لطلاب البكالوريوس

[العقرب]

اولا ازيكم كلكم وعاملين ايه

انا كنت عايز اسالكم او اسال كل واحد فيكم عن الاربع سنين اللي فاتوا
يا ريت يجاوب بصراحه


الاول ايه اكتر حاجه عجبتك في كليه الصيدله ؟


الثاني ايه اكتر حاجه ضيقتك وبسببها كرهت او كنت هتكره كليه الصيدله؟


بعد كل هذه السنين ما هي كليه صيدله او كيف وجدتها ؟


ما هي نصيحتك للجدد ؟


يا ريت كل واحد يقول اللي جواه من غير حرج ومن غير خوف ومن غير زعل


ورمضاااااااااااااااااااااااان كررررررررررررررررررررررررررررررررررررررريم

[hopeless]

ههههههههههههههههههه
انت جاي ع الجرح
هههههههههههههه..لا حول ولا قوة الا بالله
بسم الله الرحمن الرحيم
أولا:اللي عجبني ممممممممم مش لقية حاجة صراحة عجبتني هههه
لا لا نتكلم جد شوية..اللي كان عاجبني في الكلية اصلا من قبل ماادخلها اني حابة اكون
صيدلانية ..انا بحب اتعامل مع الادوية واكون فهمة فيها وكده..كان ده بيشدني اكتر من طب يعني
نقدر نقول اللي عجبني فيها مش كتير صحيح بس يمكن الواحد قابل بعض دكاترة محترمين ومميزين وكانوا
بيدوك الامل شوية في بكرة وكنت لما تيأس تقول ان شاء الله بكرة اكون زيهم..
ثانيا:اللي كرهته..ياااااااااااااااااه كتير ماتعدش ,,نظام الكلية ولا المحاضرات الغبية ولا السكاشن اللي مش عملية وبعض مواد هي اللي كرهتني في نفسي
تحليلية اعدادي واولى وتانية..بكرهها..واكتر حاجة كمان تعصبب ان مش شرط تذاكر تنجح او العكس
بتيجي بالحظ..يعني مادة تقول هتشيلها والتانية هتقدر فيها تنقلب الاية ومتفهمش هو حصل ايه
ثالثا:صيدلة هي...............
هي كلية يقال عنها كلية قمة ,تحسد عليها عندما يسألك احد (انت في كلية ايه)
هي كلية البعض بياخدها في 5 سنين والبعض الاخر في 10 زادوا او قلوا
هي كلية بتاخد منك ومن اعصابك ..من آمالك ومن أحلامك,,على امل اللي جاي احلى
مش عايزة اكمل بقى لاني كده جبت اكتئاب للمستمعين.. لكن انت قلت قول اللي نفسك فيه من غير حرج
او خوف..وبرده والله ماقلت كل اللي جوايا
رابعا:نصيحتي للجدد
بص يابني بصي يابنتي
تدخلوا الكلية لازم تكونوا عرفين عنها اي حاجة ولو القليل يعني نظامها اسلوبها موادها..كده يعني
من قريب او صديق ..ده شئ مهم جدا صدقوني لاني عانيت من الحكاية دي
تكون داخل وانت مستعد ( مش خايف)وتذاكر اول بأول..هنا تذاكر مش تحفظ اقرا المحاضرة بعنيك بس
يبقى فل اوي بس تواظب على كده وبالنسبة للسكاشن لازم يكون عندك خلفية انت داخل تشتغل ايه ومجهز نفسك لانها هتفرق معاك..انا بقول الحجات دي من واقع خبرة بجد,, مش شرط تكون حاضر الشرح لان الواحد مبيستفدش منه اوي وانتوا اكيد عارفين النظام بس ممكن من زميل يعني.
اه حاجة كمان مهمة اوي::الكورسات
لو ياابن الحلال متأكد انك هتمشي من غير كورس اوك وربنا معاك
بس بليز ماتجاذفش
انا وحدة مبحبش الكورسات وفعلا قعدت سنتين من غيرهم لكن جربتهم في اخر سنتين وحسيت فعلا بالفرق
لان في الكلية بتاعتنا مش شرط تكون مذاكر بس عشان تعرف تحل..لاء دي حاجات اكبر منك يابني
(فيه هتفهم الليلة ماشية اززاي والامتحانات والحلول وكده)
وعيش حياتك في الكلية عادي..ذاكر واجتهد وفي نفس الوقت استمتع وروح رحلات واخرج مع اصحابك
لان اليوم اللي بيروح مابيرجعش
وياريت كنت لقيت حد يقوللي كلمتين زي دول وينصحني ..بس الحمد لله بقى عدت
واتفائلوا خير وان شاء الله ربنا يجزينا.اللهم ااااامين
ارجوا اكون افادتكم واعذروني ع الاطالة بس بجد الموضوع مينفعش يترد عليه في كلمتين
بس كفاية عليكوا اوي كده ولو حد حب يسأل او يستفسر عن اي حاجة انا في الخدمة وممكن تبعتولي عالخاص وان شاء الله ارد عليكم
تقبلوا تحياتي وكل سنة وانتوا طيبين
ورمضان كريم

[Sincerity]

ما شاء الله يا دكتوره حاسه بتفاؤل فى التلات سنين اللى جايين , بس بصراحه كلامك مظبوط
ربنا معانا كلنا ونخلص الكليه دى على خير وفى خمس سنين بس

[العقرب]

اسعدني مروركم
وابداء ارائكم
وامني المشاركه من الجميع اقصد من لديهم الشجاعه لكن الخوافين
يقرؤا الكلام ده بس
هههههههههههههههههههههههههههههههههههه

[a_elkamhawy]

بسم الله
فى البداية أحب أقول لكم كل سنة وأنت طيبين
وأذكركم وأذكر نفسى بحاجه واحدة وهى لو مشيت خطوة لأمام اوعى اوعى تفكر فى الخطوة اللى خطيتها دايما ركز على المستقبل وان الخطوات اللى جايه تكون أحسن وأسرع
توكلو على ربنا واجتهدوا ولكل مجتهد نصيب
اخر حاجه أحب اقولها لازم يا جماعه كل واحد يكون واضع هدف أمام عينيه كويس أوى ومركز عليه ويشتغل علشانه ومش يخلى حاجه تخليه ينحرف عن الهدف بتاعه وان شاء الله هيوصل ( إن الله لا يضيع أجر من أحسن عملا )

[ana_moslema]

كل سنة وانتوا طيبين

هيه اتخرجنا وخمس سنين قضيناها فى الكلية

وبصراحة دكتورة hopeless قالت كل اللى فى نفسى سبحان الله

بس نصيحتى للجد خلى ليك نشاط فى الكلية مش تقول هقضيها مذاكرة وخلاص لان الانشطة بتفيد كتير وتخليك تتعامل مع الناس اكتر ويكون ليك خبرة ويخليك تحتك بالدكاترة انا عن نفسى معملتش كده ملقتش حد ينصحنى

ولو عايز تبقى صيدلى ناجح متعتمدش على المناهج بتاعتنا فقط ابحث ودور على النت وهات كتب ومراجع لان المناهح ......
بس وكل سنة وانتوا طيببن مرة كمان

[Amira Said]

ظريف اوي الموضوع ده،، الحقيقة الكلية في تقدم، ويمكن دفعتي عاشت المرحلة الانتقالية دي
يعني اولى وتانية حاجة وثالثة ورابعة حاجة تانية، كنظام يعني
اعتقد ان الدفعات القادمة حظها افضل، بالتوفيق جميعا