يوميات BoNbOoNa في الصيدلية !

[M_S_SH]

عودة حميدة دك بنبونة
وجزاك الله خيرا علي المجهود الي بتبذلية

هشارك في الموضوع بحاجتين
الاول..كنت عاوز استفسر عن ادوية المخدرات (الجدول)...ولية حطينها لوحدها ولية علي الرغم انها جدول في بعضها ممكن يطلع عادي...بصراحة محرج اسئل الدكتور ..اكيد فاهمني

تاني حاجة فزورة



يا تري اية دة؟؟!

[BoNbOoNa]

متبعاكى يابنبونة ربنا يكرمك حمدلله على سلامتك وحشتينا جدا

الله يسلمك يا أسماء...اكرمكي الله
شكرا علي المتابعة ...

عودة حميدة دك بنبونة

وجزاك الله خيرا علي المجهود الي بتبذلية

هشارك في الموضوع بحاجتين

الاول..كنت عاوز استفسر عن ادوية المخدرات (الجدول)...ولية حطينها لوحدها ولية علي الرغم انها جدول في بعضها ممكن يطلع عادي...بصراحة محرج اسئل الدكتور ..اكيد فاهمني

و جزاكم بالمثل يا رب ...شكرا علي تكرار المشاركة

هحاول اكرر الاجابة ... اسأل الله ان يشرح لي صدري
ادوية الجدول تختلف عن سائر الادوية في انها بتسبب الادمان .. و " بتعمل دماغ " زي ما بيقولوا يعني
بتوضع في مكان مستقل عشان يبقي سهل تعرفها بعد كده... و عشان ممكن تصرف دواء منها و انت مش واخد بالك انه جدول لو كانت بين الادوية العادية لواحد مش معاه روشتة ولا حاجة ...
حكمة تانية ... هي انها تكون بعيدا عن الانظار ... و لما يجيلك حد تشك فيه حتي لو معاه روشتة ... تقدر ترفض صرف الدواء و انت مطمئن ... لانه مش هيقدر يقولك الدواء فين ...بما ان حضرتك مخبيه في الدرج
اعتقد - والله اعلم - ان الاقراص اللي بتطلع عادي دي مش جدول.... في كمان اقراص بتيجي في علب كبيرة بتتحط في ادراج ... و بعض الاصناف الناقصة بنحطها عندنا في درج
يا ريت حضرتك تجيب اسامي الادوية دي ....
مهم تعرف ان روشتات ادوية الجدول " narcotics " لازم ولابد و حتما تتختم بختم الصيدلية في حالة صرفها ... لبيان انه تم البيع و منديش فرصة للمريض انه يكرر العلاج باستخدام نفس الروشتة من غير ما يرجع للطبيب
----------------

تاني حاجة فزورة

يا تري اية دة؟؟!

ده تقريبا علي ما اعتقد الشرائط اللي بتستخدم في جهاز تحليل السكر..... هي نفس شكل العلبة بس مش نفس اللون

مش عارفة بقي الصراحة ..

جزاكم الله خيرا د\ hancock

-----------
writing...

[BoNbOoNa]

Day 27

المشاركة دي شبه المشاركة اللي فاتت لحد كبير....
إلا ان بطل هذه الحلقة هو

~~ المــــــقـــــص ~~
.
.

... أشهر الادوية اللي بنقوم بقصها في الصيدلية ...
____________

يتربع عرش الادوية المتقصقصة الـketofan و الـOblong Novalgin



هناك أيضا الـ Ketolac

الـكيتوفان و الكيتولاك و النوفالجين مسكنات و مضادات للألتهاب

وفيه الـ Antinal

لعلاج الاسهال

الـ Buscoban ... للمغص


الـSpasmopyralgin
ده بيتطلب كده : " البرشام البني بتاع المغص "

و الـ ampicillin
" المضاد الحيوي اللي بـ 75 قرش "

في الآونة الاخيرة ... الـ Quibron أيضا اصبح يباع بالقرص
=-=-=-=-=-=-=-=-=-=
المشكلة مش في المقص ...و الحل مش اننا نضرب اللي بيقصقص الدواء !

