تعيش الصين حرة مستقلة !!!

[Anas]

[Al-Shaimaa]

لا حول ولا قوة الا بالله

بجد مش عارفة اضحك على اللي بيحصل للراجل ده
ولا ازعل على حاله اللي بقا اشبه بحالي وحال كل اللي حوليا دلوقتي
بقينا مستهلكين للمنتجات الصينية فقط
بقينا نشتري اللي نحتاجة واللي ما نحتاجوش
وقفنا سوق السلع المصرية بايدينا
رغم اننا لو فكرنا كويس هنلاقي اننا بنشتري السلعة الصينية مرة واتنين وتلاتة
طيب ما كنا من الاول اشترينا حاجة كويسة وخلاص


مشكور يا دكتور على الموضوع

[محمد_على_سلام]

موضوع جميل جدا تسلم ايدك
بس انا فعلا بقيت بكره الصين والمنتجات الصينية دول زهقونا كل حاجة عملوها
بس هى مش غلطتهم دى غلطتنا احنا اللى مش عارفين نعمل زيهم وبنتحجج بزيادة السكان

[عبدالله عبدالرحمن]

埃及生活

هههههه
لأ بجد جامدة يا 阿纳斯

بس هما مش محتاجين يحولونا لصينيين
لأننا ساعتها هنسبب انهيار الأقتصاد الصينى
هما افضل يسيبونا كده
مستهلكين
بنشترى كثير
وبنكسر كثير
ومبنعملش حاجة خالص

[white light]

تعيش الصين منتجه
وتعيش مصر مستهلكه

[asfourelgana]

مشكور والله يا دكتور

فعلا الصين بقت خلاص بتعمل اي حاجة وكل حاجة واحنا للاسف بنشتري

بدءًا من الاستيكه ومرورا بسجاجيد الصلاة والسبح وحتى الفوانيس

وفين مصر ف ده كله؟ مش عارفه بجد الحاجة المصرية اما مش كويسه خالص

واما غاليه جدا

ربنا المستعان

[د///*مطحونة*\\\]

موضوع جامد جدى
فعلا والله الصين عاملالنا غزو رهيب فى كل حاجة
حتى اللب السورى
بقا فى منه صينى بس اللب الصينى كبير جداا طبعا عن السورى وبكمية اكبر
والمشكلة ان بالرغم ان منتجاتهم تعبانة وبتبوظ فى اقل وقت برضو فى اقبال عليها
نقول ايه بقا الرخص يعمل اكتر من كدة
دة غير موضوع الزواج من الصينيات دة اللى الناس اتكلموا عنه فى الفترة الاخيرة
ناقص نفتح الحنفية ينزلنا منها سباك صينى
بس دة ان دل بيدل انهم ناجحين واحنا عمالين نكسبهم
فعلا بجد احنا فى التوهااااااااان
خلونا كدة مبسوطين بالموبيلات الصينى ام شريحتين وكاميرا وب 100 جنية والاطباق اللى مبتتكسرش
وناسيين ان الحاجات دى لو احنا اللى عملناها ممكن تخلينا من اكبر الدول الصناعية فى العالم
وكل دة بدل مانحاول نبقى زيهم بالرغم من اننا لو عملنا زيهم واتبعنا نهجهم هنبقى احسن منهم
منهم لله اللى كانوا السبب
شكرا على الموضوع يا دكتور

[NeScaFE]

موضوع حلو اوى ومضحك ..كويس بعد امتحان الصيدلانيات

اللى مضايقة منه بقى الدهب الصينى لان فى ناس بتستغله وتضحك على ناس

بيه على انه دهب اصلى .. وخصوصا اللى عاوز يضحك على مراته ويحب يجبلها

هدية .. بس هما مش غلطانين شعب وعاوز ينتج ويفكر بقى بيروح يدور على

الشعب الغلبان اللى هو احنا يعنى عشان يرود منتجاته ..ده احنا بيتهيالى مفيش حاجة

بننتجها غير اكياس الشيبسى والذى منه

[Anas]

شكرا ليكم جميعا على المرور

الموضوع للأسف بيحكي عن واقع مؤلم بنعيشه كلنا

زي ما حصل للراجل ده بالضبط من ساعة ما صحي من النوم مرورا بجميع أحداث اليوم

مع اننا لو بصينا لنفسنا و للصين هنلاقي اننا أحسن منهم بكتير

هما عدهم زيادة سكانية و المساحة يا دوب مكفياهم

احنا بقى العكس عددنا مش كبير و ربنا موسعها علينا بس مصممين نزنق على نفسنا

زي ما يكون واحد عنده شقة كبيرة و واسعة و مصمم يقعد هو و مراته و عياله في الطرقة !!!

الفرق بينا و بينهم انهم قدرو يشغلو مخهم و يستغلو كل مساحة البلد هناك

و عملو مصانع و استغلو الوفرة في الأيدي العاملة و صنعو كل حاجة و صدروها للدنيا كلها

انما احنا عندنا الأيدي العاملة بس بتكسل تشتغل في بلدها

يروح أي دولة تانية يمسح الأرض و يغسل أطباق و يبيع جرايد ... انما هنا لأ

ربنا يصلح حال البلد يا رب