استبيان عن امتحان العضويه .. للدكتوره ماجده نصر .. هام رجاء المشاركه

طبعا كلنا غير راضى عن امتحان العضوية وعن طول الامتحان .. والاخطاء اللى جت فيه واللى اتصلحب للجان قليله والباقى لم يدخل احد فيها ليعدل الاخطاء ..

وبما اننا فى كلية محترمه كلية قمه .. لازم يكون اعتراضنا محترم وبشكل كويس ..

والدكتوره ماجده نصر طلبت منى اننا نعمل استبيان عن الامتحان وطلبت منى انى اسلمه لها .. بس طلبت انه يكون موضعى ومفصل .. يعنى محدش يقول الامتحان زفت .. لا يقول ان السؤال كذا فى مشكلة كذا ..

وبالتالى انا بطلب من كل واحد فيكم .. يقول رايه فى الامتحان بشكل مفصل .. لكل سؤال .. وايه المشاكل اللى قابلها وهو بيحل فى الامتحان .. وان شاء الله كلامكم كله هيوصل للدكتوره ماجده ..

واحد يقول طب وايه اللى هنستفيده من ده ..

بص يا سيدى اولا رايك هيوصل للدكتور .. وده كل واحد فينا نفسه يحصل .. ثانيا اينعم احنا امتحنا خلاص .. بس لسه فيه تصحيح .. ولو الدكاتره اقتنعوا بكلامنا .. اكيد ده هياثر لصالحنا فى التصحيح .. واولا واخيرا هو تطبيق لمبدا التواصل بين الدكتور والطالب فى الكليه ..

يللا يا دكاتره كل واحد يمسك ورقة الامتحان بتاعته .. ويكتب استبيانه .. ولما احس ان كل الامتحان تم تغطيته .. وان عدد كويس عمل الاستبيان ده .. هسلمه للدكتوره ماجده على ورق ..

وربنا يستر فى اللى جاى ..

جزاكم الله خيرا جزيلا بجد عن الاستبيان ده ،
الدكتورة ماجده نصر بجد من الناس المحترمين جدا واللى لهم عقلية ناضجة جداااااااا
وفعلا بتحس بينا ،
وده كان باين قوى فى اسلوبها معانا فى امتحان الشفوى ،

هى بصراحة مسكت ورقة الامتحان معانا سؤال سؤال وناقشته معانا ،
واحنا قلنا راينا ،
وهو ..........
ان الامتحان طويل جدااااااااااااا وكمان صعب جداااااااااااااا،

وزى ما احنا قلنا للدكتورة ماجده فى الشفوى ...
أسئلة جزء د/ على كانت صعبه والوقت مش كافى خالص
فمثلا السؤال الاول اللى فيه nomenclature المفروض ده يبقى أسهل سؤال
لانه أول سؤال ومع ذلك كان ممتلأ بالالغاز
وده طبعا حاجة صعبه لانه هيعطيك انطباع سئ عن باقى الامتحان ،
واى دكاترة فى العالم ومهما كانت المادة لازم يجيبوا اول سؤال سهل
لمنع تعقيد الطلبه ،
هى د/ ماجده قالت احنا كنا المفروض نلتزم بالوقت المكتوب على كل سؤال
وده طبعا كان صعب جدا مع صعوبة الامتحان ،
المهم بعد كده قلنا نحاول نحل حاجة تانية
انا عن نفسى لقيت نفسى مش عارفه اركز خالص لا فى السهل ولا فى الصعب
وبقيت بحل فى باقى الامتحان وانا فى سباق مع الوقت ومش عارفه انا بكتب ايه ،

وبالنسبة لجزء د/ ماجده هو كان الى حد ما اسهل من جزء د/على بس برضه مش سهل
بالرغم من ان امتحان د/على الترم الاول كان اسهل بكتير من جزء د/ ماجده
....... بصراحه مش عارفه ايه اللى حصل عشان يعمل فينا كده الترم ده .......
والوقت مش كافى برضه بس ارحم من جزء د/ على
........وانا بقول رايى بصراحه .......

