و ابقي سلملي عالبحث العلمي

و الله العظيم مسخرة لما يبقي اللي قسم الفارما في صيدلة الزقازيق واخد اد اللي كليتنا كلها واخداها في الماستر
البداية كانت لما اتخرجت و كان ترتيبي 15 عالدفعة و قدمت عالماستر في الكلية اكسترنال يعني بفلوسي و كان املي كبير ان انا اتقبل كنت فاكرة ان ترتيبي ده حاجة حلوة بس اكتشفت الواقع الجميل ان في تسعينات و حاجات غريبة كده طب احنا دفعة منحوسة نتقارن بالناس الحلوة المتفوقة دي ليه
و الجميل ان بتوع الزقازيق يقولولك ان الاولوية لبتوع الزقازيق و انتو ليه متقبلتوش في المنصورة دنتي جايبة امتياز مع مرتبة الشرف
و اقسام تانية زي البيو و التحليلية يقولولي هاتيلنا موافقة جهة انك تشتغلي في المعامل بتاعهم و احنا نوافقلك علي طول فقولت للموظفة طب انا اجيب الجهة دي منين امت قايلالي يعني تشوفولك اي واحد معرفة في اي كلية يجيبلك الموافقة دي قولتلها بس شكرا مليش معرفة الحمد لله
بس عادي باه اديني اعدة في الصيدلية لحد ما ربنا يفرجها

علشان صيدله المنصوره بتهرج بس والاقسام بتدلع
كنتى قدمى فى طنطا كنتى هتتقبلى على طول ناس
جايبه جيد جدا واتقبلت ماستر ميكرو فى طنطا
الزقازيق انتى بتجيبى الماتريال بنفسك وبتشتغلى معامل بره ةيعنى مرمطه
انسب حاجه دلوقتى طنطا

كل اللي اقدر اقولهولك يا دكتورة قولي حسبي الله ونعم الوكيل في كل واحد ظلم دفعتنا ابتداء من الادارة لحد المعيدين الكفائة اللي كانوا مستقصدنا مرورا بدكاترتنا العظيمة وخصوصا في قسم النبات وبدون ذكر أسماء عشان محدش يذعل (دكتور احمد جوهر ودكتور احمد فؤاد)
حسبي الله ونعم الوكيل لما يبقي العشرين عالدفعة السنه اللي فاتت اتاخد منحة وال15 علي دفعتنا مش عارف ياخد ماستر علي حسابه مع العلم اني متأكد مليار في الميه ان ممكن يكون ال15 ده عنده معلومات واحقيه عن الاول علي دفعة السنه اللي فاتت
حسبي الله ونعم الوكيل لما يقولوا علينا دفعة فاشله وهما متأكدين ان الفشل ده من الدكاترة
حسبي الله ونعم الوكيل لما دكتور يجيب امتحان وحش او درجات وحشة عشان احنا بنطالب بحقوقنا...اصل كده نبقي قلالات الادب....احنا لازم ناخد علي دماغنا بالجزم ونسكت عشان نبقي مؤدبين
سؤال ونفسي حد يجاوبني عليه؟
لو كان في اوائل دفعتنا خمسة ولاد دكاترة وشخصيات مهمه....كانت امتحانتنا هاتكون كده؟
كان عدد المقبولين هايكون كده؟
اقسملكم بالله كان الوضع هايختلف
شكرا يا سيادة عميد الكليه عالمجهود الرائع المبزول فالكليه....فعلا احنا دايما في تطور والوساطة اتمنعت والحياة بقي لونها وردي
شكرا يا د\سري.....ما شاء الله الدراسات العليا بقت ميسرة للجميع والبحث العلمي بقي متوفر عشان نهضة بلدنا
شكرا يا د\ناهد.....فعلا اهتميتي لامور الطلبه ونصفتيهم علي الدكاترة الظالمة اللي فالكليه
اما انتوا بقي يا طلبه يا مشاغبين بطلوا بقي كلامكم ده....احنا اصلا دفعه فاشله ملناش حق نتكلم
حسبي الله ونعم الوكيل
حسبي الله ونعم الوكيل
حسبي الله ونعم الوكيل

و الله يا دكتور انا اصلا كرهت الكلية و كل حاجة جاية منها و احلي حاجة لما تتكلم مع دكتور يقولك دي لايحة زي كده ما دكتورة ثناء قالتلي دي لايحة يا حبيبتي يعني و لا انا و لا د.ممدوح و لا رئيس الجامعة يقدر يغيرها فعلا يا دكتورة طب ما حسني مبارك و النظام اللي قامت الثورة عشان تشيله كان برضه بيسرق بالايحة و كله بالقانون سوري التشبيه اقصد بيه التوضيح بس طبعا مفيش وجه مقارنة
فعلا مفيش حد يعرف يغير الايحة بس ممكن نخلي دفعة الاولي فيها جايبة 97% و يبقي اصلا مفيش مقارنة بينها و بين اللي بعدها
فعلا دفعتنا اتظلمت حد هيقولي منتو هتتقارنوا باللي بعدكوا طب شوفوا مجاميع اللي بعدنا
اومال لو حضرتك عرفت ان ال 33 الدفعة اللي فاتت واخدة منحة
انا افتكر حضرتك كتبت موضوع وكنت حذرت فيه من المقارنة ده بس عمر ما جه في دماغي اني هتحط في الموقف ده
واحدة صاحبتي و هي ماشاء الله تستاهل كل خير ترتيبها السنة اللي فاتت 18 و اتعينت السنة دي و انا 15 و متعينتش انا عايزة اعرف بس علي اي اساس نتقارن و احنا اصلا ممتحناش نفس الامتحانات مش حضراتكم برضوا علمتونا ان علشان نقارن بين حاجتين لازم كل اثبت كل الظروف المحيطة بيهم
انا عارفة اني بدن في مالطة بس ياريت لو احنا مستفدناش من لثورة و ان القوانين الغبية دي تتعدل غيرنا يستفيد يااااارب

قدّر الله وما شاء فعل
متزعليش نفسك يا دكتوره و السنه الجايه ابقى قدمي في المنصوره وطنطا والزقازيق والقاهره كمان
وانا سمعت ان السنه الجايه في المنصورة هيطبقوا لائحه جديده ونظام ساعات معتمده وكده
بس قبل ماتقدمي في أي جامعه تانيه ابقي أسألي عن الأقسام اللي دكترتها كويسين وبينجزوا علشان ميأخروكيش ويغلسوا عليكي ويقعدوكي بتاع 6 او 7 سنين عقبال مايناقشوا رسالتك !!!!
وعلشان السنه دي متضعيش في الفاضي روحي قدمي على دبلومه في المنصوره همه احتمال كبير انهم يفتحوا باب التقديم تاني على اخر الأسبوع دا ،زي ما حصل في السنه اللي فاتت،علشان اصلا في ناس كتير من اللي اتقبلت مش هتروح،وربنا يوفقك....