Day 13 & 14 
السلام عليكم و رحمة الله وبركاته
ازيك بومبونه انا نزلت النهاردة الصيدليه بس لما رجعت كنت متضايقه اوى ومش عاوزة اكمل مش عارفه ليه ومش عارفه اعمل ايه نفسى اعرف فى هذا المجال حتى يكون عندى خبرةولكن لا اعرف ماذا اعمل ارجو النصيحه
عشان خاطرك يا وردة...هركز المرة دي علي " اعمل ايه في اول ايامي في الصيدلية "
ربي اشرح لي صدري و يسر لي أمري و احلل عقدة من لساني يفقهوا قولي
اللهم صلِ علي سيدنا محمد ... بسم الله
(1)
اتمشي في الصيدلية
اول يومين علي الاقل ... مش مطلوب مننا اكتر من اننا نتعرف علي اماكن الادوية المختلفة
اول حاجة اطلب من احد مدربيك يوريك الاماكن بشكل سريع
انا شفتها في 10 دقائق تقريبا مع مدربتي
لكن قضيت عشر ساعات متقسمين علي يومين بتأمل فيهم لوحدي
مثلا...
روح دور علي مكان الtablets
جميل ... حدد بيبدأ منين و يخلص فين
اتفرج متحاولش تحفظ .. كأنك بتتفرج علي لوحة ..
روح شوف اللبوس و كرر نفس الحكاية.. و بعدين اسأل نفسك الtablets فين و بتبدأ منين و تخلص فين
مش فاكر اوي؟؟؟ عادي روح دور و شوف تاني و ..تالت .. و رابع
انت مش تايه ولا حاجة ... بس محتاج تبذل شوية مجهود عشان تثبت المعلومة
********************
******
(2)
تقرب من مدربيك
لازم تحاول تحتك بيهم علي قدر الامكان ... تحدث معهم في اي موضوع لا يشترط يكون بخصوص الصيدلية
لازم تبقي عارف اساميهم طبعا
شوف كل واحد شاطر في ايه و الوقت اللي بيكون فيه مش مشغول أد ايه؟؟
و علي هذا الأساس قم بتقسيم وقت التدريب بتاعك عليهم
متخليش واحد بس يقوم بالاجابة علي استفساراتك و يعلمك اماكن الادوية و قراءة الروشتات و ترتيب الادوية و الشغل علي برنامج الكومبيوتر و مكان المخزن و ....
راقب مدربيك اول يومين ... فكر... ثم قسم وقتك بما يتناسب معهم
*******************
*****
(3)
تعلم رص الادوية من اول يوم
النواقص بتترتب كل يوم زي ما ذكرت ... حاول تشارك فيها علي قد ما تقدر
اكتر حاجة هتساعدك انك تتعرف علي الادوية هي " الرص "
اثناء الرص خد بالك من :
1- لون العلبة
2- اسم الدواء بالانجليزي و العربي
3-حجم العلبة
4- مكانها علي الرف
5- فيه منه تركيزات تانية ولا لأ ( غالبا لو فيه هتلاقيها علي يمين الدواء او شماله)
**********************
********
(4)
اصنع لنفسك ... mini pharmacopeia 
!!!!
اشتري كشكول كبير 100 او 80 ورقة .. متجيبش اكتر من كده عشان ميكونش تقيل ..
يفضل يكون سلك عشان ميتبهدلش و يستحسن كمان ان الcover بتاعه يكون غير قابل للثني
عشان متحتجش تسند علي حاجة لما تكتب فيه ...
هتروح لواحد من مدربيك ... و تطلب منه يكتبلك فيه كل يوم صفحتين من الادوية المشهورة و بعدين حضرتك تدور عليها...
اول اسبوع هتمشي بالترتيب
يعني اول يوم اشهر اقراص بحرف a b c
تاني يوم d e f g
و هكذا .. الحقن هتاخد منك يوم و الكريمات يوم و اللبوس نص يوم
الاقراص و أدوية الشرب هي اللي بتاخد وقت شوية ... لانها كتير
ده بالنسبة للاسبوع الاول
-------
الاسبوع التاني تبدأ تدور علي كل مبيعات اليوم اللي فات و اللي قبله
بتجيبها من الكمبيوتر ... الاول تقف جنب مدربك و هو بيجيبه و بعدين هتعرف تعمله لوحدك
----
الاسبوع التالت
اطلب من مدربك يكتبلك ادوية الكحة المشهورة ... بس بأشكالها المختلفة .. اقراص و شرب و لبوس و حقن و ...
