أنا موافق على عمل المرأة ... وأنا مش موافق

[*محبة رسول الله*]

أنا موافق على عمل المرأة .. لأ انا مش موافقة على موافقتك

ده مش كلامى على فكرة ... الموضوع نقلته وحبيت أسمع أراءكم مش أكتر

أنا موافق على عمل المرأة .. أنا مش موافق على عمل المرأة .. يؤسفني ويسعدني في نفس الوقت أقول لك لا من حقك توافق ولا ترفض .. المرأة كيان كامل الأهلية .. إنت من حقك بس ان تبحث اثناء إختيارك لزوجة المستقبل عن الزوجة العاملة أو غير العاملة .. عادي جدا وبدون أي مبررات ومش مضطر اطلاقا تفلسف القصة

زي ما من حقي أختار زوجي شخصية سوية .. متدينة .. محترمة .. ذو مركز اجتماعي ومادي واعد .. مثقف .. يحترم عقلي وقلبي لوكشة واحدة

زي ما من حق أي بنت ترفض مهنة محددة لشخص .. أو ترفض تتجوز واحد بهيئة معينة غير مرغوبة من وجهة نظرها .. أو ترفض تتجوز واحد ها يسافر يشتغل بره .. آراء متطرفة جدا وغير موضوعية في الحكم .. وكذلك مَن قرر أنه من حقه أن يفهم نفسية المرأة وإنها لا تحتاج العمل مطلقا .. هو حضرتك كنت ست وغيرت؟ يعني سالي وقلبت سيد؟ أمال بأمارة إيه تحكم على نفسيتي التي لم تختبرها سابقا؟

انت لك حق الإختيار .. والمرأة لها حق الإختيار .. ولا عزاء لمن أساء الإختيار تحت مسمى بعض التابوهات المجتمعية البالية

بالمناسبة أنا باسعد أيما سعادة لما احقق انجاز في شغلي وبرجع لبيتي بنفسية كليوبترا بعد حمامها الشهير على البحر المتوسط .. أنا باسعد جدا لما بجد إن بنتي عمرها ما اخدت درس خصوصي قبل النهاردة إلا مادة واحدة في الإعدادية وبالطبع أبني أنا معلمته الأولى والأخيرة .. أنا باسعد جدا بلعبي مع عيالي ومناقشاتي الرائعة مع الكبيرة الغالية ودلالي الزائد لإبني الميوص الصغير .. أما أعمال البيت من طبخ وتنظيف وغسيل وخلافه فكلها أقوم بها من باب الواجب فقط .. وأنني لم أتعود مطلقا "البلطجة" في مسئولياتي .. من علمني هذا الإلتزام نحو أمور أكرهها؟ إنها دراستي العملية وعملي المتصل من يوم تخرجي

أنا لا أعمل حبا في زوجي ولا حبا في بريق مركزي ولا حبا في الأصفر الرنان .. أنا اعمل لأن عملي هو إكسير حياتي .. هو التحدي الحقيقي .. هو فرحتى وزروة نشوتي .. أنا أعمل إذا أنا ستيتة بكامل هنائها الشخصي .. أنا أعمل إذا أنا موجودة .. عملي هو إختياري وعملك هو إختيارك .. أحترم إختيارك ولست مضطرة لفهمه أو الشعور بنفس شعورك .. فاحترم خياراتي في الحياة دون أن تفهم شعوري

لا أحب الكلمات الرائعة من قبيل "لو بإيدي أقعد أنا من الشغل ومراتي تشتغل ياريت" عذرا سيدي أنت كاذب .. لو تركت عملك يوما واحدا .. لو فارقت نجاحك وانجازك لتحولت لعجوز عقليا ومحطم نفسيا وانسان ينتظر النهاية بلا أمل .. أنت لا تعمل فرضا فقط .. حتى لو كنت غني حرب أو وارث .. سوف تبحث عن عمل وتبحث عن تحدي .. ولو كنت غير ذلك لتفكهنا عليك بالمجالس وذكرناك دوما كمثال .. ببساطة لأنك مخالف للطبيعة والفطرة .. السعي فطرة .. ولكل منا حقوق وطموووووووووووووووح

كل إمرأة جلست في بيتها حبا في هذا البيت .. أو لأن ترتيب أولويتها أوحى لها أنها لا تستطيع الجمع بين العمل والبيت .. أو لأي قناعة أخرى تخالف قناعاتي .. أحترم إختيارك جدا

ولكن لا أحترم الآتي

1- أن يتم برمجتك من مجتمع ذكوري ببضع كلمات منمقة ترضي بها أب أو أخ أو عريس غافلة وأنت لا تعلمي أساسا فيما تتحدثي

