مذكرات صف ظابط ( ملحمة أسطورية)

[E.Raafat]

متابعة حضرتك للقصة بيزيدها شرفا
الحلقة القادمة عصر الثلاثاء

[E.Raafat]

الحلقة السابعة عشر ( سمك ,,,,,,,, لبن ,,,, تمر هندي )
صلّيت الفجر جماعة في المسجد وجلست كعادتي أقرأ في المصحف الشريف لكنّي لم أستطع الإستمرار حتى شروق الشمس فقد غلبني النوم ,,,,, ساعة واحدة على سريري المريح ووسادتي التي تمكنك من التوغل في أعماق النوم عكس ما كنت أجده في الجيش ,,,, ساعة واحدة ثم جاءت أمي تحاول إيقاظي لكنها فشلت في ذلك فقالت ( طيب أنا لسه فاكره إزاي كنت بصحيّك) خرجت ثم بعد ذلك بقليل حدث ما لم يكن في الحسبان ,,,, رأيت سارة ( بهيه ) تدخل حجرتي يعلو وجهها الغضب الشديد وإليكم مجمل الحوار:-
* سارة * ---- اصحى بقى ياحبيبي يدوب تلحق تجهز عشان توصّلني المدرسة ,,, يالا يا بابا اصحى بالذوق أحسن لك ....
* أنا *---- أوصّلك المدرسة !! ليه النهاردة بالذات اللي ممكن تتوهي لو روحتي لوحدك ؟؟؟
* سارة * ---- قوم ياحبيبي متخلينيش أقلب على الوش التاني ,,,, أنا يدوب ماسكة نفسي بالعافية ..
* أنا * بصراحة هيه من جهة ماسكة نفسها هيه مبتكدبش ,,دا أنا كنت متوقع ضرب وشتيمة وكنت مجهز رقم الإسعاف على الموبيل عشان يلحقوا ينقذوني لو الموقف تتطور .. طيب ياسارة خمس دقايق على السريع وأقوم أوصلك ياحياتي ....
* سارة * ولا دقيقة واحدة .................
ولسه بتفكر تستعجلبي بإحدى قبلاتها البريئة التي مازال أثرها ينساب على خدي ,,,, دخلت ست الحبايب وقالت ( لا ااااااااااه إنتم ما يتسكتش عليكم لسه هنستنى سنتين دا انتم ممكن تتجننوا ,,, إحنا النهارده هنستغل فرصة زيارة أهل سارة لنا ونكلمهم نعجّل الجواز شويه ) .....
صرخت أنا بأعلى صوت ,,, ياماما ليه الاستعجال يا جدعان ياعني ,,, بس ماما كانت حرجت .........
المهم صحيت ,, فطرت ,,, وخدت الست هانم أوصلها لمدرسة ( الثانوية بنات بالسنبلاوين ) وحاولت أشد من أزرها شويه بعد المجموع الفلكي اللي الهانم جيباه في سنة تانية ثانوي ( 62%) مش عارف هتدخل بهم أيه ؟؟؟أنا اقترحت تدخل بهم جمعية مين عالم مش ممكن ربنا يكرمها وتوصل ولو حتى لتربية ....
وصلنا المدرسة وطبعا طلبت منّي العودة مرة أخرى لإصطحابها ,, ظننت أنني سأصطحبها للبيت لكن كانت الحقيقة إني هصطحبها لجولة مكوكية تتضمن ثلاثة دروس في مختلف نواحي السنبلاوين ...
عدت إلى المنزل لأجد العائلة مجتمعة عن بكرة أبيها ,,, أحسن حاجة فعلا هيه ولاد خواتي ( مايا & مها & شيماء & رغد & روضة & وطبعا فارس باشا أخويه الشخص الذي يقف خلف كل ما يحدث لي في الجيش ) ......
أخبرني والدي أننا سنذهب اليوم لزيارة ( اللواء محمد سالم ) للحديث عن موضوع سلاح المدفعية فقد وعدنا سيادة اللواء بأنّه سيحاول نقلي للخدمات الطبية ......
الوقت عدى بسرعة ومكنتش واخد بالي من التليفون ,,, لسه ببص لقيت حداشر مكالمة لم يرد عليها ,,,,, طبعا ست ( سارة ) من غيرها ,,,,,,,,, سلام دلوقت يدوب ألحق أروح لها إدعوا من قلبكم ربنا يستر ,,,,,

الحلقة القادمة ( يوم عائلي ,,,,,,,,,)
إبراهيم رأفت

[ehabsalama17]

متابع معاك والحلقة دي جميلة جدا

[الواثقة بالله]

