ايه رايك لما يبقى فرحك اسلامى

السلام عليكم ورحمه الله وبركاته

طبعا احنا دلوقتى فى فصل الصيف والافراح ما شاء الله كتيره بس بصراحه

كم فرح حضرته كان اسلامى او على منهج الرسول الكريم

(صلى الله عليه وسلم) بالنسبه لى بصراحه ولا واحد :confused:

طب انت او انتى عندك استعداد ان يبقى فرحك اسلامى طب لو ايوه ايه السبب ولو لا ايه سبب رفضك او مش رفضك نقدر نقول انك مش محبذ للفكره على اساس انها ليله فى العمر واحنا مش كل يوم بنعمل فرح طب ليه مانستخدمش الليله دى فى طاعه الله انا لحد دلوقتى يمكن ماكونش مؤمنه ميه فى الميه ان نفسى فرحى يكون اسلامى بس ممكن مع الوقت واقناعى لنفسى اوصل ل 100 % عايزه اسمع ردكو ان شاء الله

سلام:slam: :slam: :slam:

إن شاء الله فرحي لازم يكون إسلامي
لأنه مينفعش يكون غير كده:169:

الصراحة هو فرح واحد إسلامي هو اللي حضرته وده حاجة مؤسفة والله
عن نفسي طبعا أريد فرحي إسلامي
بالنسبة لموضوع ليلة في العمر ...... ناااااااس كتير اوي ماتت يوم فرحها شوفوا بقة الخاتمة عاملة ازاي
وبعدين يا جماعة الزواج ده طاعة نتقرب به لله عز وجل ازاي نعمله باللي بنشوفه كل يوم ده
كمان الواحد بيفتح بيت جديد وأسرة جديدة مش معقول يبدأ حيانه بمعصية لله وكمان كل المعاصي الي بتحصل في الفرح والأغاني والاختلاط المشين ده غير الباقي ..... بلاش وصفه كل ده على ظهر صاحبنا اللي عمل الفرح يعني يشيل ذنوب كل الموجودين

موضوع فعلا يستاهل النقاش ومعرفة آراء ناس كتير

الحقيقه انا حضرت فرح اسلامى .. وبهرنى جدا جدا .. لانه كان بيطابق اللى فى دماغى ..

الفرح كان فى مارشال وكان عادى جدا جدا جدا .. كل مافى الموضوع ان ماكانش فيه اغانى ولا رقص .. ولا اى حاجه من دى .. والعروسه كانت لابسه محترم جدا جدا حتى الطرحه مكنتش اسبانيش كانت عاديه والفستان كان واسع جدا .. ومقمتش من الكوشه اللى فى اخر الفرح عشان تسلم على الناس وتمشى ..

وانا اتمنى ان فرحى يكون كده ..

موضوع جميل اوى
وبصراحة قليل اوى الى بيعملوه كده
انا ان شاء الله ناوية اتفق مع خطيبى ان شاء الله على انه يكون اسلامى باذن الله
علشان نبدا اول يوم فى حياتنا مع بعض بطاعة ان شاء الله مش بمعصية.....
وبجد موضوع مهم جدا جزاكى الله كل خير

وليه نقول اسلامى ....؟؟؟؟...او نخصص اللفظ دا للافراح اللى تتبع نهج الرسول عليه الصلاة والسلام ...المفروض كلمة فرح فى مجتمع مسلم ومؤمن بالله ورسوله عليه الصلاة والسلام يكون معناها الفرح اللى احنا بنميزه دلوقتى عن باقى الافراح ونقول انه اسلامى

انا بجد نفسى افهم هيا الناس اللى بتعمل الافراح دى ...مش مسلمين ؟؟؟...ولا نسيوا انهم مسلمين ؟؟؟
بحسهم وقت الفرح ناسيين ....او بيعملوا نفسهم ناسيين ...ناسيين ربنا امرهم ب ايه ؟؟؟...
هيا فعلا ليلة العمر ..بس ليله هيتبنى عليها اسره وبيت وحياه ...ياتكون فى طاعة الله ياتكون غير كدا ........بيتهيالى اول خطوه فيها الفرح ودا اللى بيحدد


