اللقاءات الطلابية .. غاية فى الأهمية !!!

بسم الله الرحمن الرحيم

ندخل فى الموضوع علطول .. عشان مطولش عليكوا ..

تم اعتماد جداول اللقاءات الطلابية لجميع الفرق و تعليقها أمام أبواب المدرجات ..

اللقاءات الطلابية تهدف إلى حل المشاكل التى تواجه الطلبة مع أقسام الكلية .. بالإضافة إلى حل المشاكل العامة ..

كل أسبوع فى نفس الميعاد .. و لمدة 4 أسابيع هيعقد اجتماع مع الطلبة فى المدرجات كل حسب الجدول اللى تم تحديده .. و مناقشة مشاكل الطلبة .. و الوقوف على النقاط الهامة اللتى يعانى منها الطالب .. بالإضافة إلى معرفة أهم ما يطلبه الدكتور من الطالب من حيث الالتزام و الحضور .. إلى المعامل .. و السكاشن .. و الامتحانات ..

إحنا بدأنا النهاردة فى تواجد كل من ،،

الأستاذ الدكتور محمود بكر العشماوى -- عميد الكلية

الأستاذ الدكتور حسن الكاشف -- وكيل الكلية لشئون التعليم و الطلاب ..

الأستاذ الدكتور سرى -- مدير وحدة ضمان الجودة والاعتماد ..

الأستاذة الدكتورة داليا رشاد عبد الحميد .. القائم بعمل رئيس قسم الميديسنال ..

الأستاذة الدكتورة سعدية محمد محمود العشرى ..

الأستاذة الدكتورة ماجدة أحمد الشربينى ..

الدكتورة عزة رشاد معروف ...

الدكتورة دينا توفيق محمد الشربينى .. ،،

الدكتورة نجلاء إبراهيم عبد العزيز ..

و برغم قلة عدد الطلاب المشاركة .. اللى أنا بصراحة اتضايقت منه .. و إن كان فى عدد معظم اللى قاعدين .. قاعدين يتفرجوا .. و مش بيشاركوا .. .. إلا إن اللقاء كان فى منتهى الروعة ..

و نيابة عن جميع طلاب الفرقة التالتة .. بقدم جزيل الشكر لكل الدكاترة اللى شاركونا ..

و أتمنى من باقى الفرق التفاعل .. و المشاركة ..

و أرجو من الطلبة الحضور .. للاستفادة .. و الوقوف على ما يواجهم من مشكلات .. :co:

تم إضافة استفتاء للموضوع ..

الاستفتاء متعدد الخيارات .. يعنى ممكن تختار أكتر من حاجة .. و أرجو إن اللى يختار ميناقضش نفسه ..

أتمنى التفاعل من الأعضاء .. و أرجو الأمانة فى نقل صورة فعلية لإدارة الكلية :)

فكره حلوه أوى ياريت فعلا تطبق عندنا ف تانيه ...هوا بصراحه احنا لسه مش عندنا خبر ان فعلا اللقاءات دى هتتعمل ...بس بما انها بدأت فعلا النهارده ف سنه تالته يبقى احنا اكيد اللاحقون ... احنا بجد محتاجين حد يسمعلنا و يشوف مشاكلنا ف الكليه ويحاول يحلها معانا ...

اللقاءات بدأ تفعيلها من الأسبوع ده .. لكل الفرق ..

و الجداول متعلقة قدام المدرج ..

و أكيد اللى ميعرفش.. حاجة من الاتنين ..

يا إما مخدش باله من الجدول .. يا إما مش بيحضر :5:

لا والله بحضر بس مش باخد بالى من الجداول دى ...انا اللى شفته بس النهارده جدول الامتحانات :fop (37):

انا كان نفسى احضر بس الندوه بتاعتنا كانت شغاله فى نفس الوقت

انا اعتذرت لد/ماجده ود/داليا
والاسبوع الجاى مش هاقدر احضر ياريت لو ينفع الميعاد يتغير لاننا عدد كبير عندنا سكشن فى الميعاد ده

