صفحة 1 من 2 12 الأخيرةالأخيرة
النتائج 1 إلى 10 من 15

الموضوع: شرح مختصر لمواد أولي كلينيكال

  1. #1
    Pb Elite
    تاريخ التسجيل
    Sep 2008
    الدولة
    .. مع الله ..
    المشاركات
    3,120

    Wink شرح مختصر لمواد أولي كلينيكال


    يااااااااااااه !.... خلصت الثانوية بحلوها و مرها و دروسها و سهرها و توترها ....
    و دخلنا كلية صيدلة المنصورة ... اجمل كلية ...و أكفأ عميد... و ارقي دكاترة..... و اجدع ناس
    كلية تستحق فعلا كل ذرة مجهود بذلناه في الثانوية العامة
    اغلبنا كان فاكر ان الكلية هي آخر درجات السلم ... و انه صعد معظم خطوات سلم حياته في المرحلة الثانوية
    لكن.........
    لما دخلنا الكلية اكتشفنا اننا كنا "بنحبو" !!.... و اول عام في الكلية هو العام الذي ستتعلم فيه الوقوف علي قدميك و المشي .. ولوهمتك عالية هتتعلم فيه الركض ....لتنطلق في السنوات القادمة ان شاء الله .. نحو ذات يرضي عنها الله و تقر بها عين الرسول و يفخر بها الوالدين و يحبها الناس...

    نستعرض معكم في هذا الموضوع نبذة مختصرة و مبسطة عن كل مادة من مواد سنة أولي
    عشان يبقي عندكم خلفية و فكرة عامة عن المواد و تعرفوا الامور ماشية ازاي
    نسأل الله ان يرزقنا القبول و يرزقنا الاخلاص في كل قول و عمل
    " رب اشرح لي صدري و يسر لي امري و احلل عقدة من لساني يفقهوا قولي "

    *العام الدراسي عبارة عن ترمين ... كل ترم عبارة عن 7 مواد مستقلة ...بمعني,,, مفيش مادة مقسومة علي الترمين
    *كل مادة عليها 100 درجة ...يبقي الــمجموع الكلي للترم 700 درجة
    * بعض المواد لازم تنجح فيها عشان تقدر تاخد المادة اللي بعدها لانها بتعتبر pre-requesit للمادة القادمة
    و البعض الاخر اذا لا قدر الله معدناش فيها مش هيأثر علي مواد الترم القادم


    .:: Semester 1 ::.
    __
    .
    .

    المواد هي :
    English – Math – Biophysics – Cell Biology – Botany – Analytical chemistry 1 – Organic chemistry 1

    نمسك بقي مادة مادة و نقول الخلاصة بتاعتها

    Englsih (1)
    كورس الي حد ما بسيط ... اللي بيحب اللغة الانجليزية مش هيتعب فيه ان شاء الله
    هتدرس فيه شوية grammer و vocab. من منهج ثانوي
    و basics عن كتابة الdialogue و الparagraphs
    بالاضافة الي communication skills و speaking و بتبقي فضااااايح ههههههه
    الجزء اللي هيحتاج منك شغل شوية هو عبارة عن مقدمة لمادة ال terminology اللي بنتعلم فيها المصطلحات الطبية ( تدرس في سنة تانية ان شاء الله) ... هتكتشف في الجزء ده ان فيه فرق بين الانجليزي العادي و..الانجليزي الطبي ... " فرق كبير علي فكرة ! "

    Math (2)
    طبعا الرياضيات دي لعبتنا !! ... مادة جميلة جدا جدا مش محتاجة منك اكتر من انك تفهم كويس
    الامتحان بيقيس مدي فهمك ... فضروري انك تذاكرها من الاول عشان تكون ملم بكل الافكار
    و الدكتور مش بيخرج عن كلام المحاضرة ... لكن ده ميمنعش انه ممكن يربطلك اكتر من فكرة مع بعض فركز فيها عشان تضمنها في جيبك ....
    هناخد فيها قشور من رياضة 2 ... التفاضل بتاع ثانوي بتوسع شوية و هناخد جزء من التكامل
    هندرس الlimits (النهايات) تاني و هناخد طرق حل الدالات و المعادلات ..(solving functions & equations) و جزء من الاحصاء بتوسع شوية ....

