انسان لسان....وايه باقى؟؟!!!(بقلم شاعرة البحر الصغير والمركز الثانى فى المسابقة الادبية )
الناس يا ناس معدتش فيها غير اللسان
ده راح فين وده جه منين ..واللى غطس ما بان
ماسبوش قريب ولا بعيد ولا حتى الجيران
كل همهم كشف المستور ..وايه يكون ورا البيبان
هيكون وراها ايه يا عم مرجـــــــــــــــــان؟؟؟!!
اكيد ورا البيبان بيبان لكن...............
من كتر لمعان العيون فيها اصبحت سلوفان
من سهم حسود او نفخه حقود......تطير
وربنا يكفيك شر شماته الشمتـــــــــــان
فى ثانيه تنهار العمدان وينطفى الدهان
وتبهت الالوان اللى كانــــــــــــــــــت
فى يوم زاهيه على الجــــــــــــــدران
وده حال بنى آدم لما حطم كيان انسان
كان كل ذنـــبه انه اداله الأمان
كان فاكره يعرف معنى الكتمان
كان فاكره فى يوم انســـــــــــان
لو تكدب فى يوم عليـــــــــــــــهم
يشوفوك فى عيونهم مــــــــــــاس
واول ما تفتح قلبك وتصارحـــــهم
تتحول علطول لنحــــــــاس.....
وبالجزم تنداس
وبعد ما كانوا بيوزنوك بالمال
وفى الرايحه والجايه ينادوك يا استاذ
بصدقك يحدفوك بالطوب والازاز
ويجرحوا مشاعرك وبدون احساس
لايفتكروا لك الطيبه ولا يعرفوا
ازاى يقابلوا الاحسان بالاحسان
ما انت انكشفت يا حلو والمستخبى بان
الله الله يا سلام.....!!!!!!!!!!!!!
دلوقتى الفهم ملاهم ...ونضجت الاذهان؟!
ولما شافو لك غلطه.......ماصدقوا
وبدأ الرهان------------------------
اللى يألف سيناريو...واللى غاوى افلام
واللى رجليه مساعداه
وخد الحارة كعب داير يملى الودان
خلاص---------------------------
بقى منهم العلاّمه وابو العريف وسمعان
ماسمعوش قول الرحمن لما قال...
اذا جاءكم فاسق بنبأ فتبينوا يا اخوان
مابصوش يوم لعيوبهم ولا دوروا فى جيوبهم
يمكن يلاقوا ربع جنيه يجيبوا بيه لبان
يداروا بيه كسوفهم ......ويتلهوا
قبل ما يقعوا باللسان ويكون عليهم شاهد عيان
ياسلام ....ياسلام
ماهو ساعتها هينسوا كل شئ
وما هيفتكروا ...غير النسيان
عشان ينسوا حكمه اتقالت وبتتقال
====كما تدين تدان====
واتنزع الخير من ادينا وبايدينا
زرعنا الشوك فى كل مكان
شوفتوا ازاى العيب مالينا
ونرجع نشكى حالنا ونعيب فى الزمان
دا الانسان اتحلل وبعد ما كان له كيان
ماعاد باقى منه غير عين...ولسان
ولو فضلنا على ده الحال..
يبقى يا ويلنا من اللى جااااى
بقلم: شاعرة البحر الصغير