التعيين!!!

السلام عليكم ورحمة الله وبركاته

ازيكم ياجماعة
انا هتكلم فى موضوع ممكن تشوفوه عجيب شوية بس انا شايف انه مهم
التطوير اللى بتشهده الكلية خلانى اتشجع واتكلم فى الموضوع ده
وبدون مقدمات الموضوع هيكون عن نظام التعيين فى الكلية
هل انت شايف انه ملائم للعصر ويواكب تطورات التعليم فى انحاء العالم المتقدم
هتقولى ايه هو نظام التعليم فى العالم المتقدم
ماشى
هقولك ياسيدى
فى أىى جامعة محترمة بره التعيين بيشمل الأوائل والحاصلين على التقديرات المرتفعة
بعد عمل عملية تققيم لعدة عوامل
اولا العامل التربوى
هل هذا الشخص قادر على ايصال المعلومة بشكل واضح-لأنه لا يشترط ان يكون العالم قادر على ايضاح ما تعلمه للأخرين وفى نفس الوقت فان هذا لا ينقص من قدره كعالم-
ثانيا العامل العلمى
هل المتقدم لشغل الوظيفة على درجة من العلم تؤهله لأن يشغل هذا المنصب

طبعا المتخرجين الأوائل كلهم تقريبا يحققون الشرط الثانى
ولكن الكثير منهم يخفقون فى الشرط الثانى
وهنا يتم تعيينه فى الكليه كباحث علمى ولا يسند له عملية التدريس
ويتم اختيار الطالب الذى يحقق هذه الشروط بعد نظم اختبارات شفوية وتحريرية
وتقييم نهائى من أساتذته
وهنا يتم تعيين الطالب فى كليته
ولكنه يظل خاضعا للتقييم ولكن هذه المرة من طلابه وأى تقصير أو فشل منه فى تعليم الطلاب يفقده مركزه
لأن عقده يكون لمدة عام فقط

لقد كتبت هذا الموضوع وانا أتذكر طلاب فى غاية المهارة والبراعة والأحترام يفشلون فى تحقيق أمنيتهم كمعيد فى تخصصه ؛لأن اختبارات لا تعبر عن مستواهم الحقيقى قد قيمتهم بشكل خاطىء

ليس من الشرط ابدا ان يكون الأول على الكلية هو الأفضل فى المادة العلمية أو فى القدرة على الشرح
بل قد يكون من هم من أقل منه فى التقدير وأعلم منه بما تقدم من شروط تؤهله بشكل كامل لأن يشغل هذه الوظيفة

بعد أن قرأت هذا الموضوع هل ترى ان نظام تعيين المعيدين فى كليتنا عادل
وانه يمنح فرص متكافئة لكل الفئات
انتظر أرائكم بفارغ الصبر
وأرجو من ممن قد يقرأ هذا الموضوع ان يخبرنى رأيه
شكرا

مش هتكلم كتير

بس انا شايف ان نظام التعيين يفشل نتيجة فشل نظلم الامتحانات

انا معاك جدا
فعلا هناك دكاترة كبار فى المادة العلمية وعلى قدر كبير من العلم ولكن مش عندهم ملكة التدريس ونقل المعلومة بشكل واضح
المعلم ليس بشرط ان يكون عالم كبير
والعالم ليس بشرط ان يكون معلم

لابد من الفصل بين الاثنين
ولا مانع ان يجمع شخص بين الاتنين فهذا ممتاز

اما المظلوم الوحيد فى الحكاية دى هى الطلبة اللى بتعانى اثناء الدراسة

انا متفقه معاك جدا يا دكتور فى الراى كتير جدا بنشوف معيدين ودكاتره كبار ومعندهمش اى قدره على توصيل المعلومه ويمكن ده سبب اساسى من اسباب الدروس الخصوصيه انك ممكن تلاقى خريج بيدى دروس وبيوصلك المععلومه بصوره مناسبه جدا تقدر تفهمها يا ريت فعلا تكون فى اختبارات فى تعين المعيدين ويكون عقدهم سنه ولو كويس يتمد العقد بتاعه ولو مش كويس يمشى

اولا الامتحانات لا تعطى الفرصه الكافيه للحكم على المتفوقين .. ثانيا اول عامل من عوامل الاختيار من الاوائل لابد وان تراعى ..