    Biophysics (3)
    مادة جميلة و كلها تخيل ... محتاج فيها تفهم كتير و تحفظ قليل عشان تعبر بيه ...
    هندرس فيها الانتشار ( diffusion) بتوسع و منه هتفهم مراحل تحلل قرص الدواء في بطن سعادتك و تقدر تحدد الاسرع الاقراص ولا الفوار ولا البودرة ولا ايه بالظبط ...
    كمان هتدرس فيها جزء حاجة اسمها "surface tension" و دي من الاخر بتوضح ليه نقط الماء بتنزل من مدورة مش مربعة ولا مستطيلة ولا مثلثة !! .... (بكره تفهموا انا اقصد ايه)

    Cell Biology (4)
    مادة ابسط مما يكون .... هتدرس فيها تركيب الخلية و مكوناتها و اهمية كل مكون
    يعني استرجاع لمعلوماتك السابقة عن الخلايا من ابتدائي و اعدادي و ثانوي
    هتدرس كمان الخلايا يتتواصل مع بعض ازاي ؟؟ (cell signaling and communication) و ده يعتبر مقدمة للbiochemisrty
    و هتدرس مختصر لدورة حياة الخلية cell cycle و نبذة بسيطة عن ال cancer و انواعه و الفرق بين الخلية لسرطانية و الخلية الطبيعية .....

    Botany (5)
    مادة النبات .... مادة متنوعة الاوجه فيها مصطلحات و وصف و جداول و رسومات
    لازم تتذاكر " بذكاء " عشان متتوهش .... و لازم تبقي عارف انك بتدرس كورس مكثف جدا للنبات
    عبارة عن منهج اعدادي كله و نص اولي ( في النظام التاني)
    هتدرس فيه الاول النبات عبارة عن ايه و هتاخد الثغور (Stomata) بأدق التفاصيل و هتدرس " شعر النبات و الأُصة بتاعته كمان " و هتشوفه تحت الميكروسكوب ... حاجة خياااااال سبحان الله بكل ما تحوية الكلمة من معاني
    بعد كده هتتقدم شوية و تاخد تركيب الساق و الجذر و الفرق بينهم و بعدين تاخد تركيب ورقة الشجر
    اللي فات ده يعرف بتشريح النبات ((anatomy
    فيه جزء تاني ... عبارة عن غزل عفيف و صريح في شكل النبات و عود النبات و ورق النبات و فاكهته وبذوره و ساقه و جذره و ورده... و كل حاجة في النبات من طأطأ لسلامه عليكم !!
    يعرف هذا الجزء بالــMorphology ...
    Morphus يعني شكل ... و logia يعني علم .... اذن هي علم : شكل النبات
    دي بقي اكتر مادة بتتذاكر .... و اكتر مادة لازم تاخد بالك منها ... لان كل محاضرة معتمدة علي اللي قبلها
    و كل سكشن يعتمد علي اللي قبله ... لاااااازم تتذاكر أول بأول عشان متلومش نفسك في الاخر .. و هتلاقيها تمام ان شاء الله ...
    بعد كده هتركز علي بعض الleaves و تدرس خواصها باختصار و موادها الفعالة و بتعالج ايه زي النعناع mentha لعلاج الانتفاخات و الsenna للامساك و الdigitalis للقلب و ...
    في الاخر هتاخد جزء باختصار شديييييييد جدا .... عن النتح و البناء الضوئي و بعض الظواهر الاخري الخاصة بالنبات



    Analytical chemistry 1 (6)
    مادة التحليلية .... لذيذة خصوصا لو درسها لكم د\ فتح الله بلال ...
    هتدرسوا فيها الـspectroscopy ... جزء جميل افهمه و اقرأه باستمرار و هيبقي كويس اوي ....
    كمان هتدرسوا خواص المادة solid – liquid – gas ....و الـelement والcompound و دي حاجات مكررة من العلوم التراكمية اللي درستها ... لا جديد فيها
    هتدرس فيها التقريب ... امتي نقرب لرقمين و امتي لواحد ... يعني مثلا 1.2355 .. امتي نقربه لـ 1.24 وامتي لـ 1.236.... و هكذا ,, كمان هتاخد اسرار عن الصفر و امتي يكون معترف بيه كعدد و امتي نرميه في الشارع !..
    هتدرس فيها كمان جزء مسائل بسيطة و هتاخد ازاي توزن المعادلات .... مكرر من منهج كيمياء ثانوية عامة
    هتدرس الأنيونات و الكتيونات (anions & cations) ... و ازاي تقدر تعرف ان معاك حديد مش نحاس مثلا .. و لوعندك الاتنين ازاي تفرق بينهم ... الجزء ده سكاشنه ممتعة خصوصا انك مش مطالب بحفظ التجارب و انما مطلوب منك اتقانها و عملها بشكل سليم ... و بتدخل امتحان العملي بورق التجارب و تكون راسم لنفسك خطة تمشي عليهاعشان تتعرف علي الايونات المكونة للملح المجهول اللي قدامك ... للأسف محدش قالنا كده غير قبل الامتحان بيوم ... بس اديني قولتلكم اهو ( أي خدمة )
    بس متفرحوش اوي كده ! ... التجارب مطلوبة في النظري و بتتسأل في معادلاتها و في كيفية الفصل بين الايونات المختلفة ...
    مادة التحليلية بشكل عام مادة رائعة ... و تعتبر اجمل و اكمل قسم في الكلية باجماع الكثير من الناس سواء كمعامل او شرح او دكاترة او معيدين او امتحانات شفوي و تحريري او عمال ... واللي بيذاكرها بيلاقي نتيجة تعبه و احسن كمان ...اهم حاجة التكرار التكرار و ترتيب الافكار ...

