طب إزاى هو فى حد مابيخافش من الموت:ai:
فكرت كده لو فى يوم من الأيام قريب أو بعيد مت
ياترى أهلى والناس اللى كنت أعرفهم هيزعلو عليا شويه
طب وبعدين ماهم هينسوا أكيد هينسوا مافى ناس كتير ماتت قبلنا والحياة موقفتش يعنى
ممكن يفتكرونى لو اتفرجوا على صورنا القديمة أو عدوا فى مكان كان لينا ذكرى حلوة فيه
ممكن لما يفتكرونى يبتسمو ويقولوا اه كانت انسانه كويسه وأثرت فى حياتنا
وممكن لما يفتكرونى يقولوا ايه اللى فكركوا بالسيرة ديه بس ديه كانت إنسانه وحشه وبايخة
وممكن مجيش على بالهم خالص
وفى الحالة ديه يبقى وجودى فى حياتهم كان زى عدمة لاأثرت فيهم لابخير ولابشر
ياترى بقى أنا انهى شخص فيهم
سيبك من الناس دلوقتى وفكرى كده قبرك هيبقى عامل ازاى
قبر ياااااااااه ديه كلمة مقبضة أوى
قلت ياترى قبرى بقى واسع وقطعة من الجنه والملايكة فيه شكلهم يشرح القلب الحزين
ولا ضيق والملايكة فيه شكلهم مقبض والحياة فيه تخنق
قلت طب تعالى نشوف لما يوم القيامة يجى ونطلع السما
إيه اللى هيحصل؟
طبيعى يعنى حاجة من اتنين يا هتدخلى الجنه ياهتدخلى النار
بس أنا خيالى شطح شويه وقولت ليه مكونش من الناس اللى بيقربوا من عرش الرحمن
وفكرت كده لو قابلت ربنا
ياترى هقوله ايه؟
لقيتنى بقول اللهم لك الحمد كما ينبغى لجلال وجهك وعظيم سلطانك
إزاى يعنى مش هحبه وهو اللى واقف معايا وبيحمينى من نفسى ومن الشيطان
وهو اللى علمنى وكبر عقلى وطهر قلبى
وهو اللى بيسمعنى ويساعدنى لما كل أبواب الدنيا تتقفل
أنا بقول الكلام ده كله ليه
بصوا أصلى لما فقت من أفكارى لقيت حل واحد يخلينى مخفش من الموت وأتحاشى ذكر اسمه
انى اتخيل الجزء الحلو من الحدوته وأجهز نفسى عشانه
ليه دايما من يوم مابنتولد والأم بتفضل تجهز بنتها عشان تبقى عروسه والبنت بتفضل تحلم بفارس الأحلام من وهى سن خماستاشر سنه عشان توصل لليوم اللى تبقى فيه عروسه
والشاب بيفضل يجهز نفسه من أول حلمة بفتاة الأحلام اللى هتشاركه حياته لحد مايشتغل ويجيب الشقة والعفش وفلوس الشبكة عشان يبقى عريس
ويفضلو يتخيلو يوم فرحهم هيبقى عامل إزاى طول عمرهم
طب ما هو نفس الفكرة لو كل ماتفتكر الموت تفكر فى القبر الواسع اللى عبارة عن قطعة من الجنه
والملايكة اللى شكلهم يشرح القلب
والجنه اللى فيها مالا عين رأت ولاأذن سمعت يعنى مهما اتخيلنا هيفضل حاجة بسيطة أوى بالنسبة للحقيقة
واحلم انك من المقربين من عرش الرحمن ، كل ماحلمك يكبر كل ماتحقق حاجة كبيرة أوى وممكن تقرب من حلمك كمان
طب وبعد ما اتخيلنا ؟
نبتدى نجهز نفسنا للفرح ده الفرح اللى بجد الفرح الخالد بأمر الله
وده معناه ايه بقى منستمتعش بحياتنا ولانعيش؟
لأ مين قال كده بالعكس ربنا خلقنا عشان نستمتع بحياتنا فى الدنيا والأخرة بإ ذنه تعالى
الفكرة إننا نربط تصرفاتنا وحياتنا بالفكرة ديه
يعنى وإحنا بنشتغل وننجح ونتفوق فى شغلنا ونيتنا ان كل ده لله
نحب ونتجوز ونخلف ونربى أولادنا على الدين والأخلاق وفى نفس الوقت إنهم يعرفوا ربنا صح فيحبوه مش يخافو منه، يعرفوا انه رحيم وودود وكريم وفى نفس الوقت قادر وجبار على كل ظالم فيحبوه ويتمنوا يرضوه
حتى هزارنا وضحكنا ولعبنا نخلى نيتنا فيه اننا نحاول منغضبش ربنا
صدقونى أنا لسالى كتير على ما أوصل ان كل حاجة فى حياتى تبقى بالشكل ده
بس بجد بتمنى أوى أنى أبقى كده
عشان كده جيت أحكيلكوا اللى فكرت فيه عشان نشجع بعض
أحبكم جميعا فى الله:hi::fop (29):
بقلمى هبه مرسى
انا بجد مش عارفة الكلام ده ينفع يتحط فى الادبى ولا لأ ولا عارفة ممكن يتصنف ايه بس هى فكرة حسيتها وحبيت أعبر عنها وبس:)