جمييييييييييييييييييييييييييييييييييييييييييييييلة يادكتور اوى اوى اوى
بجد حضرتك انا بستمتع جدا بقراءة القصة دى لدرجة انى ببقى تقريبا مش حسة باى حد اونا بقراها
لغاية اما اخلص واذ فجاة الاقى نفسى كدة مبتسمة

ربنا يخليك يادكتور وتمتعنا دائما بشذى كلماتك
وابقى قولى بقى سارة عملت فى حضرتك اية ؟؟؟؟؟؟؟؟؟

انا منتظرة بفارغ الصبر
ياريت حضرتك ماتتاخرش علينا

واتمنى لحضرتك مزيد من التفوق
وفقك الله الى مايحبة ويرضاه

[E.Raafat]

متابعة حضرتك للقصة شرف للقصة ولكاتبها ,,, وكلام حضرتك وسام على صدري ويارب أكون دايما محل ثقة

[M.Hegazy]

.. تسجيل متابعة يا بطل ..

استمر يا إبراهيم ..

متابع معاك ..

[E.Raafat]

الحلقة الثامنة عشر ( يوم عائلي ,,,,,)

يعني كان لازم والدي ياخد العربية معاه ما كمان سبها ,,,,,, أعمل أيه أنا دلوقت ,,, لو فكّرت في المواصلات يبقى سارة هتحطم الرقم القياسي في عدد المكالمات التي لم يرد عليها والبالغ عددها حتى الان ما يقارب الخمسين مكالمة ,,, لم أدرك أنني أصبحت أفكر بصوت عال فسمعتني والدتي وأسرعت تفكر في حل .....
مش عارف حب أمي لسارة مخليني أحس إن أنا مش ابنها دي بتحبها يمكن أكتر منّي لدرجة إنّي بقيت بغير من سارة,,,,,, في الأخر أمي اقترحت أشوف عربية أي حد من صحابي ,,, قلّبتها في دماغي هوه مفيش غيره الواد ( محمد محمود ) بس يارب يكون في البيت ,,,,, الحمد لله لقيته ووافق كمان يديني عربيته بس بعد إلحاح ما هو عارف سواقتي ممكن العربية ترجع له مسمارين وأكرة باب ,,,
أخيرا فتحت على سارة وإليكم أخر الأنباء
* سارة * سيدتك فين دلوقتي وليه مبتردش على تليفوني ؟؟؟؟؟؟؟؟؟
* أنا * مش لاقي أي كلمة أقولها ( التليفون كان مع *مايا * بتلعب بيه ومشفتوش غير دلوقتي )
* سارة * هصدقك ياكدّاب ,,,, ومعاليك فين دلوقتي ؟؟
* أنا * ثواني وأكون بين إيديكي .....
الحمد لله وصلت وحبيت أخدها في دوكة
*أنا *قلت بأنفاس متقطعة وساند على كتفها وماسك ركبتي ( اسكتي ياسارة مش قادر أتلم على نفسي )
* سارة * ووشها أقلب ألوان ( أيه ياحبيبي مالك ؟؟ فيه أيه )
*أنا* وأنا جاي في الطريق العربية اللي قدامي والعربية اللي ورايه لبسوا في بعض وأنا وقفت في النص مش عارف أروح لمين فيهم ,,,, في النهايه سبتهم وجيتلك ياجميل
* سارة * الحمد لله ياحبيبي إن انت سليم .. المهم يالاّ بقى عشان ألحق الدرس
* أنا * فتحت لها الباب وبسرعة اتدورت أركب من الجهة التانية بس لاقيتها واقفة مركبتش ( أيه ياسارة متركبي يالاّ)
* سارة * سيدتك فين العربية بتاعتك ؟؟؟ وأيه النملة اللي انت جاي بيها دي ؟؟؟
* أنا * العربية مع بابا ودي بتاعة محمد... بتسألي ليه ؟؟؟؟؟
*سارة * دي أخرها تاخد اربعة وباقي صحباتي اللي مستنين معايا بقالهم أكتر من ساعة دول أوديهم فين ؟؟؟
* أنا * طب ياحياتي وأنا أعرف منين ؟؟؟
* سارة * أنا مليش دعوة بقى .. وأنا عمّاله أوصفلهم في العربية الهيونداي سبعه راكب .. وحبيبي هيوصلنا متقلقوش وفي الأخر ألقيك جاي بعربية ( كرسي للسوّاق وحصيرة للناس اللي هتركب معاه ).. شفلي حل بسرعة قبل ما أفقد أعصابي .....