2- أن توافقي على عدم العمل طمعا في لقب "مدام فلان" ث تكتشفي بلوتك وغلطتك فتحيلي المنزل إلى جحيم إختلافات طمعا في لقب "المرأه العاملة فلانة" .. المؤمنين عند شروطهم ففكري قبل الموافقة أو الرفض

3- أن تتخذي من جلستك المنزلية طريقة رائعة للبلطجة وعدم القيام بواجباتك كما قام بها جيل أمي وجدتي

4- وأخيرا لا أحترم من لا يحترم اختياراتي في الحياة ويعتبر رأيه "كما هي عادة العرب ربنا يخليهم" هو الصحيح الفريد الرائع الذي يوافق كل دين وعرف وطبع




***
إليك قائمة الممنوعات والبلطجة الحقيقية .. لا تنامي حتى الثالثة عصرا وتسهري حتى الفجر .. لا تتركي زوجك ينزل للعمل دون إفطار لأنك بتنخمدي قبل ما يصحى هو بنص ساعة .. لا تقضي اليوم على التليفون .. لا تقضي النهار بالنادي مع الشلة .. لا تتخذي من بقائك في المنزل وسيلة للبطالة تحت مسميات خادعة للاخرين .. لا تنتظري أن يتفرغ زوجك للترفيه عنك وسماع شكواك المتصلة من هموم المنزل فهو له ألف أولوية والكلام أخرته ها تكون "ويعني هو أنا بشتغل علشان مين" .. "اتصرفي انت مع العيال أنا لازم أئنتخ شوية علشان أكمل جري ع الرزق" .. لا تتحولي للست سنية التي اصبح أغلى أمانيها النميمة والغيبة والتلصص على أخبار الجيران ووصل وزنها ل 220 كيلو متر مربع من كتر الأكل والنوم وقعدة الفوتيه

من الآخر تكوني منتجة في بيتك لأن غيرك من النساء تعمل 8 ساعات يوميا على الأقل وتجيد كل ما تم ذكره آنفا .. وببراعة


على فكرة الموضوع ده منقوووووووووول
أحب أسمع وجهات نظركم وبعدين ان شاء الله هقول رأيى

اعتقد الموضوع فيه بعض الكلمات اللى مش عجبانى شخصيا بس حبيت انقل الموضوع بكل حاجه فيه عشان نقول رأينا

[AbU ElKhAiR-Let`s Go]

أنا أااااااااااسف أول مره أااااااخد بالى من الموضوع
بس مش لحقت أقرأه كله
وان شاء الله أرد عليه أول ما أرجع
بس شكله موضوع كويس
كنت أتمنى انه يكون فى منتدى المناقشات

[Dr.A7med]

أنا أحب ان زوجتي تكون سيدة ناجحة .. لأن أولادها هيستفيدوا من حاجة زي كدة .. ومش المفروض اني أكون أناني ..طالما كل واحد فاهم حقوقه وواجباته خلاص .. أنا هساعدها بكل قوتي انها تبقي حاجة كبيرة
ومع ان أمي كدة وكتيييير من ستات المجتمع المصري .. لكن أنا مش هبقي مبسوط لو زوجتي بقت ست بيت .. هزعل .. يعني ايه انسانة بتتنفس كدة ومش بتنفع مجتمعها من خلال رسالة بتأديها بجانب رسالة اخراج أعضاء صالحة للمجتمع
باختصار لو في نوع بيدور علي زوجة تبقي ست بيت وغير عاملة .. يبقي أنا النوع التاني اللي عمره ما يحب يتجوز ست غير عاملة مع الوضع في الاعتبار نوع العمل.. يعني مثلا الموظفة عندي ما تفرقش كتير عن غير العاملة .. أنا بتكلم عن العمل الحقيقي .. البناء اللي بيسيب بصمة .. بالظبط زي ما أنا بتمني لنفسي
معلش طولت

[*محبة رسول الله*]

متشكرة لحضرتك دكتور أبو الخير ومنتظرة ردك ان شاء الله

وطبعا أسعدنى مرور حضرتك يا دكتور أحمد

وبحترم وجهة نظرك طبعا

بس ردى هيكون بعد شوية كده ان شاء الله

[dr_orchida]

والله أنا شايفة ان المرأة من حقها الشغل طبعااا مادم مش مأثرة في حق بيتها
وزوجها المرفوض لما يلاقيها موفقة بين بيتها وشغلها ما يحرمهاش من تحقيق ذاتها
ولازم يبقي في احترام لوجهات النظر واختيارات الحياة ويكون الاحترام ده متبادل
مادام مش هيأثر علي حياتهم
توبيك روعة يا هالة تسلم ايديكي

[مشمشة]

بصى بقى ياهالة.......اقولك راييى





استنى كدة..........