________
المشكلة ان الناس مش بتوصف لنفسها المضاد الحيوي بس دلوقتي
لأ بقت بتوصف لنفسها كل حاجة ... حتي الضغط (خطر جدا تدي دواء ضغط لواحد مش مريض ضغط اصلا.. و مأخدش دواء للضغط قبل كده)
---------
امبارح مثلا... جاتلنا واحدة (40-45 سنة) عايزة بتقول ان ركبتها بتوجعها جدا و رجلها ناشفة و شادة عليها ..
وصفت لنفسها العلاج ,,, و هو حقنة المسكن اللي هي مش فاكرة اسمها ... و قالت ان هي اخدته قبل كده بس "مكسلة" ترجع تجيب العلبة و تيجي
و بعد تفكير دام طويلا افتكرت انها بـ 4 جنيه و نص
و في الاخر اخدت declophen تجربها وخلاص
هي كانت متعصبة شوية .... شويتين الحقيقة .. فمحاولتش اتكلم احسن...
............
حل المشاكل اللي من هذا النوع هيبقي زي ما اتكلمنا قبل كده علي المضادات ... اهم حاجة ناخد و ندي مع المريض و نفهم هو حاسس بايه و يا حبذا يعني لو اقنعناه يروح لدكتور ...
-------------
المشكلة دي ليها طرف تاني خفي ... مش عارفة بيحصل عندكم ولا لأ ...
أزمة الفكة
------

بما ان ثقافة "keep the change" ثقافة نادرة الوجود في بلدنا
فطبعا كل واحد بيصمم ياخد حقه بالظبط
الزبون ميقدرش ابدا يتنازل عن قرش واحد ( و ده طبعا حقه )
المشكلة بتبقي في حالة عدم وجود فكة ... و ده يمكن انا بحس بيه اوي لان الـshift بتاعي الصبح و مش بيكون فيه اي فكة في الصيدلية ...
اللي بيحصل بقي انه بيتم التغلب علي النقص ده بحاجات غير النقود
3 حاجات بتصرفوا عندنا عوضا عن الفكة :
اقراص الريفو : 5 اقراص = ربع جنيه
ketofan = 0.25 L.E for each
Novalgine = 0.35 L.E for each
-----
طبعا بالطريقة دي احنا بنزود المشكلة اكتر ...و بنعرض المريض لخطر اكبر ....ليه ؟؟

1- لانه اخذ دواء ليس بحاجة إليه
2- الاقراص تاريخ صلاحيتها مجهول بالنسبة له لان مش معاه العلبة
3- فرصة حدوث تفاعلات للادوية كبيرة جدا
و طبعا اشهر حاجة الأسبرين لو كان المريض بياخد warfarin او اي مضادات للتجلط تانية... لو الجرعات مش متظبطة فيه risk كبير لحدوث نزيف لا قدر الله
------
طيب انا ليه احط نفسي في موقف زي ده
و ليه اكون سبب في تفشي المشكلة بدلا من علاجها

حاولت كتير اتغلب علي الموضوع ده ...
اشتغلت في الاول كــ "بنك متنقل "
كل ما اروح عند خالاتي او جدتي او اي حد من اقاربي اتعاقد معاهم و ألم منهم الفكة و احطها في الصيدلية
و اخر الاسبوع اجيبلهم الفلوس المجمدة
بس احيانا كتير الازمة بتمتد و مش بلاقي فكة كافية
و طبعا ان مش كل يوم عند اقاربي يعني كل اسبوع مرة مرتين كده
ففشلت ....
حاولت اتعاقد مع بعض الزبائن اللي بييجوا يوم بعد يوم مثلا...
وافق واحد بس ... صاحب محل جنبنا و بيعاني من الجنيهات المعدنية
فبيجيها لي الصبح في " قرطاس " زي بتاع الطعمية
و ييجي اخر النهار اكون تممت علي الفلوس و جهزتله المجمد
بييجي كل 4 ايام كده و يجيب معاه 200 جنيهًا معدنيًا
خير و بركة ... الحمد لله
بس الناس مش بترضي تاخدهم ...
تقريبا بائت كل محاولاتي بالفشل ...
==========
المهم انا توصلت لحل وسط ... احنا هنستبدل الفكة بحاجات اخري غير الادوية
حاجات لا تضر المريض ولا تشكل خطر عليه
-------------
-------
---