لكن فيه سؤال ممكن نضيفه للموضوع ..

هل ممكن واحد يكون عنده ملكة التدريس وايصال المعلومات بشكل ممتاز .. لكنه غير متفوق ، يبقى له حق التعيين ؟؟

تقصد ايه بكلمة غير متفوق
لأ طبعا لو كان غير متفوق
عمره ماهيقدر يواصل
لأن الوظيفة نفسها تجبر صاحبها على التفوق غصبا عنه
ولو عنده امكانية توصيل المعلومة بس عنده نقص فى المعلومات
يبقى مش هيقدر يوصل حاجة أصلا

بس فعلا انا مع نظام اختبارات قبول المعيدين بدل من التعيين الفورى للأوائل

شكرا دكتور warriorعلى الموضوع

موضوع جميل يا جماعة ويستحق المناقشة وانا من رايى ان اللى يتعين هما الاوائل اللى يكون عندهم القدرة على توصيل المعلومة كمان يعنى مش بس تفوق علمى لا لازم يكون فية كمان تفوق اجتماعى وقبول عند الطلبة عشان يقدروا يستقبلوا المعلومة
وبالمناسبة دى اختى لسة متعينة امبارح بس معيدة فى كلية طب الاسنان وهيا ماشاء الله قدرتها على توصيل المعلومة حلو جدا

اقتباس:

---

تقصد ايه بكلمة غير متفوق
لأ طبعا لو كان غير متفوق
عمره ماهيقدر يواصل
لأن الوظيفة نفسها تجبر صاحبها على التفوق غصبا عنه
ولو عنده امكانية توصيل المعلومة بس عنده نقص فى المعلومات
يبقى مش هيقدر يوصل حاجة أصلا

---

فيه ناس بيبقوا جايبين امتياز ومش بيتعينوا .. عادى ..

وبعدين فيه حاجه .. التقدير اللى بيدى الترتيب بيبقى على كل المواد .. واللى بيتعين بيتعين فى قسم ماده واحده ممكن تكون هى اقل تقدير عنده ..

انا معاك جدااااااااااااااا يا دكتور الموضوع مهم فعلا
وزى ما الزملا قالوا فيه خريجين بيدوا دروس وقدرتهم على توصيل المعلومة وتبسيطها
احسن من دكاترة كتير مع عظم مكانتهم العلمية
والمفروض اننا نستفيد من اللى عندهم الموهبة فعلا ويتعينوا بدرجة مدرس
يعنى كل دوره هو التدريس وءان اثبت تفوق ممكن يدخل فى مجال البحث العلمى
لان فعلا الامتحانات لاتعتبر تقيم كافى لقدرات الطالب لعوامل كتير:
1- ظروف الطالب والصحية النفسية والاجتماعية اثناء الامتحانات
2- امتحانات الشفوى اللى بعتبرها بلا قيمة او هدف وبينى وبينكم
بتعدى زى ما كلنا عرفين (كوسا ياصحابى كوسا) وربك يستر
3-امتحانات العملى وانت وبختك يابو بخيت
4- النظرى والوقت الطويل بتاع الاجابة
والباقى كلنا عارفينه وعايشينه
واسفة على الاطالة

اقتباس:

---

المشاركة الأصلية كتبت بواسطة Gohary

فيه ناس بيبقوا جايبين امتياز ومش بيتعينوا .. عادى ..

وبعدين فيه حاجه .. التقدير اللى بيدى الترتيب بيبقى على كل المواد .. واللى بيتعين بيتعين فى قسم ماده واحده ممكن تكون هى اقل تقدير عنده ..

---

ودى حته تانية مهمة لازم التخصص يكون فى المادة الأقرب والأفضل للمعيد وغير معتمدة على تقديره العام وده هيتم
اعتماده بشكل أكبر لو فى امتحانات تقييمية ؛ الموضوع مش هيبقى سهل بس ممكن نبدأ حبة بحبة لغايةماالدائرة كلها تكتمل

والف مبروك لد/ قناع الذهب على تعيين أختها وعقبالها بأذن الله:em:

الله يبارك فيك يا دكتور وعقبالك كمان ان شاء الله

اقتباس:

---

المشاركة الأصلية كتبت بواسطة قناع الذهب

الله يبارك فيك يا دكتور وعقبالك كمان ان شاء الله

---

بالنظام الحالى((فى المشمش طبعا)) هههههه

المهم ممكن حد يقترح طبيعة الأمتحانات التقييمية دى

أولا شكرا ليك يا دكتور على الموضوع المهم .....

