الفرحة : قصة تاريخية ، درامية ، جاسوسية .. تمت بحمد الله

http://img262.imageshack.us/img262/6069/10902305gi2.jpg

محمد : أنا مسافر بكرة بورسعيد .
إلهام : تانى يا محمد هو كل شوية سفر ؟؟
محمد : وأنا في إيدى إيه بس دى ظروف الشغل .
إلهام : أنا تعبت يا محمد من الظروف دى .
محمد : يا إلهام هو أنا باشتغل عشان مين . ما هو عشانك .. يا إلهام أنا بحبك .
الهام : وأنا كمان بحبك يا محمد بس هنفضل كده لحد إمتى ؟!
محمد : ما هي الدنيا كويسة معانا والحمد لله إننا مع بعض و..

إلهام (بسخرية ) : مع بعض آه .... يا محمد أنا كل ما أبقى في مشكلة وأدور عليك جنبي مش بالاقيك ، وقت ما بدور على حد أحكى له ويشيل همومي معايا أنت أول واحد بابقى عايزه أحكى له .. بس في اغلب الأوقات مش يتبقى موجود .
محمد : يا إلهام ما انتى عارفه ظروف الشغل وظروف البلد ، من بعد النكسة اللي حصلت والبلد كلها إتقلب حالها .
إلهام : وبعدين ما هو من قبل الحرب وأنت كانت نفس الظروف عندك و مفيش حاجه أتغيرت ..... أنا مش هأقدر أكمل كده يا محمد .
محمد : إيه اللي انتى بتقوليه ده .
إلهام : اللي أنا باقوله ده صعب عليا إني أقوله ، ويمكن هو صعب عليا أكتر منك ، لكن الوضع اللي إحنا فيه ده مش قادرة أستحمله أكتر من كده .
محمد : ياريت تفكري تانى يا إلهام في الكلام ده ولما توصلي لقرار عرفيني ...........

" حمد الله على السلامة يا حضرات وصلنا بورسعيد " قطعت جملة السائق شريط ذكريات آخر حوار لمحمد عبد المقصود الضابط بالمخابرات المصرية مع خطيبته إلهام قبل سفره لبورسعيد، نزل محمد من السيارة وتوجه مباشرة نحو القاعدة البحرية ببورسعيد مرتديا زى الضباط المميز بالبحرية المصرية وما أن وصل حتى قام بتسليم نفسه إلى قائد القاعدة البحرية العقيد / أحمد مصطفى .

محمد : تمام يا فندم ، أنا النقيب محمد عبد المقصود الضابط في ...
العقيد أحمد : أهلا يا محمد أنا عارف أنت ضابط فين وأنا اللي طلبت إن ضابط من المخابرات يكون موجود معانا هنا بعد ما أجهزة اللاسلكي لقطت إشارات مريبة أكتر من مرة .
محمد : تفاصيل المهمة اللي وصلت لي يافندم بتقول إن الإشارات دى كانت بتتزامن مع دخول المدمرة إيلات لمياهنا الإقليمية ، مظبوط يا فندم ؟؟
أحمد : أيوه يا محمد مظبوط إحنا من بعد خروج قواتنا البحرية سليمة من النكسة ، وإسرائيل بتحاول تستفزنا لأنها ما وقعتش فينا أي خسائر تذكر ، كل فترة يدخلوا لنا المدمرة إيلات تعدى في المياه الإقليمية وترصدها الردارات الخاصة بينا وتخرج تانى من المياه الإقليمية .... عارف يا محمد يعنى إيه مدمرة زى إيلات مفخرة القوات البحرية الإسرائيلية واللي شاركت قبل كده ضدنا في حرب 56 ، تدخل مياهنا الإقليمية كده من غير ما يكون فيه رد مننا ؟
محمد : شعور صعب جدا يا فندم ، في البداية أنا بقدم التعازي لسيادتك في الشهداء اللي استشهدوا في الاشتباك مع المدمرة .
أحمد ( بحزن ): النقيب عوني والملازم رجائي كانوا اسود .. وما خافوش من الموت ونالوا الشهادة اللي كانوا يبحثوا عنها وضربوا المثل لشجاعة المقاتل المصري ، إنهم يخرجوا يواجهوا المدمرة بدون خوف ولما طلبنا منهم الانسحاب رفضوا بحجة إنهم مش هيقدروا ينسحبوا وإنهم متحاصرين وبعدين توجهوا بلنشاتهم ناحية المدمرة في عملية انتحارية ... دى قمة الشجاعة ..... لكن للأسف المدمرة بمساعده لنشين الطوربيد اللي بيبقوا معاها قدروا يغرقوا لنش عوني ورجائي على بعد 30 متر بس من المدمرة قبل الاصطدام .
محمد : سبقونا بالشهادة يا فندم وكل واحد مننا في الحياة العسكرية هنا شايل روحه على كفه مستني بس اللحظة اللي يقدم روحه فداء لبلده .
أحمد : تمام يا محمد تمام .. أنا عارف انك جاى تعبان من السفر روح أنت دلوقتى ارتاح عشان وراك مهمة كبيرة جدا ..... يا محمد أنا مش عايز أخسر ضباط تانى لو حصلت أي مواجهة مع إيلات لمجرد إن فيه خاين بيبلغ المدمرة باللاسلكي بأي حركة بتحصل مننا .
محمد : تمام يا فندم إن شاء الله هانعرف مين الخاين ده .
أحمد : تمام يا محمد أتفضل أنت دلوقتى .


يتبـــــــــــع ،،،

http://dc595.4shared.com/img/I885lII...6/images_3.jpg


الحلقة الثانية


http://pic.myegy.com/pic_big/575166230.png


الحلقة الثالثة

http://pic.myegy.com/pic_big/575166230.png


الحلقة الرابعة

http://pic.myegy.com/pic_big/575166230.png


الحلقة الخامسة

http://pic.myegy.com/pic_big/575166230.png



الحلقة السادسة

http://pic.myegy.com/pic_big/575166230.png


الحلقة السابعة

http://pic.myegy.com/pic_big/575166230.png



الحلقة الثامنة

http://pic.myegy.com/pic_big/575166230.png



الحلقة التاسعة

http://pic.myegy.com/pic_big/575166230.png



الحلقة العاشرة

http://pic.myegy.com/pic_big/575166230.png



الحلقة الحادية عشرة و الأخيرة

http://pic.myegy.com/pic_big/575166230.png

تسجيل متابعه

حاجة محترمة ,,في انتظار باقي الحلقات :hi:

لذيذة جدا يا دوك ملاح ،، عشتها و عشت جوها فعلا ..

استمر و تابع فيها و إن شاء الله تتثبت و ننشرها في المجلة بتاعتنا بعد إذنك .. ^_^

جميلة يا دكتور تسجيل متابعة
:hi:

جميلة جدا الحلقة الأولى يا دكتور
متابعة ان شاء الله

اقتباس:

---

المشاركة الأصلية كتبت بواسطة rose smile

تسجيل متابعه

---

:):hi:
شكرا للمرور :) وتسجيل المتابعة
-----

اقتباس:

---

المشاركة الأصلية كتبت بواسطة E.Raafat

حاجة محترمة ,,في انتظار باقي الحلقات :hi:

---

شكرا يا دوك ابراهيم على رأيك ومرورك :) وتسلم يا غالى

:hi:
-----

اقتباس:

---

المشاركة الأصلية كتبت بواسطة قطر الندى

جميلة يا دكتور تسجيل متابعة
:hi:

---

شكرا يا دكتورة على مرورك :) وشكرا على تسجيلك المتابعة

اقتباس:

---

المشاركة الأصلية كتبت بواسطة M.Hegazy

لذيذة جدا يا دوك ملاح ،، عشتها و عشت جوها فعلا ..

استمر و تابع فيها و إن شاء الله تتثبت و ننشرها في المجلة بتاعتنا بعد إذنك .. ^_^

---

تسلم يا دوك حجازى :fopl00l:
ان شاء الله هاستمر وأكمل مفيها وأرجو التثبيت .. وشرف ليا انها تتنشر فى المجلة بتاعتكوا :hi:

-----

اقتباس:

---

المشاركة الأصلية كتبت بواسطة Dr_Cinderellaaaaa

جميلة جدا الحلقة الأولى يا دكتور
متابعة ان شاء الله

---

شكرا جدا ليكى يا دكتورة على مرورك وعلى رأيك فى الحلقة :hi: وشكرا ليكى على تسجيلك المتابعة

الحلقة الثانية من قصة : الفرحة

https://fbcdn-sphotos-a.akamaihd.net...79454917_n.jpg

خرج محمد متجها نحو سكن الضباط وفى داخله خليط من المشاعر مابين الفخر لوجوده في تلك القاعدة البحرية التي أنتجت أبطال ، والقلق الدائم الذي يشعر به مما يدفعه دائما لإنجاز ما يسند إليه من مهام ، بالإضافة لتفكيره في كيفية العثور على هذا الخائن ، ترى من يكون ؟ ولماذا يفعل ذلك ؟ كيف يرى أمامه زملاء له يقومون بالتضحية بأرواحهم من اجله ومن أجل مصر ويصر على أن يفشى أسرارهم ؟ .... " لا داعي للتفكير الآن فقد اقتربت من السكن ويجب أن أركز فقط فيما يدور حولي " كان هذا لسان حال محمد ، عندما وصل إلى باب السكن الذي اخترقه مسرعا من شدة حماسه للتعرف على زملائه فى القاعدة .