Solution
----
(1)

فوار الفواكه ... محدش بيقول عليه لأ ... و ممتاز لحل أزمة الربع جنيه
=-=-=-=-=-=-=-=-=-=-=-=-=
(2)

اقراص الـraid ... في الدرج اللي جنب الريفو بالظبط
بعد ما اقترحت علي مدرباتي الفكرة...بدلت الدرجين مع بعض فايدهم بتتمد للدرج تلقائيا عشان اتعودوا عليه ... بس اللي بيطلع الـ Raid بدلا من الـ Rivo ...
=-=-=-=-=-=-=-=-=-=-=-=-=
(3)
PLASTERS

=-=-=-=-=-=-=-=-=-=-=-=-=
(4)
Candy

الاطفال بالذات بيتبسطوا اوي من الموضوع ده ...

ممكن لو فيه لبان هيبقي كويس برضه ...( احنا معندناش لبان في الصيدلية )
=-=-=-=-=-=-=-=-=-=-=-=-=-=-=-=
=-=-=-=-=-=-=-=-=
الروشتات الكبيرة بقي ... بيبقي الازمة في جنيه او اتنين

ممكن نديله MENTOS او HALLS
ده علي سبيل المثال ....
~~~~~~~~~~~
~~~~~~~~
~~~

المطلوب بقي هندور علي ادوية اللي فيها acetyl salicylate (aspirin)
لاحظ ان مفيش حقن خالص ولا مراهم ولا ادوية شرب - علي حد علمي-
معظمه اقراص .. و في بعض اللبوس
تم رفع الملف بنجاح الحمد لله .... السرعة جبارة الحقيقة ... 150 بايت ... من غير كيلو !!
total = 14 drugs only

لا تنسوني من صالح دعائكم

سبحانك اللهم و بحمدك...أشهد ان لا اله الا انت ...أستغفرك و أتوب اليك

~تم بحمد الله~

[..::ciZar_Resala::..]

هشارك في الموضوع بحاجتين
الاول..كنت عاوز استفسر عن ادوية المخدرات (الجدول)...ولية حطينها لوحدها ولية علي الرغم انها جدول في بعضها ممكن يطلع عادي...بصراحة محرج اسئل الدكتور ..اكيد فاهمني

بالنسبة لأدوية الجدول ..

الأدوية دى متقسمة 3 جداول .. و ده مش تصنيف اسم .. و لا شركة .. و لا pharmacology زى ما بنعمل .. ده تصنيف تانى خالص ،،

التصنيف ده بيبقى حسب ال risk بتاعتها .. يعنى حسب النسبة ما بين فايدتها إلى الضرر بتاعها ..

كل ما يكون الضرر أعلى .. رقم الجدول يقل .. و قياساً على كده .. أخطر الأدوية هى جدول 1 ..

هنستفيض شوية ف الكلام .. و نأجل الكلام عن المحاليل ال infusion اللى كنت وعدتكوا بيه ..

التعامل مع أدوية الجدول و الأدوية المخدّرة له معاملة خاصة جداً ..

هنبدأ بالمواد المخدرة .. زى المورفين ..

المفروض يكون فى دفتر مواد نفسية بالصيدلية .. الروشتة لا يتم التعامل بيها أكتر من 3 أيام ..

ف حالة جالك روشتة فيها مخدر زى المورفين أو البيثدين .. بتاخد الروشتة و تعينها و تصرفله الدوا .. و مترجّعش الروشتة للمريض ..

الروشتات اللى بيتصرف على أساسها المواد المخدّرة مش روشتات عادية .. لا دى بتتصرف من مديرية الشئون الصحية ف القطاع التابع ليه الدكتور ..

ثانياً: أدوية الجدول ..

جدول 1 ..

و دى أخطر الأدوية .. و تعامل معاملة المواد المخدرة اللى فاتت .. يعنى بتتسجل خروجها ف الدفتر .. و بتاخد الروشتة من المريض .. كمان اللى بيتصرف عبوة واحدة بس .. من أصغر عبوة متسجلة ف وزارة الصحة .. " أصغر عبوة مش أصغر تركيز .. فى فرق " ..