انا اعرف واحده فركشت خطوبتها عشان الفرح دا ....هيا كانت مصممه يبقى اسلامى والباقى لأ....قلت خلاص يبقى مش عايزين فرح خالص.....برده مانفعش ....هوا كل شئ قسمه ونصيب انا عارفه ....بس ليه ...ليه حد يقبل على الانسانه اللى اختارها من وسط الدنيا كلها انها تبقى فى الموقف دا وسط الناس دى بالاسلوب اللى بنشوفه فى افراح اليومين دول ؟؟؟؟؟؟؟؟؟؟

انا عن نفسي برضه محضرتش غير فرح اسلامي واحد بس لكن بصراحه ياجماعه محستش فيه ببهجه خالص كانوا الستات والبنات قاعدين في قاعه لوحدهم والرجاله في قاعه تانيه ومن القاعه بتاعتهم كان في شيخ بيقرا قران انا قلت يمكن ده علشان العروسه والعريس لسه مجوش وقعدت شويه كتار مستنيه لحد مالحمد لله ربنا فرجها والعروسه وصلت دخلت العروسه وكانت لابسه اسدال وبعدين قلعته وقعدت بفستان فرح محترم خالص ومفيش ميكب نهائي وبعدين رحنا هنيناها وباركنالها انا بقى استنيت اي مظهر من مظاهر الفرح دف زغاريد اسماء الله الحسنى طلع البدر علينا اي حاجه مفيش برضه وبعدها بشويه قعد شيخ يقول خطبه طويله ساعه او اكتر عن الزواج واهميته وبعدها حطوا الاكل والعريس والعروسه مشيوا :cry: :cry: :cry:
انا عارفه ان مش كل الافراح الاسلاميه كدا لان ليا اصحاب بيروحوا افراح اسلاميه وبيرجعوا مبسوطين خالص بس انا حكيتلكم عن التجربه بتاعتي لكن ارجع واقول ان طبعا مفيش حاجه احسن من ان الواحد يبدا حياته الجديده بطاعه ربنا
ويفرح ويبسط الناس اللي في الفرح برضه يعني :p :p :p :p

انا بصراحه ماحضرتش غير فرح اسلامى واحد وده من زمان

بس بصراحه كان جميل وممتع جدا وماحدش ابدا من المعازيم حس بملل

بالعكس كل الناس اتبهرو بيه خاصه دلوقتى بقه فيه حجات كتيره جميله بتتعمل

وزى ماربنا عايز مننا برده يعنى كان فيه فرقه بنات بتنشد وانشايد جميله وجدا

واصحاب العروسه والعروسه كانو بيرقصو معاهم بس مش الرقص اليومين دول

لا دول بيلفو حوالين العروسه وكده وبالعكس حسيت انى واخده راحتى جدا وكل البنات

علشان القاعه للبنات بس يعنى برده فكره الافراح الاسلاميه مابقتش زى الاول

ويارب كلنا نحب نعملها واحنا مقتنعين تماما

وان شاء الله ربنا يوفقنى واكون واحده منهم

أنا مش هقولكم انا حضرت افراح شكلها إزاي

ربنا يرحمنا جميعا

اللي أان مستغربله

واحدة سايبه شعرها في الفرح مع انها عمرها ماسابته في البيت حتي :297:

ويقولك أصلها ليلة العمر

المهم

أنا فرحي إن شاء الله مش هحط غير اناشيد دينية

وممكن أطنش كمان موضوع الفرح ده

والله يا جماعة الموضوع فعلآ مهم,

أنا الحمد لله حضرت أفراح كتير منها الإسلامى و منها العادى :(

هو ممكن أهم حاجة إن مايكونش فى معصية فى الليلة دى :

إختلاط, أغانى, أى حاجة تانية ممكن تكون غلط حتى لو تبذير فهو غلط برده ...

إن شاء الله أنا برده ناوى على إنه إسلامى إن شاء الله,

وهو أنا عندى كفاية عليا والله الليلة دى, يعنى لو هعمل للناس فرح ويقعدوا ياكلوا هما ومش أروح أنا مافيش مشكلة :D لازم نوفر فى الوقت :rec:

بس هو برده أكيد مش هتوصل لدرجة إنى مش هعمل فرح, برده مهما كان من شروط العقد الإشهار, وتقريبآ دلوقتى الفرح هو الوسيلة الفعالة للإشهار وكده .........

أنا فاكر إن فى السعودية مثلآ كان النادى كبير كده

وباعدين فيه قصرين أو قاعتين يعنى , قاعة للرجالة وقاعة للحريم, دى عمومآ فكرة حلوة ومتطبقة فى مصر فى معظم الأماكن, ومعظم الأفراح المحترمة كانت بتفصل والحمد لله مش فقط مافيش أغانى أو أى حاجة فاضية ....

بس هو بجد الليلة دى فرحتها بالنسبة ليا مش محتاجة فرح ولا ميت فرح حتى, بس هو علشان خاطر الأهل وأهل العروسة كمان والكل بيقول عايز أفرح بإبنى وكده بس برده, عايز تفرح بيا يبقى بالصح إن شاء الله ....

أنا عايز أتكلم كتير عن الموضوع ده وأد إيه معظمنا مستنينه بس يلا كفاية كده علشان مش أجيب صداع لحد ....

انا عن نفسي مش بحب اروح افراح مش اسلامية لانها كلها معاصي
الدى جى بيكون عالى جدا لدرجة الصداع والاغاني والموسيقى والاختلاط والرقص يعنى مئات السيئات
وطبعا مش هروح بلبس سوارية او احط مكياج فى فرح فيه اختلاط!!

لكن في الافراح الاسلامية البنات بتلبس وتقعد وترقص مع العروسة براحتها

اي فرح بيكون حلو بحسن تنظيمه واجتماع الاهل والاحباب وفرحة العروسة والناس وكله في طاعة ربنا

مشكلة الافراح الاسلامية احيانا قلة التنظيم
يوم فرح أختى كانت لابسة اسدال وكانت القاعة مفصولة عن قاعة الرجال
بعد ما دخلت وقلعت الاسدال والناس واخدة راحتها كل شوية الباب يتفتح علشان الرجالة يدخلوا الاكل!! والقاعة كانت في الدور الارضى والرجالة فوق وكل شوية واحد يفتح الباب ينادي على أهله عشان يروحوا وانا مش عندي اخ ولد يقعد على الباب من بره يمنع دخول الناس

كان فيه لخبطة كتير لان احنا مش كنا عارفين الناس بتعمل ايه علشان الفرح الاسلامي يكون منظم لكن الغلط كان مننا اننا مانتبهناش للنقط دى قبل الفرح
بس بجد ورغم قلة التنظيم كان الكل مبسوط
اناشيد اسلامية بصوت هادى مش مزعج ,والعروسة كانت ( لما الباب يتقفل) قاعده براحتها مع صحابها و المعازيم
والاهم بلا معاصي والحمد لله

من فتره حضرت فرح اسلامى كان رائع منظم وبسيط
العروسة في قاعة فوق (يعنى حتى لو الباب اتفتح ما فيش حد معدى) وفيه بنت قاعدة على الباب تاخد التحية وتدخلها ولو حد عاوز ينادي على واحده يقول للبنت تناديها له (ممكن اخو العروسة هو اللي يطلع الحاجة واختها هي اللي تقف على الباب تاخد منه )
والبنات كلهم لابسين براحتهم
والعروسة علىstageفي نص القاعة بترقص وحواليها اصحابها وفرقة
بنات الفرقة كانوا منظمين جدا وصوتهم رائع احلى من الشرايط ومعاهم دفوف وبخاخات وادوات كتير
بنتين بيغنوا واتنين بيضربوا على الدف والباقي حوالين العروسة
وحركاتهم منظمة وبجد اتبسطنا كلنا والفرح خلص بدري

لما خلص العروسه رمت الورد للبنات
ولبست اسدالها وطلعت لعريسها الي طلع يستناها على الباب
بس كان رااائع احلى فرح حضرته سواء اسلامى او غير اسلامي

ومش معنى ان الواحد حضر فرح اسلامى مش حلو ان الافراح الاسلامية كلها وحشة
كفاية انك بتبدئى مرحلة جديدة بلا معاصي من اول لحظة راجية التوفيق والسداد من الله تعالى

انا بيصعب علي العرسان الي فرحهم مش اسلامي من كتر الذنوب اللي هياخدوها بالفرح ده(لو لم يتوبوا الى الله بصدق منها)

وانا ان شاء الله ناوية فرحي يكون اسلامى طبعا وبسيط وهحرص على تنظيمه وترتيبه لاننا اتعلما من اخطائنا في فرح اختى
وبعيد عن التكلف والتبذير قدر المستطاع
وخالى من المنكرات
لعل الله ان يوفقني فى هذه الحياة الجديدة