لم يجد محمد في السكن سوى ضابط واحد بادر بمصافحته قائلا " أهلا بيك يا قبطان ، نورت السكن ... أنا النقيب أحمد شاكر قائد لنش صواريخ ( كومر ) "
أجابه محمد " أهلا بيك يا قبطان ، السكن منور بأهله .. أنا النقيب محمد عبد المقصود زميلكم الجديد في السكن هنا "
مرت دقائق التعارف التالية سريعا ، فالعمل في المخابرات قام بتنمية مهارة محمد في التعرف على أى شخص والتأقلم عليه سريعا فهو شخص اجتماعي من الدرجة الأولي ، ومن طبيعة عملة أيضا قيامه بالفصل بين مشاعر الإنسان الطبيعي من خوف وقلق و فرح وبين قدرته على التركيز عند العمل فيتحول إلى آلة تسجل ما يحدث في مكان تواجده بمنتهى الدقة ولكنه هذه المرة لم يستطع فصل مشاعره طويلا حيث باغته أحمد بقوله " أنت عارف يا قبطان أنت هتسكن مكان مين ؟؟؟ ..... مكان الشهيد عوني عازر "
تبدلت ملامح محمد إلى الحزن فقد تذكر ما قاله قائد القاعدة عن النقيب عوني ، وتوجه بالسؤال لأحمد قائلا " على كده بقى أنت كنت عارفه كويس وعارف تفاصيل اللي حصل له لما خرج يشتبك مع إيلات "
أحمد " طبعا أعرفه ...... أنا و عوني كنا من إسكندرية زى بعض ، وزى ما أنت شايف في نفس السكن مع بعض ، تعرف يا قبطان .. عوني ده كان بطل وكان بيعشق مصر جدا ، وكان طول عمره بيتمنى الشهادة ، أول ما تشوفه تلاقيه يدخل قلبك على طول وتحس إنك عارفه من زمان ، بتشوف فيه جدعنة ابن البلد وشهامته وخفة دمه "
محمد " الله يرحمه .. طيب ممكن تحكيلى أكتر هو استشهد إزاى ؟ "
أحمد " إحنا كنا في القاعدة هنا يوم 11 يوليو ، وعلى الساعة 6 مساءا الرادار بتاعنا رصد هدف معادي دخل مياهنا الإقليمية ، الهدف ده عرفنا بعد كده انه كان المدمرة إيلات ، اللي فضلت موجودة على الشاطئ لحد بداية ليلة 12 يوليو وفضلنا منتظرين أوامر من القيادة بالاشتباك لكن مفيش أوامر وصلت إلا في الليل بتحرك لنش طوربيد بقيادة النقيب عوني عازر ولنش طوربيد تانى بقيادة النقيب ممدوح شمس ، خرجوا الاثنين للاشتباك مع مدمرة ولنشين كانوا موجودين معاها بيساعدوها وقدروا في الأول إنهم يغرقوا لنش الشهيد ممدوح شمس .. وقرر عوني إنه يكمل المواجهة رغم إنه كان يقدر ينسحب .. و أفراد الطاقم الموجود معاه بيستشهدوا فرد ورا التانى وهو بيتابع معانا في اللاسلكي هو والملازم رجائي حتاتة وبلغونا في النهاية إنهم قرروا إنهم يصطدموا بالمدمرة في عمليه انتحارية و بدأوا يزودوا السرعة في اتجاه المدمرة ... تخيل يا محمد مدافع ورشاشات المدمرة وطوربيد اللنشين كلهم متوجهين ناحية اللنش بتاع عوني وبيضربوه ومع ذلك حاول يكمل لكنهم قدروا يغرقوا اللنش بتاعه قبل الاصطدام ب 30 متر بس .... واستشهد يومها النقيب عوني " صمت فترة النقيب أحمد ليغالب دموعه ثم استكمل قائلا " مات يوم 12 يوليو قبل فرحه بــ 3 أيام "
سادت فترة من الصمت فقد كان الحزن يخيم عليهم حتى قال محمد " الله يرحمه ، نال الشهادة .. عقبالنا إحنا كمان "
أحمد " يارب .. كان زماني أنا دلوقتى اللي مكانه ... أنا طلبت من قائد القاعدة البحرية يومها إني أخرج باللنش بتاعى وأشتبك مع إيلات لكن القيادة رفضت ، قال إيه يا سيدي خايفين إنهم يخرجوا لنشات الصواريخ لأن مفيش لنش صواريخ قبل كده اشتبك مع مدمرة وقدر يغرقها "
محمد " معذورين برضه يا أحمد اللي حصل لنا مش سهل في الحرب ، و بقالنا يا دوب شهر ونص ..... مفيش جيش في العالم يحصل له اللي حصل لنا ده ويقدر يبنى نفسه في الفترة الضيقة دى ، دا غير إنهم عايزين يحافظوا على كل قطعه ممكنة ، و أنت طبعا عارف إننا في القوات البحرية أقل خساير في الجيش كله "
أحمد " آه طبعا ... لكن ربنا يستر علينا إحنا دلوقتى قدامهم طعم مكشوف وطيرانهم ممكن يستفرد بينا خصوصا إن إحنا تقريبا دلوقتى مفيش عندنا طيران "
محمد " هو ده الخوف كله .. ربنا يستر ... أنا هاقوم أستريح ساعتين قبل نوبة الصحيان لأني مرهق جدا "
رد أحمد قائلا " أنا فعلا محتاج أرتاح ساعتين اليوم كان متعب أوى النهاردة .. تصبح على خير قبطان "
وأستسلم أحمد للنوم بينما بقى محمد يفكر فيما سيفعله في الفترة القادمة ليمسك بمن عاون في قتل النقيب عوني .

جميل جدا إن حضرتك تعرض قصه تاريخية بالشكل المشوق ده
بأسلوب الحوار وكسر ملل أسلوب السرد .
متـــــــابـــــــــعه

اقتباس:

---

المشاركة الأصلية كتبت بواسطة Abeer Fathi

جميل جدا إن حضرتك تعرض قصه تاريخية بالشكل المشوق ده
بأسلوب الحوار وكسر ملل أسلوب السرد .
متـــــــابـــــــــعه

---

شكرا جزيلا يا دكتورة على كلام حضرتك الجميل ورأيك فى القصة حتى الآن وأتمنى أن القصة تنال إعجابك فى الأجزاء اللى جاية :hi: :hi:

الحلقة الثالثة من قصة ( الفرحة )

https://fbcdn-sphotos-a.akamaihd.net...03503405_n.jpg

مرت الساعات الباقية سريعا واستسلم محمد للنوم حتى استيقظ على نوبة الصحيان في تمام السادسة صباحا وبدأ يومه بالذهاب مباشرة نحو مكتب قائد القاعد العميد أحمد مصطفى ، وأدى له التحية العسكرية ثم أتبعها قائلا " صباح الخير يا فندم .. أنا جيت لحضرتك عشان نبدأ نشوف إيه اللي هنبدأ بتنفيذه الفترة اللي جاية "
رد العميد أحمد قائلا " صباح الخير يا محمد ... اتفضل اقعد... قولي بس طلباتك كده اللي أنت عايزها نوفرها ليك .. لكن قبل كل ده عايز أتأكد من حاجه منك "
محمد متسائلا : " خير يا فندم ؟؟ "
أحمد " انت طبعا من المفترض انك تشارك في التدريبات الطبيعية الموجودة هنا في القاعدة عشان محدش يحس بحاجه غريبة .. مش كده ؟ "
أجابه محمد باسما بعدما أدرك مايقصده العميد " أكيد يا فندم ... أنا قبل ما أتحول للمخابرات كنت ضابط في البحرية ويمكن إن ده كان السبب الرئيسي في اختياري أنا للمهمة دي ... أنا قررت انى أكون ضابط في الجيش عموما بعد ما تطوعت في لجان المقاومة الشعبية في العدوان الثلاثي في 56 لما كنت لسه في المرحلة الثانوية ... وقررت انى أكون ضابط في البحرية خصوصا بعد ما سمعت قصص وبطولات لضباط البحرية ولما أتأثرت خصوصا بقصة استشهاد الضابط البحري جول جمال لما قرأت أكتر عنه وإتاثرت بقصته ، لكن الوقت كان قصير جدا في البحرية لحد ما اتنقلت للمخابرات "
أحمد مبتسما " عال .. عال ، قولي بقى أنت محتاج إيه نساعدك بيه ؟ "
محمد بعد فترة من ترتيب الأفكار " أرجو إن حضرتك تمدني بالإشارات اللي تم رصدها و اللي كانت بتتوجه من الخاين ومواعيدها وحالة القاعدة في الأوقات دى ، و أرجو كمان يا فندم ملفات المجندين في القاعدة هنا ."
أحمد " مفيش مشكلة .. لكن همتك في انك تقدر توصل له بسرعه .. اتفضل انت خد جولة في القاعدة و أتعرف أكتر على الضباط زمايلك و إفطر و بعدين تعالى هتلاقى كل اللي طلبته ده جاهز إن شاء الله "
محمد مؤديا التحية العسكرية " شكرا جزيلا يا فندم .. هستأذن حضرتك أنا دلوقتى "
رد عليه أحمد التحية العسكرية وسمح له بالذهاب ليبدأ جولته فى القاعدة ، بدأها محمد بالسير على المرسى وأصابه بعض الضيق عندما رأى اللنشات وهى مغطاة بشباك الصيد وذلك ضمن خطة الخداع خوفا من قيام العدو برصدها فتكون لقمة سائغة لقواته الجوية التي أصبحت تسيطر على سماء مصر طولا وعرضا بعد تدمير القوات الجوية على الأرض فى حرب الأيام الستة بعد ضربة جوية مدمرة قامت بها القوات الجوية للعدو ودمرت طائراتنا على الارض فى خطة مطابقة لما قام به العدو في العدوان الثلاثي عند توجيه نفس الضربة ، وتذكر وقتها التصريح الذي قراه في أحد الصحف الأجنبية بعد الحرب مباشرة عندما سئل موشي ديان وزير الدفاع الإسرائيلي عن سبب استخدام نفس خطة العدوان في 56 وعدم خوفه من أن يتم إجهاض ضربة الطيران الإسرائيلية من قبل الجيش المصري فقال انه " كان مطمئنا لأنه يعلم أن العرب لا يقرئون ولا يتدبرون ما يحدث من حولهم " .
تنهد محمد في حزن عندما دار في خاطره هذا التفكير وحاول أن يبعد هذا التفكير عن رأسه حتى يستطيع التركيز فى المهمة بعيدا عن اليأس والحزن ، وعندما لمح النقيب أحمد شاكر جالسا مع بعض الضباط يتناولون وجبة الفطور وجدها فرصة للتعرف عليهم فتوجه إليه ليحيه ، وقابله النقيب أحمد مقابلة جيدة جدا و ألح عليه للجلوس لتناول طعام الإفطار معهم وقام بتقديمه إليهم كزميل جديد في القاعدة البحرية .

وفى نفس اللحظة التقطت أجهزة اللاسلكي فى القاعدة إشارة تقول " الحالة مازالت طارئة ، لا تقوموا بشيء الآن " ، ونقلت هذه الإشارة الغريبة كمثيلاتها إلى قائد القاعدة البحرية الذي ظل في انتظار محمد .

في نفس الوقت كان محمد في تجاذب أطراف الحديث مع الضباط الموجودين وكان الحديث ملئ باللوم على القيادة السياسية التي ألقت بالجيش في هذا الفخ حتى تم تدميره ولا تخلو من التساؤل .. من كان السبب فيما أنتهت إليه حرب الأيام الستة ؟ لكنها في نفس الوقت كانت تحمل في طياتها وطنية شديدة خالصة من جميع من شارك في هذا الحوار الذي أضطر محمد لتركه ليلحق بميعاده مع قائد القاعدة فأضطر للاستئذان متعللا بتعبه وأنه يريد الراحة ، وتوجه مباشرة نحو مكتب قائد القاعدة ، وعندما وصل وجده جالسا على مكتبه وأمامه بعض الأوراق التي ينظر إليها ويتأملها بتفكير عميق .

قدم محمد التحية العسكرية للقائد وإستئذنه للدخول فأذن له وطلب منه أن يحمل هذه الأوراق وقال له أنه قد أحضر له كل ما طلبه وانه سيسمح له بالجلوس في المكتب لدراستها وأشار إليه بأن أجهزة اللاسلكي قد التقطت إشارة جديدة ، فتناول محمد الأوراق و جلس على مكتب مجاور لمكتب العميد وبدأ في دراستها ، محاولا العثور على أى طرف لخيط قد يقوده للتعرف على الخائن والقبض عليه ، وعندما بدأ في دراسة الإشارات الغريبة الصادرة من الخائن وجد ضالته فقد لفت نظره شيء قد يكون بداية الطريق العثور على طرف الخيط ....

يتبع ,,,

تسجيل متابعة :)

متــــــــــــــابــــــــــعه بإنتظام

القصة حلوة اوى يا دكتور ومفيهاش ملل خالص لاعتمادها على الحوار بين الشخصيات عكس معظم القصص اللى بتبقى من النوع دة

القصص اللى بتبقى عن التاريخ والجاسوسية دى بتبقى شيقة جدا وبتبقى مليانة احداث وصدمات وحبكة فنية
متابعين باذن الله
عاوزين نعرف مين الجاسوس دة:fop7::290:
.....

اقتباس:

---

المشاركة الأصلية كتبت بواسطة Mouri Ran

تسجيل متابعة :)

---

شكرا جزيلا ليكى يا دكتورة على تسجيل المتابعة :)

تقبلى تحياتى :hi: :hi:
-----

اقتباس:

---

المشاركة الأصلية كتبت بواسطة Abeer Fathi

متــــــــــــــابــــــــــعه بإنتظام

---

شكرا جزيلا لحضرتك يا دكتورة على المتابعة :hi:
-----

اقتباس:

---

المشاركة الأصلية كتبت بواسطة د///*مطحونة*\\\

القصة حلوة اوى يا دكتور ومفيهاش ملل خالص لاعتمادها على الحوار بين الشخصيات عكس معظم القصص اللى بتبقى من النوع دة

القصص اللى بتبقى عن التاريخ والجاسوسية دى بتبقى شيقة جدا وبتبقى مليانة احداث وصدمات وحبكة فنية
متابعين باذن الله
عاوزين نعرف مين الجاسوس دة:fop7::290:
.....

---

شكرا ليكى يا دكتورة على الكلام الرائع ده على القصة وأتمنى ان باقى الأجزاء تعجبكم أكثر وسعيد جدا لأن ده رأى حضرتك فى القصة ان مفيش فيها ملل لأن ده أصلا الهدف من كتابتى ليها بأنى أسرد عملية حقيقية زى عملية إغراق المدمرة إيلات وإستشهاد أبطال زى عونى عازر ورجائى حتاتة .. ووجود نقيب بطل زى أحمد شاكر ... حبيت أنى أتكلم عن الناس دى فى إطار قصة بحيث إنى أوفيهم حقهم وعشان كده بدأت فى تأليف قصة الجاسوس وضابط المخابرات الخياليه بحيث أنهم يكونوا الخط الأساسى اللى عن طريقه بيتم سرد قصة إغراق إيلات:)

:hi: :hi:

الحلقة الرابعة من قصة الفرحة

https://fbcdn-sphotos-a.akamaihd.net...97050191_n.jpg

بدأ محمد في تفحص الإشارات بعين الخبير ، يبحث فيها عن شيء يقوده لطرف الخيط ، ما بين تتابعات وفواصل زمنية ثابتة ربما لم يلحظها من ألتقطها أو لم يستطع قائد الموقع أن يجدها ، وعن محتوى الإشارة و تغيره مع تغير حالة القاعدة وبعد قليل من الوقت وبعد أن ألقى نظرة فاحصة على كل ما سبق وجد أخيرا ضالته وارتسمت على وجهة ابتسامة خفيفة لاحظها العميد أحمد فباغته قائلا :
" خير يا محمد .. شكلك بيقول إنك لقيت حاجة ؟ "
رد محمد بنبرة تعتليها الفرحة " مظبوط يا فندم لقيت طرف الخيط اللي هيوصلنى ليه ."
أحمد " طيب ما تقولي كده وصلت لإيه وفرحني معاك "
انتقل محمد إلى مكتب العميد حاملا بعض الأوراق و صفها أمامه بجوار بعضها البعض وبدأ يشير إلى خانة الوقت في كل إشارة قائلا له " لو حضرتك تلاحظ معايا كده يا فندم هتلاقي كل إشارة بتتبعت بفاصل زمني ثابت عن الإشارة اللي قبلها وهو 12 يوم تقريبا وموعد كل إشارة بيكون إما الساعة التاسعة أو العاشرة صباحا بالتبادل بين كل مرة والثانية وبكده إحنا نقدر دلوقتى نتوقع الإشارة الجاية هتكون إمتى .. وكل اللي علينا إننا فقط نحصر قايمة بالمشكوك فيهم وهيكون سهل علينا جدا وقتها إننا نمسكه متلبس وقتها "
أحمد بنبرة إعجاب " رائع جدا يا محمد .... ممتاز " ثم أضاف مازحا " أنا عرفت دلوقتى أنت ماكملتش في البحرية وقت طويل ليه ونقلوك على طول على المخابرات "
أجابه محمد ضاحكا " الحمد لله يا فندم وأنا باستمتع بشغلي في المخابرات جدا ...... على فكرة يا فندم أنا لقيت حاجه ثانية كمان لفتت نظري " سادت لحظات من الصمت بينما كان محمد يعدل من ترتيب بعض الأوراق التي يعرضها على العميد أحمد حتى وصل إلى الأوراق التي تحتوى على نص الإشارات وبجوارها حالة القاعدة من حيث درجة حالة الطوارئ وقتها أمام القائد قائلا " لو هتلاحظ يا فندم إن مضمون كل إشارة بيشير بصورة أو بأخرى إلى حالة درجة الطوارئ والإستعداد فى القاعدة في الوقت ده ولو قارننا الكلام ده بالأوقات اللي تم تسجيل فيه اختراقات لمياهنا الإقليمية من قبل المدمرة إيلات نلاقى إن المدمرة بتخترق بعد الإشارة اللي بتشير بتدني درجة الطوارئ ولما تكون في أقل مستوى بعد أقل من 24 ساعة من وقت إرسال الإشارة وبتكون المدمرة موجودة في مياهنا الإقليمية طبعا لعمل شو إعلامي وكجزء من الحرب النفسية إن العدو ينشر إن مدمرة تابعة ليه بتتجول في مياهنا الإقليمية من غير أى رد مننا ولأن قطعهم البحرية بيكون فيه غطاء جوى يقدروا يستدعوه في الحال عشان يحميها وإحنا لأ فبيكونوا مطمئنين وهما بيتخذوا الخطوة دى "
أحمد " ممتاز جدا يا محمد تحليل رائع .. عايزين همتك يا بطل في انك تحصر الأشخاص اللي يبقى مشكوك فيهم عشان نقدر نتخلص من الخاين ده "
محمد " إن شاء الله يتم ده في أسرع وقت حضرتك ، وكان ليا رجاء أتعشم إن سعادتك توافق عليه "
أحمد متسائلا " خير يا محمد ؟"
محمد " أنا عشان أقدر أدرس حالات المجندين و واحدد مين اللي يبقى في قائمة المشتبه فيهم لازم أكون متفرغ للموضوع ده عشان أقدر أدرسه وده ممكن ياخد منى مدة توصل لأسبوع بحث متواصل وطبعا لو حصل ده هنا في القاعدة هيبقى غياب أى فرد في المعسكر خصوصا ضابط منقول جديد لمدة أسبوع عن الأنظار مصدر شك للجاسوس وأكيد هيخلى عنده حذر أكتر .... والخوف كمان إن الورق ده حد يعرف انه موجود معايا فأنا كان عندي اقتراح إني أدعى المرض وحضرتك تصدق على قرار بنقلي للمستشفى وهناك ننسق مع أحد الأطباء عشان يكتب تقرير طبي يوصى بوجودي هناك مدة أسبوع على الأقل وهناك هأقدر أدقق زى ما أنا عايز وكمان أقدر أتصل بزمايلى في القاهرة عشان يمدوني بأي معلومات أحتاجها .. إيه رأى حضرتك يا فندم ؟ "
أحمد " فكرة ممتازة .. شد حيلك أنت بس واعمل تعبان وأنا هاقوم بالباقي "
محمد مازحا " تحت أمرك يا فندم .. أستأذن أنا عشان احتمال أتعب كمان ربع ساعة وأتنقل المستشفى "
أجابه العميد أحمد ضاحكا " أتفضل يا محمد "
وبالفعل بعد مرور ربع ساعة تظاهر أحمد بالمرض واتجه النقيب أحمد شاكر إلى طبيب الوحدة الذي قرر بأوامر من القائد نقل محمد إلى المستشفى للفحص والعلاج ، وتم تنفيذ هذا الأمر فورا .

يتبع ,,,,

الحلقة الخامسة

https://fbcdn-sphotos-a.akamaihd.net...21003039_n.jpg

بدأ تنفيذ الخطة التي عرضها محمد على القائد حينما تظاهر محمد بالمرض في وجود زميله النقيب أحمد شاكر الذي هرع إلى طبيب الوحدة والذي بدوره أمر بنقله بعد أمر قائد القاعدة ، وتم نقله في سيارة إسعاف إلى المستشفى وفى الليل زاره قائد القاعدة البحرية وفى حوزته الأوراق التي يجب على محمد أن يقوم بدراستها.

لم يضع محمد وقتا وبدأ في دراسة الأوراق والملفات مباشرة ، هو يعلم ما الذي يبحث عنه بالتحديد ، مجند له ظروف دفعته لأن يصبح جاسوسا ولأن يوافق بملء إرادته على الانضمام للطابور الخامس ليطعن كل من يعملون معه في ظهورهم ، لابد من طرف للخيط فهو إما حاقد على نظام حكم البلد ، أو محب للمال بشراهة أو لأسباب أخرى كانت جميعها تدور في رأسه عند بحثه لأحوال المجندين وملفاتهم .

وبعد مرور يومين من التدقيق والفحص بدأ يتسلل الإرهاق واليأس إليه شيئا فشيئا فجميع من قام بفحصهم حتى الآن لا توجد في ملفاتهم ما يثير الشكوك ، فجميع من قام بفحصه حتى الآن كانوا الضباط وكان كثير منهم من شارك في عمليات من قبل ضد العدو أى كانوا على وشك التضحية بأرواحهم في سبيل مصر ، و قد قابلهم أيضا من قبل وتناول معهم طعام الإفطار وعلى الرغم مما ظهر في حديثهم من الحنق والغيظ ممن كان سببا في توريط القوات المسلحة في هذه الورطة إلا أن هذا الكلام كان يخفى في طياته الوطنية في أبهى صورها فما كان الدافع لديهم لقول هذا الكلام لولا وطنيتهم الشديدة وغيرتهم على بلادهم وبينما هو على هذه الحالة إذ سمع صوت طرق على الباب فأخفى الورق سريعا ثم أذن للطارق بالدخول وتفاجئ عندما وجده السيد محمود عادل قائده المباشر في جهاز المخابرات والمشرف على هذه العملية ، فأعتدل محمد واقفا ليصافحه قائلا له : " أهلا بك يا سيد محمود نورت بورسعيد "
رد عليه السيد محمود ضاحكا "أهلا بك أنت يا محمد ، أنت ناسي انى أصلى من بورسعيد وانتقلت بسبب الشغل للقاهرة ولا إيه ؟ "
محمد " آه صحيح يافندم معلش أعذرني ."
محمود " لا يا محمد ولا يهمك أنا عارف إن دماغك مشغولة جدا بالمهمة ، و أنا جاى لك النهارده أكلمك في موضوعين الموضوع الأول عن المهمة اللى أنت فيها هنا .... ها يا بطل قولي وصلت فيها لإيه ؟ "
محمد " أنا لقيت تتابع زمني لإرسال الإشارات و لقيت إن على حسب مضمون الإشارة المدمرة بتحدد الظروف تسمح باختراق مياهنا ولا لأ ، و بدأت أراجع دلوقتى ملفات الأفراد في القاعدة عشان أقدر أحصر قايمة بالمشتبه فيهم ، وملفات الضباط اللى راجعتها لحد دلوقتى مفيش فيها أى حاجة لفتت نظري تخليني أشك في حد منهم وكنت أتكلمت معاهم قبل كده مالقتش حاجه غريب تخليني اشك في حد منهم و كنت بدأت أراجع ملفات المجندين دلوقتى "
محمود " تمام يا محمد ... أنت طبعا عارف أن في الشغل مش بنستبعد حد في بداية مرحلة البحث وحصر المشتبه فيهم "
محمد " أكيد يا فندم "
محمود " تمام يا محمد تمام ... وأخبار قائد القاعدة البحرية العميد أحمد إيه معاك ؟ "
محمد " الصراحة العميد محمد مش بيبخل عليا بأي معلومات أو أى مساعدة أطلبها منه "
محمود " العميد محمد راجل وطني ومخلص من الدرجة الأولى ، وتفاعله معاك شيء طبيعي على قائد عرف إن وسط فريقه وجنوده واحد خائن " أعتدل محمود في جلسته ثم أستكمل كلامه قائلا " أصعب حاجه على القائد إنه يعرف إن فيه واحد خائن في وسط جنوده اللى يستأمنوا بعض على حياتهم وإن الخاين ده بيسلم زمايله للموت بإيديه "
محمد مصدقا على كلامه " أكيد يافندم بيبقى شعور صعب جدا "
محمود " أكيد يا محمد ، أنا هاراجع معاك شوية ملفات من اللى باقين و هاساعدك شوية وأنا قاعد معاك دلوقتى لكن قبل ما نبدأ نراجعهم عايز أكلمك في الموضوع التانى اللى أنا جايلك بخصوصه "
محمد " خير يا فندم .. موضوع إيه ؟"
محمود " الموضوع ده بخصوص إلهام يا محمد ."
محمد " إلهام ؟؟!! "

يتبع ,,,,,,,

تسجيل متــــــابعة ،،،

:fop (29):

اقتباس:

---

المشاركة الأصلية كتبت بواسطة M.Hegazy

تسجيل متــــــابعة ،،،

:fop (29):

---

تسلم على المتابعة يا دوك حجازى وأتمنى ان الحلقات الجاية تعجبك :hi:

الحلقة السادسة

https://fbcdn-sphotos-h-a.akamaihd.n...06238103_n.jpg

بدأ محمد في التفكير فيما يريد محمود أن يتكلم فيه ، وبدأ يسترجع شريط الذكريات مع الهام وكيف انتهى اللقاء الأخير بينهم نهاية لم تكن بالنهاية الجيدة على الإطلاق قبل سفره ، وبينما هو سارح في خياله إذا بمحمود يقطع عليه حبل أفكاره قائلا له " آه يا محمد .. أنا عايز أكلمك عن اللى حصل بينك وبين إلهام في آخر مرة "
محمد " والله أنا ما زعلتها في حاجه ، حضرتك عارف إن ظروف الشغل دى مش بأيدينا "
محمود " أيوه يا محمد أنا عارف وأنا مش بكلمك دلوقتى بصفتي والد إلهام ، لأ أنا باكلمك بصفتي والدك أنت ... ربنا يعلم انى من ساعة ما شوفتك في الجهاز أول ما جيت واشتغلنا مع بعض وأنا حبيتك زى إبنى اللى ربنا ماكتبش ليا وجوده ، وزاد حبي ليك أكتر مع تفانيك في عملك ومواقفك اللى شوفتها منك بعد كده وأثبتت لي إنك راجل على حق ، ولما أنت أتقدمت لي تطلب أيد إلهام بنتي وافقت فورا وبدون تردد عشان كنت عارف انك راجل و هتحافظ عليها "
محمد " وأنا والله شايلها جوا عينيا و بحاول أكون معاها على طول بس برضه زى ما قولت لحضرتك ظروف الشغل بس"
محمود " عارف ظروف الشغل يا محمد كلنا عدت علينا الأيام دى وكان فيه مشاكل بينا وبين زوجاتنا عشان الشغل ، يمكن أنت مشكلتك أكبر شوية لان مشاكل غيابك عن إلهام بتحصل في فترة الخطوبة لسه .. في أيام خطوبتي مكنتش لسه أتنقلت المخابرات لأنه مكانش فيه على أيامي مخابرات وكنت في الجيش فغيابي كان محدد بوقت أنما المخابرات شغلها من غير وقت محدد "
محمد " تمام يا فندم وأنا بحاول أكون ناجح في عملي وأفيد بلدي لكن للأسف ساعات ده بييجى على حساب حياتي الشخصية "
محمود " بص يا محمد يا إبنى .. أوعى تكون فاكر أن الراجل الناجح هو اللى بيكون ناجح في حياته العملية وبس ومقصر في حاجات تانية بما فيها حياته الشخصية ، لو كنت فاكر كده تبقى غلطان .
الراجل الناجح يا محمد اللى يبقى ناجح في بيته وتكون كل الظروف في حياته الشخصية بتخليه مهيأ أنه يقدم أحسن ما عنده في الشغل ، يعنى لازم يكون بيعرف يوازن بين حياته الشخصية والعملية ، وممكن كمان تكون الأولوية لحياته الشخصية انه يحافظ عليها مستقرة عشان ما تكونش ضغط إضافي عليه وهو بيمارس شغله "
محمد " وأنا والله بحاول أوازن الكفة بين حياتي العملية وحياتي الشخصية مع إلهام ، لكن هيا بتتضايق من غيابي وأنا بصراحة شايف أنها معاها حق .. كل البنات في سنها بيخرجوا مع أزواجهم وبيلاقوهم وقت ما يحتاجوهم إنما هيا مش بتلاقينى لأني بابقى في مهمة ... أقرب حاجه مثلا إن فرحنا كان المفروض يكون الخميس في الأسبوع الجاي وأتأجل لما أتكلفت بالمهمة دى "
محمود " أنا عارف انك بتحاول توازن لكن الحياة مش دايما وردى ، و بتبقى محتاجه صبر لحد ما نعدى لبر الآمان ، أنت ضابط بتحب شغلتك مش لأنك مجبر عليها و بتخدم وطنك فلازم صبر شوية ، ومن ناحية إلهام مطلوب منها تصبر هي كمان ، أنا قولت لها نفس الكلام اللى أنا قولته ليك دلوقتى لما حكت لي اللى حصل بينكم ، وعرفتها إن الست لازم تقف ورا زوجها وتساعده وإن المفروض تكون دافع ليه عشان ينجح مش تقلل من عزيمته وتخليه مش طايق الشغل بسبب المشاكل اللى هو فيها .. والحمد لله اقتنعت بكلامي "
سأله محمد بلهفة " بجد يا فندم ؟!! "
محمود " أيوه بجد يا محمد ، حتى لو كلمتها دلوقتى هتلاقيها أهدى من المرة اللى فاتت ، أقولك .. روح كلمها في التليفون اللى في أوضة الطبيب اللى إحنا اتفقنا معاه انه يخليك هنا .. هتلاقيها جنبنا هنا على طول "
محمد والسعادة بادية على وجهة " ألف شكر لحضرتك .. أنا مش عارف بجد أقول لحضرتك إيه "
محمود " يابنى قوم بسرعة قبل ما ارجع في كلامي "
محمد " لا يا فندم حالا هاقوم أتكلم أهه "
محمود " ماشى بس قبل ما تقوم وريني أنت واقف فين في الملفات عشان أراجع شوية على ما تيجى .. وما تتأخرش في المكالمة "
محمد " حاضر يا فندم .. أتفضل الورق أهه أنا واقف عند المجند ده ولسه اللى بعده "
محمود " ماشى يا محمد .. أتفضل أنت روح أتكلم في التليفون "
شكره محمد كثيرا على منحه هذه الفرصة وتوجه لغرفة الطبيب ليتصل بخطيبته إلهام ، وكم كان سعيدا عندما تأكد من كلام السيد محمود وانه فعلا قد أقنعها بالصبر والتحمل ، ومرت دقائق من الاعتذارات على الطرفين مابين اعتذار محمد على انشغاله الدائم وظروف عمله ، واعتذار إلهام على تهورها و طلبها منه الانفصال ، ثم أخذ محمد يقسم لها ويعدها بأنه سيعوضها عن الفترة الماضية وأنه بمجرد عودته من بورسعيد سيتم تحديد موعد الفرح .
في هذه الأثناء قد توصل محمود إلى بعض الأشياء التي لفتت نظره وجعلته يبدأ في إضافة اسم أحد المجندين لقائمة المشتبه بهم وما أن عاد محمد بعد أن أنهى مكالمته حتى قال له " أتفضل يا محمد ده أول اسم المفروض تشك فيه وتبدأ تتأكد منه "

يتبع ,,,,

متاااااااااااااااااااااااابعه

اقتباس:

---

المشاركة الأصلية كتبت بواسطة Abeer Fathi

متاااااااااااااااااااااااابعه

---

شكرا يا دكتورة على المتابعة :hi: :hi: :hi: :hi:

الحلقة السابعة

https://fbcdn-sphotos-e-a.akamaihd.n...90100818_n.jpg

نظر محمد إلى ملف المجند الذي قدمه له محمود فلم يلفت نظره أى شيء مريب فقال له : " بس أنا مش لاقى في الملف أى حاجه تخليني أشك فيه يا فندم "
رد محمود " السبب اللى خلاني أشك فيه هو أسمه .. أحمد فؤاد شركس "
محمد " وإيه السبب في كده يا فندم "
محمود " الشاب ده والده كان من الإقطاعيين الكبار ، أنا فاكر كويس لما كنت في لجنة الحصر إننا حصرنا ممتلكات فؤاد شركس ده وان جزء كبير من ممتلكاته فقده بعد كده "
محمد " قصد سيادتك إن حزنه بسبب اللي حصل لوالده هو ده الدافع اللى خلاه يخون بلده "
محمود " بالضبط .. هو ده اللى أنا أقصده ، هو شايف إن دى ممتلكاتهم هما و إنهم أحق بالأراضي اللى أتوزعت على الفلاحين الغلابة ، مايعرفش أن جده أوجد جده حصلوا على الأراضي دى أصلا كهبة من محمد على وأولاده ، تصور أرض مصر كانوا واخدينها هدية ، والفلاحين الغلابة المصريين يزرعوها ليهم و يتعبوا فيها وفى الآخر يرموا لهم حاجه بسيطة ماتحسبش حاجه جنب مجهودهم "
محمد " الحمد لله يافندم اللى رجع أرضنا وخيرها لينا أحنا ، وإحنا بإذن الله هنحافظ عليها من أى عدو من الداخل أو من الخارج "
محمود " إن شاء الله يا محمد ربنا يقدرنا .. شوف بقى يا بطل أنت تكمل الأسبوع بتاعك هنا عادى وبعدين تطلع على القاعدة البحرية وتسلم نفسك وتوصل للقائد اللى وصلنا له ، صحيح أنت متوقع المعاد الجاى للإشارة إمتى ؟ "
محمد " المفروض معادها يكون يوم 4 سبتمبر يا فندم الساعة 10 صباحا طبقا للتتابع الزمني اللي بيرسلها بيه "
محمود " كويس جدا يعنى كمان 5 أيام .. أنت توصل للقائد الكلام ده وتطلب منه يبقى فيه تدريبات يومها في الوقت ده ويكون مشارك معاك أنت في التدريبات أحمد فؤاد ده ولو مكانش فيه يومها إشارة اعتقد هيبقى سهل عليك إنك تمسكه متلبس بعد كده مظبوط ؟"
محمد " مظبوط يافندم .. كن واثق إني هاعمل كل اللى أقدر عليه عشان تنجح العملية دى ."
محمود " أنا متأكد من كده يا محمد ، أنا برضه عشان أساعدك هاخد أسامي المجندين دول ونتحرى عنهم إحتياطى "
محمد " ماشى يا فندم ، والمعلومات هتوصل لي على مكتب القائد ؟ "
محمود " مظبوط يا محمد ، ، هستأذنك أنا بقى عشان ألحق أرجع القاهرة "
محمد "ماشى يا فندم توصل بالسلامة " ثم أستكمل مازحا " أرجو أنك توصل سلامي لإلهام "
رد محمود ضاحكا " لا إله إلا الله .. مش أنت كنت لسه مكلمها في التليفون ؟؟ ... حاضر يا سيدي هأوصله عشان تشوف شغلك ومايكونش عندك أى حجة "
محمد "ربنا يخليك لينا يارب يا سيد محمود "
ثم تصافحا وودع كل منهم الآخر ثم مضى محمود إلى القاهرة ، بينما بقى محمد في المستشفى يدرس ملف المجند أحمد فؤاد لمدة يومين حتى انقضت فترة جلوسه في المستشفى فذهب مباشرة للقاعدة البحرية و أبلغ قائد القاعدة بكلام السيد محمود ، وبالفعل تم إبلاغ بعض الجنود بالاستعداد لتدريبات تقام في اليوم التالي وكان من ضمنهم المجند أحمد فؤاد .

ظل محمد طول الليل يفكر هل ستنتهي هذه المهمة في الغد ؟؟ وهل يكون الغضب من قرار للقيادة السياسية للدولة دافعا كافيا للخيانة ؟؟ ترى كيف يشعر الخائن حين يسلم زملائه للموت ؟؟ هل ينسيه المقابل الذي يحصل عليه سواء كان مادي أو معنوي منظر الدم عندما يسيل من زملائه ؟؟ أو منظر زوجاتهم اللواتي لا يعلمن كيف ستعيش كل منهم من بعد وفاة زوجها ؟ هل تنسيه الأموال التي يتحصل عليها الألم الذي يراه في عين طفل كتب عليه أن يحرم من أب يوجهه ويرشده في حياته ؟ يا الله كيف ينام هذا الخائن ليلة واحدة وهو يعلم أن هناك أما تنتظر ابنها ليعود وينام في مكانه في البيت ولكنها تنتظر طويلا بلا فائدة ؟ رجل كهذا أقل حكم عادل قد يصدر ضده هو الموت لأنه حكم على الكثيرين غيره من قبل بالموت .

ظل محمد يفكر طويلا حتى أستسلم للنوم ثم استيقظ على " نوبة الصحيان " في السادسة صباحا ، وبدأ يستعد هو والآخرين للاشتراك في هذه التدريبات على اللنشات ، وطوال التدريبات لم يغب المجند المشتبه به أحمد شركس عن نظره حتى انتهى القسم الأول من التدريب في الساعة الواحدة ظهرا وعاد لمكتب القائد سريعا ليتأكد بأنه لم يتم إرسال الإشارة في معادها ، لكنه فوجئ بالقائد يخبره أن الإشارة قد تم إرسالها في موعدها كالعادة .

صدم محمد لما سمعه من القائد ، فقد كان يراقب المشتبه به جيدا طول اليوم حتى أنه تعمد أن يتواجد معه في نفس المكان في الساعة العاشرة موعد إرسال الرسالة ، إذا فالجاسوس شخص آخر لم يشترك في التدريب ، من يا ترى يكون هذا الجاسوس ؟

يتبع ,,,,

متاااااابعة

اقتباس:

---

المشاركة الأصلية كتبت بواسطة Mouri Ran

متاااااابعة

---

شكرا جزيلا لحضرتك يا دكتورة على المتابعة :hi: :hi: :hi: :hi:

تصحيح بسيط وقع سهوا .. التاريخ فى الجزء السابع لموعد الإشارة القادم هو 14 سبتمبر

معذرة التصحيح ضرورى وإن كانت القصة خيالية فإنها ترتبط بأحداث حقيقية وقعت وانتهت بإغراق ايلات

-----

الحلقة الثامنة من الفرحة
https://fbcdn-sphotos-c-a.akamaihd.n...69287770_n.jpg

كانت صدمة محمد كبيرة عندما عاد إلى مكتب القائد على أمل أن يخبره بأن الإشارة لم ترسل وبالتالى يكون قد تاكد من أن المشتبه به هو فعلا الجاسوس ، لكنه وجد أن الأشارة قد أرسلت فى نفس الوقت مما يعنى أن الجاسوس فرد آخر غير المشتبه به لكن دائرة البحث قد ضاقت بعض الشيئ فلم يعد أمامه سوى عدد محدود من الأفراد قد بستثنى منهم قائد الموقع وأفراد اللاسلكى والإشارة الذين يقومون بالتلبيغ عن الإشارات لا يتبقى سوى خمس أفراد و هم الأفراد الذين لم يشتركوا فى التدريب .
كانت الساعة أصبحت الثانية وهو المعاد الذى اتفق عليه محمد وقائده محمود من قبل للإتصال من مكتب القائد ، وبالفعل رن جرس الهاتف فى هذا الوقت فى مكتب القائد وأجاب القائد بنفسه على الهاتف ، وإستنتج محمود من كلام القائد أن المتحدث على الطرف الآخر هو السيد محمود .

بعد أن تحدث قائد الموقع مع السيد محمود اعطى سماعة الهاتف لمحمد ليبلغ السيد محمود بآخر التطورات وكان الحوار بينهما كالتالى :
محمد " للأسف يا سيد محمود اللى احنا كنا شاكين فيه طلع برئ والإشارة اتبعتت فى نفس الوقت اللى أنا كنت معاه فيه "
محمود " ولا يهمك يا محمد أنا توقعت كده لما شوفت باقى الملفات بس حبيت الخطة تمشى زى ماهيا عشان نتأكد لأنى لقيت ملف مجند خلانى أشك فيه ولما جبنا معلومات أكتر عنه ، حسيت ان ممكن يكون هو الجاسوس "
محمد " مين ده يا فندم "
محمود " فيه عندكم مجند بيسوق العربيات فى المعسكر اسمه محسن يونس "
محمد " أيوة ياسيد محمود ، السواق اللى أنا كنت ركبت معاه بعد مانزلت من المواصلات ووصلنى للقاعده اسمه محسن ، ماله يا فندم محسن ده "
محمود " أنت مالحظتش فيه حاجه غريبة خالص ؟"
محمد " لا عادى جدا يا فندم مالحظتش حاجه ، احنا مااتكلمناش غير شوية قليلين شوية موضوعات على الماشى كده هو بس أنا حسيت إنه فاهم كل حاجه بيتكلم فيها كويس "
محمود " طبعا لازم يكون فاهم ، محمد ده شاب مصرى من مواليد محافظة المنوفية ، اتخرج من كلية الآداب جامعة القاهرة ولأنه كان من المتميزين فى الكلية تم إرساله فى بعثه لفرنسا ، لمدة 4 سنين فات منهم سنتين دلوقتى "
محمد " ازاى يافندم وهو موجود معانا هنا دلوقتى ، يعنى المفروض يكون فى فرنسا "
محمود " ماهو ده اللى خلانى أشك ، محمد قعد فى فرنسا سنة ورجع ، ولما حاولت اعرف معلومات أكتر لقيت اهله لسه فاكرينه فى فرنسا لأنه لما رجع عمل تغيير لمحل الإقامة لمكان محدش يعرفه فيه ، وقدم لنا الورق بتاعه فى التطوع على إنه معاه ثانوية عامه بس وإتطوع فى الجيش وقال انه بيعرف يسوق كويس ودلوقتى هو سواق عندكم فى القاعدة "
محمد " غريبة يا فندم واحد زى ده معاه مؤهل عالي ، إيه اللى يخليه يعمل كل ده "
محمود " هى دى مهمتك بقى يا محمد ، إنك تتأكد أولا إن محسن ده هو الجاسوس اللى بيبيع زملائه ، وتعرف بعد كده هو بيعمل كده ليه لما تمسكه متلبس وهو بيرسل الإشارة دى "
محمد " تمام يا سيد محمود ، ربنا يوفقنا إن شاء الله "
أنهى محمد مكالمته مع السيد محمود ثم أخبر قائد الموقع بما سمعه للتو ، وكانت دهشة قائد الموقع كبيرة جدا عندما سمع هذا الكلام ، فقد كان يثق في المشتبه به الجديد لتفانيه فى عمله ولأنه لم يكن يتأخر أبدا عند طلب أى شيء منه وكان يقوم بما يطلب منه على أكمل وجه .