أدوية جدول 1 .. جميع الأدوية اللى بتحتوى على المواد الفعالة الجاية:

Bezhexol
Butorphanol
Codeine
Dihydrocodeine
Dextromethorphan
Kitamine
Zolpidem

======

الجدول الثانى

الروشتات بتكون مختومة من اتحاد المهن الطبية .. و الدكتور بيصرف الروشتات " اللى هيكتب فيها الدوا " من اتحاد المهن الطبية ..

الروشتات دى هى اللى بتتختم .. و سيبها مع المريض عادى .. لأن مفيش صيدلية تانية هتصرفها لو مختومة .. إلا لو كان الدكتور بتاعها تاجر .. أو اللى واقف بتاع دبلوم مش فاهم الختم ده معمول ليه .. و مفكر إن الصيدلية بتعامل كل روشتاتها كده و تختمها !!

العلاج ممكن يستمر لمدة شهر بالروشتة .. لا أكثر .. و الدكتور اللى كاتب العلاج ميكتبش ف الروشتة غير صنفين فقط ..

الأدوية دى زى ما الصيدلية بتصرفها للمريض .. الوزارة بتصرفها للصيدلية ..

كل صيدلية من حقها 30 عبوة شهرياً .. و لذلك فى بعض الصيدليات تلجأ إلى طلبيات تحت السلم عشان للأسف الدكتور بتاعها معندوش ضمير و بيطلع الحاجات دى من غير روشتة !! و خصوصاً الترامادول !!

30 شراب - 30 أمبول - 300 كبسول أو قرص ..

طب أنا قلت 30 عبوة .. طب إيه حكاية ال 300 كبسولة ؟؟

العبوة الواحدة بتحتوى على 10 أقراص .. يصرف 30 عبوة ..

so 30 x 10 = 300 caps/tab

نيجى للمواد اللى بتتعامل المعاملة دى ..

جميع الأدوية المحتوية على المواد الفعالة الجاية:

All Benzodiazepines & their derivatives as
Diazepam
Alprazolam
Bromazepam
Clonazepam
Lorazepam
Midazolam
Delorazepam
Lormatazepam

Tramadol
Nalpuphine
Nefopam
Zopiclone
Carisoprodol
Dextomethorphan

Colmidal L & its equivalents
Migranil & its equivalents

======

الجدول التالت

الروشتات مختومة و بتتصرف من اتحاد المهن الطبية زى اللى فات ..

الروشتة هنا مش هتاخدها من المريض و لا هتتسجل ف دفتر الصيدلية ..

الكمية اللى بتتصرف للمريض .. و الصيدلى .. غير محدودة بكم ..

المثال:

Congestal syr
Cloxibe tab
Librax tab

======

اللى بيحصل إيه ؟؟

الدكتور بيجيب طلبيات المخدرات من تحت السلم ..

و بالتالى مش بتتسجل ف الدفاتر ..

و بالتالى بيخرجها بمزاجه .. و يتاجر فيها ..

======

فى حاجات موجودة جدول و الدكاترة اللى مش عندهم ضمير بيخرجوها .. زى إيه ؟

Congestal syr
Osinex syr
Tussivan N
و التلاتة دول لعلاج الكحة ..

ممكن واحد يدخل يمثل عليك ف الصيدلية إن عنده كحة ناشفة و مبينامش و مش عارف إيه ..

خليك صارم .. و تعامل معاه بكل جدية .. و قوله روح اكشف .. مهما يقولك .. يبقى عندك رد واحد .. روح اكشف .. و خصوصاً لو شكيت ف مظهره .. لآنه جاى عاوزك تجيبله كودايين !!

======

بعض الأدوية التى يتم المتاجرة بها من أجل الربح ؟؟

Tramadol & all equivalents
