احم احم .. مينفعش حد م المنتدى الأدبي يطلب مني أشارك وملبيش النداء , دي أول مشاركة ليا تقريبا ً , يا رب تعجبكم
(1)
قلبي الغريب انا بسألَك
منين ساعات بتكون حَيَالله
ريشه طايره ف الهوا
شبه اللي ياما قبل منك برده طاروا
سايقك مسار الريح و راضي باختيارُه
يحييك ساعات لما يِحِنّ
و ساعات كتيرة بيقتِلَك
ومنين ساعات بتكون شجر ...
باصص لفوق
منعاك كرامتك م اللجوء ...
لدموع بتِكْشِف ضعْفِنا
كُلَّك ثَبات
قادِر تِداري الحُزن ف جراب السُكات
صابر أوي .. على جرح جيّ ف مَقْتَلَك
قلبي الغريب انا بسألك
(2)
طابِع سكونَك
نشوة جنونَك
إزاي ف قلب اتجمعوا
وازاي بإيدك اللي عَجَزِت تِمْسَح دَمْعتك لِلْتَوّ
تمسح على ضهر الغريب ...
يتداوي مللي بيوجَعٌه
ومنين تِنَور للي تاه كُل الطُرُق ؟
والنور ف قلبك (قد) حَلَك
قلبي الغريب انا بسألك
(3)
يا قلب مبيِلْمَحش نَفْسُه
لمَّا يبُص ف المرايات
من إمتا كان رَقْص الغوازي
ينفَع على دمْع النايات ؟
يا قلب عاشق للحياه
يا قلب مَلْمِل م السِكَك
يا شيخ ملامحه عَجِّزِت و اتعَكِّزِت
على طفل مَتْعَلِمش غير .. يِرسِم حياتُه ع الدِكك
يا نجم عالي ف السما
وبرغم ده ما أوحلك ؟!
قلبي الغريب أنا بسألك
(4)
يا قلب مليان بحكايات
يا ضحكة ف ضلوع الآهات
يا (ألزهايمر) جوَّه مِنُّه
عايشة كُل الذكريات
يا وَلَد رافِض يؤُش
يا أَسَد ساكن ف عِش
يا هدوء كل الجناين
يا قَلَق قلب الحارات
يا اللي كل الدنيا مِلْكَك
وانت وَحْدَك بالإيجار
يا جعان وتمللي تِحْبِس
بعد جوعك بالسيجار
يا اللي واخِد ضِحْكِتك
تَقْشيرة للحُزْن البعيد
تِضْحَكْها يبقا الكون سعيد
فتسيبه يفرَح مَطْرَحُه
وتدور مّعّ
دورة همومك ف الفَلَك
فازاي كده ؟
قلبي الغريب .. أنا بسألك
رامي وفا
الخامسة فجراً
صباح يوم الاثنين 6/2/2012
