عاوز ايه من سنة تانية ؟؟؟ .... تعالى و شاركنا هدفك ...

بسم الله الرحمن الرحيم


ازيكم يا دكاترة .... اتمنى ان الناس كلها تكون قضت الاجازة كويس و الحمد لله و عملت اللي نفسها فيه

احنا ان شاء الله داخلين سنة تانية صيدلة

يعني بقالنا سنتين في الكلية ... و عرفنا النظام ماشي ازاي

و أكيد كل واحد فينا حاطط لنفسه أهداف يحققها أو خطة ينفذها للسنة دي

يا ترى .... عاوز/ة ايه من سنة تانية ؟؟؟؟

قدامنا الفرصة لسه كبيرة اننا نقعد مع نفسنا ...و نشوف احنا عاوزين ايه

لان تحديد للهدف هو اولى الخطوات في الطريق الى تحقيقه

و نحدد ... هنوصل للهدف ده ازاي " او اهداف ... كل حسب طموحه "

يمكن أنا كتبت الموضوع بدري شوية .... بس علشان الناس تلحق تفكر
و اللي لسه مخططش و لا حط أهداف ... يبدأ ... لسه الفرصة قدامنا علشان نحدد

احنا عاوزين ايييييييييييه ..... من سنة تانية

أرجو ان محدش يتسرع ... و كله يتأنى في اختيار اهدافه

و كل واحد/ة بيختار ... يجعل نيته الأخذ بالأسباب

******************

أحب أوضح نقطتين في نهاية الموضوع

* النقطة الأولى

الموضوع ان شاء الله هيفضل مثبت لحد ليلة اول يوم في الدراسة ... و يتم غلق الموضوع

‏"‏ ممكن حسب الظروف يتم مد الفترة الى عيد الفطر "

و ان شاء الله في آخر السنة ... و يوم ظهور النتيجة هنرجع الموضوع تاني

و كل واحد يشوف مع نفسه ... هل هو نجح و الحمد لله في تحقيق هدفه أو اهدافه اللي كان مخطط له ؟

و ايه هي العوامل اللي ساعدته على تحقيق هدفه ده .. و بكده يقدر ينميها و يطورها للسنة اللي بعدها

و لو لا قدر الله مقدرش انه يوصل لهدفه بالدرجة المطلوبة .. أو موصلش من الأساس

ايه اللي خلاه ميوصلش ... هل التقصير منه ؟؟؟؟ ... هل هو ملتزمش بالخطة اللي كان راسمها لنفسه لتحقيق الهدف ده

هل هو مختارش العوامل الجيدة اللي تقدر تساعده على تحقيق الهدف ده ... و ليه مختارش كويس من الأول

بجد ... لو كلنا عملنا كده ... كلنا ان شاء الله هنوصل ... طالما انت داخل عارف انت عاوز ايه

انما اللي كتير " و انا منهم " كان بيعمله قبل كده ... هو انه يدخل و حسب تساهيل ربنا

هو أي نعم كل شيء بأمر الله و بتسهيله .... و لكن اللي بنعمله ده كله أخذ بالأسباب


* النقطة الثانية

ممنوع منعا باتا الرد في هذا الموضوع بعبارات الشكر .... أو أي عبارات خارج الموضوع او تعليقات فرعية

و كل دكتور مننا هيرد مرة واحدة بس في الموضوع ده

و لو حد عاوز يضيف حاجه لرده بعد كده ... يبعتهالي و أضيفها ان شاء الله على رده

آسف اذا قلتلكم ان أي مخالفة لشروط الموضوع سيتم حذف أو تعديل المشاركة حسب الحاجة

و آسف مرة أخرى اذا كنت طولت عليكم في الموضوع


في انتظار ردودكم .... و عاوزها تكون بعدد طلاب الفرقة التانية ان شاء الله


و السلام عليكم و رحمة الله و بركاته

اولا يشرفنى الرد فى موضع هايل زى ده وانا هدخل فى الموضوع علطول


عاوزة ايه من سنه تانيه: اتمنى اجيب تقدير زى سنه اولى

ازاى وخطتى ايه: ان شاء الله نفس اللى كنت بعمله فى سنه اولى وكتر ان شاء الله من حضور المحاضرت واشتغل السكشن بما يرضى الله واذاكر كويس