الترامادول بجميع مسمياته ..

======

بعض الأدوية غير موجودة ف الجدول .. و لكن لا يجب أن تصرف بدون روشتات .. و خصوصاً إذا شكيت ف الشخص اللى قدامك ؟؟

All sedating anti-histaminics
مثال .. و مشهور جداً .. و إياك تخرجه .. حقن الأفيل .. Avil amp ..

======

هيحيلك واحد الصيدلية ..

أختى تعبانة أوى .. و مبتنامش .. هى عندها حساسية .. و مش بتقدر تاخد نفسها .. و تاعبانا معاها و الله .. متعرفش تاخد إيه ؟؟

الرد: المفروض طالما مش قادرة تاخد نفسها تروح تكشف ..

المفروض: لو هى معاه .. " أصلاً لا ليه أخت .. و لا ليه عيلة أصلاً " .. هتدى حقنة prophylaxis زى الديكساميثازون Dexamethasone .. و بعدين تصرفله دوا شرب للحساسية .. و تقوله لازم تروح تكشف .. و الكلام ده المفروض يحصل بس بشرط الحالة تكون قدامك ..

طيب إيه الغرض من كلامه ؟؟

استكمال الحديث: هى بتاخد حقنة مش عارف اسمها ايه كده .. زى الفيل ..

الرد: Avil يا فندم ..

الشخص: أيواااااااااااان .. و مش لاقيها ف أى صيدلية ..

الرد: لا و الله .. مش موجودة و متحاولش تدور عشان ناقصة ف السوق .. " أو معدتش بتنزل " ..

==> حقن الأفيل بتعمل دماااااااااغ

الفيلم ده واحد صاحبى شافنى واقف ف الصيدلية لواحدى .. هو مش صاحبى أوى .. كنا بنلعب كورة سوا .. جه عمل الفيلم ده عليا ..

أنا كان ال reflex بتاعى سريع جداً .. و قلتله بص .. هى موجودة و مش هديهالك لآنها مش بتطلع إلا بروشتة .. يا تروح تجيبلى أختك .. و أنا هديهالها ..

طب أنا رديت كده ليه ؟؟

البيه جاى يعمل فيلم عليا .. عشان معرفة .. مفكر إنى هطلعهاله .. فرديت الرد ده عشان أفهمه إن أنا عارف هو عاوز الحقن دى ليه و إن أنا عارف إنه بيستغفلنى !!

نفس الحكاية حصلت من واحد صاحبى زميلى من أيام الإعدادية .. من حوالى 3 سنين .. بس المرة دى كانت عشان ال Osinex !!

اللهم عافينا ..

تحت أى ظرف متطلعش مخدر غير بروشتة ..

تحت أى ظرف حتى لو صاحبك .. اللى قدامك ميصعبش عليك .. لآنه داخل و عارف الحاجة دى بتعمل إيه .. و عارف المفروض ردك يكون إيه .. و برده بيجرب .. يمكن يقدر يستغفلك ..

======

حاجات تانية ممكن تتصرف و مش جدول .. و الناس بتعمل بيها دماغ ..

Toplexil syr

حصل مع واحدة أكبر مننا بسنة .. و ادتهاله .. فتح العلبة و هو لسة واقف ف الصيدلية مخرجش .. و راح شاربها كلها .. و قال " تشكرى يا زوق " .. !!! و ساب العلبة و مشى ..

======

حاجات لا جدول و لا أى حاجة .. لكن صرفها لشخص إنت شاكك فيه يعتبر مساعدة على اللى هو بيعمله .. و ربنا هيحاسبك ..

Prisoline eye drops

البريزولين ؟؟ !!

أه .. البريزولين !!

الشباب " الفاااااااااااااااسد " اللى بيؤوح يشرب حشيش .. أو قاعد ف " مكنة " زى ما بيقولوا .. بعد ما بيهبب الى بينيله .. و يعدل مزاجه .. من اللى هو بلبعه .. و الدخان و القرف .. بيخرج من الليلة عنيه حمرا .. سواء حشيش .. بانجو .. أى حاجة من دى ..