وبعدين كل ده بيشجع على الدروس الخصوصية ود/ماجده من اول الناس
اللى بتهاجم الدروس الخصوصية ،
انا عن نفسى بحضر كل المحاضرات ومع ذلك بحس ان الناس اللى بتاخد
كورسات افضل مننا بكتير وبيكونوا فاهمين بجد ،
ليه الدكاترة بقى يجيبوا الامتحان صعب؟؟؟؟؟؟؟؟؟؟

اما جزء د/ علاء فانا فعلا ما لحقتش احط فيه القلم يدوب بصيت ع الورقة بس ،

ده رأيى عن الامتحان بصراحه ...

وانا بطلب من الدكاترة بجد ياااااااااااااا ريت يراعونا فى التصحيح
احنا بجد فى امس الحاجة لنص درجة
وبجد نفسى اعدى منها السنة دى لانى مش متخيلة نفسى لو شلتها لا قدر الله .

أنا أسفه جدا ع الاطاله بس ياريت يبقى بفايدة بجد ،
وجزاكم الله خير .

اعتراضي ان الامتحان بجد كان طوييييل اوي اوي
وعايز واحد داخل يكتب بس ..... يعني توزيع الوقت للكتابة مش للتفكير في السؤال
والامتحان جايب المنهج كلو .... مغطي كل حاجة دي ميزة وعيب برده ان فيه حاجات مهمة وفيه حاجات لا
يعني احنا واحنا بنزاكر فيه حاجات بنركز عليها وفي حاجات بنقلبها اصلا او قراية وخلاص


السؤال الي انا محطتش فيه قلم كان معادلات الامين والاميد الي هيا الصفحة الخامسة
انا ببص لاول معادلة معرفتهاش ولقتني لسه هفكر واطبق الكلام
قمت قالبة الورقة وحليت الكربوهيدرات (الي كان بيتهيالي حسنة الامتحان الوحيدة)
والتزمت فيه بالوقت فعلا وكان اتبقى حوالي ربع ساعة كان ممكن ابص على المعادلات بس فضلت اني ارجع اكمل الي ناقصني فالاسئلة الاولى الي انا حلتها بالشبه اصلا

وكتبت على سؤال المعادلات i have no answer

الامتحان مش صعب الامتحان عايز واحد داخل رايق فاهم بيعمل ايه يبص للسؤال يكتب اجابتو
ومفروض ان الدكاترة لما تيجي تحط امتحانات تبص للامتحانات القديمة وتحطها على نفس النظام
بحيث الطلبة اكيد هتراجع على الامتحانات.. فيبقى شكل الورقة ادامهم طبيعي ومألوف ويقدرو يحلو

مش 6 صفحات ومليانين كلام

انا وحدة شايلة العضوية دي على 20 درجة التيرم الاول ....والله اعلم هجيب فيها كام التيرم التاني
ولا هعدي بيها ولا لأ......بعد يوم التلات دا
العضوية مش سهلة انها تتشال مع مواد تانية ولا تتشال لوحدها اصلا ....كفاية احساس انو يبقى معاك عضوية تخلف .

وكتبت واتكلمت وقلت اللي عندي عسى فعلا يادكتر الجوهري الكلام يوصل للدكتورة ماجدة نقدر نغير حاجة

لو مش لينا ...يبقى للسنين الجاية لطلاب اولى السنة الجاية واللي بعدها واللي بعدها .......

