مستنيين ايه ؟؟؟؟؟؟

[dr.monalizaa]

السلام عليكم ورحمة الله وبركاته

انا مش عارفة أبدأ منين بالزبط ... بس أتمنى ان الموضوع ده ما يتحذفش او يتشال لان حتى لو اتشال هلاقي أماكن كتير أحطه فيها

أنا من يوم 25 وأنا قاعده في بيتي قلت لنفسي اللي انا وغيري عاوزين نقوله فيه ناس تزلت تقوله وبعدين انا بنت أنزل ليه !!!

بعد كدة لما البلطجية والمسجلين نزلو وحظر التجول اتفرض كله قعد في بيته عشان ما يتأذيش وعشان يحمي بيته وأهله

لغايه ما شفت بعيني الناس بتموت

الناس بينداس عليها بالسيارات

الناس بيطلق عليها رصاص حي

ناس كبيرة ومحترمة بتنضرب وبيطلق عليها رصاص مطاطي وغاز مسيل للدموع

ناس باتت وقضت ليالي في عز البرد ومازالت

شباب زي الورد قدموا روحهم عشان نعيش احنا أحرار

آباء وأمهات ... شباب وشيوخ ... فقير وغني ... مشاهير وناس عادية ... نساء حوامل ومتزوجون جدد

كله نزل وقال وانا لسة قاعده ؟؟؟

انا قاعده مستنية ايه ؟؟ لما كمان 100 من أخواتي واولاد بلدي يموتوا قدام عيني وانا حتى ما اتنازلتش ونزلت أقول لا ؟؟؟

انا مش هستنى تاني

انا من بكره نازله وهعتصم من الصبح لبلليل

مش عشان انا بس كارهه النظام والحكومة

ومش عشان انا حاسه ان البلد دي ليها حق عليا وعلى كل واحد عايش فيها

عشان الناس اللي ماتت دي دمهم في رقبتنا

ولو ما خدناش انا وانت وانتي حقهم ... يبقى دمهم راح هدر

مين معايا ؟؟؟؟

[Dr_Cinderellaaaaa]

أنا أول واحدة معاكى يا دكتورة
أتا محترمة رأى حضرتك جدا و معجبة بفكرك.وليه الموضوع يتحذف؟؟؟
هى كلمة الحق بتزعل؟
-----
على فكرة أنا من أول _الثورة_ما بدأت و أنا جوايا ناااااااااااار والله
بس لما شفت صور الشباب اللى استشهد قعدت أعيط ...هى دى أكتر حاجة خلتنى أفكر أنزل... أنا أقل من الناس دى فى ايه؟؟؟...
حسبنا الله و نعم الوكيل
أما ان للظلم أن ينتهى؟؟

[yojeena]

أنا معاكي و حاسه بيكي لاني نفسي في كل لحظه ابقي معاهم

لدرجة اني قاعده اتخيل نفسي مع البنات بساعدهم و اخدهم معايا بيتي يستريحوا شويه و لو عايزين حاجه اجيبهاليهم

بس هقولك حاجه

المكان اللي اصبح رمز للثورة هوا ميدان التحرير

يعني اي اعتصام في مكان تاني مش هيبقي بنفس القوة

لو مظاهرات ماشي لكن اعتصام صعب

طيب انا نفسي اساعد اعمل ايه

انا عن نفسي بحاول علي اد ما اقدر اتكلم مع اصحابي بالعقل من غير غضب

لو حتي فوقتي شخص واحد بس يبقي انتي قدرتي تعملي حاجه

ادخلي علي مواقع ع النت زي الفيس

و شوفي الناس اللي بتقولك هيفضل طول العمر

افهمي و جهة نظرهم و وعيهم

و ادعي ربنا داااااااااائما انه يزيل الغشاوة المؤقته عن عيون المصريين و ينور بصيرتنا

انا عندي ثقه تامه في الله انه يظهر مكرهم

((و يمكرون و يمكر الله والله خير الماكرين))

[dr.monalizaa]

هننزل وهنقول لا

هنعمل ميدان تحرير خاص بينا

ولما ننزل كله هييجي يقف معانا

صدقيني اللي في ميدان التحرير بدأوا بشخص أو شخصين

بقو ملايين

انا بنادي لاعتصام مليوني في المنصورة من بكره ويستمر ليوم الجمعة

شعارنا الاساسي مش بس ان الرئيس يرحل

ناخد حق اولادنا واخواتنا اللي ماتو

ناس على كراسي متحركة نزلت في التحرير

ناس كفيفة

واحنا ؟؟؟؟؟؟؟؟

[dr.monalizaa]

30 واحد شاف وماردش غير 2

عيب علينا والله

[الجنة مرادى]

نفسى بجد بس صعب وفين كمان فى المنصورة؟

كفاية ميدان التحرير

واحنا أخدنا النية ان شاء الله

واللى علينا هو الدعاء للى هناك بالصبر والثبات

[dr.monalizaa]

مش مهم المكان قد ما مهم ان صوتنا يوصل

وميدان التحرير مش كفاية يعني من 85 مليون مصري ما ينزلش غير كام مية ألف أو حتى مليون ؟؟؟؟

ده كليتنا لوحدها فيها اكتر من 6000

صعب ليه ؟ فيه أسر كاملة بتنزل

تفتكري الدعاء لوحده حل ؟؟ تفتكري هتحسي انك عملتي اللي عليكي بالدعاء بس ؟؟

[juman]

انا للاسف مش من المنصورة ولا القاهرة ومش عندنا مظاهرات قريبة بس بابا واخواتى فى ميدان التحرير وده مصبرنى شوية بس والله انا لو مكانكم فى المنصورة كنت نزلت ويا ريت كنت مكانكم

[mandy]

طيب حضرتك اخترتى مكان محدد فى المنصوره؟

[N00R EL _SHAMS]

انا بجد الى نفسى اوى

بس حاسه انه صعب علينا كبنات اننا نعمل كده

حاسه الامر هيكون شاق علينا

انا والله حاسه بالعجز وقلة الحيله

لا املك سوى الدعاء