طب و عشان الغلابة اللى ف البيت مياخدوش بالهم .. يعمل إيه ؟؟

الحل ف البريزولين ... !! ييجى يطلبها و عنيه حمراااااااااااااااا ..

و طبعاً دول شكلهم بيبقى باين .. فمن فضلكم .. إياكم تصرفوا البريزولين لآى شخص شاكين ف شكله ..

======

الحمد لله الذى أعاننى على الكتابة ،

لا تنسونى بالدعاء

[BoNbOoNa]

الحمد لله الذي عافانا .... الحمد لله
يا رب ..لا قوة لأحد علي طاعتك إلا بإعانتك ... ولا حول لأحد عن معصيتك إلا بمشيئتك
=-=-=-=-=-=-=-=-=-
سلمت يمناك .... مشاركة مميزة يا د\ ياسر بارك الله فيكم و نفعنا بكم دائما
احد المندوبين امبارح كان بيقول ان الـtramadol هيبقي جدول اول ... و انا مفهمتش يعني ايه الكلام ده غير دلوقتي (بغض النظر عن صحة الخبر)
هي ايه حكاية " تحت السلم" دي ؟!!....

[..::ciZar_Resala::..]

الحمد لله الذي عافانا .... الحمد لله

يا رب ..لا قوة لأحد علي طاعتك إلا بإعانتك ... ولا حول لأحد عن معصيتك إلا بمشيئتك

الحمد لله ،،

سلمت يمناك .... مشاركة مميزة يا د\ ياسر بارك الله فيكم و نفعنا بكم دائما

متشكر جداً بنبونة .. بس أنا " أعسر " .. بكتب بإيدى الشمال ..

احد المندوبين امبارح كان بيقول ان الـtramadol هيبقي جدول اول ... و انا مفهمتش يعني ايه الكلام ده غير دلوقتي (بغض النظر عن صحة الخبر)

يااااااااااا رب ،،

هي ايه حكاية " تحت السلم" دي ؟!!....

فى عدة احتمالات ..

مجهولة المصدر ،،
استيراد ،،
حاجات غير مسجلة بوزارة الصحة ،،
مندوب شركة حقق ال target بتاعه .. و بيبيع الباقى بفلوس أغلى أو أقل .. و ده ال common ..

و ما خفى كان أعظم ،،

=====

اسمحيلى أضيف حاجة لكلامك ،

بالنسبة لل acetyl salicylate .. دورى على أمبول عندكوا ف الصيدلية اسمه Aspegic .. و شوفى المادة الفعالة فيه إيه .. سعر الأمبولة 15 جنيه على ما أتذكر ..

بالنسبة للفكة ..

أضيف لكلامك ..

شامبو كلير رجالى + حريمى " عرض 3 = نص جنيه " أكياس
شامبو صن سيلك أكياس " الدوبل + الدوبل و نص " الكيس 0.25 قرش
و ما شابه ..
و أكياس الفازلين
أمواس الحلاقة العادية
أقراص البرادورال " استحلاب للزور "
البستلة

دمتم فى رعاية الله ،،

[pharmacistina]

بعض الأدوية غير موجودة ف الجدول .. و لكن لا يجب أن تصرف بدون روشتات .. و خصوصاً إذا شكيت ف الشخص اللى قدامك ؟؟

All sedating anti-histaminics
مثال .. و مشهور جداً .. و إياك تخرجه .. حقن الأفيل .. Avil amp ..

======

هيحيلك واحد الصيدلية ..

أختى تعبانة أوى .. و مبتنامش .. هى عندها حساسية .. و مش بتقدر تاخد نفسها .. و تاعبانا معاها و الله .. متعرفش تاخد إيه ؟؟

الرد: المفروض طالما مش قادرة تاخد نفسها تروح تكشف ..

في حل آخر لموضوع الحساسية و الناس اللي عايزة تاخد Avil بالعافية عشان يعملهم sedation ..