    Organic chemistry (7)
    هتدرس فيها تسمية المركبات من اول ... و كمان خواص كل مركب و تقارن بين مدي استقرار كل واحد عن التاني و الخواص الحامضية و القاعدية (acidity & alkalinity) و لما بنرمي ذرة علي مركب بتدخل ازاي و فين (addition & substitution reactions)... و بعض ال basics الاخري اللي هتخدمك في عضوية الترم التاني ... هتدرس و لاول مرة في حياتك التفاعل بيمشي ازاي ... ليه الذرة الفلانية دخلت من فوق مش من تحت
    ليه حصل اكسدة مش اختزال ... ليه مينفعش يتكون مركب بالشكل الفلاني ... من الاخر ... هتسأل نفسك " ليه" كتير أوي ....
    ده بالاضافة الي جزء يعتمد علي الفهم اولا ثم الحفظ ... وهو عبارة عن معادلات لتفاعلات المركبات المختلفة و طرق تحضيرها ... بعض التفاعلات هيتطلب منك تحفظ اسمها و بتتسأل فيه ...و الترم يركز علي المركبات الاليفاتية (aliphatic compounds)


    بكده يكون الترم الاول انتهي ....نخش بقي علي الترم التاني


    .:: Semester 2 ::.
    __
    .
    .

    المواد :
    Human rights ( No prerequesit) – pharmaceutical orientation(No prerequesit) – Organic chemisrty 2 (prerequesit : Organic 1) – Analytical chemistry 2 (prerequesit :Analytical 1) – Pharmacognosy(prerequesit : Botanny) – Histology(prerequesit : Cell biology) – Physical chemistry (prerequesit : Biophysics)


    Human rights (حقوق الانسان) (1)
    ... تضاف للمجموع عكس الكليات الاخري و عليها 100 درجة زي باقي المواد
    هتتعلم فيها امتي نرفع قضية و ايه حقوقك و واجباتك و يعني ايه حقوق انسان و مين بيدافع عنها و هل فيه تعارض بينها و بين عقوبة الاعدام ولا لأ .... بعد كده هتاخد نماذج لحقوق الانسان زي حق العمل و التعلم و..
    فيه في الاخر محاضرتين تلاتة تختص بحقوق الصيدلي و المريض و الطبيب و علاقتهم ببعض
    الدكاترة بيبسطوا المادة و بيختاروا مواضيع مفيدة و سهلة ... ابسط بكتيرمن حقوق انسان النظام التاني متقلقوش
    اهم حاجة تكون بتعرف تكتب كلام شبه الكتب... دكاترة حقوق بيحبوا الكلام المكعبل و الحوارات دي ... بس ابعد تماما عن انك تكبر خطك زياد عن اللزوم و ترسم الياء شبرين و بين كل سنة من اسنان السين شبر و نص
    عشان تملي الورقة و خلاص ......هتنقص علي طول ...... !!

    التوجيه الصيدلي .... Pharmaceutical orientation (2)
    تعتبر مقدمة لـلـdrug design (تصميم الدواء) و للصيدلانيات
    بتدرس فيها الـdosage forms المختلفة زي اللبوس و الاقراص و المراهم و... بالاضافة الي الفروقات اللي بينهم و المميزات و العيوب
    هتعرف اماكن الحقن المختلفة زي الوريد و العضل و تحت الجلد و في العين و القلب مباشرة كمان و ...
    كمان هتعرف انواع الروشتات المختلفة و طرق صرفها و هنحتفظ بيها ولا لأ ... وامتي منصرفش الروشتة و امتي نرجعها للطبيب و هكذا ...
    هتدرس جزء رائع يعرف بالincompatibilites بيتكلم عن تعارض الادوية مع بعض ...لو لاقيت دوائين في الروشتة مينفعش يتاخدوا مع بعض هتعمل ايه ؟ عرفت ازاي اصلا انهم مش بيتاخدوا مع بعض ؟ الحل الامثل من بين الحلول المتاحة ايه؟

