السفير الإسرائيلى ومعاونوه يستقلون طائرة خاصة ويتجهون إلى تل أبيب

السفير الإسرائيلى ومعاونوه يستقلون طائرة خاصة ويتجهون إلى تل أبيب

السبت، 10 سبتمبر 2011 - 03:17
http://www.youm7.com/images/NewsPics...0082185358.jpg

استقل السفير الإسرائيلى يتسحاق ليفانون ومعاونوه بالسفارة، الطائرة العسكرية الإسرائيلية، التى وصلت مطار القاهرة منذ قليل، متوجهاً إلى تل أبيب بعد الأحداث التى شهدتها السفارة أمس الجمعة.

وقد انتقل السفير الإسرائيلى ومعاونه بسيارة تابعة لشركة العال الإسرائيلية من استراحة المغادرة إلى الطائرة.

كانت طائرة عسكرية إسرائيلية سوداء اللون، وصلت إلى مطار القاهرة لتقل السفير الإسرائيلى وإجلاء الرعايا الإسرائيليين من القاهرة إلى تل أبيب بعد حادث اقتحام سفارتها.

المصدر: موقع اليوم السابع

رايكو ايه يادكاترة فى الموضوع ده وتوقعاتكو ايه اللى هيحصل بعد كده ؟

في داهية بس كنت اتمناها طرد مش مغادره ..............

اقتباس:

---

رايكو ايه يادكاترة فى الموضوع ده وتوقعاتكو ايه اللى هيحصل بعد كده ؟

---

هيرجع تانى :D

لو كان الكبارات طردوه و عملوا للشهدا كرامة مكنش حصل اي حاجه
و العجيييييييب الناس اللي طالعه تقولك دي سياده دوله اجنبيه
و اللي ماتوا و الارض بتاعتنا دا ايه مش سيادة دوله؟؟؟؟؟؟
حاجه تقرف
منهم لله ادوا للبلطجية فرصه يخربوا الدنيا

أكيد هيرجعوا تانى بس بعد فترة لما الانتخابات تتعمل ويكون فى رئيس جمهورية والأوضاع تتحسن

احنا عارفين من الأول إن ده هيحصل وهما برده عارفين ومرتبين نفسهم كويس علي كده...بعد الأحداث الأخيرة..
فبدأو هيلعبوا علي اللي حصل وطبعاً كان اول رد فعل لهم راحو يجرو علي اوباما علشان يحميلهم السفارة..!ولاد تيت صحيح..!! هيعملو نفسهم بقه مظلومين..!واحنا اللي مجرمين..!ومش عارفين نحمي ولا حدودنا ولا سفارتهم..! علشان يطلبوا حد من بره يحمي الحدود بقه والسفارات (التدخل الأجنبي)

طبعا هيرجع ودا تصريح مسئول اسرائيلى
لكن الأهم هوا استغلال الحكومه الاسرائيليه للموقف
اللى أكيد هتكبره وتفضح الدنيا
وممكن تطالب باعتذار ومش بعيد تطالب بتعويضات
لأنهم باختصار بيعرفوا يستغلوا الفرص

ربنا يحفظ البلد دى يارب

وكمان أتمنى بأه يتعمل تحقيق مصرى للكشف عن هويه اللى قاموا بالأعمال دى سواء قدام الداخليه او مديريه أمن الجيزه أو السفارخ وبلاش تصريحات بدون أساس
وبلاش يخبوا الأخبار بالطريقه الغبيه دى
حد يقول آياد أجنبيه طيب هما مين مش مهم
حاجه تهبل