في Non - sedating anti-hiatiminic drugs .. تشيل الحساسية و تزبط كل حاجة بس مش هتعمل الـ sedation اللي نفسهم فيه .. Terfenadine و الـ Fexofenadine و الـ Cetrizine و الـ Astemizole

في الحالات اللي زي دي الواحد يرفض انه يعطي Avil و لو الراجل قعد يحلف انها حساسية يبقى ياخد Fexon و دة عبارة عن Fexofenadine = Non-sedating antihistamine ..

و الله لو فعلا صادق خلاص دة مضاد للحساسية .. لو كداب يروح يدور بقى ع الـ Avil ..

[..::ciZar_Resala::..]

المشكلة إنه جاى يعمل فيلم عشان ياخد الـ Avil .. مش أى دوا تانى ..

يعنى لو طلب حاجة OTC .. و مطلبش اسم و شكله ميديش ع الادمان .. هنديهاله ..

شوفى هو وصل لـحتة إنه عاوز sedating إزاى ..

مش بتعرف تتنفس .. و مبتعرفش تنام .. ده الكلام اللى قالهولى ..

و ف حالة إن يكون فى هرش جامد .. أو حالة زى التنفس دى .. زى ما قلت ..

هرش جامد = sadating ف بداية العلاج ..

صعوبة ف التنفس = dexamethazone الآن + sedating ف بداية العلاج .. يصرف مرة واحدة .. و لا يكرر إلا بعد استشارة الطبيب ..

اللى كان بيسأل ده خبرة .. مش جاى يقول أى كلام .. و عارف إن ممكن الصيدلى يقع فيها .. و يديله ال avil ..

بس لو حد تانى مش صاحبى .. كنت هقوله هاتلى الحالة ..

[shimoaa]

ما شاء الله عليك د/ ياسر ود/ فارماسيستينا
بجد انتوا دكاترة بجد
يا ريت كل الدكاترة دلوقتي يكونوا زي حضرتك يا دكتور ياسر
بس للاسف انا شفت دكاترة بيطلعوا الدوا وهما ممكن اصلا مش عارفين استخدامه ايه
بس عارفين الناس بتاخده لغرض ايه
ربنا يعافينا ويقيهم شر انفسهم

[BoNbOoNa]

متشكر جداً بنبونة .. بس أنا " أعسر " .. بكتب بإيدى الشمال ..

حفظك الله و بارك لك في يمناك و يسراك ....

و ما خفى كان أعظم ،،

شغل عصابات محترفة ده ولا ايه... استر يا رب
جزاكم الله خيرا د\ ياسر ....و شكرا علي الاضافة ... هجربهم ان شاء الله بالذات اكياس الفازلين لانها نايمة و مش بتتطلب كتير ...
-----------------
كلامك جميل يا فارماسيستسنا .... نديله الـ non sedating و اذا مش عاجبه يروح يدور بعيد عننا بقي...
===============
فيه حاجة نسيت اقولها ....
انا كنت سألت عن الـ thiophenicol
و الغريب ان احنا عندنا هي ملهاش بديل ....
حتي الـcidocetin مش بنطلعها بدلها
الدواء الوحيد اللي فيه نفس المادة الفعالة اقراص الـthiamphenicol ... و دي مش عندنا في الصيدلية
thiophenicol >>> thiamphenicol 750 mg
cidocetin >>> Chloramphenicol 1000 mg
=================

بالنسبة لل acetyl salicylate .. دورى على أمبول عندكوا ف الصيدلية اسمه Aspegic .. و شوفى المادة الفعالة فيه إيه .. سعر الأمبولة 15 جنيه على ما أتذكر ..

ممممم تمام ...هدور عليه انهاردة ان شاء الله
الاسم مر عليا قبل كده ....في روشتات اكيد