لكن عايزين قبل الامتحان محاضرة في المدرج عشان الرسومات
ثالثا : الترم ده من حيث الاشراف صعب جداااا وفيه تشدد من الدكاترة الكبار
علي عكس الترم الاول مع حبيبتنا الدكتورة مني زغلول
من تصحيح كتب علي شيتات بجد بجد شخصية رائعة
لكن الترم ده ربنا يستر في تصحيح الكتب

[**mahasen mohamed fouad**]

اولا :الف شكر يا دوك على المجهود الكبير وجزاك الله خيرا كثيرا به
ثانيا :بالنسبه للعملى الترم الاول انا بيتهيالى انه طبعا كان الوضع افضل من الترم التانى كمجمل .بالنسبه للتيرم التانى بصراحه اسوا شىء كان عدم وجود محاضرات شرح العملى لان نظام الشرح بيختلف من معمل للتانى لكن غير كده بصراحه ماشاء الله قسم العقاقير عندنا فعلا احسن قسم من وجهه نظرى فى الكليه سواء كانت معامل او تجهيزات او حتى تعامل ................وفقكم الله

[صيدلية وأفتخر]

رأيي : الشرح في المعامل أحسن من المدرج بكتير

العدد صغير والكل عنده فرصة ينقل صح ويفهم .. إحنا كان دكتور أحمد ما شاء الله

كفاءة وامتياز معانا وكان الشرح سهل وواخدنا بالراحة وحسسنا إن المنهج سهل

لكن لما كان الشرح في المدرج ، كان نص الكلام مبسمعوش + أحساناً مبلاقيش مكان

فبسيب المدرج !! كانت مأساة معايا >> الشرح في السكشن وفر كتير ده رأيي

أما التجهيزات فسكشني مفيش فيه ولا ميكروسكوب شغال !! موجود بس 2 ميكروسكوب

( من اللي بنركب فيهم ال slide ) وأفضل واقفة فوق ال10 دقايق والربع ساعة علشان أشوف شريحة !!

فياريت يا دكتور عدد الميكروسكوبات يكتر شوية

أما تصحيح الكتاب فهي دي الماساة فعلاً .. إحنا بننقل بالملي من ورا الدكتور وعدلنا على الرسومات

في السكشن اللي قبل التصحيح ، لكن للأسف كنا عند دكتور ....... ومدي للي ربنا كرمه B

وفي اللي واخد ( B ( -ve وفي اللي مش حاططله حاجة أصلا وفي اللي واخد F !!

طبعاً السكشن كان بيشعلل من الدرججات دي لأن فعلا بذلنا مجهود في الكتاب .. ولما

كلموا دكتورة منى قالتلهم إنها هاخد الكشف وتعدل في الدرجات ، بس الله أعلم ده حصل فعلاً ولا لأ !!

[*ذكريات*]

بالنسبة للشرح فى المعمل احسن من المدرج برضوه لنفس الاسباب
اما بالنسبة للميكروسكوب دة اصعب حاجة فى السكاشن لان اكتر الميكروسكوبات مش شلغالة او ناقصة مراية او مفهاش اساسا عدسات
فنفسى العمال قبل ميحطوا الميكروسكوبات يشفوها شغالة ولا لا متبقاش كمالة عدد
وبالنسبة للامتحان فاتمنى يكون احسن من الترم الاول
هو الترم الاول مكنش صعب بس المشكلة فى الوقت لان الوقت مش ثابت شوية بسرعة منلحقش نقرا حتى بقيت الاسئلة ودى حاجة كانت مستفزة جدا ان الواحد يبقى مذاكر وميعرفش يحل عشان ملحقش يقرا السؤال
ووضع الميكروسكوبات فى الامتحان مش حلو لان اول ميكروسكوب بيبقى محطوط فى اخر البنش جوة خالص على ما بنروح هناك بيبقى الوقت فات وحصلت اكتر من مرة فى السكشن اللى كنت بمتحن فية ان الناس مبتلحقش تقرا اول سؤال بالذات فاتمنى الترم دة تكون معمولة بالعكس وياريت الوقت يبقى بمؤقت

[sara yousif]

