>> @@ .. فضفضه .. فضفض وطلع اللى جواك .. @@ >>

صعب إنك تحس من جواك إنك بتفرض نفسك على حد بسؤالك ومش بتبقى عارف تعمل ايه
فبتلاقى نفسك بتبعد علشان متزعجوش أكتر بس بتفضل تتمناله الخير حتى لو من بعيد

الأطفال أحلى حاجة فى الدنيا كفاية بس لماتبصله وتلاعبه فتلاقيه بيضحكلك إحساس تانى ولما أنت تخلى بالك عليه ولماينام بتبقى مش عايز حد يقربله أو يعمل دوشة جمبه ولما يعيط بتحس إنك قلبك موجوع علشانه لأن دموعه غالية عليك .بجدإحساس جميل ربنا مايحرمش حد من النعمة دى أبدا ويرزقنا جميعابالذرية الصالحة

خايفة اوووى من اللى جاى ويارب يكون خير
خايفة على البلد واللى بيحصل فيها وكل فريق شايف انه على حق
خايفة من الفراق بينى وبين اصحابى بعد الكليه وبتمنى نفضل مع بعض دايما على كل خير
خايفة من البعد بينا وبين اعمامى اللى كل فتره واحد بيسيب البيت ويستقل بأسرته فى بيت لواحده
خايفة على اخواتى وولاد اعمامى اللى اصغر منى واللى بعشقهم وبحبهم جداااااااا
خايفة يجى يوم وتبقى العلاقة بينا مجرد سلام فى الطريق
خايفة على والدتى اللى متحملة كتير اووووووى
خايفة من نفسى ان ممكن ارجع لأسوأ فتره عشتها فى حياتى واتعرضت فيها لظروف عمرى ما تخيلت انى ممكن اكون فيها
يااااااااااااااااااارب طمّن خوفى وابعد عن ظنونى

ياااااااااه كل فين وفين علي ما بقيت بفتح المنتدي دنا حتي دلوقت فتحته بالصدفه كنت بعمل سيرش وجالي وبالعافيه علي ما افتكرت الباسوورد ههههههه فكرتني بزكريات جميله السكاشن والامتحانات والزنقه فين ايام ما كنت بدخل عشان اشوف صحابي بيتوقعو ايه او حصل ايه في امتحان العملي امبارح لاول سكشن امتحن هههه يا الله
الايام بتعدي هوا واهو بقالي سنتين متخرجة وكنت بتمني اللحظة دي وانا قاعده كده فاضيه فضي السنين ومش بعمل حاجة بس حاليا بتمني ازاكر تاني ويبقالي هدف واشوف صحابي بس انا بعيده اوي عن ام الدنيا

امبارح كنت فى فرح أخت ريهام صاحبتى لما شوفت ريهام وهى ع المسرح جنب أختها افتكرت فرحها اللى كان من خمس سنين وازاى كنا كلنا فرحانين ومبسوطين على الرغم من ان ليلتها كنا منتظرين نتيجة الثانوية العامة بتاعتنا افتكرت لما اول بنت لها غرقت واتوفت وازاى ريهام كانت منهاره وبتبكى فى حضنى
حسيت وقتها اننا كبرنا أوى بتجاربنا مش بسننا
هى دى ريهام صديقة طفولتى صاحبة أجمل صوت اللى كانت دايما بتغنيلى أغنية ( ياريتنى ) لهانى شاكر
افتكرتها هى وماجى وانجى لما كنا فى الاعدادى ووقفوا يراقبولى الطرقة عشان أعزف لآخر مره ع الاكسليفون
افتكرت قعدتنا فى بلكونة جدها اللى بتطل على جنينة الموز ومنظر الاراضى الزراعية اللى أكتر من رائع
افتكرت أجمل وأحلى ذكريات ليا مع أصدقائى
ربنا يكرمهم ويحفظهم ليا ولأهلهم

إحساس وحش جدا انك تحس ان سنة كمان من عمرك بتتسرق... وتلاقي ناس قريبين منك شاركوا في ده ويمكن مش واخدين بالهم. انا عمري ما قصرت مع حد من أصحابي ابدا. بالعكس كنت دايما أبديهم علي نفسي... من الساعة ٩ صباحا لحد الوقتي تليفونات اني أوصل لحل مش عارف. بقيت مخنوق اوي ومش عارف آخد قرار. كان هايفرق معايا جدا الماجيستير السنة دي. مش عارف اقول إيه بجد تعبت ونفسيتي تعبت وكرهت نفسي وبلدي وكل حاجة فيها. حسبي الله ونعم الوكيل

مش عارفة صحبتى واهلى وفى نفس الوقت حياتى
حاسة ان الامور متعقدة ومش عارفة أعمل ايه ومحتارة
يارب اهدينى للخير يارب

يمكن دى اول مره افضفض ع المنتدى
ويمكن اتجرأت اعمل كده عشان عارفه ان المنتدى فضى ومحدش عاد بيشوفه
انا واحده كل حاجه شافتها
عزيز قوم ذل
حق وضاع
وعمر بلا فائده
جروح معلمه
تقصير.. نتيجة طبيعيه
عتمه وسواد
وشك ف اغلب الناس
وخوف من اى حد يقربلى
حتى لو بدأه احس انى مرتاحه ببعد
لانى ديما شاكه فيهم
وحساه انى ضغيفه اوى واى حد ممكن يضحك عليا
معقده ومش عاوزه اتجوز وكلهم فاكرين ف البيت انى بحب حد عشان كده رافضه الجواز
لدرجه انهم بيقولولى لو جه هنوافق مهما كان ظروفه
وفشلت بانى اقنعهم ان والله مفيش حد بس انا حياتى كده ومش عاوزه حد معايا فيها
وتعيسه اوى من جوه رغم ان اللى زعلان وعاوز يفك يقعد معايا دقيقتين ينسى الدنيا
ساعات ده بيبستنى ويخلينى اقول كويس انى سبب ف فرحه حد
وساعات ده بيخنقنى جدا وابقى بكل حقد عاوزه اللى حوليا يحسوا بيا ويعيطوا عليا

مش قادر اكتب

مش عارفة فى ايه ؟!
:fop1::cry: