(( كدبــــــــــــــــــه البـــــــــــــعد ))
كدبـــــــــــــه البــــــــــــــــعد
مين جاب حبيبتي سيرة البعاد
مين قال يا عمري فات الميعاد
مين قال اننا بقينا صورة لمجرد
ذكريات
.......
جت بتخبي وشها
وبتحاول تداري ملامحها
بإيديها
وفضحها غصب عنها رعشه
عينيها ...مش ضحكها
جت بتصرخ..حبي مات
وجه خلاص وقت البعاد
.........
ولقتني بعمل زيها
وبحكي عن الفراق ...عن السفر
فجأه لقيت الدمع سال من عينيها
علي خدها
وحكي عن حب حياتها اللي في خطر
مديت ايديه امسح دمعها
اتحول الدمع لشعله غضب
ولقيت مليون اتهام
وسؤال بيجي وراه سؤال
وانا واقف مش فاهم ايه حصل
وقلب مين اللي انكسر
..............
بصيت لقيت
الكدبه كبرت غصب عني وعنها
ما كنت فاكر إننا مهما هنكدب
عمرنا ما هنصدق غير حبنا
والحب راح ينتصر
وفضلت مستني ضحكها
علشان الحزن ينحسر
...............
والوقت مر علينا بالساعات
والجو مشحون بالآهات
وكل واحد منا ساق في الكدب العناد
وأنا كان منايا اسمع ضحكها
علشان اعترف اني كدبت علي كدبها
فجأة لقتني وحدي
وهي بدأت في البعاد
قلبي اتحسر .........وفضلت السكات
سبتها
ما حقيقي قلبي بين ايديها مات
وبقينا صورة لمجرد ذكريات
...........