بش لو مانفعش اكيد هنكون موجودين الاسبوع الجاى ان شاء الله

اممممممممم
مخدتش بالى منه
بس الصراحة
كان عندنا كزا لقاء طلابى مع دكاترة الاقسام الترم الاول
وكنت باحضر
لكن للاسف
نتايجه كانت مخيبة للامال
وبعض الدكاترة كانوا مش بيصدقونا لما بنشتكى من حاجة
وكنت بطلع اعصابى تعبانة وباحس انه مفيش فايدة للاسف
ياريت اللقاءات دى تكون افضل من قبل كدة

شكرا لك يا ياسر على نشر الموضوع وعلى مشاركتك الايجابية فى اللقاء
وكل ما تحدثت عنه قيد الدراسة

وانتى با د مطحونة باين عليكى زعلانة من الكلية كلها ... !!!!!

اقتباس:

---

المشاركة الأصلية كتبت بواسطة Dr Mahmoud

شكرا لك يا ياسر على نشر الموضوع وعلى مشاركتك الايجابية فى اللقاء
وكل ما تحدثت عنه قيد الدراسة

وانتى با د مطحونة باين عليكى زعلانة من الكلية كلها ... !!!!!

---

ابدا والله يا دكتور
انا بحب الكلية بتاعتى فوق التخيل
لانى داخلاها عن اقتناع
مش تنسيق حادفنى
كنت باحلم بيها لمدة سنين طويلة
ولما دخلتها مش عارفة ايه اللى حصل
فى مشاكل كتير اوى بنقابلها كطلبة
مواد او خلافات مع الدكاترة
وحسيت ان مالهاش حل فى وقت م الاوقات
لكن الحمد لله بقالى مدة حاسة بحركة ايجابية نحو الافضل
ويارب يتم الحكاية دى على خير
والحق اشوف الكلية باحسن حال قبل مااتخرج باذن الله
امين يا رب
:::::::::::::::::::::::::::::::::::::::::::::::::
وعاوزة الفت نظر حضرتك لحاجة يا دكتور
مجرد تواجد حضرتك معانا على الاقل فى المنتدى
بتعملى دفعة معنوية غير عادية
مش بصدق اصلا انى كلمت حضرتك عالمنتدى
ههههههههههههههههه
والكلية اللى العميد بتاعها زى حضرتك
اكيد هيبقى فى امل انها تبقى افضل
وباشكر حضرتك للمرة المليون على تواجد حضرتك معانا
واتمنى حضرتك تبقى متواجد معانا علطول

اقتباس:

---

المشاركة الأصلية كتبت بواسطة Dr Mahmoud

شكرا لك يا ياسر على نشر الموضوع وعلى مشاركتك الايجابية فى اللقاء
وكل ما تحدثت عنه قيد الدراسة

---

شكراً جزيلاً دكتور محمود ...

أدامها الله علينا نعمة .. عميد كليتنا " أباً و أخاً .. حريص على مصلحة جميع الطلاب" ... دائم الحرص على تطوير الكلية إلى الأفضل ...

متأسف على إطالة الحديث فى اللقاء الطلابى .. و بشكر حضرتك على سعة صدرك ...

و شكراً على دراسة مشاركتى ...

و أتمنى رؤية حضرتك مرة أخرى فى لقاء طلابى قادم .. و فى اجتماعات وحدة الضمان :)

:fop (27): :fop (27): :fop (27):

اقتباس:

---

المشاركة الأصلية كتبت بواسطة د///*مطحونة*\\\

انا بحب الكلية بتاعتى فوق التخيل
لانى داخلاها عن اقتناع
مش تنسيق حادفنى

---

أتمنى إن الكل يكون كده .. :)

اقتباس:

---

المشاركة الأصلية كتبت بواسطة د///*مطحونة*\\\

كنت باحلم بيها لمدة سنين طويلة
ولما دخلتها مش عارفة ايه اللى حصل
فى مشاكل كتير اوى بنقابلها كطلبة
مواد او خلافات مع الدكاترة
وحسيت ان مالهاش حل فى وقت م الاوقات

---

أكيد كل مشكلة و ليها حل .. و لكن دايماً إحنا اللى بنفكر بطريقة سلبية و نبص لنص الكباية الفاضى ..

