بتقضى يومك ازاى فى رمضان

[DR.BIBO]

ايه رايكم ياجماعه فى الموضوع ده نشجع بعض على العباده فى رمضان يعنى مثلا كل واحد يقول هو وصل للجزء الكام فى القران ونشجع بعض
على قيام الليل وصله الرحم ولو حد مشترك فى اى جمعيه يقولنا على نشاطهافى رمضان عشان نشارك فيه
وايه رايكم لو كل واحد فسر ايه فى القران مكنش فاهمها يقولنا على تفسيرها وبكده نشجع بعض على العباده وكلنا ناخد حسنات
ويارب يكون الموضوع عجبكو

[محبة الهادى]

موضوع جميل يادكتور وان شآء الله كلنا نشارك

[Dr/Asmaa]

فكرة جميلة جدا
ان شاء الله ننفذها

[DR.BIBO]

ايه ياجماعة هو محدش عايز يشجعنا على العباده ولا ايه عموما انا ختمت جزئين من القران وصليت التراويح
وروحت جمعية رساله ولقيتهم عاملين انشطه كتير زى افطار شوارع وقوافل وتجميع ملابس وحاجات تانيه كتير
وربنا يوفقنا كلنا الى ما يحبه ويرضاه
مين اللى هيشجعنا ويقول بيعمل ايه

[dano_90]

أنا ببتدى يومى من الآخر ..
يعنى ,,بسهر بالليل لغاية 1.5 أو 2 أبتدى أجهز السحور للعيلة ..ولما أخلص بصحيهم من النوم يتسحروا ونقعد مع بعض نستنى نصلى الفجر ..
بعديها بنام شويا لغاية 9 أو 10 الصبح ..أقوم أقعد مع اخواتى الصغيرين شويا ..وأقوم أقرأ قرآن..
ممكن بعدها لو والدتى احتاجت منى حاجة بعملهالها ..
وأقعد على النت شويا ..
يأذن الظهر ..أتوضى وأصلى ..
ممكن أقرأ قرآن ..او اقعد على النت اقرأ موضوعات ..
وأنام شويا لو أمكن (ساعه كده )
أقوم بقى أتوضى وأصلى العصر ..
أجهز مع والدتى شوية حاجات علشان الفطار ..
وساعات بتفرج على الكرتون ..(أصلى بحبه )
واستنى بقى لغاية آذان المغرب أفطر ف 10 دقايق بكتيره ...
أقوم أصلى المغرب ..
بعديها بقعد مع ماما وبابا واخواتى قعدة عائلية كده ..
وأروح المسجد أصلى العشاء والتراويح ..
لما أخلص بروح عند أى حد من قرايبى ..
وياسلام لو عندهم حد من الناس الكبار ف السن دول ..بحب اقعد معاهم جداااااا ..قعدتهم مسلية وبيدعولى كتير ..
بعديها بروح أقرأ قرآن او اقعد على النت شويا ..وهكذا ..

thanx
nice topic

[قناع الذهب]

مممممممممم بصى يا بيبو انا الحمد لله وصلت للجزء السابع و بصلى القيام كل يوم بس فى البيت
اما عن يومى بقضية ازاى فانا بصحى من النوم بعد الضهر بقوم اصلى الضهر واشوف لو ماما عاوزة حاجة بغلبها شوية بس بعملها فى الاخر لحد الفطار وبصلى العصر طبعا وبنفطر كلنا سوا وبعدين بصلى المغرب واشوف التليفزيون شوية واصلى العشا والتراويح واقعد على النت شوية وبعدين اقوم اقرا قران وادعى واتسحر لحد الفجر وممكن انام بعد الفجر بنص ساعة وهكذا

[نون نون]

انا لو نمت مش بصحى بسهوله

ولو نمت بدرى مش هصحى اصلى الفجر

فبسهر لحد ما اصلى الفجر
وانام لبعد العصر اهئ اهئ
بيقولولى علشان تصلى الفجر تطيرى بقيه اليوم

مش عارفه بقى اعمل ايه

[Amira]

انا بنام على الساعه 12 او 1 كده

وبصحى الساعه 11 بساعد ماما لو عايزه حاجه وبعدين اصلى الظهر لما يأذن

الساعه 2 كده بقرأ قرآن لحد قبل العصر بشويه وبعدين بفتح النت شويه وبعدين اصلى العصر

واقوم اساعد ماما تانى لحد ما الساعه تيجى الساعه 5 بقوم اشوف برنامج قصص القرآن

وبعدين المغرب يأذن افطر وبعدين اصلى المغرب وافضل لحد العشاء ماتأذن نايمه صاحيه

وبعدين اقوم اصلي العشاء والتراويح وبعدين اقرأ قرآن لحد الساعه12 وبعدين انااااام واصحى الفجر اتسحر

واقرا قرآن لحد ما الفجر يأذن وبعدين اصليه واقعد نص ساعه احفظ بعد الفجر وانام بقى واصحى الساعه 11 ........ وهكذا

بس كده يومى خلص

[SHYMAA]

انا باتسحر على 2.5 كده وبعدين اقرا ورد من القران
وبعدين اصلى الفجر وانام
باصحى بقى على 2 كده او2.30 مش بعد كده
اصلى الظهر وبعدين اقرا شوية قران كمان
واصلى العصر واجرى على المطبخ
اعمل الاكل واهم حاجه طبعا السلطه بس دى بتكون قبل الفطار بنصف ساعه بس
وبعدين اقرا برضه شوية قران
افطر واروح الصيدليه واجى على 10.30 اصلى العشاء واقرا شويه قران كمان
بالنسبه للتليفزيون مش باسمع حاجه خالص
عموما انا ختمت 16 جزء
وبالتوفيق ان شاء الله

[DR.BIBO]

انا متاخرة اوى فى القران ولسى فى الجزء العاشر
يارب اقدر اختمه ان شاء الله ادعولى