* أنا * بمنتهى السلاسة ,,, ياجماعة,,, يامعشر صديقات سارة والله احنا عندنا عربية هيونداي سبعة راكب بس هيه في مشوار فدلوقتي اتنين منكنّ هيركبن معنا والباقيات يأخذن ( تكاتك ) ومحدش منكنّ يحاسب ,,, يالاّ بسرعة عشان أنا محضّر لبكم مفاجأة بعد الدروس....
الحمد لله عدت على خير .. بس في طريقنا لكل درس سارة طبعا قاعدة مبتتكلمش ومصدّرة وش جبس ويدوب تتكلم تتطلب شوية طلبات أجبها لها لمّا تطلع من الدرس يعني ( شوية مذكرات ,,,, أدوات تجميل ,,, تبعتني أجيب واحدة صحبتها من البيت مكسلة تيجي ,,,إلخ ) شغل عيال طبعا الكلمة دي في سري ,,, أثناء الدرس الأخير استغليت الفرصة وطلعت على مطعم أبو شنب ( أمام موقف السنبلاوين ) وطلبت منهم حجز الدور الثاني لمدة ساعة ونصف وإعداد وجبة عشاء فاخر ,,, يمكن ست سارة ترضى عنّا ,,, وكان لي ما أردت ,, لكن سارة جلست متحفظة وكأنها تنتظر المزيد من فروض الطاعة والولاء التي يقدمها قلبي كالعادة ,,, المهم كله تمام ,,, العصافير كلت ووصلت كل واحدة لحد بيتها ...........
وبقيت أنا وسارة في طريق العودة وإليكم إطلالة سريعة :=
* سارة * سياد......... ( قاطعتها بسرعة )
*أنا * بصي ياسارة أنا نازل أجازة تلت أيام عدّى منهم يوم في الفاضي وباقي يومين لوفضلنا على الحال دا يبقى ان شاء الله اليومين اللي فضلين هيدوا رخرين على الفاضي
* سارة * يعني ....( قاطعتها للمرة الثانية )
* أنا * أنا كنت عاوز أقضي النهارده مع العيلة وهم كانوا كلهم متجمعين النهاردة وكانت فرصة عشان اليومين اللي فضلين يكونوا معاكي ياحبيبتي ,, بس بما إن النهاردة ضاع ,,, بكرة الجمعة أجازتك فدي فرصتنا الأخيرة عشان السبت هزور باقي العيلة وصحابي أيه .......( قاطعتني هي تلك المرة )
* سارة * مبدئيا موا فقة على يوم الجمعة على أن نحدد لاحقا ما سيتم يوم السبت ,,, هستناك بكرة هتيجي إمتى
* أنا * إن شاء الله بعد صلاة الفجر مباشرة ....
* سارة * طب ما نصلي الفجر جماعة ونمشي أحسن !!!!!!!!! والله شكلي هاجي أصحيك بكرة
* أنا * خلاص بقى ياسارة عشان أختم الحلقة طوّلنا أوي النوبة دي على الناس ,,, ( أعزائي مشاهدي ومتابعي قصتنا ,,, أشكر إليكم حسن الإستماع وسعة الصدر على تصرفات سارة الصبيانية ويارب يجي اليوم اللي تكبر فيه بقى وتبطال شغل الأطفال ده ..........
نشرة التاسعة ( أكد شاهد عيان سماع دوي طلق ناري من سيارة على طريق السنبلاوين أبو كبير السريع ,, كما أكد أيضا أن مصدر الرصاصة هي فتاة وأن المصاب قد يكون خطيبها بعد ما حاول إنهاء الحلقة بطريقة استفزت سارة )

الحلقة القادمة ( هالة حبيبتي ........ قصدي سارة حبيبتي )
إبراهيم رأفت

[M.Hegazy]

محمد محمود

مش أنا طبعا ..

انا اسمي محمد محمود يا إبراهيم .. إوعى يكون أنا و أنا مش عارفني ..

حلقة تحفة يا دوك و دمها خفيف جدا .. تسلم إيدك

استمر ..

[ahmed kewan]

انا قرأت حلقتين بس

متااااااااااااااااابع معاك

جود لك ساره
يا رب تربيه

[Mouri Ran]

رائع رائع وأروع من رائع كمان بكل التفاصيل

أسلوب جميل جدًاااااااا بجد .. روائي محنك ما شاء الله ^^

أول روايتك فكرتني بأخويا تعب جدا أول ما دخل الجيش من قلة الأكل والمجهود وبردو اتضرب واتقلب عليه ميا ساقعة لحد ما أغمي عليه.. بس في النهاية كل الظروف دي لازم تتعرضوا ليها في الجيش وإن شاء الله تكون في البداية بس .

متابعة إن شاء الله : )