اقتباس:

---

المشاركة الأصلية كتبت بواسطة د///*مطحونة*\\\

لكن الحمد لله بقالى مدة حاسة بحركة ايجابية نحو الافضل
ويارب يتم الحكاية دى على خير
والحق اشوف الكلية باحسن حال قبل مااتخرج باذن الله
امين يا رب

---

اللهم آمين ... و أتمنى مشاركة أكبر عدد من الطلاب فى تطوير الكلية و البحث عن الأفضل دائماً ..

ماشاء الله
اللقاء باين عليه كان جميل
للأسف محضرتش عشان كان عندي سيشكن
يارب يكون اللقاء خرج بنتائج فعلية وخطوات عملية

انا الصراحة حضرت لقاء طلابي التيرم الأول وكان لقسم المديسنال برضه كان العدد قليل جدا ، أذكر كنا 3 أولاد بس في المدرج !!!! وحوالي 10 بنات !!!!

أتمنى يكون فيه تفعيل للقاءات ديه ونظهر أهميتها عشان الطلبة تهتم بحضورها

يارب يكون اللقاء الجاي مش في ميعاد سيكشن بقة عشان أحضر

جزاك الله خيرا د . محمود على الحرص على التواجد معانا باستمرار وكل إدارة الكلية على الاهتمام


وفي انتظار اجتماعات وحدة الضمان :)

ياخساره أنا محضرتش للأسف معرفتش ان كان فى لقاء طلابى وفوجئت بنهايته وانا داخله المدرج
بس على العموم حصل خير وان شاء الله اللقاءات التانيه نحضرها
لأن بجد الفكره جميله وباتمنى تفعيلها من ناحيه الطلبه يعنى الكليه عملت اللى عليها واتاحتلنا فرص كتير نعبر بيها عن مشاكلنا فرص يمكن لم تتح لغيرنا فى السنين الماضيه زى الاشراف الاكاديمى واللقاءات الطلابيه
بس للأسف احنا اللى مش بنفعلها من ناحيتنا احنا لاما مش بنحضر لاما بنحضر ومنتكلمش يعنى عدد كبير قوى من الطلبه ان لم أقل الغالبيه العظمى منهم (وعلى فكره أنا أولهم) معندوش الشجاعه انه يقوم ويتكلم عن المشاكل اللى بتواجهه لاسباب عديده مش مجالنا دلوقتى سردها
فياريت ياجماعه نقدر نكسر الراهب النفسى اللى عندنا ونتفاعل أكتر علشان على الأقل يكون المستقبل أحسن ونقدر نتخلص من السلبيات والمعوقات اللى بنتعثر فيها وبتعترض طريقنا

شكله كان اجتماع مثمر
معرفتش احضره ... بس ده بسبب الندوه

وأكيد المرة الجايه أكون فيه
هو بدأ من الترم اللى فات بس الحقيقه مش كل الاقسام عملته ...

بس دى خطوه حلوة من خطوات التطوير ... وان المسافه تقصر بين الطلاب والادارة .
والطلاب اللى بيفضلوا يقولوا كلام كتيـــــر ... ياريت يحضروا ويعرضوا وجه نظرهم بشكل فعال ومباشر ..
وده دورنا اننا نقول السلبيات اللى شايفنها عشان نصلحها ;لان كل واحد فينا بيشوف من زاويه معينه ... كمان ماننسناش نشيد بالايجابيات ...
ولو كلنا قولنا رأينا نقدر نشوف الصورة كامله .
وبقدر الامكان الكليه تتطور ...
:fop (29):

فيه مشكلة في اللقاءات الطلابية
انها بتبقى معمولة في معاد بيكون فيه ناس نفسها تشارك بس بتبقى مشغولة بسكاشن او تجهيز لسكاشن او امتحانات

والمشكلة الأخرى اللي بنعاني منها " الطلبة المشاركين في الأنشطة الطلابية" اننا دائما في اوقات اللقاءات الطلابية بيكون فيه أنشطة للأسر

والمشكلة الأكبر ان مفيش وقت بين المحاضرات والسكاشن للقيام بالأنشطة فبنحاول نقتنصها في أي ساعة فاضية كده

زي ما حصل مع رحاب كده


بإذن الله نحضر اللقاءات القادمة ونشارك فيها

و أنا أتمنى المشكلة دى تتحل .. و إن شاء الله نقولها ..

