.....بتعمل كده ليه......

.....بتعمل كده ليه......

دلوقتى بعد ما النتيجه ظهرت وكل واحد عارف تقديره وتقدير اصحابه او اى حد يعرفه

ساعات بيستغرب

ويقول ازاى ده يجيب كده

دة كان بيعيط وبيقول يا رب اعدى

الموضوع ده حصل معايا شخصيا

وبجد متضايق منه قوى

بس معرفش هوة ليه بيعمل كده

الموضوع مش مستاهل كدب

ولا انك تسوء صورتك

ما كل حاجه هتظهر وهتتعرف.....!!!!

مش عارف

ده انا حصل معايا موقف فى اعدادى كنت خايف قوى ساعتها لكن الموضوع اتظبط

وطلع انى كنت غلطان

مكنتش خايف غير من ان صورتى تتهز امام اصحابى واى حد يعرفنى

لكن طلع كان فى غلط من الاول

فياريت لو حد من الناس دى او اى حد يقولى هما ليه بيعملوا كده..؟!!!

:fop5::fop5::fop5::fop5:

وارجو مشاركتكم

في ناس بتهول الموضوع شوية
وفي ناس بتحس فعلا انها مش هتعدي على الرغم من انها ممكن تكون حلت كويس جدا بس مثلا ممكن يكون في كام سؤال كده وقفو معاها أو استغرقت وقت كبير لتتذكره فبتتعكنن وبتحس كده فعلا وبتبأى محتاجة حد يهديها ويراجع معاها الامتحان عشان مابيكونوش مستوعبين الموقف
بس في ناس بأه غاوية كدب وخلاص ودي بتبقى عادة من الصغر .. بس مش عارفة ازاي مابيتكسفوش من نفسهم بعد كده..

ايوة فعلا من ايام ما كنا في ثانوية عامة وهما كانوا بيعملوا كدة والواحد بيرجع يتفاجئ انهم جايبين اعلى منه(انا مش بقر)بس اللي اقصده ان انت لوبتعمل كدة عشان ماحدش يحسدك او كدة فانت بالعكس بتلفت الانظار ليك اكتر منين ماحليتش ومنين جايب تقدير عالي وبعدين المفروض احنا كبرنا بقى خلاص ع الحركات دي ولا ايه رأيكم يا دكاترة؟؟؟

احسن حاجة ان الواحد ميهتمش بالحاجات دى و يركز مع نفسه و بس عشان يعيش مستريح

اقتباس:

---

المشاركة الأصلية كتبت بواسطة NonY

احسن حاجة ان الواحد ميهتمش بالحاجات دى و يركز مع نفسه و بس عشان يعيش مستريح

---

هوه مش حكايه ان احنا ناخد بالنا منهم ولا لا
دول خلاص بيتعرفوا ويتركنوا على جنب


:fop4::fop4:
نفسى واحد منهم يخش ويقولى هوه بيعمل ليه كده
لانى سألت واحد منهم هوة بيعمل ليه كده معرفش يرد

فنفسى حد يجاوبنى بجد


:fop4::fop4::fop4:

موضوع مهم حقيقى وظاهره دايما بتناقش فيها
للأسف الشديد الظاهره دى منتشره وبنتعرض ليها كتير
الواضح بقى اننا رجعنا تانى لأيام الثانوى كل واحد بقى خايف على نفسه وان حد يعرف انه بيذاكر أو بيحل
طيب كنا بنشوفها أيام الثانوى ونقول معلش بقى رعب ثانويه وخوف والموضوع هيضل شويه وينتهى
بس للأسف الظاهر الموضوع دا هيكمل مع الشخص دا فى كل حياته مهو بقى اتعود على كدا ومن كتر التكرار بقى حافظ الكلام وبيسمعه بدون تفكير وللأسف فى الأول بنصدق الشخص دا ويعنى بقى بنتأثر بكلامه وبكاءه وبنعد نفكر فيه وندعيله لحد لما يجى يوم النتيجه وخصوصا نتيجه اعدادى أنا شايفاها اصعب صدمه لأنك اول مره بقى بتشو ف نتيجه للكليه المهم تلاقى نفسك أمام واقع مذهل تلاقى الشخص دا ماشاء الله ( يعنى افتكر أحدى زميلاتنا كنت بسألها عملت ايه فى امتحان كيمياء فيزيائيه وغير عضويه وقعدت بقى تشتكى وتقول ربنا يستر وافاجأ بيها جايبه .........بلاش احسن)
هههههههههه بصراحه بيبقى شكلهم محرج جدا وللاسف بيتعرفوا بدا ومعدش يبقى فى مصداقيه فى كلامهم خالص لأنك بتعرفهم وبتتعود على سماع الكلام دا
واللى يضحك انهم هما اللى بيجوا يسألوك عن اخبارك فى الامتحان وآآآه يحسسوك انك بقى ممتاز ويبختك حليت وهما يعينى بقى مساكين
ربنا يهديهم ويهدينا
وشكرا يادكتور لطرحك الموضوع