نفسى اجيب السنين الجايه امتيازات ان شاء الله عشان يكون التراكمى جيدا جدا ان شاء الله اتمنى كده وهحاول بكل طاقتى عشان ابقى ناجحه فى الدراسه وشغلى

اكيد ان شاء الله عاوز احافظ على تقديرى اللى جبته السنه دى واحاول ازيد منه واجيب امتياز ليه لآ
مع ان المعظم بيقولوا ان تانيه صعبه اووى بس مفيش مستحيل

بس انا نفسى الظروف تساعدنى وميحصلش اى حاجة تمنعنى من حاجة زى دى
واكيد نفسى اضغط على نفسى شويه واذاكر لانى بجد لما بذاكر بحصل وبعرف اقدر
لكن لما بطنش خلاص بقى ع الدنيا السلام

وان شاء الله السنه الجايه كلنا نحقق هدفنا واللى عايز يقدر يقدر واللى عايز ينجح ينجح واللى عايز يرتب ان شاء الله يرتب

اه نسيت ان عايزة بردوا انجح ف السيكوووووو ان شاء الله اصل البتاعه دى واقفه ف زورى اووى
يارب السنه الجايه اكون نجحت ف السيكو وعديت وكمان معايا تقدير جيد جداا او امتياز

ودعواتكم معانا

ان شاء الله نفسى احافظ على تقديرى واحاول اجيب جيد جدا الثلاث سنين اللى جايين علشان ان شاء الله اتخرج بالمرتبه لانى بصراحه نفسى فيها اووووووووووى, وان شاء هاحاول احقق ده بالانتظام فى حضور المحاضرات واحاول على قد ما اقدر ان انا افهم من الدكتور ,وبصراحه نفسى اذاكر اول باول لانى سامعه ان تانيه اصعب سنه فى صيدله وعايزه مذاكره جامده وده لان احنا بنخلص فيها العضويه والتحليليه يالا ربنا يعديها بسلام وتكون احسن سنه ويوفقنا كلنا يارب.

نفسى ان شاء الله احافظ على تقديرى السنة اللى فاتت وازيد كمان علشان اروح تالتة ونخلص بقى

ويارب كلنا نحافظ على تقديراتنا ونزيد كمان
ويا رب يوفقنا جميعا ونقدر نحقق اهدافنا وننجح فيها كمان

اقتباس:

---

عاوزين ايه من سنة تانية ؟؟؟

---

تودينى سنه تالته وانا بخير .. بس

موضوعك جه فى وقته لانى كنت بفكر فيه الايام دى

انا اهم حاجه عندى انى انجح صافى السنه الجايه واحسن من مزاكرتى اكتر واجيب تقدير احسن من كده

واحاول اشتغل اكتر من كده فى السكاشن واحبها غظب عنى

لكن اهم حاجه انى اتعب على قد مقدر واجيب تقدير بمجهودى واروح تالته

بالنسبه لتحديد الاهداف من البدايه .. انا السنة اللى فاتت ( واللى قبلها كمان )
كنت محدده لنفسى اهداف كتير .. هى طبعا مش مستحيله ، وكنت حاسه انها سهله جدا بس للاسف ما حققتهاش على اكمل وجه زى ما كنت عايزة ..

وهى تقريبا نفس اهدافى السنة دى .. انى اجيب تقدير كويس جدا وانتى اشترك فى الجمعيه العلميه SAMPS ويكون ليا فيها نشاطات مفيده وبناءه ..( بس مش عارفه الحلم ده ممكن احققه ولا لآ )

ونفسى كمان ترجع ليا ثقتى فى نفسى زى الاول (قبل الكليه دى ) ،
ونفسى ابطل التوتر والقلق اللى بيحصل لى أيام الامتحانات لانه بيبقى اوفر قوى وبيضيع مجهودى وتعبى طول الترم للأسف ..
ونفسى أرضى ربنا وماما وبابا علاطول ..


وربنا يحقق لنا كل اللى بنتمناه ان شاء الله ..

عايزها تخلص بسرعه اوي اوي اوي.......

وتعدي علي خير.....

اولا الموضوع جميل
ثانياً: بتمني ان ربنا يوفقنا كلنا ونفسي بصراحة ربنا يسهل ويكرمني بتقدير زي أولي أو أكتر " يارب "
ويارب الدكاترة يكونو كويسين كلهم
والله الموفق