    Organic chemistry -2 (3)
    نفس الترم الاول بالظبط و لكن بتطبقه علي المركبات الاروماتية (aromatic compunds) زي البنزين و الحاجات الحلوة دي ...
    هتدرس جزء يتكلم عن طرق التعرف علي المركب من خلال اننا نديله طاقة يشعها تاني بعد ما يغير فيها ... جزء جميل لكن محتاج فهم عالي ... لو فهمته و استوعبته هتمشي فيه باذن الله
    طرق التعرف هتكون بواسطة : الـ NMR و الـ IR و الIV و الMass spectroscopy
    المطلوب منك تعرف ازاي تتعرف علي المركبات من خلالهم و تعرف كل واحدة بتشتغل ازاي و الفرق بينهم ايه ... جزء مهم و الدكاترة يعشقونه خاصة في الشفوي

    Analytical chemistry -2 (4)
    الترم ده بقي التحليلية ممتعة لابعد حدود .... سواء المحاضرات او السكاشن
    اكيد سمعتم عن السحاحة ... عموما هي دي بطلة التحليلية في الترم ده
    هتدرس حاجة اسمها titration ... من خلالها بتتعرف علي تركيز المادة اللي معاك باستخدام السحاحة
    هتاخد 3 انواع من التنقيط بالسحاحة (titration) ... نوع يعتمد علي خاصية الPH (acid-base titration) و نوع علي خاصية الترسيب(perciptemetry) و الاخير علي تكون مركبات مكلبظة تسمي Complex (complexmetry)
    اجمل حاجة ان النظري هتلاقيه ماشي مع العملي تمام .. تاخد المحاضرة تطبقها في المعمل بايدك
    فهتلاقي الموضوع ممتع جدا ...
    هتاخد جزء نظري فقط دون ان تطبقه يعرف بالgravimetry برده بنعين بيه التركيز و لكن بطريقة تانية ...
    دي الصراحة اكتر مادة استمتعت بيها ... و اعلي درجة جبتها في المواد كلها (97,5 %)

    Pharmacognosy العقاقير (5)
    الترم ده في جزء مكرر من الترم الاول ... سواء في الmorphology أو الanatomy
    بس زي ما اخدت استخدامات المواد المستخلصة من الورق ... هتاخد نفس الكلام مع اجزاء اخري
    زي الflower و ال bark وال herb ... و في نباتات هتتكرر لانك اخدتها الاول كleaf هتاخدها كعشب علي بعضه بقي زي النعناع ... مش هيبقي فيها اضافات كتير
    مش عايزة ادخل في تفاصيل اكتر من كده في العقاقير عشان الموضوع ميطولش مني,, بس الترم التاني هاااايف مقارنة بالترم الاول ... و زي ما د\ جلال معتوق كان بيقول لي ..." الامتياز بيناديكم في عقاقير الترم التاني "
    صور عملي العقاقير كاملة هنا :



    Histology (6)
    مادة يدرسها لنا رئيس قسم الهستولوجي في طب بيطري ... د\ هاني مرعي
    هتدرس فيها جزء من الcell bio. تاني ... و تتوسع في تركيب كل حاجة في الخلية بالتفصيل
    و بعدين نرتقي الي مستوي الانسجة و بعدين الاجهزة علي بعضها و بتعتمد المادة بشكل كبير علي الصور و ازاي تفرق من الاغشية المختلفة و الاعضاء المختلفة من خلال قطاعات طولية و عرضية فيها
    محدش يتخض لان دكتور هاني ما شاء الله عليه ابدع معانا و مع الدفعة اللي قبلنا و هتحس ان المادة دي مزاااااج
    تقدروا تتطلعوا علي شرايح الهستولوجي كلها من هنا :



    Physical chemistry (7)
    دي مادة مشابهة للصيدلانيات في النظام التاني الي حد كبير
    هتدرس اللزوجة viscousity و طرق قياسها و بعض الظواهر الاخري
    هتدرس طبيعة السوائل المختلفة ... في حاجات زي المية لما تقلبها ميحصلش حاجة ... و في حاجات زي لما تقلبها تجمد و حاجات العكس لما تقلبها تخف اكتر ...
    ده غير جزء عن المسائل و انواع المحاليل و القوة اللي بين الجزيئات في المحلول الواحد و الحاجات الطاردة للحرارة و الماصة لها ...و بعض الخواص الاخري اللي علي نفس المنوال ...
    بعد كده هتاخد المحلول و المعلق و المستحلب و الغروي ...و الفرق بينهم و الحاجات اللي بتأثر عليهم و ازاي نعرف ان ده مستحضر كويس ولا لأ ...