ثانيا بالنسبة لفكرة عقد امتحان للأوائل لقياس قدراتهم التربوية مثلا او قدرتهم على ايصال المعلومة .. انا مش مؤيد ليها و في رأيي انها فكرة غير مجدية .... لان اساسا فكرة القدرة على توصيل المعلومة دي مسالة نسبية .. ملهاش حاجة قاطعة تتقاس بيها ...

بمعنى مثلا ان ممكن انت تكون بتفهم من شخص معين و بتعتبره كفء و رائع .. :fop (18):
على حين غيرك مش بيفهم منه و بيعتبره غير جيد ف أداء دوره ...:fop (11):

كمان ف حاجة تانية الفهم من المحاضر بيعتمد على حاجات كتير جدا .. و كتير منها (ان لم يكن اغلبها) عوامل نفسية ... زي القبول و زي الحالة المزاجية من طالب لتاني ... و كذلك طريقة الشرح اللي اتعود عليها الطلبة مختلفة .. فيبقى بكدة صعب جداا انك توصل لمحاضر يلقى حفاوة من جميع الطلاب ( الا ما ندر )

انا شايف اننا لو عايزين نحل المشكلة بتاعة الفهم من المحاضر ده ... لا يتعمل اختبار و لا حاجة ... هما الاوائل يتعينوا دكاترة عادي جدا ... ( بس يبقى فيه نظام في تقسيمهم ع الاقسام ... عشان برضه محدش يشتغل ف حاجة هو كارهها او قسم هو مش كويس ف مادته ) بس نعمل حاجة و هي :

نخلي اكتر من دكتور يشرح نفس المادة مثلا .. او نفس الجزء .... و بكدة كل اللي بيستريح لدكتور و اسلوبه يحضرله .... ده غير ان شرح اكتر من دكتور لمنهج ما .. هيبقى فيه تنوع ف طريقة العرض و دي بتساعد ناس كتير جدا انها تركز و ذهنها يبقى حاضر :rec:

انما فكرة ان يبقى في اختبارات لتعيين معيدين .... زيها بالظبط زي فكرة عمل اختبارات للالتحاق بالجامعة بعد الثانوي من غير مكتب تنسيق .. فكرتين افشل من بعض ..:fop (17)::fop (17):

هي صحيح ممكن الافكار دي تكون بتتبع في دول متقدمة و جايبة نتايج ... لكن مش كل حاجة موجودة بره تنفع هنا ... و كل بلد لها نظامها و سوق عملها و نوع دراستها .. انما كون اننا ننقل نظم من بلاد تانية لمجرد انها نجحت عندهم و منبصش لكون اذا كانت الطرق دي تتناسب هنا مع منظومة التعليم ام لا :169:فدي فكرة من رأيي انها غير صحيحة

بشكرك يا دكتور مرة تانية ع الموضوع ....:fop (43):

و بعتذر اذا كنت طولت ف الرد .... :fop (26):

===================================

http://img177.imageshack.us/img177/5990/logo2pb1.jpg

Gohary

نظام التعليم فى مصر فاشل فاشل فاشل

موضوع مهم فعلا ..
في رأيي لما الكلية بتاخد الأوائل للتعين و استكمال الدراسة .. هي في الواقع اختارت ناس عندهم عزيمة .. كل الأوائل عندهم عزيمة كبيرة جداا ما شاء الله .. و دة شيء جميل ولازم في الباحث ان يكون عنده اصرار و صبر و الطلبة الأوائل ياما ذاكروا و ياما صبروا فلابد من تقديرهم معنويا .. التقدير دة بالتعيين ممكن يكون دة اللي مش صح في كل الحالات .. ممكن يقدروهم بوظائف جيدة في شركات كويسة بمرتبات كويسة و هيظل سباق التقديرات قائم .. لكن بدون ما نظلم الموهوبين علميا اللي مش بيعرفوا يكتبوا صفحات و صفحات اجابة على سؤال Give an account on

الباحث بالاضافة لصبره و اصراره لازم يكون عنده حاجات تانية ممكن جداا مش تكون موجودة في الأوائل دول دايما .. قد يكون في الطلاب العاديون من هو أقدر على البحث العلمي ..

