قصة كفاح ربع جنيه ... من الخرم الى اللا خرم !!!
بمناسبة العيد و العيديات هنحكي حدوتة صغيرة
في قديم قديم الزمان ......... يجي من عشرين سنة كدة
كانت توجد عملة تسمي الربع جنية
وكانت تتم صناعتها من الورق مع اضافة زخارف ليها
وكانت الورقة ماشاء الله قد كف اليد لعيل عنده 15 سنة
وكان الناس بتتبسط بيها وبيستعملوها في شراء مناديل فاين
او شراء مصاصتين او لبان تشكلتس
وكان في اطفال تجمعها في العيد عشان بتبقي لسه جديده
ومترضاش تصرفها
وبعدين كشئ طبيعي ومنطقي حصل تغيير - في الشعب ( وليس في النظام ) -
ونتيجة لده ظهر في قديم الزمان الي بعده ربع جنية لكن معدن ... وفيه خرم
وابتدا الناس تتجاهله في الاول ومترضاش تاخده
ومنهم الي يتعارك مع السواق لو اداله الباقي فيه ربع جنيه مخروم
لكن كان في ناس بتاخده وتحب تحطه في الميداليه لغايه لما تتملي
ويبقي مبلغ محترم
وناس ابتدت تجمع اتنين منه وتشتري مناديل فاين ( بقيت 50 قرش )
او يجمعو 4 منه ويشتروا مصاصة ( بقت 1 جنيه )
وطبعا مننساش السمكرية الي كان بيستعملوه بدل الوردة في المسامير
المهم دوام الحال من المحال وحسب التطور الطبيعي للحاجة الساقعة
حصل تغيير آخر - في الشعب برضه ( وليس في النظام ) -
ناس اتشالت وناس اتحطت
ناس اتخرجت من الكليات وناس لسه
ناس بتشرب شاي وناس بتشرب ينسون وواحد هناك بيشرب بيريل
كل الظروف دي ادت لظهور
الربع جنيه بدون خرم !!!
ربع جنيه ظريف كده تبصله تبقي عايز تضحك
المهم دلوقتي هما منزلينه يتجاب بيه ايه ؟
وبعدين من غير خرم مش هيتحط في ميدالية او وردة مسمار؟
لكن كل ده مش مهم
المهم الفاريتي الي موجود عندنا
الثلات انواع موجودين في الاسواق وبيتم التعامل بيهم حاليا
ومن الممكن الحصول عليهم من اي تاجر او محل عصير
او سواق ميكروباص
وبكده كملت العيلة
الجنيه المعدن / النصف جنية المعدن / الربع جنيه بدون خرم المعدن / الربع جنيه بخرم المعدن / العشرة قروش المعدن / الشلم او الشلن المعدن
وقريبا الخمسة جنيه المعدن
وان شاء الله في اول السنة ولا حاجة العشرة جنيه والخمسين المعدن
وهنمشي كلنا بجراب للموبيل وجراب للدنانير قصدي الفلوس
والي يروح البنك يروح بشوال او كيس قماش زي بتاع الخضار
وهنا يجيلي سؤال بيجمع نفسه
هل في بلد غيرنا فيها تداول لعملة واحدة ليها ثلاث اشكال في نفس ذات الوقت ؟
تحيا مصر ... و كل عام و أنتم بخير
رد مع اقتباس
.gif "Fop (29)")