آه .......

بجد انا بزعل جدا لما بسمع واحدة بتقول انا لازم اشتغل عشان احقق ذاتى

واحسن بكيوننتى والكلام ده كله وانى معرفش اقعد فى البيت كدة وخلاص مليش اى لزمة .............مين قال كدة

انا فى راييى ان المراة فى البيت بتقدم اسمى رسالة

بجد لانها لو فعلا قدرت تربى ولادها صح

هتخرج منهم للمجتمع اللى يفيد دينهم ووطنهم ............

اكبر من اى انجاز ممكن تحققه فى شغلها

وبعدين مالها قعدة البيت دى والله احلى حاجة ع الاقل بيبقى مزاجى رايق وفلة خالص

بس مش معنى كدة ان اللى بتشتغل دى بتبقى بتقصر او كدة ........

لا خالص انا مامتى بتشتغل وكل حاجة والحمدلله قدرت توفق برة وجوا .......
**ربنا يخليها لينا يارب**

بالنسبة لى انا شخصيا ...........فانا بصراحة احب اشتغل بردة .........

((عشان بقى احقق ذاتى واحس بكينونتى وكدة يعنى

لا لا بهزر))

احب اشتغل بردة

بجد لانى احب ان افيد الناس اللى حواليا باى حاجة اقدر اعملها وبحب التعامل مع الناس.........

وكمان عشان مملش كدة من قعدة البيت لازم يكون فيه تغيير

واحنا كمان شغلنا الحمد لله كويس بجد احلى حاجة انك تنزلى as u like مش مرتبطة بمواعيد

بـــــــــــس

باى بقى يا هالة

[AbU ElKhAiR-Let`s Go]

أولا أحب أن أشكرك يا دكتوره هاله على الموضوع الرائع
اللى شمل أكتر من نقطه كنت أحب أتكلم فيها
ثانيا أحب أقولكم ان دى أرائى الشخصيه التى نبعت لدى من مبادئ ثابته
والتى أدعو الله ألا تتغير مهما كانت الظروف والشبهات
ثالثا أود أن أوضح نقطه أختلفت معها كثيرا فى ذلك الموضوع
وهى أن بعض النساء أصبحت تظن أنها أصبحت مقيدة الأفكار حبيسه الأراء
التى يسردها عليها أبوها أم أخوها أو زوجها
لا لشئ سوى أنه يقول وينصح ويرشد بأساسيات لا يجب أبدا أن نتخلى عنها
بتقديم هذه الحجج الباليه أن هذه الأفكار هى سبب التخلف
وأنها مصدر لظلم المرأه وأنها سبب لضياع حقوق المرأه
رابعا ليس معنى أن ينصح الرجل المرأه أنه بذلك يجعل من نفسه واليا عليها ويجعل من نفسه
الوالى والأمر الناهى اللهم الا ان كان والدها كما سأوضح
خامسا المرأه لها حقها أن تقول رأيها لشخصها ولا تعممه بحكم أنها أمرأه
كذلك الرجل حينما يقول رأيا فعليه أن يقول رأيه بمفرده الذى يعبر عن ذاته ولا يعتبر من رأيه رأيا عاما الا اذا كان له مصدر دينى وحكم شرعى بنص قرأنى أو حديث نبوى للمسلمين
ونص من الانجيل للمسيحين
سادسا ان المرأه والرجل هما شقى المجتمع التى لا يمكن أن يتخلى أحدهما أبدا عن الأخر
أو أن يعيش بدونه بل وجود كل منهما ضرورى كى يقوم الأااخر بدوره التى خلقه الله له