فعلا يا دكاترة انا نفسي ابقي اعمل فرحي اسلامي

بس ساعات كتير بسمع ان الافراح الاسلامية مش بيبقي ترتيبها كويس اوي وحضرت بصراحة فرحين ومكنوش مترتبين كويس

زعلت جدا لان المفروض نهتم ان دينا يظهر في فرحنا ونحافظ عليه

وبجد بجدنفسي يكون كل الافراح اسلامية علي مستوي راقي

وجزاك الله خيراااااا علي طرحك للموضوع

شكرا يا دكاتره ليكم كلكم على مشاركتكم فى الموضوع ورايكم اللى ما شاء الله تقريبا كله مع الفرح الاسلامى على فكره انا مكنتش متخيله ان هيبقى فى تفاعل مع الموضوع كده جزاكم الله خيرا وربنا يثبتنا واياكم على طريق الهدى

بصراحه عمرى ما حضرت فرح اسلامى ولا حد اعرف حضر اسلامى

بس ف افراح كتير بدات العروسه تكون فيها محجبه

فرحى بصراحه لسه هخططله بعدين واقلكو

كون ان فرحى يكون اسلامى.........فدى فكرة زمان انا كنت مستغرباها جدا وبقول ازاى لأ دى ليلة العمر

ومش عارفة ايه وشكلى لأ وكمان مكنتش مقتنعة انى التزم بحجابى فى يوم فرحى.


لكن طبعا ده لأنى كنت لسه اقل ادراكا لأمور دينى ومش قريبة قوى من ربنا .

بس الحمد لله مليووووووووون مرة ع الوضع الحالى الى أنا فيه دلوقتى واللى اقتنعت انى لازم لازم اتلزم
بحجابى وأرضى ربى عشان هو كمان يرضينى ويبارك لى فى حياتى بعد كده.
وان الفرح يكون اسلامى فأنا الحمد لله مش ممتنعة نهائى عن الفكرة ومقتنعة بها مليون المية.


وعن عدد الافراح الاسلامية اللى حضرتها فكانوا كتير..........واخرهم كان فرح ابن عمى،وبرده فرح لواحدة قربتى من بعيد شوية بس والله والله كان جاااامد جدا وربنا بارك ليهم فى ياتهم ورزقهم بالذرية الصالحة.


طولت عليكم...
مشكورة يا دكتورة ع التوبيك..........وعقبال الجميع لما يكونوا ديما فى طاعة ربنا وى ظل رحمته.

بصراحه يا جماعه الفرح الأسلامى الوحيد اللى حضرته كان فرح بنت عمى
وكل اللى حصل فيه أننا صلينا العشا فى الجامع مع العروسه اللى كانت لابسه فستان الفرح وفوقه إسدال ونقاب وأول ما دخلت المسجد خلعت النقاب والأسدال وقعدت بفستان الفرح اللى كان محتشم طبعاً وصلت معانا العشا وبعدين وزعوا علينا بست وبعدين العريس أخدها وروحوا عالبيت
يعنى أنا مش حاسه إنه كان فرح أصلاً بس هما مسميينه فرح أسلامى
بس فى ناس أصحابى حضروا أفراح أسلاميه وعجبتهم جداً
بس أنا بحكى عن تجربتى

اولا شكرا اوى يا دوك على موضوعك الجميل دا و المهم
لأنى كنت عايزة أسمع اراء الناس بردو

بالنسبة لى بأة
انا عايزة فرحى يكون مميز و جميل
طبعا مش فرح عادى أغانى و هيصة و رقص
و لا بردو الإسلامى اللى هو انا ف قاعة و العريس ف قاعة و بعدين يجى يستلمنى ف الاخر
لأنى شايفة ان اكتر حاجة هتبسطنى ف الفرح انى اكون معاه ف مكان واحد و الناس فرحانة حوالينا
غير كدا ممكن أعمل سهرة ليا انا و البنات و نقعد مع بعض براحتنا و نتبسط مع نفسنا

مفكرتش ف كل حاجة عن فرحى
بس عندى تخيلات عنه

اولا ميكونش متأخر أوى
ثانيا ممكن يكون ف قاعة جميلة او مكان مفتوووح
ثالثا انا مش ناوية أعزم ناس كتير يا دوب عيلتى القريبين
و شوية صحابى و عيلته و شوية صحابه

و بالتالى هكون ضامنة أخلاق الناس اللى انا جايباهم
و هكون فرحانة اوى بوجودهم و هما كمان فرحانين

و نكون كلنا ف مكان واحد و مثلا كل عيلة على ترابيزة
و ممكن نشغل موسيقى هادية

و اكيد ان شاء الله هكون لابسة الحجاب عادى جدا و مش اسبانش و لا حاجة
و ممكن نعمل بأة شوية أفكار حلوة ف الفرح او زى فقرات
و نلف على العيلة انا و هو و نكلم مع كل ترابيزة شوية
و مدة الفرح متكونش كبييييييييييييرة جدا

يعنى .. :em: :em:
ان شاء الله يبأة فرح حلو
بس لسة بدرى اوى :cry:

يمكن على ما يوصل كل الافكار دى تكون اتغيرت

ع العموم ميرسى اوى يا دوك
و معلش انى اتكلمت كتيير بس ليلة العمر بأة انتى عارفة
و عقبااالك : )

متفق تماما مع رأيك .. وده اللى انا بتمناه فى فرحى .. شكرا NonY المشاركه الجميله دى ..

مبرسى يا دكاتره على مروركم ورأيكو عجبنى جدا تقريبا انا نفسى اعمل نفس فكرتك يا NoNy ان شاء الله بس مش عارفه ليه نفسى الفرح مش يبقى بالليل و ما بقاش اعد كده مع العريس والناس كلها بتتفرج عليا:297: :297: :297: :297: :297:

هو الفرح في الاسلام أهم حاجة زي ما كان أيام الرسول صلى الله عليه و سلم ( الوليمة ) .. يعني بيعملوا بوفيه للناس الأقرباء و الجيران و اللي ما نعرفهمش .. يوم مفتوح في بيت العريس و العروسة ..
وأناشيد دينية يكون فرح ممتاز ..
عمري في حياتي ان شاء الله ما هقبل اني أكون متبرجة و اعذروني في الكلمة - أكون فرجة - للناس .. العروسة اللي بتلبس لبس مكشوف و بتكشف شعرها و تقوم ترقص عشان تخلي كل الناس - اللي يسوى و اللي ما يسواش - تتفرج و تنبسط ...
غير كدة فين يا بنات الحياء .. مش كدة عيب و حرام ؟؟!!! الناس بتتصرف ليه كدة مش عارفة ..
بس في أفراح بتبقى صالة للنساء مقفولة و صالة للرجال .. و لما العروسة بتيجي تروح بيلبسوها حاجة زي الخمار كدة و الأمور بتبقى تمام التمام و مش بيبان منها شعرة ..
و في نفس الوقت تقدر تكون أحلى عروسة في ليلة العمر بدون ما تغضب ربنا ..

كلنا كبنات بنتمنى نكون في اليوم دة أجمل من الجمال .. لكن بدون ما نفرج الناس الغريبة علينا .. صح و لا ايه ؟؟

it is amust ISA

شكرا dr-pharmacistina &mr_toxicعلى مروركم ورايك حلو اوى دكتر pharmacistina

شكرا يا دكتوره علي الموضوع الجميل ده

وانا بستغرب عن الناس يبداو حياتهم بكل الذنوب دي برغم ان اصول يشكروا الله علي التوفيق والفرحه

وانا عن نفسى ان شاء الله فرحي هيكون اسلامي
فرحه وسعاده بدون معاصي ولاذنوب

شكرا يا دكتورة على الموضوع الجميل ده أنا لسه كنت فى فرح إسلامى من يومين وكان جميل جدا كان الكل فرحان بس من غير مانغضب ربنا ونويت إن شاء الله أعمل فرحى كده وأتمنى إن الكل يعمل كده

اقتباس:

---

المشاركة الأصلية كتبت بواسطة SaFroOoOTA

كم فرح حضرته كان اسلامى او على منهج الرسول الكريم

(صلى الله عليه وسلم) بالنسبه لى بصراحه ولا واحد :confused:

طب انت او انتى عندك استعداد ان يبقى فرحك اسلامى طب لو ايوه ايه السبب ولو لا ايه سبب رفضك او مش رفضك نقدر نقول انك مش محبذ للفكره على اساس انها ليله فى العمر واحنا مش كل يوم بنعمل فرح طب ليه مانستخدمش الليله دى فى طاعه الله انا لحد دلوقتى يمكن ماكونش مؤمنه ميه فى الميه ان نفسى فرحى يكون اسلامى بس ممكن مع الوقت واقناعى لنفسى اوصل ل 100 % عايزه اسمع ردكو ان شاء الله

سلام:slam: :slam: :slam:

---

حضرت أفراح كتير كانت اسلاميه
وأنا مش شايفه ان فى مشكله لما يكون فرحى اسلامى
زى ما بيقولوا دى ليله العمر ............فلازم تكون أكتر ليله بطيع ربنا فيها
الافراح اللى بنشاهدها بعد حوالى 10 دقائق من الفرح بيتقلب المسرح .............أقل كلمه أقدر أقولها انه بيقى عامل زى السوق
كمان مش ممكن أموت فى الليله دى .............طيب لو مت على هذا الحال ...........هقول لربنا ايه
معلش كنت عاوزه أفرح شويه بمعصيتك
كفايانا ذنوب...........امتى هنفوق
قال موسى عليه السلام:
( وعجلت اليك ربى لترضى)
__________________________________________________ ___________
اللهم عرفنا بك.................فما أحوجنا اليك

اكيد فرحى ان شاء الله هيبقى اسلامى
دى ليله العمر علشان كده لازم تبقى اسلاميه لاننا مسلمين
لازم بدايه حياتنا الزوجيه تبقى صح علشان ربنا يوفقنا اما لو بديناها بالذنوب التوفيق هييجى منين
وربنا يوفقنا جميعا

شكرا يا Doctor علي الموضوع
فعلا في ناس كتير يقولوا دي ليلة العمر لازم يبقي فرح ابهه
طيب هو ما ينفعش يبقي ابهه الا بغضب ربنا بالعكس انا حضرت افراح اسلامية كتير بجميع المستويات وكانت جميلة جدا و شيك يعني فيها بهجة وكل حاجة ISAفرحي هيبقي اسلامي

بجد الموضوع حلو اوى
وكان نفسى من زمان اتناقش مع حد فيه واسمع اراء ناس كتير
انا الحمد لله مقتنعه اوى بكده مش عشان فكرة حلوة لكن عشان انا مسلمه
تفتكرو بعد ما ربنا يرزقنى بزوج ان شاء الله يكون ملتزم اروح انا بدل ما أشكره على النعمه دى اعمل فرح وأغانى و000
على فكرة الموضوع ده مهم جدا بس الناس مش واخده بالها
العادى دلوقتى الفرح بأغانيه ورقصه وتبرجه ومفيش فرق بين فرح محمد وفرح000
بس ان شاء الله هيبقى العادى فى يوم من الايام هو الفرح الاسلامى
ربنا يهدينا جميعا

جزاكم الله خيرا على الموضوع بس انا اصلا من صغرى مش بستمتع بجو الافراح اللى فيها هيصه وكلام من ده

ولحد دلوقتى عمرى ما انسى اول فرح اسلامى حضرته وانا صغيره اوى وكان ف القاهرة لابن عمتى وكااااااااااااااان غايه ف الجمال والبساطة ونفس فكرة نونى كده ان الرجال ف قاعه والنساء ف قاعه

وتانى فرح كان فرح اخويا كان اسلامى الحمد لله

وتقريبا عندنا بابا وماما حابين الفرح الاسلامى لينا كلنا

وربنا يرزقنا جميعا الازواج الصالحه والذريات الصالحه

وان شاء الله تبقى ليلة العمر بداية لايام كلها فرح وسعادة على الكل طالما هيا بدايتها صح واسلاميه

هوة فيه فرح اسلامى وفرح مش اسلامى على اساس يعنى ان الناس اللى بيعملو الافراح التانية مش مسلمين ولا ايه ؟ دى ياعينى العروسة بتفرح يوم واحد بس ههههههههه وباقى الايام بقة ياعالمانا عندى اقتراح حلو خالص مش عايزيين شباب خالص فى الفرح كل واحد يفرح لوحدووووو بعيد عن التانى هههههههههه اى حد واحد هيدخل الفرح هيضرب بالنار كفاية هزار بقة بصوو انا حضرت افراح محترمة جدا الحمد لله وانا مع العروسة اللى بتبقة محترمة محجبة وفستانها لذيذ كدة وطبعا لو كانو ناس محترمين اذا معازمهم كمان هيبقو محترمين زيهم انا عن نفسى بقة بحبز جدا فكرة الكاجواااااال عروسة كاجوال وعريس كاجول كدة بقة محدش هيبص على التانى ههه انا عن نفسى بحضر كاجووووال وفى الاخر كل واحد ونيتو شكرااااااااااا

