لماذا تشتكي يا غير مسجل من المحاضرين؟؟

السلام عليكم ورحمة الله وبركاته
لفت نظري في الاستفتاء الخاص بأسباب استشراء الدروس فى الجامعة أن أهم سبب تم اختياره هو
عدم الفهم من المحاضر
لذلك أدعوكم للمشاركة برأيكم لتحديد
مواصفات المحاضر المثالي
من وجهة نظركم
أرجو من الجميع المشاركة لأن حجم مشاركتكم سيؤثر في حل المشكلة
:169::169::169:

انا مش هحكى كتير عن المواصفات دى بس يلخصها شخصيات كتير عندنا فالكليه ع سبيل المثال وليس الحصر

د_حسن الكاشف

د_ماجده الشربينى

د_ثناء برج

د_حاتم

بصراحه هما الحمد لله كتير

لو عايزين محاضر مثالى يكون هما بجد شوفو بيشتغلو ازاى وياريت الكل يكون زيهم

يعنى حضرتك جمع الاراء والدكتور المختار يطرح اسلوبه في الشرح

ألف شكر د/ lost*soul على مشاركتك
وبالفعل الأسماء اللي قولتيها نفخر جميعا بوجودها في كليتنا
لكني أريد منكم صفات محددة و واضحة
لأن هذا الموضوع سيبنى عليه خطوات أخري ان شاء الله

السلام عليكم ورحمة الله ,

إزي حضرتك يا دكتور? يارب تكون بكل خير إن شاء الله,

بصراحة يا دكتور إحنا محتاجين حضرتك وكل الدكاترة تكون معانا,

أولآ يادكتور مع إحترامى لأعضاء تدريس الكلية والجامعة وجامعات مصر كلها, لكن المعظم مش تربوى بغض النظر عن المادة العلمية اللى موجودة عند معظم الدكاترة.

مش هنتكلم عن دكاترة بعضهم مش عارف يوصل بإبنه لدرجة النجاح فى الدراسة وهنطلب منه إنه يبذل مافى جهده علشان الطلبة جيبوا إمتياز .

وسؤال حضرتك لواحده مش كفاية,

دور الدكتور وعلاقته بالطالب مش فقط على الـ stage, وحضرتك عارف إن لو العلاقة بين الدكتور والطالب حلوة, الطالب هيحضر لواحده حتى لو الدكتور مش أكاديمى ومادته العلمية مش ممتازة زى باقى الدكاترة,

لكن يا دكتور مش كل الدكاترة لما بنقابلهم بيقابلونا بإبتسامة أو الحاجات البسيطة دى اللى ماحدش بياخد باله منها, بس بتأثر فى نفوسنا كطلاب,

وأكيد حضرتك عارف إن من صفات المحاضر الجيد إن يكون كونتكت بينه وبين قلب وذهن المستمع, واللى بيحصل دلوقتى إن مافيش قبول لا من الطلبة للدكاترة ولا الدكاترة للطلبة,

إحنا لو عايزين ننمى مهارات الـ stuff بتاع الكلية يبقى لازم نعملهم دورات تدريبية وتنمية بشرية فى مجالات كتير, ممكن أهمها " مهارات الإتصال " و " مهارات الإلقاء والحوار " و دورات تدريبية فى التربية.

أنا هحكى عن مثال بسيط لمدرسينى السعوديين فى السعودية وعن دراستهم :
هما طبعآ واخدين درجة جامعية فى التخصص ده بس كمان معظمهم :
ماجستير فى علم النفس
دبلومة تربية
ماجستير علم إجتماع
ودورات ودبلومات كتير جدآ عن طرق تفعيل الطالب والوصول بيه لأعلى درجات الإنتاج

وسبحان الله كل مدرس كنت برتاحله أكتر, لما كنت أتعرف عليه أكتر وكنت بحاول أعرف السى فى بتاعتهم عن قصد كنت بلاقى إنه واخد دورات أكتر, وكان فى مدرس تربية رياضية ربنا يهديه ماكنش بياخد أى حاجة, ورغم إنها تربية رياضية بس الطلاب مش كانوا بيحبوه ولا بيحبوا حصته :co:

أتمنى إن المعنى اللى أقصده وصل لحضرتك, وإن المفروض طالما الدكاترة بتوعنا مش بيعملوا كده من نفسهم, يبقى لازم يبقى فى قسم تدريبى فى الكلية ويكون إجبارى, وأعتقد إن ده بيحصل فى الجامعات المحترمة و المتقدمة خارج مصر,

وجزاك الله خيرآ يا دكتور على فتحك باب النقاش, لكن مهما كان إحنا طلبة وآرائنا هتكون من نقطة واحدة, ولازم الكلية تعمل على حل المشكلة دى من جميع النقط مش من نقطتنا بس, لأن المحاضر ممكن يبقى مش راضى عن عمله بسبب الراتب أو الدكاترة اللى شغالين معاه, بس إحنا كطلبة مش هنفكر فى النقطة دى فلازم يكون فى فريق عمل للموضوع ده مش بس آراء الطلبة,


وأعتذر على الإطالة, والسلام عليكم ورحمة الله وبركاته...