انا كنت فرحانة اما هدوا الجدار .........لكن اقتحام السفارة ده شيء غبي جدا من ناس في منتهي الجهل
انا شوفت الناس الموجودة هناك واحد قاعد يقول هنروح اسرائيل ونحاربهم بايدينا دي من غير سلاح .......ايه الجهل ده......!!!!!!!! طب روح كده يلا.......... دول هيضربوك طلقة تجيب اجلك قبل ما رجلك اليمين تعدي الحدود الاسرائيلية...
الشعب المصري تحركه العاطفة والحماس دون ادني ثقافة في اي شيء
شعب اغلبه جاهل يريد الخير ولا يفعل الا الشر
كفاية جهل اتثقفوا شوية ...حرام عليكوا
اي سفارة في دولة لا تعتبر جزء منها ولكن تعتبر جزء من الدولة المستضافة
يعني السفارة الاسرائيلية تعتبر جزء من بلد اسرائيل ......وده قانون دولي
يعني من حق اسرائيل دلوقتي انها تدين مصر باي وسيلة من وسائلها المبتكرة ومش هتغلب ده هتستغل الموقف احسن استغلال
ومش كفاهم اقتحام السفارة ...ده كمان رموا الورق من بلكونة السفارة مش احتفظوا بيه واعطوه للجيش .لأ.......ده كل واحد مروح بوثقتين تلاتة لولاده .....وواحد ذكي حرق وثائق فاكرها زي علم اسرائيل بيحرقه
المفروض كانوا يقدموا الوثائق دي للجيش وممكن يكتشفوا فيه ادانة لمبارك واعوانه ده اكيد طبعا
انا اسفة جدا علي الاطالة وطريقة الكلام
لكن فعلا المفروض الناس تبقي مثقفة ومتحضرة شوية بلاش الجهل اللي مسيطر ع الناس ده
وكمان اما الامن المركزي جه يمشيهم ضربوه بالطوب
ده غير انهم راحوا وزارة الداخلية وحدفوا طوب ع الضباط وكتبوا ع الوزارة يسقط المشير
صراحة كانت مظاهرات الميدان تحفة والمظاهرة اللي قدام السفارة وتحطيم الجدار كان تمام لكن بقه الاقتحام وضرب الامن ده اللي بوظ الحكاية خالص وانا عايزه كل اللي عملوا كده يسجنوه
ممكن تتفرجوا علي القنوات الاخبارية الاوربية وانتوا تعرفوا شكلنا ايه هناك
مصورين الوثائق وهي بتطير في الجو وعربيات الامن المولعة وقاعدين يقولوا المصريين المجرمين اعتدوا علي اسرائيل الصديقة وطبعا السياحة هتتضرب وترجع صورة المصري المنبوذ مرة اخري وكل ده من شوية جهلة
كفاية اوي كده .......ده رأيي بكل اسف...........

أكد رئيس الوزراء الإسرائيلى، بنيامين نتانياهو، أن تل أبيب ملتزمة بالسلام مع مصر، وأنه سيتم إعادة السفير الإسرائيلى يتسحاق لفانون إلى القاهرة، فى حالة توفير الحماية الأمنية الكاملة له، بعدما وصل ليفانون إلى تل أبيب صباح اليوم، فى أعقاب اقتحام السفارة من جانب المتظاهرين، مساء أمس الجمعة، وقال إن "حماية الدبلوماسيين والسفراء من واجبات الحكومات فى أنحاء العالم".

وأشار نتانياهو فى كلمة ألقاها مساء اليوم، السبت، من مكتبه بالقدس، إلى أن التعاون مع الحكومة المصرية مستمر ولن يتوقف، رغم الأحداث الأخيرة، موضحاً أنه فى أعقاب علمه باقتحام السفارة الإسرائيلية بالقاهرة اجتمع مع وزير الدفاع إيهود باراك ورئيس جهاز الموساد ورئيس الشاباك، للتباحث حول كيفية حماية السفير الإسرائيلى فى أعقاب عملية الاقتحام، مشيرا إلى أنهم توصلوا إلى ضرورة الاستعانة بالكوماندوز المصرى لحمايته، وهو ما تم بالفعل، على حد قوله.

وتقدم نتانياهو بخالص الشكر لعناصر الكوماندوز المصرية التى حمت أرواح الدبلوماسيين الإسرائيليين، وكذلك وجه الشكر لوزير الإعلام المصرى، أسامة هيكل، الذى استنكر اقتحام مبنى السفارة، مؤكداً أن هيكل كان من أوائل المسئولين المصريين الذى انتقدوا الهجوم.