أنا عن نفسي ممكن معملش فرح أساسن
أهم حاجة أساسية هي الوليمة للناس اللي جاية
لانهم بإذن الله كتير
كفاية بس ان الناس تعرف ان أنس هيتجوز
:d
و أكيييد طبعا مفيش فيه لا أغاني ولا هيصة ولا أي حاجة من الهبل و قلة العقل اللي بتحصل و بنشوفها كتير الأيام دي
و طبعا حتى لو أغاني و أناشيد اسلامية متكونش عاملة ازعاج للناس
و طبعا مش يتأخر خالص في الوقت ...

ببساطة ... أنا عاوز فرحي يبقى أبسط ما يكون ... و يحقق الغرض منه و هو ان الواحد يفرح و يفرح الناس بيه " و فيه ! " بدون ما يغضب ربنا و بدون ما يضر حد

هى الفكره فى ان البنت بتعيش طول عمرها تستنى اليوم اللى تحس نفسها بقت ملكه وكل الناس بتفرح بيها وده مش معناه التبرج ولا الكلام لا اساسى تلبس محترم وحجاب وكل حاجه واكيد اذا مرتبطه بانسان محترم مش هوافق على غير كده ده وكمان المشكله فى الافراح الاسلاميه انى بحس انها مش افراح بحس ان احسن ان العروسه والعريس يوفروا فلوسهم فى حاجه تانيه

اقتباس:

---

المشاركة الأصلية كتبت بواسطة dry_tears

هوة فيه فرح اسلامى وفرح مش اسلامى على اساس يعنى ان الناس اللى بيعملو الافراح التانية مش مسلمين ولا ايه ؟ دى ياعينى العروسة بتفرح يوم واحد بس ههههههههه وباقى الايام بقة ياعالمانا عندى اقتراح حلو خالص مش عايزيين شباب خالص فى الفرح كل واحد يفرح لوحدووووو بعيد عن التانى هههههههههه اى حد واحد هيدخل الفرح هيضرب بالنار كفاية هزار بقة بصوو انا حضرت افراح محترمة جدا الحمد لله وانا مع العروسة اللى بتبقة محترمة محجبة وفستانها لذيذ كدة وطبعا لو كانو ناس محترمين اذا معازمهم كمان هيبقو محترمين زيهم انا عن نفسى بقة بحبز جدا فكرة الكاجواااااال عروسة كاجوال وعريس كاجول كدة بقة محدش هيبص على التانى ههه انا عن نفسى بحضر كاجووووال وفى الاخر كل واحد ونيتو شكرااااااااااا

---

:sad: :sad: :sad: :sad: :sad:

اعتقد ان كل واحد فعلا ونيته وكل واحد بيسيب بصمته وما اعتقدش ان البصمة دى لا تطابق المواصفات
المهم
كله بيقول دلوقت هعمل ومش هعمل وان لازم ومش لازم وساعتها ما بيكونش فى جواز اصلا بلاش يا جماعه
المهم تانى الاسلامى فى وجه نظر الناس حاجة واسلامى فى وجه نظر ناس تانيين حاجة بمعنى اسلامى لناس سلفين يعنى على السنه الصح بيبقى حاجة واسلامى لناس كاجوال زى ما ذكر بيبقى حاجة وفى الاخر الواحد والواحدة بتقول دنا فرحى كان اسلامى وهوا ... يالا مش مشكلة اما عن الهزار هم دول المصريين هزار والناس بتموت مش بقول نموت معاهم بس طالما ان احنا بنهزر وهم بيموتوا على الاقل سورى وخلاص بلاش اكمل عشان كفاية................. ان الواحد كمل ممكن ماينامش فى بيته .