اولا بشكر حضرتك يا دكتور على الاهتمام بالموضوع واتاحة المجال للمناقشته
ثانيا مواصفات المحاضر المثالى :
1-انه اولا يكون بيحب شغله جدااااااااااااااااااااااااااااااا لانه لو حبه هيبقى مستمتع بيه وهينقل الحب ده لينا وهينعكس على فهم الماده.( وده حسيته فى د\حسن الراضى )
2-يتمتع بروح الدعابة لانها فعلا بتنشط مخ الطلبة وتزود قدرتهم على الفهم حتى لو مكنش عنده القدرة دى ممكن يجيب كليب صغير كوميدى فى فاصل صغير اثناء المحاضرة لان فى بعض الناس وقورة بطبعها(زى د\عطا الله ) .
3-ذو سعة صدر وصبور وبشوش (د\سامى خيرة رحمة الله عليه)&(د\اسامة بشير )&(د\عطا الله)
4-مرتب الافكار متمكن من ايصال المعلومة (د\سناء برج &د\فاطمة النبوية )
5-اتاحة المجال للمناقشة فى موضوع المحاضرة فى نهايتها(مش قادرة افتكر مثال للنقطة دى)
6-القدرة على حفظ نظام المحاضرة من حيث الهدوء يعنى ميسبش اللى عاوز يخرج يخرج واللى بيتكلم براحته (بلاش ذكر اسماء)
7- لازم يحث الطلبة على الاخلاقيات والمثل زى ما بينصح اولاده .

شكرا dr/noony على مشاركتك وفي انتظار المزيد من باقي الأعضاء

والله يادكتور انا من وجهه نظري ان المحاضر الناجح هو اللي بينصب اهتمامه على توصيل المعلومه للطالب بسهوله ويسر واكبرمثال على كده بصراحه دكاتره الصيدلانيات في سنه اولى د/ عبد المنعم فوده ود/ حسن الصباغ ود/ حمدي عبد العليم بصراحه قمه في الابداع وذلك نظرا لتمكنهم فعلا وحبهم للماده العلميه اللي هما بيدرسوها
2- كتاب الماده بتاعهم مرجع رائع للطالب ومبسط يعني احنا كنا بنقعد في المحاضره بس علشان نفهم ونستوعب كلام الدكتور وبالنا مش مشغول ابدا بالكتابه لان كل المعلومات في الكتاب
3-قدرتهم على اداره دفه المحاضره يعني مفيش كلام ولا هرج ومرج الطالب بيبقى عامل حساب للدكتور وقاعد محترم نفسه
4- اسلوب محترم في التعامل مع الطالب اضافه الا انهم مكانوش بيستخدموا ابدا اسلوب الترهيب من الامتحان زي ما بعض الدكاتره بتعمل
5- الامتحان متناسب تماما مع مستوى الشرح فبجد بجد ربنا يكرمهم ويجازيهم عنا خير
وفي كمان نقطتين احب اقولهم نقطه الكتابه في المحاضره دي يا دكاتره عمله للطلبه ازمه الدكتور اللي بيستخدم الداتا شو مش بيصبر يادوب يخلص كلام ويقلب الصفحه طبعا بيبقى معتمد ان الطالب معاه كتاب لكن يادكاتره اصبروا علينا شويه لان في كتب مش بتبقى ماشيه بنفس الترتيب مع الداتا شو زي كتاب العقاقير مثلا ليه الدكتور ميعملش الكتاب نفس الداتا شو او العكس احنا بنقعد ندور على المكان اللي المعلومه مكتوبه فيه وقت ماالدكتور بيشرح ولحد ما نلقاها يكون الدكتور قلب الصفحه وشرح نقطتين تلاته كمان ده اضافه الى ان الكتاب غير مفهرس يعني الدكتور بيخلص شرح النبته ويبدا في شرح نبته جديده واحنا لسه قاعدين بندور عليها واحيانا كمان تطلع مش موجوده في الكتاب من اساسه اما الدكاتره اللي بتكتب على الصبوره فياريت تهتم بتكبير الخط شويه احنا بنبقى قاعدين مش شايفين ولا كلمه
تاني نقطه يادكتور هي اسلوب الحوار بين الطالب والمحاضر لانها بتبقى صدمه كبيره جدا علينا كطلبه لما نشوف دكتور جامعي بيشتم طالب مهما كانت درجه وقاحه الطالب فان الدكتور عنده مليون وسيله ردع غير انه يشتم الطالب وطبعا الحاله دي انا مشفتهاش غير 3 مرات من ساعه مدخلت الكليه فالحمد لله ان دي حالات شاذه لان دكاترتنا قبل مايكونوا معلمين ومعلمات فهم اباء وامهات اسفه اذا كنت طولت بس زي ماحضرتك تفضلت يادكتور ان ارائنا هي المفتاح للتغيير