بعد توضيح كل هذه النقاط أعتقد أنه من حقى أن أقول رأيى فى عمل المرأه

المهم أن أعتقد أن عمل المرأه خارج حق لها ان شاءت قامت به ولا يحق لأى أحد أن يمنعها طالما أنها تخرج من بيتها منضبطه بالحدود والضوابط التى شرعها لنا ربنا وسنها لنا نبينا ()
وان لم ترد (وهذا الأفضل من وجهة نظرى لأنه أحفظ لها يزيدها عزة ويرفع كرامتها ويجعلها ملكه مكرمة فى بيت زوجها )فلها ما أرادت كما شاءت وكيفما شاءت
وللرجل أن ينصح ويختار كما قلت بضوابط الشرع والدين _أيا كان _
لكن أود أن أقول فى هذه النطقه أنه بالفعل ان عمل المرأه فى بيتها هو أفضل _بالفعل ليس فرضا عليها _لكنها طبيعه وفطره فطر الله الناس عليها أن تعمل المرأه داخل البيت_مملكتها_وأن يعمل الرجل خارج البيت
فهو أصون وأحفظ للمرأه وفيه من الخير ما فيه من بعد عن الشهوات والشبهات وبالطبع البعد عن الاختلاط
أخيتى لا ينقص ذلك أبدا من قدرك فلربما امرأه سيدة فى بيتها هى أفضل من ملايين من الرجال والنساء الذين يعملون خارج البيت
أعتقد أن من تريد التعلم والتثقف والابداع بل والابتكار فلا يضيرها أبدا أن تكون داخل البيت أو خارجه
أما عن اثبات الكيان فلا أظن أبدا أن هناك طريق أفضل من أن تبدع المرأه داخل بيتها
لأانى أظن أنها ان ساعدت زوجها وأبنائها على الابداع خارج البيت وساعدت بناتها علىالبداع داخل بيوتهم وحمل الرساله فى المستقبل فهى بذلك قد أدت أسمى الوظائف وأعلاها ويكفيها جزاء ربها أما ان كان هدفها هو الظهور واللمعان فهى وشأنها وأدعو الله لى ولها بالهدايه والسداد

وأشكرك للمره الثانيه على هذا الموضوع
وأدعو الله أن أكون أوضحت وجهة نظرى دون خطأ أو اختلاط فى الأمور

[*محبة رسول الله*]

أيوه كده

أنا احب النظام فى الكلام
وأحب اللى يتكلم يرتب أفكاره ويقول
أولا وثانيا وثالثا

لا بجد يا دكتور أبو الخير راااااااااااااائع

ووفرت عليه كتير والله

لأن دى نفس وجهة نظرى

أكتر كلمة عجبتنى حتة انه البيت هو مملكة المرأة

فعلا عندك حق
الست لما بتخرج بتتبهدل والله

وأقولها بكل صراحة:

أنا مستنية أخلص الكلية ان شاء الله عشان أقعد فى البيت أتفرغ لعبادة ربنا وأفوق بقى من المهزلة دى وأبقى ملكة فى بيتى

واللى عاوزة أحققه فى نفسى

أوفر لزوجى الجو المناسب عشان يحققه

وزى ما بيقولوا :

وراء كل رجل عظيم امرأة

بس ايه النور ده يا نوووووووووون(او يا اوركيدااااااااا)

منورة يا قمر

وبشكرك طبعا يا مشمشة يا قمر
منورة الموضوع ورأيك طبعا عاجبنى ومقتنعه بيه

[AbU ElKhAiR-Let`s Go]

أشكرك يا دكتوره

[*محبة رسول الله*]

النهارده حصل موقف استفزنى قوى
وانا فى الصيدليه لقيت واحد بيقول لخالى ده فيه واحد كان عاوز عروسه وانا جبتله صيدلانيه وهو موافقش

بيقولوا بنت امورة ومحترمة قوى

وقاله أنا عاوز مدرسة

هو اصلا لا دوك ولا صيدلى ولا مهندس العريس ده......

فقلتله ازاى يعنى؟
وبعدين ايه اللى يجبرها على كده

قالى أصله عاوز مدرسة عشان الكادر والمكافآت والحوافز وما شابه ذلك

قررت انى ان شاء الله مش هشتغل

وانا مروحة عديت على خالتى فبقول أنا ان شاء الله مش هشتغل

قالتلى ازاى يعنى؟
ما تروحيش الكلية بقى وخلاص ملهاش لزمة

قلتلها وأنا مش هصرف على جوزى

قالتلى مش بتتقال كده

دى مشاركة

قلتلها : لألألألأ

قالتلى حرام تخدى صيدلة 5 سنين
ومتعمليش بيها حاجه

قلتلها ايه يعنى صيدلة
زيها زى أى كلية مقصدش فى المستوى

قالتلى مش حرام يتصرف عليكى كل ده وف الاخر تبقى ست بيت
أنا : ما كل الكليات بتصرف زينا مش احنا بس

كل ده ماما كانت بتصلى
سمعتنى وقالتلى انتى مش اتكلمتى فى الموضوع ده قبل كده ومجدش عرف يقنعك؟

فعلا ببايا كان عاوز يضربنى وانا بتكلم قبل كده

يلا حد يقولى وجهة نظر تقنعنى

عشان حسه انى غلط شوية

وصدقونى انا مستعدة اقتنع بسهولة ان شاء الله