يتبع ,,,

الحلقة التاسعة من الفرحة

https://fbcdn-sphotos-c-a.akamaihd.n...84775989_n.jpg

سادت لحظات من الصمت فى مكتب القائد أحمد ، كل من محمد والقائد سرح بخياله وتفكيره فيما وصل إليهم حديثا من معلومات لكن كل منهم كان يفكر فى شيئ مختلف ، فمحمد كان يفكر في خطه للإيقاع بالجاسوس وكيفية القبض عليه متلبسا ، ومن ناحية أخرى كان تفكير القائد في جنوده الذين استشهدوا بسبب هذا الشاب المنضم حديثا إلى القاعدة .

قال محمد بعد فترة من التفكير : " دلوقتى كل حاجه بدأت تبقى واضحة يا فندم ، كده احنا عرفنا الجاسوس ، وبقى واضح إزاى كان الجهاز اللى بيبعت منه الإشارات بيدخل وبيخرج من القاعدة من غير مانكشفه ... أكيد كان بيخبيه فى العربية"
أحمد مؤكدا على كلامه :" وبقى واضح كمان سبب ارسال الإشارات الساعه 9 أو 10 صباحا ، لأن ده الوقت اللى بيبدأ يحهز فيه محسن عشان يخرج يقضى طلبات الضباط والمعسكر "

محمد " طيب يا فندم ممكن حضرتك تستدعيه للمكتب هنا وتوبخه على أى سبب مثلا إهماله لما يتطلب منه حاجه ، أو تاخيره فى أى مشوار بيروحه ، وأنا فى نفس الوقت هأفتش مكان سكنه والعربية اللى بيسوقها وأحاول ألاقى جهاز الإرسال بتاعه "
أحمد " ماشى أنا هاطلبه حالا ، عايز الموضوع ده يتم فى خلال ربع ساعه بالكتير "
محمد " تمام يا فندم .. أنا هأستنى قدام المكتب بره وأول مألاقيه جاى هاروح وأبدأ التفتيش "
أحمد " ماشى يا محمد "
وبالفعل بدأ تنفيذ هذا الكلام وفى خلال خمس دقائق كان محمد واقفا أمام مكتب العميد يشاهد محسن وهو فى طريقه للمكتب فذهب مباشرة إلى سكن محسن وبدأ بتفتيشه إلا أنه لم يعثر على شيء ، ثم تسلل ناحية السيارة وبدأ في التطلع إليها ثم إنحنى لينظر إليها من الأسفل ودقق مرة والثانية لكنه لم يجد شيئا مرة أخرى وبدأ يتملكه اليأس لكنه حاول أن يقاومه بأن بدأ بالمحاولة للمرة الثالثة فى التدقيق بالسيارة وبينما هو على هذا الحال لفت نظره نتوء بارز كالزر فى أسفل السيارة خلف العجلات .
ضغط محمد على هذا الزر فوجده كان يخفى مايشبه الدرج ولكنه صغير جدا فى حجم اليد مثبت بمسامير فى هيكل السيارة ، عندما فتحه وجد ضالته أخيرا عندما وجد جهاز الاستقبال الذى لا يزيد فى حجمه عن حجم كف اليد ، أخذ محمد يتطلع هذا الجهاز في دهشة و تعجب .

فى ذلك الوقت بدأ محمد يسمع أصوات أقدام تقترب من السيارة ونظر لساعته فوجد نفسه قد تعدى الوقت الذى قد حدده مع القائد من قبل ، فأعاد الجهاز فى سرعة خاطفة إلى مكانه وأعاد كل شيئ إلى ماكان عليه ثم بدأ يتحرك مبتعدا عن السيارة ، حتى وصل إلى مكتب القائد وأبلغه بانه تأكد أن محسن هو الجاسوس وأنه عثر على جهاز الإستقبال .
أراد القائد حينها أن يذهب للقبض عليه لكن محمد إستطاع بصعوبة أن يقنعه بالانتظار حتى يتم الأمساك به متلبسا وهو يرسل الإشارة ، ماعلينا فقط سوى أن نراقبه وننتظر حتى تمر الفترة التى تفصل بين كل إشارة والتى تليها .

إقتنع القائد بفكرة محمد وبدأوا سويا فى الإعداد لخطة مراقبة الجاسوس والتى كان يتولاها محمد و أرسل محمد إشارة إلى القاهرة لطلب إرسال قوة مكونة من 5 أفراد من الشرطة العسكرية يوم 9 أكتوبر للقاعدة للمساعدة في القبض على الجاسوس ، وعلى الفور وافق قادته على إرسالهم له يوم إرسال الإشارة على أن يكونوا تحت قيادته .

مرت الأيام بطيئة جدا على محمد الذي كان ينتظر يوم التاسع من أكتوبر بفارغ الصبر حيث سيلقى القبض على صنف من البشر لطالما كان يكرهه ، وكان يحب العمل فى المخابرات لأنه بذلك يساعد في الكشف عنه والقبض عليه ، كان ينتظر ذلك اليوم بفارغ الصبر لكي يطهر القاعدة البحرية من هذا الخائن .

يتبع ,,,

الحلقة العاشرة من الفرحة ( قبل الأخيرة )

https://fbcdn-sphotos-a-a.akamaihd.n...27613055_n.jpg

مرت الأيام حتى جاء يوم التاسع من أكتوبر ، كانت درجة حالة الطوارئ قد إرتفعت فى القاعدة بناء على أوامر قائد القاعدة ، وكل الضباط والجنود يشتركون في تدريباتهم على القطع البحرية ، وكان محمد يتدرب معهم حتى لايلاحظ محسن أى شيء مريب فيمتنع عن إرسال الرسالة لكنه توقف عن التدريب فى الساعة الثامنة والنصف ليلبى استدعاء قائد القاعدة .
كان نداء قائد القاعدة تمويها ليكون مبرر لغياب محمد عن التدريب والذي ذهب لمراقبة محسن ومن خلفه بمسافه كان يوجد أفراد الشرطة العسكرية الذين أخذوا يلحقون به حتى ذهبوا جميعهم وراء محسن دون أن يلحظ وجودهم من خلفه ، ثم حاول كل منهم الإختباء خلف أى ساتر حتى لايراهم محسن .

إقترب محسن من السيارة ثم نظر حوله ليرى إن كان هناك أحد يراه فلم يجد أحد ، ثم انحنى ليخرج جهاز الإستقبال ويرسل الإشارة المعتادة .
أخذ محمد يراقبه من المكان الذي يختبئ فيه ، وما أن لاحظ أن محسن قد قام بإرسال الرسالة حتى أعطى الأمر للقوة المصاحبة له بالهجوم والقبض على محسن .
حاول محسن الهرب منهم لكنه لم يستطع ووقع فى أيديهم فى النهاية وفى يده جهاز الإرسال ، تم إقتياده بعد ذلك نحو مكتب القائد ليتم التحقيق معه بواسطة القائد ومحمد .
لم يستطع القائد فى البداية ان يخفى مشاعر الغضب التى كانت بادية عليه ، كان من داخله يود لو تركوا هذا الخائن له ليقتص منه وليعيد حق أبنائه الضباط عونى ورجائى الذى كان استشهادهم نتيجة إشارة من هذا الجاسوس .
حاول محمد أن يهدئ الأمور بعض الشيء وبدأ فى إستجواب محسن متسائلا " أنا عايز أفهم حاجه واحده بس واحد زيك ، خريج كلية ومعاه شهادة ، والبلد اعطتك فرصة دراسة بره فى بعثة .. إيه اللى يخليك بعد كل ده تفكر تخونها ؟؟ "
محسن بنبرة هادئة وواثقة لايبدو فيها التأثر أو الخوف " الفقر ... لما دخلت الجامعة كان كل اللى حواليا عندهم كل حاجه ، وأنا مكانش عندى أى حاجه من دى ولو كملت زى ما أنا كنت هاأبقى باأكتب على أولادي يعيشوا زيى ويشوفوا الذل اللي أنا شوفته طالما كتبت عليهم بالفقر زى ما أهلي كتبوه عليا قبل كده "
محمد وقد بدا الغضب على وجهه " مش مبرر.... الفقر مش مبرر يا محسن عشان تبيع بلدك وتبيع دم زمايلك "
محسن " مكنتش أعرف إنها هتوصل لكده ، أنا إفتكرتهم فى الأول عايزين منى معلومات وبس ، مجرد معلومات بسيطة لأن هو ده اللى عملوه في الأول طلبوا منى معلومات بسيطة وكان المقابل بتاعها على أوى ... مقابل يخلينى أضمن لنفسي ولأولادى من بعدى عيشة مرتاحة "
محمد بنفس الحدة " إزاى ماتتوقعش إنها توصل للدم ؟؟ ... وبعدين إزاى تقبل من الأصل تحط إيدك فى إيد ناس قتلوا اخواتنا قبل كده وسارقين أرض مننا "
بدأ الإرتباك يظهر على محسن إلا أنه حاول أن يخفيه فقال " الكلام ده مش بيأكل عيش ياباشا ... أنا عيلتى حاربت عشان تدخلنى الكلية ، كنا بنستلف عشان نقدر نعيش وأتعلم ، وباعوا أغلب اللى عندنا عشان أقدر أكمل تعليمى فى الكلية لحد ماجت لى المنحة دى "
محمد " ياريتك كنت زيهم كنت على الأقل هتستاهل إن الناس تحترمك ... فقير لكن محترم وعنده عزة نفس أحسن مليون مرة من خاين إيده عليها دم زمايله ودم الشهداء اللى راحوا بسببه واللى فى يوم أكلوا معاه عيش وملح وهو خانهم "
محسن " كلام إنشاء وكلام كتب يا باشا ، عمرك ما كنت هتقول كده لو كنت إنت مكاني "
محمد " لما هو كلام الكتب مش حقيقي كنت بتقرأ الكتب دى ليه وكانوا اهلك بيتعبوا عشان يخلوك تقراها ليه ؟؟ إنت خليت كل اللى عمله أهلك راح فى الفاضى وكل التعب والبهدلة اللى شافوهم ضيعتهم أنت باللى عملته "
لم يستطع محسن هذه المرة الرد على محمد وبدأ فى التفكير ، وتركه محمد ليذهب لمكتب القائد ليرسل برقية تفيد نجاحه فى القبض على الجاسوس للقيادة في مصر وظل منتظرا للرد فى مكتب القائد .

بعد مرور ساعتين أتاهم الرد بعدم ترحيل الجاسوس وأن السيد محمود سوف يحضر لتبليغ قائد القاعدة برسالة فى مساء هذا اليوم ، فقرر محمد الذهاب للراحة حتى يصل القائد محمود بعد أن وضع محسن تحت حراسة مشددة فى إحدى الغرف .

يتبع ,,,

الحلقة الحادية عشر والأخيرة

https://fbcdn-sphotos-g-a.akamaihd.n...17369328_n.jpg

وصل السيد محمود إلى القاعدة فى المساء وبدأ فى عرض الخطة التى وضعتها القيادة للإنتقام ولرد الإعتبار على القائد فى وجود محمد ونالت الخطة إستحسان القائد كثيرا وبدأ فى تنفيذها فى اليوم التالي مباشرة بتدريبات مكثفة لضباط وجنود لنشات الصواريخ يوميا ولمدة أحد عشر يوما تنتهى فى يوم 19 أكتوبر .

فى اليوم الثانى عشر تم إحضار محسن وطلب منه أن يرسل إشارة كما كان يفعل من قبل لكن مضمونها هذه المرة مطابق لمضمون الرسالة التي أرسلها قبل اختراق إيلات الأخير للمياه الاقليمية وأن يبلغهم بأن حالات الإستعداد أقل مايكون فى القاعدة البحرية ليشجع العدو على الدخول للمياه الإقليمية وأخبروه أن محتوى الرسالة سيتلقونه كما حدث مع الإشارات السابقة وأنهم لن يرحموه إذا تلاعب بمضمون الرسالة ، وبالفعل أرسلها محسن كما طلبوا إليه ولم يتبق فى خطتهم سوى الإنتظار حتى يبتلع الحوت هذا الطعم .

مرت الساعات بطيئة جدا حتى حدث ماكانوا يتمنونه ، حيث تم رصد هدف معادى تسلل إلى حدودنا الإقليمية فى الساعة الحادية عشر والنصف من صباح يوم 21 أكتوبر وأكد من رآه أنه يماثل نفس الشكل الذى رآه من قبل عندما تسللت إيلات ، وتنفس الجميع الصعداء لإبتلاع العدو للطعم وتركوها تمرح فى المياه الإقليمية كما تريد حتى أنها إقتربت من الشاطئ بمسافة 5 ميل فقط وكان من الممكن رؤيتها من المبانى العالية التى توجد على الشاطئ فى بورسعيد .

كان كل من فى القاعدة يتمنى الخروج لمعركة رد الشرف و كان الجميع يريد أن ينتقم لعونى ورجائى وغيرهم ممن كانت المدمرة إيلات سببا فى وفاتهم ، لكن التكليف الذى صدر من القيادة كان يقتضى بخروج لنشات الصواريخ هذه المرة بقيادة النقيب أحمد شاكر والنقيب لطفى جاد الله للتصدى للمدمرة .

بدأ تنفيذ العملية فى الخامسة مساء بعد خروج اللنشات فى مسافات متقاربة حتى يلتقطها رادار المدمرة وكأنهم قارب واحد وبمحاذاة الشاطئ وبدون أى إتصالات لاسلكية مع القاعدة حتى يتحقق عنصر المفاجأة حتى وجدوا أنفسهم فى مكان يسمح لهم جيدا بتوجيه الصاروخ الذى فوجئ قائد المدمرة إيلات به يتجه نحوهم ليصيب المدمرة وتتعالى منها الإنفجارات ، وعندما رأى النقيب أحمد شاكر هذه الإنفجارات ظن أن المدمرة قد بدأت فى الغرق فأنسحب مكتفيا بإطلاق صاروخين .

لكن فى الساعة السابعة وبعد مرور ساعتين على ماحدث لوحظ وجود نفس الهدف فى مكانه على الرادار وتبين ان إيلات لم تغرق بعد فصدر الأمر للنقيب لطفى جاد الله بالتعامل معها وإغراقها وبالفعل خرج النقيب لطفى بلنش الصواريخ وأطلق صاروخ ثم أتبعه بصاروخ آخر ليتأكد من غرق المدمرة وبالفعل غرقت المدمرة إيلات بطاقمها أمام بورسعيد فى سابقة لم تحدث فى تاريخ أى معركة بحرية فى العالم بأن تنجح لنشات الصواريخ فى إغراق مدمرة .

غرقت المدمرة إيلات التى شاركت ضد مصر فى عام 56 فى العدوان الثلاثي ، وشاركت فى حرب الستة أيام ، غرقت بعد أن دفعت مصر ثمنا غاليا من أرواح خيرة أبنائها ، غرقت إيلات محطمة إسطورة أشاعتها إسرائيل عن أن جيشها لا يقهر فإذا بفخر البحرية الإسرائيلية تغرقها مجرد لنشات صواريخ مصرية .

غرقت إيلات تاركة ولأول مرة منذ يوم 5 يونيو 67 فرحة داخل جنود البحرية وجنود القوات المسلحة بعد مرارة هزيمة ظنوا أنهم لن يفرحوا بعدها أبدا .

تمــــــــــــــــــــــــــــــــــــــت بحمد اللــــــــــــــــــــــــــه

تم إضافة القصة لبوابة المنتدى الأدبي الدائمة لتسهيل وصول الزوار و المتابعين إليها :

http://www.pharma-board.com/board/sh...ad.php?t=23495

شكر خاص و كبير للمجهود الرائع للــ د/ محمود الملاح .. على القصة العبقرية و الممتعة و الجميلة و الفريدة من نوعها ..

و خالص تمنياتنا له بالتوفيق ..

في انتظار أعمال أخرى قريبا .. ^_^

:fop (29):

اقتباس:

---

المشاركة الأصلية كتبت بواسطة M.Hegazy

تم إضافة القصة لبوابة المنتدى الأدبي الدائمة لتسهيل وصول الزوار و المتابعين إليها :

http://www.pharma-board.com/board/sh...ad.php?t=23495

شكر خاص و كبير للمجهود الرائع للــ د/ محمود الملاح .. على القصة العبقرية و الممتعة و الجميلة و الفريدة من نوعها ..

و خالص تمنياتنا له بالتوفيق ..

في انتظار أعمال أخرى قريبا .. ^_^

:fop (29):

---

شكرا جزيلا يا دكتور حجازى وشكرا انكم تقبلتونى ضيف على المنتدى الأدبى الكام يوم اللى فاتت ويابخت من زار وخفف واتمنى إن وجودى كضيف كان خفيف :)

شكرا مرة تانية على رأيك الجميل جدا ده فى القصة تقبل تحياتى :hi: :hi: :hi:

جمييييييييلة :)


في انتظار الجديد إن شاء الله يا دكتور :)

اقتباس:

---

المشاركة الأصلية كتبت بواسطة Mouri Ran

جمييييييييلة :)


في انتظار الجديد إن شاء الله يا دكتور :)

---

شكرا جزيلا لحضرتك يا دكتورة على متابعتك وعلى رأيك فى القصة وتقبلى تحياتى
:hi: :hi: :hi: :hi: :hi: :hi:

تم إلغاء تثبيت الموضوع و إضافته إلى بوابة المنتدى الأدبي ..


شكرا جزيلا د. محمود و بانتظار إبداعاتك الجديدة ..

خالص تحياتي ..

-mh