الظاهره دى تخنق فعلا
كانهم بيقولو فى وش الواحد خمسه وخميسه مش ناقص غير يقراو المعوزتين
على العموم دى شخصيات باه المشكله انها بتاثر فى نفستى انا لانى بحس لما نتيجتى تطلع اقل ان العيب منى
اسلوبى مثلا غلط فى الكتابه ... مش بكتب المفيد...
الشفوى مثلا ... بقعد اقول لنفسى هما الدكاتره بيتشاؤموا منى ولا ايه
بس الخلاصه باه.... ماعلينا... ربنا يشفى كل مريض من اى داء
لان الامراض مش بسعضويه فى امراض نفسيه ... الغرور... التكبر... حتى انك تستغفل غيرك... مرض

وانا ف تالتة ثانوى كانت واحدة صاحبتى شاطرة قوى قوى كانت اشطر منى كتير
كانت طول السنة تقعد تقوللى اعمليلى جداول عشان اذاكر عشان اعوض مجموع السنة اللى فاتت وتصعب عليا واقول ازاى جابت المجموع القليل دا دى كانت موس واعمللها جداول وتانى يوم اشوفها ذاكرت ولا لا وابقى قلقانة عليها مع ان مجموعى كان 94.6 بس كنت مهتمية بيها وكانت صعبانة عليا
وبانت النتيجة لقيتها بتقوللى انها جابت 99 وحبة ضربتها فى دماغى قلت مستحيل بمجموعها اللى فات تجيب المجموع دا فسالتها ازاى قالتلى لا مانا مكنتش جايبة كذا انا مكنتش قايله لحد على مجموعى وبلعتها وقعدت اضحك
ودخلت طب وهتبقى دكتورة قد الدنيا يللا ربنا يهدى بس والله العظيم مش فارقة اصلا ومحدش بياخد غير اللى ربنا كاتبهولة

ياجماعة بالراحة شوية شكرا اولا دكتور سامح على طرحك مواضيع معاصرة من واقع كليتنا00 انا احيانا بكون زعلانة جدا من مادة وببقة متعصبة وخلاص بقول يارب بس اعدى الكلام اللى احنا عارفينو دة ومواد تانية اطلع منها مبسوطة جدا ومقفلة الامتحان خلاص وبقول امتياز امتياز بصو بقة 00 تتطلع النتيجة عكس التوقعات المادة اللى كنت بعيط فيها هية اللى امتياز والمادة التانية عكس ماتوقعت فانا شايفة ان دة فى الاول وفى الاخر كرم من ربنا وممكن تكون عملت حاجة كويسة قبل ماتدخل الامتحان هيا اللى عملت كدا اصلا احنا بننجح بدعا الوالدين دى حاجة الحاجة التانية بقة هية عدم الثقة بالنفس يعنى ممكن يكون اجابتو كويسة بس مش واثق انها صح او يكون شخصية مثالية ممكن يكون مجرد ان سؤال وقف معاه قفلو وخلاه ياخد الانطباع دة فانا شايفة ياجماعة اننا نحاول نلتمس الاعزار للى حوالينا ولو لقينا اصحابنا زعلانين نحاول نهديهم ودايما نفترض حسن النية وحصلتلى انا شخصيا فى الفيتو جبت اعلى من توقعاتى بس دة عشان ربنا عارف اد ايه تعبت طول الترم اتمنى تكون وجهه نظرى وصلت انا بقالى ساعة بكتب هههههه معلشى لو كان الكلام ملخبط اصلى عايزة انام:fop4:

موضوع جميل اوى
بخصوص اللى بتسال عنهم
والسبب انهم بيعملو كدة
لازم نقسمهم لنوعين
النوووووووووووووع الاول الخبيث الطيب
ناس مش بتبقى قاصدة انها تكدب
بيزاكروا وكل حاجة
بس خوفهم بيسيطر عليهم لدرجة تحسسهم انهم مش مزاكرين ولا عارفين حاجة
منهم اللى بينقل قلقه للناس
ومنهم لا مش بينقل قلقه وبيخاف انه يقلق حد معاه
بس فى الحالتين الناس دى واضحة يعنى بتقول بتزاكر ايه ومش بتزاكر ايه
بس بيبقو خايفين

