مسلسل رمضان ( مجنون سارة ) .. تم التحديث : 03 - 08 - 2012

[chemist girl]

تسجيل متابعه

[E.Raafat]

الحلقة السادسة عشر ( زيارة مفاجأة )

صباح اليوم التالي وجدت نفسي أرتدي ملابسي عازما على زيارتها في بيتها ,, ألقيت السلام على أبي و أمي الجالسين في الصالة و لم أخبرهما وجهتي ,, قطعت المسافة الفاصلة بين بيتها وبيتي بسرعة البرق رغم أنّي لا أعلم ما سأقوله أو أفعله ,, فقط أريد رؤيتها ,, أريد أن أنظر بسمتها بل أريد أن أستأثر بتلك الوردة لنفسي دون الآخرين ...

رأيت سيارة العريس أمام البيت فازداد الوضع سوءا , ترددت في الدخول و أردت العودة و الخروج من الباب الخلفي لكنّي قبل أن أهمّ بالرحيل أوقفني صوت شجار داخل البيت فقررت الدخول و إليكم ما حدث :-

( أنا ) ____ فيه أيه يا جماعة ؟؟ صوتكم جايب أخر الشارع ...

( محمد ) ___ يا عم أيه اللي جابك دلوقتي ؟؟

( خالي ) ____ " بعدما رآني أهمّ بالرحيل " إدخل يا ابراهيم رايح فين ؟؟

( أنا ) ____طب ممكن أعرف أيه اللي بيحصل ؟؟

( محمد ) ___ سارة ,, فتحت موبايلي شافت رسالة من رقم غريب مكتوب فيها كلام مش كويس و عليها و قامت زي ما انت شايف ..

( سارة ) ____ " بعدما نظرت تجاهي بقسوة " انت ممكن تشوف الرسالة و تحكم بنفسك ..

( محمد ) ____ دي مجرد رسالة عادية ممكن تكون جاي بالغلط ,, مش عارف هيه مكبّرة الموضوع ليه ؟؟

( أنا ) ____ خلاص يا جماعة دي ساعة شيطان و هتروح لحالها ..

( محمد ) ____ خلاص بقى يا سارة أهوه شهد شاهد من أهلها ,, ابراهيم قال الخلاصة ,, ساعة شيطان و هتعدي ..

( سارة ) ____ " بعدما كادت تحرقني بنظرتها " المرة دي هعدّيها بمزاجي ..

( خالي ) ___ طب يالاّ يا سارة شوفي ابن خالتك يشرب أيه ...

( سارة ) _____ يقوم هوّه يعمل لنفسه ,, هوّه مش عامل حلال المشاكل ؟؟

( أنا ) ___ رجاله و لازم نقف في صف بعض ,, مش كده ياعريس ؟؟

( محمد ) ____ كده يا بن خالتي ...

( أنا ) ____ أنا هقوم أنا أعمل لنفسي عصير حد فيكم هيشرب معايا ؟؟

( محمد ) ____ لا إحنا سبقناك من زمان ..

( أنا ) ___ طب بعد إذنكم ...

( محمد ) ____ متنساش تقول لها كلمتين يعقلوها ..

دخلت المطبخ فوجدت سارة ممسكة بالسكين ,, و إليكم أخر المستجدات :-

( سارة ) ____ ساعة شيطان و هتروح لحالها !! انت هتجنني ؟؟

( أنا ) ___ ألف سلامة عليك من الجنون يا حبيبي ,, و ماله لو اتجننتي شويه مش شايفه حالي بقى عامل إزّاي ؟؟

( سارة ) ____ انت بتهزّر !! و بعدين انت كنت عارف ان محمد بيجيله رسايل زي دي منين ؟؟

( أنا ) ___ بس ابعدي السكينه إلاّ السلاح يطول ...

( سارة ) ___ انطق عرفت منين ؟؟

( أنا ) ___ شوفت تليفونه خلسة من وراه و هوه بيلبس البدلة يوم الخطوبة ..

( سارة ) ____ انت ناوي على أيه بالظبط ؟؟

( أنا ) ____ كل خير ان شاء الله ,, أنا كلّمت والدي امبارح في الموضوع ..

( سارة ) ___ كلمته في خطوبتي !! أيه الشجاعة دي ؟؟ و وصلتم لأيه ؟؟

( أنا ) ____ وصلنا لطريق مسدود بس ان شاء الله ناوي أكلمه تاني ..

( سارة ) ___ انت مجنون ,, و شكلك هتوقّع الدنيا كلها في بعض ..

( أنا ) ____ أنا مستعد أقف مكاني ما تحركش خطوة واحدة لو انت قولتي لي متكملش ..

( سارة ) ____ طب ليه ادخلت النهارده و هدّيت الموضوع ؟؟

( أنا ) ____ كان لازم أعمل كده ,, أصل عمر ما فيه خطوبة بتنتهي من أول خناقة ..

( محمد ) ____ دول مش كلمتين بتقولهم ,,لو سارة قافلة دماغها سيبك منها ..

( أنا ) " بصوت عالي " لا يا سيدي سارة فهمت الموضوع ,, بس يارب انت تفتكر المواقف دي ..

( سارة ) ___ عملت العصير اللي انت عاوزه ؟؟ خلصنا و اطلع برة عشان ألحق أحضّر العشا ,, هتتعشى معانا ...

( أنا ) ___ دا لو انت عاوزاني أتعشى ,, إنّما لو عاوزاني أمشي في دقيقة أكون في بيتنا ...

( سارة ) ___طب اطلع اقعد بره معاهم ..

إبراهيم رأفت
الحلقة القادمة ( عشاء جماعي )

[Mouri Ran]

متابعة ^_^

[E.Raafat]

[Dr_Cinderellaaaaa]

تسجيل متابعة

[Dr.Sanureta.S]

حلاوة اما اشوف اخرتها معاك يا عم ابراهيم

[E.Raafat]

[chemist girl]

وتلاقيك انت اللي بتبعتله الرسايل دي
..................متابعه......................

[M.Hegazy]

القصة في أوجها و قمتها ..

متابعين بشغف .. ^_^

[الملاك الباكى]

من فضلك نزل الحلقات كلها بسرعة مشتاقة اعرف النهاية ويا رب تكون نهاية سعيدة