في رأيي .. أي دولة عايزة تتقدم علميا .. تختار و تنتقي البحاث على أساس ( الموهبة العلمية ) .. يعني مثلا ممكن طالب يكون بيحب يتفرج ع النباتات .. يحب يشوفها تحت الميكروسكوب .. عنده قوة ملاحظة في المجال دة .. دة ممكن يكون عنده بداية لموهبة البحث في النباتات الطبية مع العلم بأن الموهبة تحتاج الى تنمية من الطالب نفسه و تحتاج الى من يكتشفها و يقدرها والا هتنتهي ..

والله كلام جميل جدا جدا
بس مين يسمع ومين يطبق

موضوع التعيين ...مشكلة كبيرة جدا في مصر كلها بأمانة
1- يتم تعيين الأكثر تفوقا او الاكثر درجات يعني
2- اه الشخص ده شاطر وممتاز وزي الفل لكن هل عنده موهبة التدريس الأكاديمي
هل عنده القدرة انه يدرس ويوصل المعلومة للطلبة
الاجابة: طبعا مش كلهم بيبقى عندهم الموهبة او المقدرة دي
طيب ايه الحل؟؟
الحل : تقسيم المتفوقين من خلال اختبارات وتجاربهم مع الطلبة واستفتاءات حولهم
تقسيمهم إلى قسمين:
1- هيئة التدريس الأكاديمي ودول عندهم القدرة على التدريس وتوصيل المعلومة بسلاسة للطلبة وطبعا هيبقوا مطالبين انهم يبقوا مواكبين لأي تطور علمي في المادة اللي بيدرسوها وبرده مطلوب منهم يبقوا على نفس مستواهم وفي تنمية مستمرة لنفسهم وده يتلمس من خلال الاستفتاء اللي بيقول الطلبة بتوعهم رأيهم فيهم
2- هيئة البحث المستمر: ودول بقى المتفوقين علميا وعباقرة بس مش بيعرفوا يوصلوا المعلومة ودي مش عيب في شخصيتهم على الإطلاق..لكن هم ممكن يفيدوا بلدهم وكليتهم بشكل آخر من خلال البحث العلمي
وبرده هنطالبهم بشغل وتنمية مستمرة لنفسهم

ونتيجة لده كله:
1- هنرتقي بمستوى التعليم داخل الكليات
2- هنرتقي بمستوى البحث العلمي ويطلع من عندنا ناس كتير جدا زي زويل ومجدي يعقوب وغيرهم....

بحترم رأيك جدااا دكتورة آلاء و موافقاكي عليه .. لكن فئة البحث العلمي ممكن تشمل المتفوقين ( أصحاب الدرجات العالية ) و عدد غير كثير من الموهوبين علميا اللي مالهمش في الحفظ .. أو واحد موهوب علميا في مادة معينة و ممكن يعمل فيها شغل جامد لكن مش بيحب مادة تانية فدرجاته امتياز في المادة اللي بيحبها و مش قوي في المادة اللي مش حاببها فبالتالي تقديره العام أقل من واحد من الأوائل جايب امتياز في كله لأن المواد عنده كلها ماتفرقش , المادة تتذاكر و خلاص و تتحفظ عشان يجيب تقدير و يتعين ..
الطالب الموهوب في مادة معينة المفروض عليه لو عايز يكمل انه يكمل على حسابه , مع انه أولى بأن الجامعة تتبنى موهبته و تنميها .. غالبا بيطنش يمكن عشان ظروف مادية و بالتالي الموهبة بتموت ..
أظن الفرق واضح و فاهمين قصدي ..

على فكرة سمعت ان الدكتور مجدي يعقوب متخرج بتقدير عام جيد .. و مكمل على حسابه ..
دلوقت أكبر جراح قلب في العالم ..

احنا كدة في مصر .. محدش بيسمع للموهبة العلمية ولا بيديها فرصة تثبت ذاتها .. في حين الكل بيسمع للموهبة الفنية التيليفزيونية ( غناء - تمثيل - رقص ) .. مصر يوميا بتكتشف مواهب شابة في مجال الغناء .. و بيصرفوا عليهم فلوس كتير .. لو ربع الفلوس اللي بتتصرف ع المغنيين و الممثلين تتصرف ع المواهب العلمية كنا نبقى في أعلى مكانة .. دة اللي أمريكا بتعمله .. بتعطي فرصة البحث العلمي للي عايز و تكون عنده سمات التفوق , و تعطيه وقت اما يثبت نفسه فيه و اما مع ألف سلامة يتكل على الله ( صوته مش حلو مش هيعجب الجمهور أقصد شغله ما أضافش جديد للعلم ) ..

مش بقول ان الأوائل بتوعنا مش باحثين كويسين .. لا
معظم الأوائل ( معظم و ليس كل ) يتمتع بقدر من الذكاء و الملاحظة و يصلح لأن يكون باحث .. و كثير من غير الأوائل أيضا يصلح لأن يكون باحث .. فدة دور الجامعة .. دور أعضاء هيئة التدريس يمكن انهم يكتشفوا المواهب العلمية ..

ازيكم ياشباب ...

ماشاء الله عليكم الآراء كلها مثرية ومشجعة للواحد انه يتكلم ف الموضوع الجميل ده

هو انا بس كنت حابب اتكلم ف 3 نقط

اول حاجة .. بالنسبة لحكاية ان الاوائل يتعملمهم اختبارات او كدة عشان يبقوا اساتذة جامعيين او لا ....

ياريت حد يقولنا الاختبارات دي تتعمل ازاي ؟؟؟؟ او تبنى على ايه ؟؟؟

تاني حاجة فكرة الناس عمالة تتكلم عليها و هي الموهبة العلمية ؟؟؟ ..
... يعني ايه موهبة علمية ؟؟؟ :qi: ... بيتهيألي اللي بيصنع من الانسان عالم انه يدرس و يبحث و يطبق اللي بيدرسه و بيعمل عليه ابحاث:rec: .. يعني الاساس ف الموضوع التعلم و الممارسة .. الموهبة دي اعتقد انها تبقى ف الرياضة او الفنون او الحاجات دي اللي انت متعرفش تتعلمها .... انما العلم كله قائم على نظريات و اسس و قواعد .. انت بتتعلمها و تطبقها ...

آخر حاجة عن كلام شائع بنسمعه من واحنا لسه اطفال و هي ان عشان الواحد يتفوق ف مصر محتاج للحفظ او الصم و هو ده اللي يخليه من الاوائل في اي مرحلة طول حياته من الحضانة لحد الدكتوراه ..

الحفظ و الفهم ... و الكلام ده بقى قديم جدا :290:... و عمره ما يخلي حد لا يتقدم و لا يعمل حاجة من اصله ... و الدليل اننا بقالنا قرون قاعدين نتكلم ف الهراء ده و مبنتحركش 5 سم لادام حتى .... :fop4:

مفيش حاجة اسمها مجال حفظ ... و لا مجال فهم ... في حاجة اسمها ان الانسان بيدرس مجالات معينة و يتعلمها ... و يطبقها ... و اهم مرحلة في خطوات التقدم .. هي التطبيق .. و ليس الفهم او الحفظ او الكلام الغريب اللي الواحد بيسمعه م الناس ده

تلاقي واحد صاحبك يقولك ... انا بحب افهم ... محبش الحفظ خالص ... احفظ ليه .. كنت دخلت ادبي بقى .... و متخيل ان ده صح .. لكن هو بيتهياله... لان مفيش حاجة اسمها الحفظ و لا الفهم .. كل مجال في حاجات معينة تستدعي الحفظ و حاجات تستدعي الفهم ..

الاهم لو البلد نفسها يبقى ليها مكانة و تنهض علميا هو التطبيق ... و الدليل على كدة ان ماشاء الله البلد مليانة ناس فاهمة .. و مع ذلك معندناش نهضة علمية بشكل حقيقي .. عشان فكرة التطبيق مش موجودة ....

تاني حاجة هدي لحضراتكو مثال ...
في حد فيكم عمره سمع عن واحد عالم صيني مثلا ؟؟؟؟ :fop (44):
معتقدش .. او يمكن بس نادرا ... و مع ذلك الصين عندها نهضة جبارة .. و دولة متقدمة .. لأنها اللي يهمها التطبيق ... ممكن يكون واحد مش فاهم التليفزيون ده بيشتغل ازاي اصلا .. بس بيعرف يصنعه صح ... يبقى ده انسان مفيد اكتر من اللي فاهم النظريات بس مش بيطبق حاجة ...

اسف لاطالتي المعتادة بس الموضوع قيم جدا و مساعد الواحد انه يقول رأيه ... ;)

و شكرا ع الموضوع مرة تانية .. و على كل الآراء اللي اتقالت vcool:

كلام مميز دكتور ليدو ودكتورة pharmacistina
القضية محتاجة دراسة عشان حرام نضيع أمل ناس عندهم القدرة انهم يكونوا علماء حقيقيين لمجرد أن التوفيق لم يحالفهم؛ ده غير ان الأوائل اللى بيتعينوا عادة بيكونوا العشرة ؛ يعنى باقى الناس اللى جابوا امتيازات برضه أوت خالص

وبالنسبة للموهبة العلمية
ففعلا فى ناس موهوبة فى العلم فعلا
هتقول يعنى ايه
بص يا سيدى الموهبة العلمية تعنى الأبتكار والتجديد والأتيان بغير المألوف
شخص زى اينشتين كان طول عمره بيكره فى الرياضيات لكن كان مبدع فى الفيزياء بدرجة غير معقولة
النظرية النسبية لم تقم على اساس تفاعلات معملية لكنها قامت على عقل موهوب يجيد التفكير والتطبيق

انا شفت بعينى ناس بتجيب امتيازات ولا تستطيع تذكر معلومات فى غاية البساطة من سنوات سابقة
وهذا دليل قاطع على انه لم يخرج بشيء مما تعلمه وحصل فيه على درجة الأمتياز

وانا حطيت شكل عام للأختبار التقويمى المقترح
أولا اختبار عام تحريرى فى الأساسيات
ثانيا اختبار عملى يقوم فيه المتقدم باختيار موضوع من المناهج ليقوم بشرحه أمام لجنة من الأتى
رئيس قسم المادة التى تقدم لها(وبعض الأساتذة عشوائيا)
طالب عشوائى ممن حصل علىالأمتياز فى المادة
10طلاب عشوائيين ممن حصل على جيد جدا فى المادة
20طال ممن حصل على جيد فى المادة
يراعى ان يكون ماتقدم شرحه من المتقدم لم يدرس للطلبة من قبل
يعطى كل شخص فى اللجنة تقدير من عشر درجات
5 درجات على مستوى الفهم
4درجة طريقة العرض
1درجات للكفاءة فى الشرح

طبعا دا اقتراح أولى ممكن اى حد يزود عليه ويطوره
منتظر تعليقاتكم

اقتباس:

---

تاني حاجة فكرة الناس عمالة تتكلم عليها و هي الموهبة العلمية ؟؟؟ ..
... يعني ايه موهبة علمية ؟؟؟ ... بيتهيألي اللي بيصنع من الانسان عالم انه يدرس و يبحث و يطبق اللي بيدرسه و بيعمل عليه ابحاث .. يعني الاساس ف الموضوع التعلم و الممارسة .. الموهبة دي اعتقد انها تبقى ف الرياضة او الفنون او الحاجات دي اللي انت متعرفش تتعلمها .... انما العلم كله قائم على نظريات و اسس و قواعد .. انت بتتعلمها و تطبقها ...

---

ازاي بس .. Dr- Lido مع كل احترامي لرأي حضرتك .. بس الموهبة العلمية موجودة و شيء لا يمكن التغاضي عنه أو التقليل من دوره .. بدليل شوف كام أستاذ جامعي في بلاد العرب .. كلهم ذاكروا واتعلموا و مارسوا زي ما حضرتك بتقول .. بس مين منهم أضاف جديد للمعرفة البشرية .. مين منهم سجل براءة اختراع .. اللي بيحب مجال معين و موهوب فيه هو بس اللي أضاف جديد زي زويل مثلا .. يعني اللي غاوي ..
لكن في واحد تاني بيدرس و يذاكر ويسافر يدرس و يعمل اللي عليه عشان يرضي ربه و بيعمل ماستر و دكتوراه و يبقى معاه شهادة كبيرة و له قدره في المجتمع ولكن لم يضف الى العلم جديدا ,, في حين واحد مش معاه شهادات عالية أوي وربنا أراد انه ياخد فرصته ويتعلم خارج مصر و تتاح له امكانيات مادية فعمل جديد وابتكر و اخترع ( لأنه غاوي علم مش غاوي شهادات ) و دة أفيد للمجتمع ..