و أتمنى حضور الكم الأكبر من الطلبة اللقاءات الطلابية .. بروح الاستفادة و الإفادة ..

بروح التعاون .. و روح المشاركة ..

و ليس بروح الاستماع .. و الخمول .. و السلبية ..

أتمنى من الجميع إنه يكون إيجابى ..

لأن عدم حضورنا .. بيأكد خطأنا ..

شكرا دك ياسر علي طرحك للموضوع
بجد انا كنت ما اعرفشي الجدول بتاع اللقائات العلمية وروح اشوفة علي باب المدرج وياريتني ما شوفتة كل لقائات الفرقة الاولي يوم الخميس
وانت ما تعرفشي يوم الخميس دة بالنسبة للدفعة عندنا عامل ازاي الخميس التعيس حضرتك
سكاشن بداية من الساعة 11 لغاية الساعة 7 بالليل
دة لمجموعة والمجموعة التانية مابيبقاش عندنا محاضرات في اليوم دة فتقريبا الطلبة ما بتجيش يبقي نص الدفعة بيجي وبيقي عندة سكاشن طول اليوم والنص التاني مابيجيش
يبقي احنا ازاي نعرف نحضر وعلي فكرة انا كنت حضرت لقاء الترم الاولاني للدكتورة سناء بجد كان حلو اوي
في الاخر ياريت تشوفولنا حل
شكرا تاني لطرح الموضوع

اقتباس:

---

المشاركة الأصلية كتبت بواسطة hancock

شكرا دك ياسر علي طرحك للموضوع
بجد انا كنت ما اعرفشي الجدول بتاع اللقائات العلمية وروح اشوفة علي باب المدرج وياريتني ما شوفتة كل لقائات الفرقة الاولي يوم الخميس
وانت ما تعرفشي يوم الخميس دة بالنسبة للدفعة عندنا عامل ازاي الخميس التعيس حضرتك
سكاشن بداية من الساعة 11 لغاية الساعة 7 بالليل
دة لمجموعة والمجموعة التانية مابيبقاش عندنا محاضرات في اليوم دة فتقريبا الطلبة ما بتجيش يبقي نص الدفعة بيجي وبيقي عندة سكاشن طول اليوم والنص التاني مابيجيش
يبقي احنا ازاي نعرف نحضر وعلي فكرة انا كنت حضرت لقاء الترم الاولاني للدكتورة سناء بجد كان حلو اوي
في الاخر ياريت تشوفولنا حل
شكرا تاني لطرح الموضوع

---

يا دكتور لو فى أى مشكلة فى مواعيد اللقاءات الطلابية .. المفروض تتوجهوا للأستاذ دكتور حسن الكاشف .. أو للأستاذ الدتور محمود بكر .. و تقولوله على المشكلة إنكوا عاوزين تحضروا بس المواعيد مش مناسبة للدفعة ..

و أظن المشكلة دى كان المفروض تتعرض أول ما اتعلّق جدول اللقاءات الطلابية ..

إحنا دلوقتى فى الأسبوع التانى .. و اللقاءات مستمرة لمدة أربع أسابيع .. يعنى لسة الأسبوع ده .. و كمان أسبوعين ..

فياريت تحلوا مشكلتكوا بسرعة :)

حدث هذا اليوم ....

النهاردة كان اللقاء الطلابى بقسم الكيمياء الحيوية ..

الدكتور أحمد ربيع .. و الدكتور عبدالله الموافى كانوا متواجدين فى الميعاد ..

مكنش فى عدد كبير من الطلبة .. فالدكاترة زعلوا و مشيوا !!!

لا تعليق !!

-----------------

طبعاً للأسف إحنا اللى غلطانين ..

بس أعتقد إن لو الدكاترة كانوا انتظروا 5 دقايق كمان كانوا هيلاقوا عدد أكبر ..

خصوصاً إننا كان عندنا سكشن assay و كنا لسة خارجين منه .. الساعة 1.10 ..

و يا دوب لسة داخل ع المدرج قايلنى واحد .. و قاللى الكلام ده ..

و بالطبع أنا اتصدمت .. و مصدقتش ..

و كملت طريقى للمدرج .. و فوجئت بباب المدرج مغلق :) !!