    كده خلصنا الترم التاني ........ بعد كده نقولك مبروك .......... و نشوفك في سنة تانية ان شاء الله

    ملحوظة:
    الموضوع مكتوب من الذاكرة ... و بناء علي تجربتي الشخصية خلال عامي الاول في الكلية
    الف مبروك ليكم كلكم ... ويارب ايامكم كلها نجاح و تفوق في رضا الله سبحانه و تعالي

    لو فيه أي استفسار انا تحت أمركم ....

    اختكم في الله و لله.......BoNbOoNa



    سبحانك اللهم و بحمدك ... أشهد ان لا اله الا انت ... أستغفرك و أتوب اليك

  2. #2
    Pharma Student
    تاريخ التسجيل
    Sep 2007
    الدولة
    Mansoura
    المشاركات
    2,026

    افتراضي

    كويس و الله
    كنت عايزة أعرف انتو بتاخدوا ايه

    جزاكى الله خير يا بنبونة : ))

  3. #3

    افتراضي

    جزاكي الله .. خير .. وعرض جميل ورائع جدا ..
    انا شخصيا كان نفسي أعرفه ..

  4. #4
    Banned
    تاريخ التسجيل
    May 2009
    الدولة
    في بيتنا
    المشاركات
    666

    افتراضي

    I got a permanent ban on the board for being vulgar, reflecting the atmosphere where I am living

  5. #5
    Pharma Student
    تاريخ التسجيل
    Mar 2009
    الدولة
    in my unique world
    المشاركات
    815

    افتراضي

    جزاكِ الله خيرا غاليتي ..

    وفقك الله

  6. #6
    Pb Elite
    تاريخ التسجيل
    Sep 2008
    الدولة
    .. مع الله ..
    المشاركات
    3,120

    افتراضي

    اقتباس المشاركة الأصلية كتبت بواسطة NonY مشاهدة المشاركة
    كويس و الله
    كنت عايزة أعرف انتو بتاخدوا ايه
    جزاكى الله خير يا بنبونة : ))
    واياكم يا نوني ... أشكرك
    اقتباس المشاركة الأصلية كتبت بواسطة Gohary مشاهدة المشاركة
    جزاكي الله .. خير .. وعرض جميل ورائع جدا ..
    انا شخصيا كان نفسي أعرفه ..
    شكرا جزيلا... من بعض ما عندكم يا د\ جوهاري



    اقتباس المشاركة الأصلية كتبت بواسطة حموودي النمر مشاهدة المشاركة
    آآآآآآه بس لو انا صغير سنه عشان كنت اقرا الكلام ده قبل ما ادخل اكلينكل بدل الضياع الي كنا فيه بالاول على العموم بجد كلامك حلو وماشاء لسه فاكره حاجات كتير من الي خدناها في الترم الاول

    جزاكم الله خيرا يا د\ مرسي .... ربنا يوفقك ان شاء الله

    اقتباس المشاركة الأصلية كتبت بواسطة lovely princess مشاهدة المشاركة
    جزاكِ الله خيرا غاليتي ..

    وفقك الله
    جزاكي الله بالمثل يا برنسس ... شكرا لكي

  7. #7
    Pharma Student
    تاريخ التسجيل
    Oct 2007
    الدولة
    in dreams' world
    المشاركات
    154

    افتراضي

    حبيبتي احلى بونبونة .......
    ربنا يبارك فيك يا رب

  8. #8
    Moderator
    تاريخ التسجيل
    Dec 2008
    المشاركات
    2,631

    افتراضي

    شرح رائع يا بونبونا
    جزاكى الله كل خير

  9. #9
    Pharma Student
    تاريخ التسجيل
    May 2009
    الدولة
    Mansoura
    المشاركات
    342

    افتراضي

    ظهرت نتائج الثانوية 2009

    صيدلة المنصورة أخدت حوالي 96.7 %

    مبروووك للدفعة الجديدة

  10. #10
    Pharma Student
    تاريخ التسجيل
    Apr 2009
    الدولة
    Egypt :)
    المشاركات
    765

    افتراضي

    حــــــــــــــــــلــــــــــــــــــــو يا بنبونة ياريت الكلام ده يبقى قبل الدراسة مش بعد ما نخلص لو كان ينفع

صفحة 1 من 2 12 الأخيرةالأخيرة

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •