رأيك يهمنا فى استبيان الأداء التدريسى

الأعزاء الطلاب جاء وقت مشاركتك فى العملية التعليمية من خلال اعطاء رأيك فى اداء اعضاء هيئة التدريس من خلال المحاور المكتوبة. هل اديته؟. هذا يساعد ادارة الكلية فى تحسين الأداء التدريسى و التعليمى لكم. و بذا تشاركون فيه. عليكم ان تذهبوا لنادى التكنولوجيا فى قاعة الإمتحانات الإلكترونية و الدخول بالباسوورد الخاص بكم. فى حالة نسيان الباسوورد برجاء الذهاب لوحدة ضمان الجودة و الإعتماد و الإتصال بالإستاذ ياسر الشربينى. التأخير فى انهاء هذا الأمر قد يتسبب بحجب النتائج. فبرجاء السرعة. تذكر ان هذا واجب مطلوب و نحن فى انتظار اداءه. باقى ان تعبر عن رأيك بصراحة و صدق. مع تحياتى.

لو حضرتك تقصد الاستبيان اللى بيتعمل بعد كل فصل دراسى
فده احنا بنعمله

والواحد و هو بيعمله بيحاول انه يقول رأيه لان دى شهادة بنحاسب عليها أمام الله

لكن للأسف فى ناس كتير بتدخل و تعمله اى حاجة أو بتخلى اى حد يعمله بدالها
لمجرد انه يتعمل وخلاص

بس كان عندى سؤال : هل نتائج الاستبيان ده ليها مردود عن أعضاء هيئة التدريس

ولا هى أصلا لا يتم النظر اليها من الاساس ؟؟

و شكرا

شكرا لأستاذنا الفاضل د/عطا الله

احنا كل سنة بنحاول نتحرى الدقة واحنا بنملأ الاستبيان

بس السنة دي قبل النتيجة ما تظهر ..حاولت ادخل عليه عشان أملاه ملقتش الصفحة بتاعته شغالة

بالنسبة لاستبيان الترم ده ان شاء الله نملاه لأنها أمانة هنتحاسب عليها ان شاء الله

انا هتكلم معاكو شويه وياريت لو تتقبلو الكل كلامى سوا هيئه تدريس او اعضاء

موضوع الاستبيان :: كويس ان يكون فيه استبيان بس الحقيقه ان كتيييييييير بيختارو موافق وخلاص ده حتى مش بيقراو ايه المكتوب وبيتعمل بدون اى اهميه وياترى فعلا الدكاترو بتقراو ولا لاء
ياريت مع الاستبيان يكون فى رايك ف الدكتور ونتكلم احنا عنه مش نختار


بتتكلمو كتيييييييييييييير عن تطوير المعلم وازاى يكون بافضل صورة ويقدم كل واجباته ع اكمل وجه
طيب مين اتكلم عن الطلبه وهل فعلا ده ف صالحهم ولا فى منهم هيفهمو غلط
يعنى مثلا:: ف طلبه لما تلاقى ف صله بينها وبين دكتورها واصحاب ممكن ده يزيد الحب والصله والاحترام الاحترام الاحترام

وف العكس هيفهمو كده خلاص انا والدكتور ند تو ند واكيد كلنا عارفين ان فى فئه م الناس لازملها اسلوب خاص ف التعامل اكيد انتو الكل فاهمين

مش مطلوب من المعلم غير انه يشرحلنا ويساعدنا نكون صيادله بجد ونغير راى الناس ف الصيدله انه بقال واو صاحب سوبر ماركت محترم وان اى حد ممكن يفتح صيدليه ووقت ما نحتاجه باحترام نلاقيه
الحمدلله عندنا كتيييييييييييييير دكاترة كويسين
ازكر ع سبيل المثال حضرتك والاهتمام باراءنا ومحاولاتك ف التطوير ربنا يوفقك
د_ماجده الشربينى راااااااااائعه وقريبه جدا
بصراحه كل قسم الطبيه والصيدلنيات
واكييييييييد د_ حسن الكاشف ده يكفى عنه كلمه ماحلاه ف كل شئ
كل الى بيشتركو معانا هنا ويسمعونا ويشاركونا ويبادلونا الاراء
بس ياريت كمان هيئه التدريس تهتم بتطوير الطالب وايه المطلوب منه

هحكى عن شئ ديما بيضايقى والغرض منه مش قصه هحكيها بس اتمنى تفهمو منها الى عايزة اقوله لانى خايفه اقوله صراحه حد يزعلنى منا

كان يامكان فى دكتوره عندنا ف كليتنا عسوووووووووله جداااااااااا وشرحها ممتااااااااااااااز وطيبه جدا جدا لدرجه انها مش بتقدر تأذى اى طالب مهما عمل
ع الاقل انها توقفه وتحرجه ودى ابسط شئ بس احترامها لنفسها وطيبه اصلها تمنعها حتى من ده
والنتيجه ف طلبه بتحترمها وتسمعلها وتخرج م المحاضرة فاكرة كلامها ومش محتاجه انها تزاكر المحاضرة غير قراه بس
وف للاسف بتحس انهم ف سوق وتقلها خلاص اسكتو ياجماعه دقايق وهخرج وبتقول حتى بدون ما تتعصب يسكتو شويه وبعدين ترجع ريما لعادتها القديمه

انا راى ان المعلم ف اى مرحله يكون ليه احترامه وهيبته وخاصه معلمين المدارس ولما نكبر هنكون ربينا ع احترامنا لمعلمين نروح الجامعه نلاقى المعلم صديق نحبه ونحترمه ده الى لازم يكون

تقبلو راى وياريت تكونو فهمتو الى عايزة اقوله بدون ما اقله

بسم الله الرحمن الرحيم, بعد اذن اعضاء هيئة التدريس اريد ان اطرح فكرة قد تساعدنا كثيرا.. هذه الفكرة هى بالفعل موجودة ولكن ليست على الوجه الأكمل.
فعند حضور المحاضرة قد يتطلب ذلك كتابة ما يقوله المحاضر ومطلوب ايضا فهم ما يقوله و((ماجعل الله لرجل من قلبين فى جوفه)) وهذا قد يأثر على الهدف الأساسى وهو الفهم الجيد..
لذلك نرجو من المحاضر ان يعرض لنا الكورس الذى يدرسه على البروجكتور. وهذا بالفعل قد تم و لكن لزيادة التواصل نرجو ان يكون هناك لينك على موقع الكلية يشمل على كل الكورسات لكل المحاضرين
حيث يكون هذا اللينك هوا المكان الرئيسى للحصول على المحاضرة او مذاكرتها..وبذلك يتمكن الطالب من مراجعة دروسه اول بأول ويتمكن ايضا من تحضير او اخذ فكرة عن المحاضرة القادمة ...
وهذا لا يعفى الطالب من كتابة بعضى ال notes فى المحاضرة التى تساعده على زيادة الفهم..واخيرا ناسف للإطالة ونتمنى ان تكون اراء الطلبة كلهم مسموعة.. وشكرا

جزاك الله خيرا يا دكتور..وأضم صوت إلى صوتك أيضا

بخصوص الاستبيان ..

للأسف معظم الطلاب بيملاه بدون ما يقرأ ..

موافق
موافق
موافق
موافق

و الله أنا شفت بنفسي واحدة بتملاه ..

بيسأل : المميزات التي تجدها في هذا المنهج ؟

كتبت : السهولة و الوضوح ..

مع ان البنت دي كل أما أشوفها تشتكي لي من الدراسة , واحنا مش بنستفيد حاجة , و الامتحانات صعبة ..

هي في كلية تانية عموما ..

بصفة عامة المشكلة ان الطالب حتى مش عايز يتعب في قراءة الأسئلة عشان يجاوبها صح ..

و الدليل على كدة ان في سؤالين على ما أذكر مكررين بصيغة مختلفة شوية ..

و الكل مجاوب اجابة مختلفة هنا و هنا .. فدة دليل على ان الطالب دة ما قرأش أصلا و المفروض يلغى استبيانه ..

أنا الحمد لله جاوبت استبياني بما يرضي الله ..

لكن الاستبيان شامل بعض الأساتذة اللي ما درسونيش فمعملتش استبيانهم ..

زي الدكتور - ممدوح بقسم العقاقير .. و اللي عمره ما درسني فمعرفش سيادته أصلا .. فازاي أقول رأيي في المحاضرة ؟؟؟

للأسف في ناس في دفعتي ملأت استبيان هذا الأستاذ .. فدول المفروض يتلغى استبيانهم ..

كمان في ناس مش بتحضر أصلا ولا عمرهم دخلوا المدرج و عاملين استبيانات أي كلام ..


أقصد ..

لو عايزين استبيان عن كفاءة الأداء التدريسي ..
اسألوا الطلبة اللي بتحضر و قاعدين في المدرج من أول السنة ..
يتوزع عليهم ورق بدون كتابة أسماءهم عشان الناس اللي بتخاف ..
و يتساب لهم وقت وليكن ربع ساعة ..

ويكون السؤال مختصر ..
هل تحقق استفادة من محاضرة الدكتور فلان .. أوافق , لا أوافق , ليس تماما


لكن و احنا بنعمل الاستبيان برده كان في مشكلة ان الاستبيان طويل أوي أوي ..
يخلي الطالب يمل , و لو عمل شوية أسئلة كويس ممكن يكروت الباقي من الزهق ..

عشان كدة أنا عملت استبياني على مرتين ..

برجاء مراعاة النقاط دي عشان يكون الاستبيان حقيقي ..

وبقول لزمايلي وزميلاتي .. اللي مش هيعمل الاستبيان صح يبقى حرام عليه , ويبقى يستاهل كل اللي يجراله و مش من حقه يشتكي من أي حاجة بعد كدة ..