والله يا دكتور انت طعبا امتحنت معانا وشوفت الامتحان كانت ظروفة ازاى واحنا بعد الامتحان طلعنا مش عارفين اية الى احنا عاملينو صح واية الى غلط واية الى احنا سايبينة اساسا
نيجى نشوف الامتحان من جوة

انا معايا ورقة الامتحان شايفها
شوف بئة اول سؤا المفروض سؤال التسمية بيكون هدية من الدكتور لينا او زى مبيئولوا درجة الواحد بيكون ضامنها وانت شوفت السؤال كان عامل ازاى من اولوا وهوا تعجيز كانى بمتحن لسة فثانوية عامة
المهم انا شفت الى انا حليتة صح طلع 3 من 9
دة طبعا غير الغلطة بتاعت اللاكتيد
بئيت الورقة حلوة بس طبعا الواحد كمل الحل وهوا نفسيتة مدمرة
الورقة 2
اول سؤال كان سهل وانا حليتة وغلط فواحد كدة لغبطة من انا
السؤال التانى
A
اول وتانى سؤال غلط غلط غلط ومحدش بردوا جة الينا نا السؤال دة غلط ولا قلولنا التصحيح
B
الحمد للة كان كويس
C
كان بردو الى حد ما شغال
نخش عالتئييييييييييييل
الورقة 4
السؤال التالت A

شوف انت بئة سؤال بالكمية دة ومكتوب جنبة 5 دقايق دة الواحد لو كان شارب المنهج وحفظة صم كان خد فية 10 دقايق مبالك الى داخل مزاكر عادى انا عن نفسى اخت فية ربع ساعة
B
فية مركب كدة اسمة غريب مشفتوش فأى حتة خااالص او جايز كنت بزاكر من غير تركيز طبعا المركب دة الى هوا رقم C
الى بعد كدة انا شبتة عشان مكنتش مخلص امين كويس
الورقة 5
سؤال الترتيب بتاع **** شوف انت كام مركب انا على ماوصلت للورقة دى كان فاضل ساعة الا ربع على الامتحان طبعا سيبتة عشان اكمل البائى وفالاكمل بردو كان فية كام جزئية معرفتهاش طبعا انا مكنش عندى وقت حتى افكر قبل محل كنت عايز اخلص باى طريقة عشان والاهى نفسيتى تعبت
الورقة 6
الحمد للة لائيت حاجة تتحل مع انى كنت مزاكر كربوهيدريت قلب وفالانجاز الا ان دكتور علاء ربنا يخلية انا شايف انو هوا جاب اسئلة تتحل والواحد يجمع منها درجات بعد المأسى الى حصلت فالخمس ورقات الى فاتوا.......................
وبكدة يا باشا انا خلصت ومعلش لو كنت طولت عليك بس انا كنت عايز اعرف رأيك بردو انت كنت خارج من الامتحان تعبان زينا
:):):)

اولا بشكر كل اللى حط رايه وعمل استبيانه .. وبدعو كل اللى لسه مشاركش انه يشارك .. وتاكدوا يا جماعه ان كلامكم كله هيوصل والله للدكتوره ماجده .. لانها هى اللى طلبت منى كده واكدت عليا وصممت انها تعرف رايكم كامل ..


وبالنسبه لاستبيانى انا هعمله فى الاخر خالص ان شاء الله ولو انه مش هيكون فيه حاجاه جديده او مختلفه عن اللى اتقال ..


منتظر مشاركات اكتر ...

أولا أنا بشكر د/ماجدة على تعاطفها وتواصلها معانا بجد ويا ريت كل الدكاترة يكونوا زيها
بالنسبة للسؤال الأول :
* طبعا nomenclature زي ما كل الدكاترة قالوا المفروض يبقى أسهل سؤال وهدية من الدكتور وبصراحة أنا مش عارفة هاخد فيه درجات ولا لأ .
* وبعدين سؤال acetophenon بصراحة ده السؤال الوحيد اللي كان حلو في جزء د/علي وبشكره عليه.
* أما بقى سؤال diethyl malonate أنا كنت مذاكره جدا والله وعارفة إنه بيتكرر في امتحانات كتير بس من الخضة معرفتش أحل فيه حاجة .
* نجي بقى لسؤال aldol condensation والله ما حليت في إلا واحدة مش عارفة ليه؟؟؟
السؤال الثاني:
*بصراحة keflex ده عمري ما سمعت عنه خالص .
* أما سؤال allyl cyanide حليته بعد التصحيح.
* وسؤال mechanisms ما افتكرتش ولا واحد فيهم فكتبت المعادلات وأسماء التفاعلات بس وربنا يستر.
* وسؤال تكملة المعادلات كان حلو الحمد لله ما عدا اسم polymer .أما جزء د/ماجدة كان شكله سهل بس طويل وعايز تفكير فقلت هحل جزء د/علاء وبعدين اخش عليه تاني بس مالحقتش وماحلتش فيه حاجة خالص .
السؤال الرابع:بصراحة ده الحاجة الوحيدة الحلوة في الامتحان كان جاي حلو جدااااااا

بصراحة أنا بعد كل ده مش عارفة هنجح ولا لأ ربنا معانا كلنا إن شاء الله
وبشكر د/ماجدة تاني مرة ود/جوهري على حسن وسرعة تصرفه iii

شكرا جزيلا جزيلا لد-ماجدة لانها مستعدة تسمع راينا واللي كان نفسي فعلا انه يوصل للدكاترة
لأننا بجد بنحترم دكاترتنا جدا والاستبيان ده أكد لنا أن اللي حصل في الامتحان كان غير مقصود وقابل للتصحيح
***أولا الشكوى من جميع الطلبة باختلاف مستوياتهم
انا تقديري العام الترم الاول امتياز وفي عضوية اعدادي والترم الاول كنت جايبة امتياز

طبعا اكبر مشكلة والشكوى العامة من الامتحان كانت في ضيق الوقت . الوقت المكتوب لا يتناسب تماما مع الاسئلة لذا كانت الاجابات بدون تفكير لنتمكن من حل اكبر قدر ممكن قبل انتهاء الوقت
لا احنا قادرين نجاوب السهل بسب السرعة ولا قادرين نفكر في الصعب بسب ضيق الوقت!

*اولا جزء د.علي:
1- احنا ما أخذناش تسمية ما زاد عن 10كربون ...
وجزء الالكان ماكانش ليه جزء في الكتاب الترم الاول يعني معلوماتنا في تسمية الالكان من محاضرات د.سحر
وكتب العضوية كلها ومحاضراتها عندي لأني بحضر محاضرات العضوية من اعدادي كلها ...
واللي جاوبها صح اللي بياخدوا كورسات واعتقد ده ضد مبدأالكلية

2-التسميه كلها 9درجات يعني المفروض ماتاخدش اكثر من عشر دقايق ربع ساعة وده كان مستحييييل
3-سؤال diethyl malonate(, أو أسئلة الmechnisms عامة)
احنا اتعودنا في المحضرات على الفهم لا الحفظ ود.علي كان بيقول افهم الmechanismاساسه ايه من غير ما تحفظ وفي الامتحان بفهمنا نحل
وده كان مستحيل مع الوقت المتاح .الامتحان عاوز حد حافظ.... يسمع الاجابة من غير تفكير
صحيح الحفظ مطلوب لكن مش هو الاساس (ده اللي اتعلمناه )


*ثانيا جزء د. ماجدة:
(A)
كل جملة تتقرأ ونفكر في جميع الاجابات الممكنة في اقل من دقيقة!!! افتكر انه اخد مني 10دقائق تقريبا مع اني كنت بحاول أقرأ و افكر و اكتب في نفس الوقت!
(B)
-صعب ان الstructureيترسم ونفكر ونكتب السبب في دقيقة(وربع)!
-c-اعتقد ان كان مطلوب حفظ structures of non essintial amino acids & الثلاثةdrugs
لكن المركب ده مااعرفش حد عمله لأن أثناء المحاضرات كنا بنفهم السبب دون ان يطلب مننا حفظ.