الشرح فالمعمل افضل بكتير من الشرح فالمدرج بفهم الصراحه لان العدد قليل لكن المدرج كانت مأساه بالنسبه للمبكرسكوبات ليه مش بنشتغل على ميكرسوبات اللى بنمتحن فيها اللى هى الجديده لكن الميكرسكوبات القديمه دى صعب يتقال عليها ميكرسكوبات اصلا بالنسبه لتصحيح الكتاب احنا كنا معلمينه قبلها بسيكشن ودكتورة ولاء ربنا يكؤمها كانت مديانى 10 وانا والله كنت مكملاه لاخر سيكشن بس الله اعلم بقى بعد تصحيح الدرجات اخدت كام صعب بعد ما تكون خدت 10 تنقص تانى بس الحمد لله على كل حال

[mohamed fadel]

السلام عليكم
اولا الف شكر لحضرتك عالمجهود اللي بذلته معانا طول السنة ان شاء الله تجزي به خيرا كثيرا

بصراحة قسم العقاقير من احسن الاقسام اللي شغالة في الكلية في ظل الامكانيات المتوفرة له
لكن في بعض الملاحظات الصغيرة كده
1-بالنسبة للمعامل اعتقد ان تصميمها مش كويس لاستيعاب اعداد الطلبة يعني المسافات بين البنشات مش واسعة وده بيحد من سهولة الحركة (انا عارف ان الخطا ده هندسي لكن لوفي امكانية لاصلاحه يبقى كويس)
2 – الميكروسكوبات ياريت يادكتور لو تحصل عملية فحص ليها لمعرفة الصالح للاستخدام وصيانته واللي مش نافع نستغنى عنه بدل المساحة االي وخدها واسمك عندك ميكرسكوب (بس من غير صورة للاسف)
3- بالنسبة للمسؤلين عن المعامل ياريت لو يتم اعادة تاهيل لهم ازاي يتعملوا مع النباتات والمواد الكيميائية اللي بنستخدمها وطريقة اعداد وتنظيم المعمل لان اكتر من مرة شكل المعمل بيكون غير مشجع ان الواحد يشتغل

كان شئ كويس ان السكاشن تكون كل اسبوع وان الشرح يكون في المعمل وده بصراحة احسن شئ الترم ده للمعيد والطالب بحيث ان ده هيكون اعداد للمعيد انه يكتسب خبرة اكبر في انه يكون محاضر جيد في المستقبل
وبالنسبة للطالب بيكون عنده المجال للسؤال وتثبيت المعلومة بتطبيقها على طول
لكن العملية دي هتعمل مشكلة للطلبة لاختلاف طريقة تدريس كل واحد ناهيك طريقة الرسم فياريت لو قبل كل سكشن يحصل اجتماع بين المعيدين والدكتور المشرف عالعملي بحيث انهم يحددوا الاطار الصحيح للمحتوى اللي هيتشرح ويكون في اتفاق في طريقة الشرح اعتقد ان ده هيسهل الموضوع شوية ويقلل من اللخبطة بين الطلبة

بالنسبة للشيتات مفيده جدا لينا عالاقل بتخلي الواحد انه يذاكر لكن ياريت لو تعتمد اكتر عالتفكير بحيث انها تكون تدريب عالامتحان مش مجرد كتابة شئ محفوظ وياريت لو تكون صعبة جدا (بس مش عليها درجات)

اما الامتحان اعتقد ان نظامه لايرتقى للمادة لانه عبارة عن طريقة لاجبارك على استرجاع المعلومة في اقل وقت ممكن دون معرفة اهمية المعلومة دي ايه او ممكن استخدمها في ايه ياريت الامتحان يكون اكثر واقعية بالنسبة للشئ اللي بندرسه
اما بالنسبة للكورس خدمنا في النظري في اننا بنذاكر النبات مرة واحدة للنظري والعملي بصراحة كده العملي والنظري عيزين تتطوير لكن خلينا في العملي دلوقتي انا مش شايف فيه أي تطوير الاساليب قديمة ومبتتغيرش ليه انا مش عارف
الطلبة بقى عندها نوع من التشبع الممل من العملي واعتقد المعيدين كمان يعني السكشن اللي فات ولا فخر اخدنا الشيت وامشينا ومحدش اشتغل خالص اعتقد كان السبب في ده ان مش هنعمل حاجة جديدة وكمان التيستات دي مش هعملها في الامتحان يبقى ليه اتعب نفسي ياريت يادكتور نعيد النظر في طريقة التدريس ونجدد من نفسنا شوية

معلش كلامي كتير لكن انا لو مش خايف ان حضرتك تزهق من القراية ان كنت كملت
مرة تانية بشكر حضرتك على التفاعل ده
ووفقني الله واياكم الى ما يحبه ويرضاه