اقتباس:

---

المشاركة الأصلية كتبت بواسطة dr\pretty

هى الفكره فى ان البنت بتعيش طول عمرها تستنى اليوم اللى تحس نفسها بقت ملكه وكل الناس بتفرح بيها وده مش معناه التبرج ولا الكلام لا اساسى تلبس محترم وحجاب وكل حاجه واكيد اذا مرتبطه بانسان محترم مش هوافق على غير كده ده وكمان المشكله فى الافراح الاسلاميه انى بحس انها مش افراح بحس ان احسن ان العروسه والعريس يوفروا فلوسهم فى حاجه تانيه

---

والله مية مية يادكتور بوووسى دة راىى برضو ياجماعة انتو ناسيين ان باباها ولا دة مالوش نفي يحضر وعمها وخالها وكل قرايبها عايزين يفرحو فيها (بيها)وكمان بقى انتو كدا هتزعلو بنات كتيرة اوى بسترزق من الافراح هههههههههه والله بجد هيزعلو بيروحو ياعينى على اساس ان حد يشوفهم يعجب بيهم والامور تمشى بجد والله اكتر من نص مواضيع الجواز دلوقتى بتحصل بالطريقة دىعشان كدة مبروحش افراااااااااااااااااح كتير

اقتباس:

---

المشاركة الأصلية كتبت بواسطة dry_tears

والله مية مية يادكتور بوووسى دة راىى برضو ياجماعة انتو ناسيين ان باباها ولا دة مالوش نفي يحضر وعمها وخالها وكل قرايبها عايزين يفرحو فيها (بيها)وكمان بقى انتو كدا هتزعلو بنات كتيرة اوى بسترزق من الافراح هههههههههه والله بجد هيزعلو بيروحو ياعينى على اساس ان حد يشوفهم يعجب بيهم والامور تمشى بجد والله اكتر من نص مواضيع الجواز دلوقتى بتحصل بالطريقة دىعشان كدة مبروحش افراااااااااااااااااح كتير

---

بالنسبه للاسترزاق
يا ليتكم تتتوكلون (تتوكلن ) على الله حق توكله لرزكم كما يرزق الطير
واتى كل خير (عريس) ... مش تقولى انا راحة الفرح ومتوكله على الله بقى ... وباخد بالاسباب وبحط ميكب كامل كمان ....

اقتباس:

---

المشاركة الأصلية كتبت بواسطة dry_tears

بجد والله اكتر من نص مواضيع الجواز دلوقتى بتحصل بالطريقة دىعشان كدة مبروحش افراااااااااااااااااح كتير

---

هههههههههههه

لنفس السبب مابروحش أفراح خاااااالص الا لو مضطرة و هيزعلوا لو مرحتش ..

على فكرة اللي بيحدد هيكون في فرح و لا مش هيكون .. أو الفرح هيكون اسلامي و لا غيره

العروسة

هي اللي لو قالت عايزة فرح بسيط هيتعمل و لو قالت عايزة كذا بيتعمل .. في الأول بس و خصوصا قبل كتب الكتاب ..

أصلا يا بنات ازاي تبقي قاعدة 4 ساعات و الناس بيتفرجوا عليكي سواء ستات ولا رجالة ..

وطبعا لو رجالة بيتفرجوا تبقى الحالة أسوأ و هتاخدي ذنب طبعا لأن في ناس برده معندهاش دم ..

و خصوصا لو انتي حلوة كدة و ( مش هتقدر تغمض عنيك )

ههههههههه

دول بيبقوا قاعدين زي كاميرات الرصد ..

لا يا بنات و الله مش حاجة حلوة ..

وكمان هتتعبي و تتبهدلي ليه ..

في عادات للأفراح بتكون غلط جدااااا عندنا المفروض نتخلص منها ..

مفيش حد في البلاد المتقدمة بيعمل أفراح زي ما احنا في مصر بنعمل ..

يا بنات احنا اللي بنحدد كل حاجة و الله ( قبل الجواز بس طبعا )

فماتعمليش الا الصح بس ..

وبعدين ممكن تجيبي أصحابك يوم الحنة ( ليلة الفرح ) و تنبسطوا و تهيصوا و تلبسي أحلى حاجة ( مع البنات بس )

و الله يوم الحنة دة أحلى من يوم الفرح نفسه ..

خلينا نبدأ بنفسنا في تغيير عادات غلط ..

أنا عن نفسي بحب البساطة و بحب الهدوء ..