وندخل عش الدبابير

[بحلم ببكره]

بسم الله الرحمن الرحيم

أنا نويت افتح موضوع صعب

ممكن يبقي فيه سخونة في الكلام

بس نفسي أفتحه من فترة ونفسي نتبادل الآراء فيه وزي ما هو مألوف إن الكلام يكون باحترام وبدون عصبية

وهستأذنكم اللي يدخل في النقاش يدخل فيه فعلا مش مجرد يرمي كلمتين ويخرج وخلاص زي ما قلة من الناس بتعمل للأسف


الموضوع باختصار شديد...


الإعلام


قبل ما أقول قصدي إيه بفكر حضراتكم إن في الاسبوعين اللي فاتوا أمتر من مرة دخلنا في حوارات وناس غيرت رأيها في النهاية بالتالي نصبر علي بعض في الكلام



موضوعنا المرة دي (ولو كملت هنفتح غيره بعد كدا بإذن الله)



__ لفت انتباهي في ميادن التحرير لافتة مكتوب عليها شكر لقناة الجزيرة

وأثناء حصار ماسبيرو هتفت الجماهير (الجزيرة فين الكدابين أهم) ....



والسؤال..

منتشر في السنين الأخيرة هجوم مصري رسمي تبعه توجه من قطاعات في الشعب ضد قناة الجزيرة واتهامات لها بالعمالة وكره مصر ومحاولة تشويه صورتها..

واختلاقها لأكاذيب ضد مصر بهدف تشويه الصورة العامة للبلد ...


يبقي إزاي الكلام دا يمشي مع راي المتظاهرين وزي ما واحد قال: (لولا قناة الجزيرة كانت الثورة المصرية كلها فشلت)


وسؤالي..

هل تتفق أم تختلف مع الكلام دا .. وليه؟؟

ياريت الكلام يكون بناء زي ما تعودنا قبل كدا..

وبعد إذنكم لو حد مقتنع إن رأيه غير قابل للتعديل أو النقاش يبقي بلاش يدخل في الحوار من اساسه



في الانتظار بشغف

[dr.monalizaa]

أنا لا أتفق ولا أختلف

قناة الجزيرة قناة ليها مكانتها من زمان وبتجيب ناس محترمة كتير وبرامج جميلة كتير

بس كان واضح جدا دورها في تسخين الأمور الفترة اللي فاتت واهتمامها بجانب المعارضة بس

لدرجة اني مبقتش أتفرج عليها واكتفيت بقناة ( العربية )

أنا مشوفتش حد بيهتف للجزيرة ... انا شفت ناس كتير شايلة لافتات عليها لوجو العربية

أنا بس شايفة انهم مكانوش حياديين وكانو منحازين لرأي (أمريكا ) عشان كله عارف قطر تبقى ايه

[بحلم ببكره]

ممكن توضيح أكتر يا دكتورة


وعلي فكرة:: لوجو العربية دا أول مرة اسمع عنه

اللي أنا شفته بنفسي إن الناس هناك كانوا متضايقين جدا لما اتقفلت الجزيرة وكانوا ساخطين علي العربية وخصوصا لتغطيتها لجمعة الرحيل


نقطة تانية: موضوع أمريكا وقطر .. حضرتك مش شايفة إن الرأي دا مش منطقي خصوصا مع تغطية الجزيرة لحرب غزة واللي أكيد كانت مخالفة لرأي أمريكا ، وفي الثورة المصرية نفسها .. لا أظن غن هو دا رأي أمريكا


ملحوظة: كلامي مش علي الأحداث الأخيرة فقط .. كلامي كان عن التغطية عموما .. في السنين اللي فاتت

[dr.monalizaa]

نوضح مفيش مشكلة

لوجو العربية كان منتشر يوم الجمعة 11 / 2 بشكل كبير وأكتر من واحد كانو رافعينه ودة ان دل على شيء بيدل

على ان القناة وصلت رأي الناس وكلامهم بشكل يرضيهم


الجزيرة بقى ... قناة كبيرة وليها مكانتها ومصداقيتها وجمهورها .. يعني أكيد مش هتسيب أحداث غزة من غير ما