وقال نتانياهو، إن ليلة أمس كانت ليلة طويلة، ليس فقط على المسئولين فى تل أبيب، وإنما أيضا على جموع الإسرائيليين، لكنى أوجه رسالة للحكومة المصرية وهى، "سنعمل سويا بناءً على اتفاق السلام المبرم بيننا".

وأشار إلى أنه أجرى اتصالاً هاتفياً بالرئيس الأمريكى باراك أوباما، فى ساعة مبكرة من صباح اليوم، السبت، وشرح له الموقف كاملا، وقال إن أوباما أكد له أن العلاقات يجب أن تستمر بين تل أبيب والقاهرة، ويجب على الطرفين الالتزام بالسلام المبرم بينهما، وأنه يشعر بقلق من وصول الأمر إلى هذا الحد.

على جانب آخر، ذكرت صحيفة "يديعوت أحرونوت" الإسرائيلية، أن رئيس الحكومة بنيامين نتاناهو ووزير الدفاع إيهود بارك حاولا الاتصال بالمشير محمد حسين طنطاوى، لكن الرد كان سلبياً، ولم تجر أى اتصالات.

المصدر : موقع اليوم السابع

رايى؟؟؟؟
حاجة تكسف طبعا
مكنتش اتمنى ابدا انه يمشى كدة
بس نقول ايه؟لو كان انطرد من الاول وعملوا حساب لكرامتنا مكانش حصل دة كله وفى الاخر اهو هيرجع برضو
احساس وحش اوى ان الناس دى تبقى على ارضنا واخدين مكان بالقانون واحنا اللى بنحميهم وبنبنيلهم حواليه سور مكافاة على قتلهم لينا على الحدود !!
وبصراحة اكتر فى الموضوع دة انا لايهمنى منظر مصر برا ولا يحزنون من امتى وبرا كانوا بيهتموا غير باسرائيل وبس؟
ولولا ان السفير دة كان مشى والعمارة فيها مصريين انا كنت اتمنى يولعوا فى السفارة باللى فيها بصراحة
انا سمعت عالتليفزيون حد بيقول ان اصلا امن الدولة من قبل كدة قبل ما يتم حله كان عامل خطة لهروب السفير الاسرائيلى فى حالة حدوث اى اعمال مشابهة للى حصل دة
المشكلة فعلا ان فى حاجات غامضة كتير ومحدش مرسينا على حاجة وكل واحد بيطلع يقول رايه بعديها بدقايق ينفى اللى قاله! وكله بيتبرا من كله!وحتى اللى حصل بالتفصيل مفيش كلام واضح عنه وكل واحد بيحكيه بطريقة
عموما اسرائيل عملت اللى هى عايزاه فى الاخر
اللى لفت نظرى انهم مفيش ثوانى اتعرف بالحوار دة بعتوا للسفير فى ساعتها واستدعوه وبعتوله طيارة تنقله وكلموا امريكا وسخنوهم علينا وقالوا ان اللى حصل دة مش هيعدى مرور الكرام
احنا بقا ضربونا عالحدود شوفوا من امتى ؟؟؟ وقدام العالم كله والناس كلها ادانت وعملت تصرفات تجاههم واحنا ... محصلش حاجة صمت
خلونا بقا نقعد كدة نزعل ونتضايق فى نفسنا ونستنى من اردوغان يعمل اى تصرف مستفز تجاههم يشفى غليلنا منهم وخلاص
بس اعتقد هيبقى فى لسة سيناريوهات استفزاز منهم كتير عشان نتخطى الحدود والاتفاقيات ونديهم الفرصة انهم يعملوا اللى عايزينه وياريت يتعمل تحقيق ونعرف مين اللى عملوا كدة ولصالح مين والتحقيقات تنشر ونعرف كل حاجة عشان نبقى على نور بدل اللى احنا فيه دة كلمة تودينا وكلمة تجيبنا