شكرا د/ summer breeze

أول حاجه اشكرك يادكتور كتير علي الموضوع المهم ده ....... تاني حاجه أنا شايف مواصفات المحاضر المثالي هي:-
1- لازم يكون قدوه قدام الطلبه .... يعنى لازم الطلبه تتأثر بشخصيته اللي لازم تكون محترمه جدا
2-متمكن من الماده العلميه بتاعته وأعتقد ان ده موجود في كل اساتذتنا
3- قادر علي توصيل المعلومه بشكل مبسط
4- يكون تربوي دارس علم نفس وكورسات في كليه تربيه
5- الكتاب الجامعي يكون منظم لكن للاسف كل الدكاتره عاملين copy و paste لكتبهم
6-المحاضرات تكون كلها علي داتا شو
7-متعاون مع الطلبه
8-البعد عن التعقيد في الامتحانات وفرد العضلات
9- اعطاء قدر اكبر للعملي لان العملي بتاع كليتنا قليل عن الجامعات التانيه..... يعني مش معقول ناخد سكشن واحد كل اسبوعين في حين ان الجامعات الثانيه بتاخد سكشن كل اسبوع مثلا زي الازهر

انا شايفة ان بعض الدكاترة غير قادرين على توصيل المعلومة وده طبعا مش عشان خلل فى مستواهم العلمى بالعكس هو انسان متمكن من مادته العلمية بدليل تفوقه فى الدراسة وتعيينه فى الكلية لكن للاسف بعضهم اللى يهمه ان هو اصبح معيد فى الكلية ومايهموش اذا كان قادر على توصيل المعلومة ولا لا,
واللى زى ده لازم يراجع نفسه لان حرام عليه يعقد الطالب ويكرهه فى المادة...
(( وهذا رأيى ))
وشكرا يادكتور على اهتمامك.

شكرا جدا يا دكتور علي اهتمام حضرتك بالموضوع
_ صحيح ممكن المحاضر يكون علي مستوي عالي جدا لكن غير قادر علي توصيل المعلومه للطلبه
فممكن من البدايه انه يستشير الطلبه في الاسلوب اللي يحبوا المعلومه توصلهم بيه

_ الداتا شو اللي معظم المحاضرين بيعتمدوا عليه في اوقات كتير مش بيقدر يوصل اي معلومه وبيخلي الطالب تايه ومش مركز علي عكس ما الدكتور يشرح ويكتب كل كلمه بيقولها بنفسه

_ وكمان لما يكون في المحاضره روح فكاهه حلوه و rest لو كانت المحاضره طويله

_ معظم الكتب اللي احنا بنشتريها بعيده جدا عن اللي الدكتور بيقوله في المحاضره وعلشان كده مش بنفتحها فليه مثلا متكونش بسيطه ويكون كل اعتمادنا عليها

وشكرا جدا لاهتمام حضرتك بالموضوع

انا من وجهه نظرى ان سبب استشراء الدروس ف الجامعه هو الفهم نفسه من المحاضر
وانا جربت الحكايه دى على فكره ولقيتها افضل حل.
عشان كده انا بنصح اى طالب ف صيدله انو ميفهمش من المحاضرين ولا كلمه اثناء الشرح وان فهم يستاذن الدكتور يعيد الجزئيه مره تانيه عشان يتمحى الفهم اللى اتفهم وبردو بوجه الرساله الى اعضاء هيئه التدريس ان هما يشرحو باسلوب اعلى من مستوى فهم الطالب اللى بيفهم واللى مبيفهمش عشان ميديش الطالب فرصه انو يفهم اى حاجه بس اهم حاجه للطالب انو يحضر المحاضرات وميفهمش