و كل يوم تاخد مرض معين و تشوف ادويته
الضغط العالي - الضغط المنخفض - السكر - الانيميا - الامساك - الاسهال - الصداع - الانفلونزا ...
دي صورة الBoNbOoNish Pharmacoepia !!!!!
و دي عينة عشوائية من الصفحات (الاسبوع التاني) 
***************************
********
(5)
الروشتات
من اول يوم حاول تقرأ الروشتات ...
ممكن اول اسبوع تقرأ ثلاثة اربعة بس
لكن بمرور الوقت هتتعود و هتقدر تقرأ معظم الروشتات و انا اتكلمت عن الروشتات قبل كده...
*************************
*******
(6)
جدد حياتك
كون لنفسك فكر من نوع خاص ... فكر يدل علي شخصيتك انت مش حد تاني
اوعي تقارن نفسك بحد ... لانك بمقارنتك دي بتهين نفسك
واوعي تسخر من حد ... لانك بسخريتك دي انما تسخر من خالقه سبحانه و تعالي
اوعي تقول انا مليش لازمة .. ولا هو انا اللي هغير الكون ... الرسول عليه الصلاة و السلام كان يتيما فقيرا أميا وحيدا و لكن انظر كيف اكرمه الله ليصبح نعم القائد و نعم المعلم
و لتصبح امة الاسلام هي خير امة اخرجت للناس تأمر بالمعروف و تنهي عن المنكر ...
و بما ان رسولنا حبيبنا هو قدوتنا و احنا بنحاول دايما نتخلق بأخلاقه و نتبع سنته
ادعوكم لنحيي سنة التفاؤل و سنة الجد و اتقان العمل و سنة العزيمة و التوكل علي الله و اليقين بانه هيكرمنا ان شاء الله
اربط علي قلبك حب ربنا و حب محمد 
و صدقني... ولا صيدلية.... و لا اي حاجة تانية.. هتقدر تحبط من عزيمتك
~ الخلاصة ~
1- خد جولة في الصيدلية
2- صاحب مدربيك..راقبهم و شوف اهتمامتهم و خبراتهم ... و علي هذا الاساس ضع خطة تدريبك
3-تعلم رص الادوية
4- اعمل كشكول لتعلم اماكن الادوية
5- تعلم قراءة الروشتات
6- جدد حياتك ...
حاجة اخيرة... كانت الاولي تتقال اول حاجة ... النية ...
لازم نجدد نيتنا كل يوم و احنا بنقفل باب البيت و لما ندخل الصيدلة ..
حط في دماغك ان تدريبك ده عبادة ... لانك نازل تتعلم و تطلب علم و تكافح و تقف علي رجليك سبع ساعات متوصلة عشان في الاخر تطلع بحاجة تنفع بيها الناس
انا دايما بتخيل اني شايفة الملكين اللي علي أكتافي ..
بجد والله
يعني لما بقرأ الدواء بقرأه 3 مرات ... مرة ليا و مره لملك الحسنات عشان يحط حسنة ...و مرة لملك السيئات عشان يمحو سيئة
احتسب مجهودك عند الله و اجتهد علي قد ما تقدر
و ربنا مش هيضيع تعبك أبدا
((والذين جاهدوا فينا لنهدينهم سبلنا))
صــــــــدق الله العظـيــــــــــــم
=======================
هذا هو ما استطعت ان اجمعه من عملي خلال الاسبوعين الماضيين,,,
ربنا يوفقك ان شاء الله يا وردة العمر ,,, و يوفق كل اللي نزل و اللي هينزل الصيدلية ان شاء الله ....gif "Fop (29)")
======================
يا رب وفق احبتي لما تحبه و ترضاه و اعنّا علي ذكرك و شكرك و حسن عبادتك علي النحو الذي يرضيك عنا و اجمعني بهم في جنة رضوانك
لا تنسوني من صالح دعائكم 
سبحانك اللهم و بحمدك...أشهد ان لا اله الا انت ...أستغفرك و أتوب اليك
~تم بحمد الله~
... جزاكم الله كل خير
.gif "Fop (28)")
.... جزاكي ربي كل خير ...بالتوفيق ان شاء الله
.gif)
ضوابط المشاركة
.gif "Fop (41)")
.gif)