بالنسبة للصين .. صح ممكن الواحد يطبق الحاجة بدون ما تكون هي اختراعه و يكسب منها و يعمل نهضة .. لكن مكاسبه بتكون ولا حاجة بالنسبة للمبتكر .. ما تنساش يا دكتور ان في حاجة اسمها ( حق الملكية الفكرية ) ..
لو أنا أو حضرتك أو غيرنا اخترعنا دواء معين .. من حقنا حرية التصرف فيه لمدة سنين بنحقق فيها أرباح مادية و معنوية لا تحصى .. غيرنا بعد لما السنين دي تفوت هيبدأ يصنع و يكسب بس ولا حاجة بالنسبة لمكاسبنا .. دة غير ان دي حاجة تشرف بلدنا و ديننا و عمل كويس الواحد يقابل بيه ربنا ..

فالاختراع ( و ما يحميه من حق ملكية فكرية ) هو العامل الأول في نهضة الأمم .. و أيضا في المنزلة التالية التطبيق و التقليد ..
عشان كدة أمريكا و اليابان ( مخترعين ) أكثر تقدما من الصين ( المقلدين المطبقين ) ..

اقتباس:

---

وانا حطيت شكل عام للأختبار التقويمى المقترح
أولا اختبار عام تحريرى فى الأساسيات
ثانيا اختبار عملى يقوم فيه المتقدم باختيار موضوع من المناهج ليقوم بشرحه أمام لجنة من الأتى
رئيس قسم المادة التى تقدم لها(وبعض الأساتذة عشوائيا)
طالب عشوائى ممن حصل علىالأمتياز فى المادة
10طلاب عشوائيين ممن حصل على جيد جدا فى المادة
20طال ممن حصل على جيد فى المادة
يراعى ان يكون ماتقدم شرحه من المتقدم لم يدرس للطلبة من قبل
يعطى كل شخص فى اللجنة تقدير من عشر درجات
5 درجات على مستوى الفهم
4درجة طريقة العرض
1درجات للكفاءة فى الشرح

---

دة طبعا اختبار جيد المفروض يتعمل لو عايزين نختار أعضاء هيئة تدريس كويسين يفهموا الطلبة .. لأن زي ما قلتم مش كل متفوق عنده مهارة توصيل المعلومة .. و في الآخر الطلبة اللي هما احنا اللي بنعاني .. و دة السبب الرئيسي للدروس و يرجعوا يقولوا ليه ؟؟ نقول حسنوا اختيار أعضاء هيئة التدريس مبدئيا ..

بالنسبة لاختيار الباحثين .. أعتقد ان زي ما في أمريكا بيحصل .. الجامعة بتمنح الواحد فترة يثبت فيها انه ييجي منه في مجال الأبحاث .. يعني لازم يوصل لحاجة of importance في خلال و ليكن سنتين .. لو ما حصلش يبقى يروح بلدهم و يقولوله It was nice to know you لأن مش هيصرفوا فلوس على حاجة خسرانه .. لو حصل انه أثبت نفسه بيتثبت في الجامعة على طول .. الكلام دة على لسان زويل سمعته بنفسي ..
أعتقد ان دة نظام كويس لاختيار الباحثين .. بس عايز ميزانية ضخمة عشان ناس كتير هتتقدم .. و طبعا لما البلد تلاقي تاكل الأول تبقى تصرف ع العلماء و الباحثين المتقدمين اللي الله أعلم هيطلعوا منهم بفايدة ولا لأ ..
آسفة ع الاطالة .. شكرا للتفاعل الرائع ..

الف شكر دكتورة فعلا مشاركتك أثرت الموضوع
وكلامك حلو جدا
وكمان كلام دكتور يامى
ممكن نقترح أقتراحات كتيرة تانية
بس هل من مستجيب؟؟؟!!