شكرا على آرائكم القيّمة وفي انتظار المزيد من باقي الأعضاء

السلام عليكم يا دكتور محمد ازى الاحوال
بالنسبة ليا اهم حاجة فى المحاضر انه يكون مش دكتولا بس انما يكون بمسابة اب لينا كلنا وينصحنا مش يدينا المحاضرة وخلاص ....
تانى حاجة توضيح شرح النظرى بشى عملى
على فكرة انا محول السنة دى من جامعة اسيوط وكان عندنا دكاترة لا مش دكاترة كانوا اباء بالنسبة لينا وكانوا يوضحوا كل شيى سواء بالموديلات التوضيحية او الشرح الوافى جدا ....على عكس الوضع هنا معلش يعنى المهم ان المنهج يخلص وخلاص ....
وفيه شويه حاجات لازم يكون لامم المنهج كله ويدرس بطريقة تكون قريبة من الطلبة اصل فيه بعض الدكاترة بيشرحوا بطريقة عالية قوى بتحسسنا ان الدكتور بيتكلم مع شوية علماء مش تلاميذ وفى النهاية ده مجرد راى اهم حاجة ان الكليه هيا اللى تاخد موقف سواء بالتدريب او مسايرة مجريات العصر
وتقبل مرورى يا دكتور

شكرا يا دكتور علي الموضوع
المواصفات لازم يكون فاهم الطلبه بتفكر ازاى ويكون في لغة حوار
يكون قدوة حسنة طبعا الماده العلميه اساس

جزاكم الله خيرا

شكرا يا دكتور محمد على موضوعك الرائع
وأنا صفات المحاضر المثالي من وجهة نظري:

1 : انه يكون بارع في المادة العلمية الي بيدرسها
2: انه يكون معاه دورات في فن الإتصال بالأخرين
3: انه يقطع العوائق الموجودة بينه وبين الطالب ويجعل الحوار سهل بينهما
4 : انه يكون محضر المحاضرة قبل ما يدرسها بيوم
5 : أن يستخدم السبورة في شرح المادة وألا يعتمد على الداتا شو اعتمادا كليا لأن بعض الدكاترة بيقرأو اللي مكتوب على الداتا شو وخلاص
6 : أن يجعل المحاضرة محببة للطلاب مثلا أن يفصل بعد كل ربع ساعة بتعليق من واقع الحياة وأن يهتم بالمعلومات التي تنهم الصيدلي بعد ما يتخرج
7 : أن يضع في باله أن أمامه طلاب يشرح لهم معلومات لم يعرفوها من قبل لأن بعض الدكاترة بيشرحوا كأنم بيشرحوا لعلماء ومبيوضحوش حاجات كتير في شرحهم
8 : يعمل أخر 5 دقايق مناقشة بينه وبين الطلاب
9 : ممكن من فترة للتانية يعمل 5 دقايق يطلع فيه طالب\طالبة يشرحوا جزء من المحاضرة أمام الطلاب لتزيد عندهم الجرأة على مواجهة الناس
وشكرا
وأتمنى أن تعرض هذه المواصفات على الدكاترة :fop (20): لكي يطبقوا علينا كل ماهو يفيد الطالب والدكتور
وشكرا:fop (43):

بسم الله الرحمن الرحيم
أولا احب اشكرك يا دكتور على فتح باب الحوار في الموضوع الحيوي ده
وبالنسبة لمواصفات المحاضر فده هو رأيي المتواضع:-
1-على درجة علمية ذات كفاءة ومتقدمة(متوفر فى معظم المحاضرين)
2-لديه تفكير محدد ومنظم وهدف أساسى من المادة التى يقوم بتدريسها
(مفيش دكتور تقريبا بيقول قبل ما يبدأ هو عايز من الطالب ايه والمنهج غرضه ايه
3-على المحاضر أن يكون ملتزما التزاما كاملا بأن يتوافق الكتاب مع مايقول فى الاتى
أ-المعلومات التى فى الكتاب (احيانا يقول الدكتور كلام غير اللى في الكتاب؛والطالب يصبح في حيرة من امره)
ب-الغاء الدكتور جزء من الكتاب يدل على عشوائيته ولا مبالاته بعقلية الطالب(وخصوصا اذا كان الجزء الملغى مهم لفهم المنهج(حدث هذا خلال فترة مكوثى فى الكلية مرات عديدة))
ج-على الدكتور ان يتلافى بشكل كامل وجود أخطاء علمية فى الكتاب؛لأن هذا لا يدل سوى على الاهمال ويعطى قدوة سيئة للطالب
د-الكتاب عنوان كل محاضر (واترك لكم فهم المعنى)
3-أشعر فى بعض المحاضرات ان الدكتور لا يكترث سوى لالقاء الكلمتين ويمشى وهذا فى حد ذاته امر محبط(يجب ان يشعر الطالب باهتمام المحاضر(وان ينسى الدكتور همومه فور دخول المدرج)
4-طبعا دخول الدكتور مبتسم معرفا عن نفسه لطلابه فى اول محاضرة ؛ليشعر الطالب بجو حميمىمع استاذه وعلم الطالب بالمكانة العلمية للدكتور فى حد ذاته امر جميا ومفرح
5-تقريبا طريقة عرض معظم المواد في حالة يرثى لها ولا تدعو الا للملل(وهذا لا يعنى ان كلامى يشمل كل المحاضرين) فالعرض التسلسلى يساعد فى زيادة تركيز الطالب والعرض المفكك لا يزيد ولا يفيد
6-معظم المواد لا يوجد توافق ما بين النظرى و العملى (اللى بنأخذه الترم الأول نظرى لا يؤخذ عملى فى نفس الترم ولكن يؤخذ فى الترم الثانى(مثال:- الemulsionخدناه نظرى الترم الأول وعملى فى الترم الثانى)) على الدكتور ان يعمل على توافق العملى مع النظرىوعدم وجود اختلاف فى المحتوي العلمى للمنهجين
7-أخرشيء هو البحث (المحاضر يجب أن يضع فى الحسبان اعطاء الطالب فرصة للبحث عن موضوع محدد؛ وقد رأيت هذا مع الدكتورة الفاضلة ماجدة عبد العزيز؛والدكتور على ماهر؛ولكن لم يعطيا أى محفز للطلاب للقيام بذلك (مثلا درجات اضافية أو اي شيء من قبيل هذا.
وفى النهاية أستطيع ان اقول ان كليتنا لسه بخير؛وفى محاضرين كتييييييير كويسين
وفى اديهم يخلوا كليتنا أحسن كلية
اسف على الأطالة
وشكرا مجددا