تجيبها وتحللها ( كعادة أي قناة اخبارية ) وغيرها من الأحداث

والا كانت فشلت في الوصول للمكانة اللي وصلتلها

يعني بالبلدي ... الجزيرة بتمثل قطر وقطر بتمثل شكل مصغر لامريكا بس مش بشكل واضح عشان ميبقاش

شكل القناة وحش

لكن بتزود احيانا وتنقص أحيانا ( على حسب المصلحة العامة ) دة اللي أقصده

[بحلم ببكره]

وصلت يا دكتورة فكرة حضرتك

لكن ولحين ظهور آراء باقي الأعضاء

ممكن أعرف إيه اللي خلاكي تقولي الجملة دي

الجزيرة بتمثل قطر وقطر بتمثل شكل مصغر لامريكا بس مش بشكل واضح عشان ميبقاش شكل القناة وحش

ودا لا يعني موافقتي أو اختلافي مع الرأي دا

وياريت نركز علي الجملة دي ::

" الجزيرة بتكره مصر "

موافق أم لا ؟؟؟

[dr.monalizaa]

السؤال المفروض يكون الجزيرة بتتبع أمريكا ولا لاء

رأي حضرتك انت ايه ؟؟

[بحلم ببكره]

أنا رايي هقوله بالنفصيل الممل

ومش هتأخر علي ما أقوله .. يعني كدا كدا بإذن الله هقوله النهارده

وصلت له بعد ما قلبت الموضوع في دماغي كتير .. بس مينفعش أقوله حالا عشان ميتقلبش الموضوع من نقاش عن الفكرة لنقاش في رأي معين

[Dr/HULK]

يادكاترة القنوات كلها بتتبع سياسة دولتها

فيه مذيع اسمه حفيظ الميرازى على العربية

كان هيتكلم فى موضوع سياسة انتقاد القنوات الاخبارية على دولها
يعنى هيتكلم عن موقف كل قناة من مشاكل الدولة اللى بتصدر القناة

والمذيع ده اتوقف

مثلا الجزيرة عمرها ماانتقدت دولة قطر ولا حتى الدول الصديقة ليها
زى سوريا او الجزائر او السياسات الامريكية

نفس الشىء العربية برضه علامة حمرا مع الحكومة السعودية ومصر فى بعض الحالات
التليفزيون المصرى لا اختلاف عليه لا ينقد احد غير الجزائريين وشوية قطر

الحرة هدفها التفريق بين العراقيين

ال سى ان ان هدفها الدفاع عن اسرائيل بكل الطرق ومعاها البى بى سى

يعنى زى ماليهود بيشتغلوا
حرب الاعلام وحرب الثقافات اقوى من حرب الاسلحة

الجزيرة شغلها على مصر فقط للخلاف اللى بين الرئيس حسنى مبارك
والشيخ حمد لما الرئيس استضاف والد حمد وكان بيسعى انه يرجعه فى الحكم

[المعلم]

لقد اعطي الله الانسان العقل الذي يستطيع ان يميز بين كل شيء

انا عن نفسي الكلام الموثق بالصور والفيديو بصدقه اما الاخبار اللي هيه مراسل الجزيره وافادت مصادر للجزيره والكلام ده لااعطيه اي اهتمام

اما الجزيره بتكره مصر او لا مكن فعلا بتكرها وممكن لا. كون ان الجزيره لاتترك صغيرا او كبيرا في مصر الا وتذكره فاكيد ده له دلالات كثيره منها الايجابي والسلبي


اما ان الجزيره لولاها لفشلت الثوره المصريه فاكيد انها اعطت الحماسه لكثير من الناس وان كانت تقصد الخير لمصر فهو اتحقق وان كانت تقصد غير ذلك فلم يحدث ومصر الان ان شاء الله في طريقا للاحسن

{ ... فعسى ان تكرهوا شيئا ويجعل الله فيه خيرا كثيرا }

[Dr/HULK]

الاخبار اللي هيه مراسل الجزيره وافادت مصادر للجزيره والكلام ده لااعطيه اي اهتمام

هو ده فعلا اللى بيوضح توجهات القناة
لان الشريط الاخبارى للقناة مليان فعلا من الكلام ده من غير توضيح لاسم المصدر