فانت تقلل خوفهم دة خصوصا لو كانو بيزاكرو كويس
النوع دة مفيش خوف منه لانه بيخف مع الزمن
:::::::::::::::::::::::
النوع التانى
الخبث عندهم زايد شوية
وبالتالى نقدر نقول عليهم لؤما
دول بقة اخطر نوع
يحسسك انه مش عارف حاجة فى اى حاجة
وهو من تحت لتحت سوسة
وعارف كل حاجة
لما يسالك على حاجة وتجاوب
يتغاظ ويبصلك بغيظ واستغراب
ويبدا يتخنق منك لانك بتجاوب
ووشه يجيب الوان ويبدا فى شغل خمسة وخميسة
ولو سالته ممكن يجاوب غصبن عنه
زلة لسان يعنى
يقول ايه دة انا جاوبت صح
دة انا قلت كدة بالصدفة
يزاكر من تحت لتحت
ويقولك تعالى نروح نجيب اى حاجة او نشترى اى حاجة او نقعد فى اى حتة
ويخرجك من المحاضرة وانت بحسن نية ممكن تروح معاه
يقعد يكلمك فى المحاضرة براحته
ولما تيجى تتكلم يوقفك ويقولك اسكت عايز اركز
تناقض عجيب فى شخصيته
اعتقد
ان اللى بيعملو كدة
ناس مريضة بفيروس الانانية
:::::::::::::::::::::::::::::::::::
انا الحمد لله
عارفة الاتنين كويس
وليك يا دكتور سامح
نصيحة منى اقبلها او لا
ماتامنش لاى حد فى الدنيا دى
خصوصا فى الحكاية دى
وخد بالك من النوع التانى واكشفه
وعامله زى مابيعاملك
وكبر دماغك
محدش يستاهل انك تتغاظ منه

بص سامح المضوع ده بيحصلنا كلنا وبنشوفه

بس ناس عندها لما يروح منها سؤال تبقى اخر الدنيا والفئه دى معروفه

ناس تانيه بتخاف م الحسد

ناس تالته فعلا مش ممتازين ولا تتوقع ينجحو بس يجبو تقدرات دى بقى الى ليه معرفش وبتخنق بصراحه

عموما بلاش تشغل تفكيرك بغيرك فكر ف نفسك وبس

بصراحه انتو عندكو حق في الكلام اللي قولتوه
بس لازم تعرفو ان الموضوع ده بيختلف من شخص
للتاني يعني في ناس ممتازه لو طلعت من الامتحان ومحلتش سؤال يبقي هي كده
ضاعت وهتشيل الماده
وممكن تلاقي اصحاب يتفقوا مايزكروش الا جزا واحد مثلا
والشخص التاني عاوز يزاكر بس هم يقولو كبر مش لازم
وهو نفسه يجيب تقدير فيضطر يزاكر جزا تاني وميقولش لهم
فاحيانا يكون مضطر لكده فالاحسن ان كل واحد يزاكر اللي ربنا قدره عليه
وميسالش حد عشان ما يتعقدش

يا دكتوره انا مبسألش حد على النتيجه
طالما هوه مقاليش لواحده
وكمان انا اقصد الناس الخبيثه اللى تلاقيه هوه اللى جاى يقولك



:fop4::fop4::fop4:

شكرا سامح علي المواضيع الهايلة

احب ااقولك ان لو ليك صاحب كده يبقي اصبر علي ابتلاءك واحلي حاجة تكبر الجمجمة ومفيش مشكله اما تحرجة مرتين بعد كده هيتعلم ازاي يتعامل معاك

موضوع حلو وواقعي جدا يا دكتور سامح بجد بحييك عليه

اما بالنسبه عن رايي المتواضع في الموضوع فالاحسن ان الواحد دايما يقول الحمد لله على كل حال ومايكدبش لو غلط يقول الحمد لله على كل حال بس غلطت في السؤال الفلاني ولو حل كويس يقول الحمد لله الامتحان كويس حليت مش هيحصل حاجه في الدنيا اما عن مساله الحسد فلازم كلنا نعرف ان الحسد دا لو تم بيبقى بمشيئه الله يعني في الاول وفي الاخر قدر من عند ربنا زي المرض او الحوادث يعني لو واحد ملوش شغله غير انه يحسدك ويقر عليك 24 ساعه لكن ربنا سبحانه وتعالى لم يشا وقوع الحسد مش هيحصلك حاجه ولو جاب دجالين البلد كلهم اما لوربنا شاء انه يختبرك هيقع عليك وفي الحاله دي هتتعامل معاه كانه ابتلاء من ربنا وتصبر وترضى وكله هيمشي تمام اما انا مش عارفه الناس بتفتكر الحسد وتخاف منه ومتفتكرش الكذب وهما بيحلفو انهم هببوا علشان يصرفوا العين
معلش يادكتور اني طولت في النقطه دي بس كنت حابه اوضح رايي فيها
واخيرا بقى يادكتور الناس اللي تتعرف عنها الصفه دي احسن حاجه في التعامل انك تتجنب تماما انك تسالهم عن اي حاجه تختص بالكليه من اساسه لانك لو سالته عن محاضره او سكشن هيقلك مفهمتش وهكذا فعلى ايه الواحد ينرفز نفسه معاهم
فربنا يوفقنا جميعا ويرزقنا حسن الظن فيه ويكلل سعينا بالنجاح وميرسي كتييييييييير للمره التانيه ع التوبك الجميل وسوري ع الاطاله