=================================

http://img177.imageshack.us/img177/5990/logo2pb1.jpg

Gohary

شكرا يادكتور انك مهتم بينا ربنا يخليك لينا وكل سنة وانت طيب

كل سنة وانت طيب يادكتور --------انا مؤيدة لاراءsummertreez
وdr/noony
sowtrigكلهم صح مية ف المية
بس لو كل دكتور او دكتورة يعتبرنا زى اخته الصغيرة او اخوه الصغير وميعاملاناش ع اننا علماء ذرة ولا مخترعين الفيمتو سكند ف ثانيتين ---------- هنبقا بحال تانى اكيد وافضل
لو عاوز تعرف ايه اللى بيشدنى ف اى دكتور او دكتورة ؟؟؟
مجرد ابتسامة صغنونة - صوته وااااااااااضح - يجزب انتباهى ليه حتى مهما شغلنى شيطانى ف المحاضرة - يحسسنى انى قريبة منه اوى زى اخته بنته بس مش مامته يعنى هههه ولا ايه - يحاول يساعدنا ع اقد مايقدره ربنا
زى مثلا
1- يحاول ينشر محاضرته باى وسيلة متاحة زى المنتدى او ع فلاشة او ع اسطوانة
2- يحاول يبسط المعلومة ع قد مايقدر
3- بلاش يتعبنا بمعلومات خارج الكتاب لو عاوز يزود اى معلومة ميحاسبناش عليها ف الامتحان
4-يحاول ينظم مواعيد محاضراته مع الدكاترة الاخرين
5- لو اى تغيير ف مواعيد محاضرته
يحاول يراعى ان فيها طلاب مشغولين بسفر او اى حالة مرضية يعنى
6-بلاش يقفل باب المدرج ف وجه اى طالب لان كلنا معرضين لظروف تمنعنا من الحضور بدرى
7-المعامل يحاولو يمرو علينا وسط المعمل يساعدونا يشوفونا بنعمل ايه ؟؟ يكون شرحهم سهل
وكل واحد يراعى ضميرررره




شكرا يادكتور انك مهتم بينا ربنا يخليك لينا وكل سنة وانت طيب

السلام عليكم ورحمة الله وبركاته ..

اولا كل سنه وحضرتك طيب يادكتور محمد ..

انا هقول لحضرتك على حاجه ..

كليتنا والله ماهى صعبة ولا حاجه ..

بس احنا بس محتاجينكم تساعدونا وتشجعوناا

احنا ف ثانوى كنا بننافس بعض جدا علشان نشوف مين هيثبت جدارته

بس الحكاية كانت محدوده شويا ..

انما احنا فى الكليه اكتر من الف طالب

فمحتاجين التشجيع يكون اكتر واكتر

بجد والله يادكتور لو شجعتونا وعرفتونا نزاكر ازاى هتلاقوا نتايج مبهرة جدا

المذاكره شىء مش صعب ..لكن التحفيز عليها هو اللى بيكون صعب احيانا ..

بالله عليك يادكتور تقولنا طريقه للمزاكره سهله وبسيطه وف نفس الوقت المعلومات تثبت ..

