معرفش معنى العالم(بفلم Dr.Lido)
معرفش معنى العالم
لكني عايش فيه
و لو سألني حد عنه
مقدرش اخبي وأداري عليه
مضطر اقوله ...
ع السر كله
اني حاولت افهم معناه
لكن لقيته أزمة و معاناة
و تعبني ياما أيام وياه
........
قالوا الدنيا بتتغير
و مفيش ف الكون قوانين
و هوية ايه لامؤاخذة
ده كلام ناس مش عاقلين
العالم مفهوش فاصل
و امبابة جنب بكين
و ولاد العم حبابيك
افتح لهم الميادين
سلم دول زي اخواتك
خليك عاقل و رزين
اثبت و أجمد يا بطلنا
خليك مقدام و متين
ده أنت اما تروح و تسلم
يصبحوا منك خايفين
..........
و احنا مراعيين بنقدر
مبنطلبش انجاز
كان عندنا هرمين لولي
قلنا نكبرهم ليك ..
و نخليهم اعجاز
بس غلط مش مقصود
خلاهم صبحوا ازاز
فياريت تقلبهم فضة
أو حتى دهب أو ماس
متقولش انك مش عارف
و لا تقعد بقى محتاس
ادامك تلاتين ثانية
و تفكرلنا ف أساس
تاني بتقول مش عارف
صدقت بقى انك فاشل
و متعملليش حساس
.........
دايما باصص ع الفاضي
و مفكر نفسك قاضي
لا صحح .. ركز .. فوق
دي بنها غير الرمادي
و عشان تتأكد بس
اسمع لكلامي الآتي
اهو عدى خريف و خريف
و مشفناش الأشكيف
صدقت ان انت مخرف
و عايش ف سيناريو مخيف
......
و عشان كدة أنا ف نظرهم
مش فاهم معنى العالم
بيقولوا أفكاري أساطير
و البعض يقول أنا ...
انسان حالم