* باقي الاسئلة عامة في الثلاثة اسئلة الاولى مشكلتها الاساسية الوقت
لااا وقت كافي للتفكير

*ثالثا جزء د.علاء :
الوحيد الي كان سهل وممكن يتحل في أقل من الوقت المخصص له وبجد كان ختامها مسك بسؤال د.علاء


*انا عن نفسي سبت الاسئلة اللى محتاجة تفكير ووقت .... لما خلصت د.علاء رجعت للي كنت سايباه وطبعا الوقت خلص وانا لسه سايبه كذا سؤال

آسفة جدا جدا جدا على الاطالة ومرة ثانية شكرا جزيلا لأنكم بتسمعوا رأينا

أولا أنا احب أشكر الدكتورة ماجدة على إهتمامها :hi:

بس فعلا دا كرم منهم انهم يحسوا بينا

لانه بصراحة امتحان يفوق قدراتنا وكمان الوقت

وزى ما الدكاترة قالوا قبلى من اول سؤال

اللى المفروض تقريبا بنبقى ضامنينه رااااااااااااااااااح مع اللى راااااااااح بعده:slam:

وكمان الوقت كان صغير جداااااااااااااااااااااااااااااااا

والله انا كنت هعيط فى الامتحان

بس فجرت كل طاقتى برة الحمد لله عيطت لما قلت بس

بس كمان ماكنتش لوحدى كل اللى كانوا قدامى من الدفعة كانوا تقريبا بيعيط

دا احتى المراقبين وانا طالعة كانوا بيقولوا الدفعة كلها طالعة تعيط

بس والله ما تقصير مننا

يعنى مش ممكن يكون كل الدفعة ما زاكرتش وقصرت يعنى

الامتحان بجد فظييييييييييييييع :sad:

السلام عليكم ورحمه الله وبركاته

اولا احب اشكر الدكتوره ماجده على اهتمامها برأى الطالبه

نبدأ ف الامتحان
السؤال الاول
Aوهو كان بيتكلم عن IuPac Name
انا شايفه انت الوقت 30 دقيقه غير كافى على الاطلاق للتفكير والكتابه
انا وصلت للساعه 9.30 ومكنتش حليت من الايوباك غير اتنين
وطبعا انهرت وحسيت بالضياع لما عرفت ان الامتحان ست صفحات مليانين بالاسئله
قولت طيب انزل اكمل باقى الاسئله وبعدين ربنا يسهلها وارجع احل الايوباك تانى
مع العلم ان 12 ذره كربون دى لوحدها صدمتنى لانى كنت حافظه لح 10 ذرات كربون
جيه السؤال B وده سؤال انا معترفه انه سهل جدااااا بس للاسف ياريت الدكتور على كان حطه اول سؤال
لانى بأمانه وضمير مزكراه لكن للاسف من الرعب الى حصل من اول سؤال نسيت كل حاجه
وكأن السؤال الاول كان بمثابه كهربه شديده جدا عالمخ وسيحت ومسحت كل المعلومات
وصلت للساعه 9.45 وانا لسه فى الصفحه الاولى و تقريبا مش حليت اى حاجه
نجى للسؤال C هو حلو وسهل والحمد لله حليته مع العلم الجزء التانى منه مش متأكده من الحل
ندخل بقى ع الصفحه رقم 2 والسؤال D Aldol Condensation
هو السؤال انا مش عارفه هو الصعب ولا لا بس انا متأكده انى حليت الاولى صح والباقى تقريبا غلط
انا عارفه طريقه حل السؤال وعارفه الخطوات الى مفروض نقوم بيها بس حقيقى توتر خلانى مش قادره اركز لانى دخلت على الساعه عشره يعنى لسه فاضل ساعه واحده والامتحان ينتهى
ازااااااااااااااااااااااااااااى فات ساعه فى صفحتين ولسه 4 صفحات متبرشمين اسئله مع العلم الصفحه رقم اتنين كانت لسه مخلصتش حل فيها ؟؟؟؟
نجى للسؤال التانى رقم A
حقيقى وبامانه انا اول مره اسمع عن Keflex مش عارفه ده اى ؟؟؟
هل ده تقصير منى ؟؟؟ ازاى وانا والله مزاكره المنهج المطلوب مننا مش سبت ولا محاضره واحده
السؤال بقى الى اتعدل فى الاخر ده حوالى الساعه 10.30 انا كنت حليته قبل التعديل ومش متأكده من الحل لما اتعدل لينا بس متاخر انا معرفتش ارجع وادور ع السؤال تانى وارجع اضيع وقت ف الكتابهوالتفكير فيه من تانى فسبته وقولت ربنا يسهل ...........
السؤال B ف السؤال التانى انا كل الى عملته انى ترجمت السؤال الى جايبه الى معادلات غير
كده انا معرفشى ايه الى مفروض نعمله بالظبط ؟؟مش عارفه والله انا ساعتها فاقدت الثقه بنفسى تماما وايقنت انى مش هنجح ف الماده دى رغم درجتى الى تقريبا ج ج ف الترم الاول
ف العضويه
لسؤال C ف السؤال التانى يمكن هو ده الى اتحل مع وجود الغلطات طبعا بسبب عامل السرعه
الى مش مخلى اى حد يركز الوقت كان بيجرى وراى بالسيف حاسه ان السيف على رقبتى
السؤال التالت
انا بقى قولت الحمد لله سؤال الاختيارات ان شاء الله هيطلع حلو ؟؟ ده مجرد اختيارات
وانا ولله الحمد مزاكره كويس
طبعا انا حليت الاختيارات لكن مش عارفه صح ولا غلط بس حقيقى كان صعب وعاوز وقت
مستحيييييييييييييييل يتحل ف خمس دقايق ........مستحيل بجد انا اخدت فيه ربع ساعه
السؤال B كان ف الضياع المراقب بيقول لسه ربع ساعه وانا كنت ف الصفحه رقم 4
وحسيت ساعتها وكأن الدنيا بتلف بيا انا انهرت بجد ساعتها مش عارفه اتلم على اعصابى والشيطان ساعتها كان بيقولى قومى وسيبى الورقه ؟؟لكنى صممت اكمل للاخر وارضى ضميرى
السؤال C حليت بسرعه وده طبعا اسهل سؤال مع العلم اخد منى حوالى 7 دقايق
بعدها سبت كل حاجه وقلبت على جزء الدكتور علاء ربنا يكرمه يارب
وندمت ندم شديد جداااااا جدااااااا انى مش بدأت بيه لانه كان سهل
ومن شده فرحتى انا مكنتش قادره اكتب لكنى ولله الحمد حليت الدكتور علاء ف 10 دقايق
وهو اكيد بسبب السرعه طير درجتين تلاته بس الحمد لله
كان لسه خمسه دقايق رجعت بسرعه للصفحه رقم خمسه وكتبت فيها اى حاجه
والكااااااااااااااااااارثه لما طلعت من الامتحان وقرأت براحه وعرفت انى كنت عارفه معظم حلها

يا دكتوره والله الامتحان طويل اووووووووووى اوووى ومحتاج وقت اضعاف الوقت ده
وكمان شديد شويه عن الاعوام السابقه يحتاج لتفكير رهيب او طالب حافظ صم
انا قدرتى متحلش امتحان بالشكل ده ف الوقت القليل ده
اسفه على الاطاله وشكرا خاص للدكتوره ماجده لتعاطفها معانا
بس ارجوكوا ارجوكوا ارجوكوا راعونااااااااا ف التصحيح انا مش بطلب غير النجاح
بعد ما كنت داخله على اساس امتياز .........صعب اووى نجيب جيد جدا الترم الاول
وبعدين نشيل الماده دى بالذان بعد سهر الليالى .........
انا حقيقى مكويه ومش عارفه اركز فى اى حاجه بعد صدمتى من العضويه .

سعيد جدا لتفاعلكم مع الموضوع .. ومنتظر آراء اكثر ليتم تسليمها للدكتوره ماجده ان شاء الله ..