مع العلم ان احنا اغلب وقتنا بيضيع مابين كليه ومواصلات ..

عاوزين نلاقى وقت نقدر نحصل فيه كل اللى بناخده اولا باول ..

وجزاكم الله خيراااااااا

شكرا يا دكتور على اهتمامك بالموضوع وانا متفق مع معظم زميلى على ان اهم حاجه فى الدكتور انه يوصل المعلومة ويعاملنا على اننا ولاده والحمد لله فيه دكتره عندنا كده بس للاسف مش كلهم واحب اضيف حاجه لو تسمحلي ان اكتر حاجه بدايقنا كلنا الدكتور اللى بيقرا اللى على el projector وما بيشرحش وده مش معناه ان المشروع ده سيء ولكن استخدامه هو اللى سيء وفيه دكتره كتير بتستخدمه كويس واكرر شكرى لحضرتك :fop (43):

أنا متفقة معاكم جداً ...بس في الأول شكراً للدكتور محمد العوضي....وفكرة جيدة للتواصل معانا

أنا بس أحب أضيف حاجه

الكم إللي إحنا بندرسه....فيه مواد تكون معقوله زي مثلاً العضويه بتاعه إعدادي....كانت كميتها معقوله بالعكس خالص بقى التحليليه بتاعه إعدادي برده....كان كم رهيب جداً


طبعاً كل الدكاترة متيزين في الماده العلميه....وبصراحه الحمد لله كلهم يتقبلو النقاش والأسئله ....دا إللي أنا شوفته لحد دلوقتي

وزي ما زمايلي قالو يستحسن لو وقت المحاضرة طويل يكون فيه راحه.....أو الدكتور فعلاً يكلمنا عن قضايا العامه


وحب الأستاذ ودكتور الماده بيحببنا في الماده فعلاً...حتى وإحنا بنذاكرها ...نفتكر الدكتور وهو كان بيحكي موقف معين وبيضحك ....مرتبط بالجزء إللي بيشرحه

أنا لحد دلوقتي أفتكر الأستاذ الدكتور محمد النجار...هو صحيح من علوم بس فيه حاجات كان بيقولها لا تنسى

وطبعاً إحنا عندنا في صيدله نماذج مشرفه جداً...زي د.ماجد ود.فاطمه النبويه ود.ثناء .ود.عبد المنعم
وحضرتك والله يا د.محمد العوضي.....بدايه حضرتك معانا بدايه مبشرة جداً
وكتير من الدكاترة ....إلخ

السلام عليكم ورحمة الله وبركاته
ازى حضرتك يا دكتر محمد .. يارب تكون بخير

اولا الموضوع جميل جداا .. وان شاء الله يفيد

وانا رايي مش مختلف اللى قبلى كتير ..

1- الدكتور المفروض يعرفنا فايدة المادة او ماشابه .. لأن كتير من الطلبة تقول وانا يعنى هعمل ايه بالتحليلية ولا العضويا !! او غيرها .. فالدكتور اكيد لو وضح النقطة دى فده هيساعد ع قابلية الطلبة انهم يتعلمو بجد ..

2- ياريت الدكتور ميستخدمش سلطته انه يفرض حاجات ع الطلبة هما مش حابينها او ملهاش لازما اساسا .. زى مثلا " انتا يبنى اقفل الكتاب ده " " انتا نزل ايدك من ع البنش !! " "متبصش جمبك " .. وكمان ساعات بتبقى فيه تريقا ملهاش لازمة .. ممكن تضحك الطلبة اه .. بس اللى بيتريق عليه ده بيكون حاله ايه بالظبط ؟؟! ..

3- ومن الحاجات اللى بتعجبنى ان الدكتور يعامل الطالب كويس ويقربه منه .وميبقاش بيبصلو من فوق وفيه دكاترة كتيرة كده الحمد لله .. وميبخلش عليه بحاجة طبعا

4- ياريت الدكاترة يوفرو مكان للمعلومة بحيث ميدوخوناش احنا .. يعنى السنا اللى فاتت كتاب التحليلية ملياااااااااان حاجات غريبا .. ومع ان الدكتور قال ننقل وراه من المحاضرة وملناش دعوة بالكتاب
طيب يبقى ناخد الكتاب ليه ؟؟ معلوات اكتر يعني؟ اللى عاوز معلومات اكتر هيجيبها من النت بقى من المكتبة من اى مكان ؟؟
فياريت الكتاب يكون منظم شويا .. شويا كتير يعني .. والله زى الدكتورة summer breeze مقالت كتاب الصيدلانيات السنا اللى فاتت مكناش بنشيل هم او كتاب العضويا كمان ..

5- اخر حاجا عشان مطولش الدكتور ياريت يكون حاكم المحاضرة كويس يعني الكلام في المدرج ,,م اللى عاوز يتكلم بيحضر لييييه من اساسو !! .. بس برضو الدكتور اللى بيفرض شخصيته .. وياريت زى م قلت قبل كده الفرض ده يكون بزكاء شويا من غير تجريح ..

وفي النهاية الكليا فيها دكاترة والله جميلا جدااا .. بس مفيش حاجا كاملة ..
واللى جاى احسن ان شاء الله
:fop (29):

يا ريت كل الدكاترة زى حضرتك يا دكتور

السلام عليكم ورحمة الله وبركاته
الموضوع جميل ومهم جدا
اولا الحمد لله الدكاتره عندنا من اعظم الدكاتره من حيث المستوي العملي لكن فتوصيل المعلومه فالغالبيه غير قادرين علي توصيل المعلومه المفروض ان كل دكتور ياخد كورس في كيفية توصيل المعلومه للطالب.
ثانيا يبقي الكتاب متوافق مع الكلام اللي بيقولوا الدكتور مش يبقي منهج تاني.
ثالثا نفسي تهتم الدكاتره بالكيف وليس الكم فمن اول محاضره تلاقي الدكتور قاعد يقول المنهج كبير ومفيش وقت ايه الخساره لو قللنا المنهج مش لما نفهم جزء احسن من اننا منفهمش الكل.
رابعا ان الدكاتره يتعاملوا مع الطلبه كأولادهم.
خامسا يبعد عن التعقيد فالامتحان.
سادسا المنهج يكون مهتم بالحياه العمليه اكثر من النظريه.
احسن دكتور د.محمد النجار
واحسن معيد د.محمد العوضي
شكرا

اولا اقدم لك شكري وتقديري وهزا لا يكفيك قدرك.كنت اتمنى ان كل الدكاتره يكونوا مثل حضرتك.مع تقديرى واعجابي بالدكتورة فاطمة.كانت محاضرتها النهردة اكثر من ممتازة .انا جتلى حالت اكتئاب من اول شرح الصيدلنيات.انا اعتقد ان الدكتور يجب ان يقترب من فهم الطالب.لايحاوره وكانه في مثل مستواه العقلى.كتير منالدكاترة تقوم تمسك المكرفون وتتكلم وكانه بيتكلم في موضوع عام الناس عيشاه.علاوة على ذلك المصطلحات الانجليزية الى بالهبل والدكتور مش عايز حد يقاطعه.بصراحة انا اتعقدت من النبات السنة الى فاتت.ولكن اتمنى ان الدكتور الشرقاوي يبقى معنا هو دكتور بمنا الكلمة.بردوا الدكاترة لازم تراعي الكم الذى ياخذ في المحاضرة.وتبدا المحاضرة بالاشياء التى لم يفهمها الطالبة قي المحاضرة الماضية .ويقلل من استخدام البروجكتر .ويحاول شرح بعض الاشياء على السبورة.ومراعاة المزكرات الي بتكون سلطة كلو داخل على كله.والمشكلة ان الدكاترة معترفه بده.بس انا مستبشرة خير ان شاء الله بدكاترة السنة دى.

شكرا ليك يا دكتور على طرح الموضوع دة انا عاوزة اقول مشكلة انا بعانى منها بس معرفش الكل مثلى ولة لا انا بلاقى الدكاترة بيشرحوا بسرعة اوى ولما نيجى نسألهم يقولولنا الوقت ضيق والمنهج كبير انا نفسى افهم طب احنا ذنبنا اية؟

بسم الله الرحمن الرحيم

***************الموضوع طويل ومينفعش مناقشته كتابة ولكن باختصار ***************


* الناس اللي قالت الكلام ده وانا واحد منهم قالوا كده لان فعلا ده اللي شوفناه في اعدادي وربنا يبعده عننا في اولى

* سنه اعدادي اول سنه للطالب في حياه جديده فعلا فالمفروض كحق من حقوق الانسان انه ميتصدمش الصدمه البشعه دي انا واحد من الناس اتقلي كلام عنها من زملائنا اللي اكبر مننا في الكليه كتير واشهر جمله ..." محدش عايز منك تقدير ولا درجات عاليه اهم حاجه عدي من السنه دي نضيف او حتى مش نضيف بس عدي "

* ده معناه ان السنه دي سيئة مش بسبب انها اول سنه في النظام الجديد على الطالب بس ولا لان مجموعها في التراكمي مش كتير ...خمسة بالمئه فقط ولكن لسوء المناهج اللتي اظهرت سوء بعض الدكاترة فمنهم اللي كان بيخرج عن شعوره في المحاضره فيعمد الى الطرد او الاستهزاء بطالب او تصعيب المتحان !!!!! وده كله من اهم الاسباب اللي ممكن تخلي طالب يكره دكتور وده اللي حصل .


* اخيرا وليس اخرا كل انسان وليه عيوبه والدكاترة بشر فاتمنى من كل دكتور يسال نفسه هل ممكن الطلاب يشتكو منه في يوم من الايام؟؟؟؟ وان كان حصل وهذا لا يخفى عليهم يحاول يعرف السبب لان في معظم الاحيان بتكون اشياء تافه وحلها بسيط جدا زي سرعته في الشرح او بطئه اوي او عدم تغير جو المحاضره او او او كما ذكر زملائي فيما سبق واسف ان كنت خرجت عن السؤال المطروح بس هو موضوع مترابط ومتشابك جدا وكل طرف يؤدي للاخر واسف على الاطاله

شكرا لاثارة الموضوع :fop (43):

السلام عليكم ورحمه الله وبركاته
ازيك دكتور محمد
انا عارفه ان الموضوع من زمان بس انا حبيت ارد علي حضرتك

بالنسبه للي بيقولوا ان هم مش بيفهموزا من المحاضرين فهم مبالغين جدا جداا
لان الحمد الله تقريبا كل الدكاتره بيشرحوا وشرح جميل جدا جدا والله ربنا يبارك فيهم كلهم بس فيه صحيح نادر قوي اللي مش بيعرف يوصل المعلومه بس بيشرح وبيبذل مجهود وبعدين اللي عايز يفهم هيفهم ..او حتي هيسأل في الجزء اللي مش فاهمه والله حتي لو الدكتور مش كويس ..........لكن اللي بيقولوا كده كلها حجح وناس الصراحه مش بتحب تتعب نفسها وتاخد المعلومه علي الجاهز كده او يمكن هو تعود من ايام الثانويه العامه علي الدروس ومتعودين ان المعلومه توصل لينا من غير اي تعب ولا بذل مجهود ..........والله وانا بقول ومتاكده ان عمر ما اللي بيحضر زي اللي مش بيحضر ابدا ابداااااااااااا انا بجمع معلومات جميله جدااا من الحضور مش شرط في المنهج يعني المحاضره اللي حضرتك عملتها لينا زياده بجد انا كنت من اوا ئل الناس اللي كنت مهتميه بيها والحمد لله حضرتها لاخر كلمه .......
وربنا يبارك في حضرتك والله انا اتعلمت من حضرتك حاجات كتير ه جدا ....بجد كلام حضرتك مؤثر جدا جدااا انا ساعات كتير والله ببكي من كلام حضرتك واقول لسه فعلا الدنيا دي فيها خير ..والله حضرتك مثل اعلي في للطلبه كلهم ربنا يكتر من امثال حضرتك يااااااارب ..اللهم امين
اسفه علي الاطاله ...وشكرااا

انا اعتقد ان اهم الاسباب هو السعى نحو الراحه فالكورس اسهل بكتير من حضور المحاضرات لساعات متواصله واللى بيدفعنا للملل وحتى التركيز بيوصل لمرحله معينه ويقف كمان فى الكورسات بيركزوا على النقاط المهمه اللى بتتناولها الامتحانات وده بيوفر على الطالب المجهود الصعب اللى بيبذله فى محاولة حفظ المناهج وفهمها دى احد الاسباب فى رأيى بس رأيى الاخير ان الكورسات ممكن تكون بتوفر على الطالب كتير من ارهاق الكليه بس فى النهايه عمرها ما هتطلع صيدلى ناجح فى الحياه الكورسات مجرد تذكره للنجاح لكن المحاضرات هى معيار التفوق فى المجال الصيدلى

اولا احب اشكر حضرتك جدا يا دكتور محمد لفتح باب النقاش فى هذا الموضوع ... ثانيا أرى ان من ضمن الصفات التى يتحلى بها المحاضر المثالى هو كالتالى:
1) الإستيعاب الجيد للمادة لعلمية التى يدرسها وان يتعامل مع الطلبة على قدر مستواهم العقلى والعلمى.
2) ان يكون ذا خبرة فى التعامل مع الطلبة بجذبهم اليه ويجعلهم يتشوقون للمحاضرة التى يلقيها وان يكون قدوة اليهم.
3) ان يكون هناك handout للمحاضرة التى يلقيها وبذلك يساعد الطالب عى التركيز اكثر فى المحاضرة.. كما تفعل حضرتك يا دكتور محمد العوضى..
وبقية الصفات زكرها زمالائى بالتفصيل والسلام عليكم و رحمة الله وبركاته