السلام عليكم ورحمه الله وبركاته
كل سنه وانتم طيبين جميعا وينعاد عليكم رمضان بالصحه والخير دايما يارب
طبعا مفيش حد خافي عليه ارتفاع معدلات الطلاق الرهيبه دلوقتي مش في مصر بس انما في اغلب البلاد العربيه كمان ظاهره تانيه ملحوظه هي ارتفاع معدلات موت الفجاه والحوادث الى اخره وطبعا الحاجات دي كلها بتخلي نسبه نساء كتير في المجتمع مطلقات وارامل وهنا بقى مش هنتكلم على نظره المجتمع ولا الاسباب في هذه الظواهر انما حابه اننا نناقش الوضع بتاع المطلقه والارمله اللي معاها اطفال
في ظلم اجتماعي رهيب بتتعرض ليه الفئه دي من السيدات لانها مش خارجه من وفاه الزوج او الطلاق لوحدها لا دي معاها اولادها اللي هيا طبعا هتبدا معاهم رحله الشقاء في ازاي تعلمهم وازاي تكبرهم وتربيهم في ظل الظروف اللي احنا عايشينها دي طبعا مش خافي عليكم برضه ان الفئه دي بتبقى حظوظهم في الزواج قليله والخيارات اللي قدامهم ضيقه والمجتع كله عارف كدا وبالتالي اللي رايح يتقدم لها يشرط ويتامر على كيفه يعني مثلا احنا هنسكن سوا وابنك ميسكنش معانا او ييجي يعيش معانا بس مليش دعوه بمصاريفه وقيسوا بقى على ذلك
انا هقول مثل واحد بس شفته على ارض الواقع يعني مش من برنامج ولا من تلفزيون ولا حاجه واحده مطلقه وشابه ومعاها ولد اتقدملها رجل ثري وميسور وعلى مستوى رفيع علميا مش فاكره هو كان دكتور في الجامعه ولا طبيب بشري المهم هو كمان معاه ولد اتقدملها وعارف ظروفها وان ليها ابن وكل حاجه يقوم بقى يشترط ايه بصي نتجوز تربيلي ابني بس ابنك ميعشي معانا
ها دا ايه دا بقى يعني هيا مش انسانه دي وليها مشاعر يبقى شعورها ايه وانت بتطالبها تربيلك ابنك وتاكله وتشربه وهيا راميه ابنها يعني متوقع منها تعمل دا ازاي ؟
خلاص معدش في رحمه هي الناس نسيت حديث الرسول عليه الصلاه والسلام ان من لايرحم لايرحم وارحموا من في الارض يرحمكم من في السماء
ادلوقتي بقى عاوزين نتناقش سوا يعني ايه رايكم في الكلام دا كبنت لو جتلك واحده وشكتلك حاله زي دي تنصحيها انها توافق ولا ترفض مع التوضيح في الحالتين وكولد هل ممكن تعمل زي الزوج دا في يوم من الايام وتطالب الزوجه ان ابنها ميعش معاكم ليه اه وليه لا
وسؤال بقى للبنات لو تخيلتي نفسك في يوم من الايام لاسمح الله ومعاكي اطفال من تجربه سابقه هتتجوزي علشان تربيهم ولا هترفضي وتفضلي انك تتفرغي لتربيتهم بمجهودك ومن غير مايدخل حياتهم رجل غريب
وطبعا زي ما سالنا البنات نسال الاولاد ليه الرجل لما ينفصل عن زوجته او يتوفاها الله على طول يروح يتجوز ليه مبيبقاش عنده حته الخوف على ولاده من زوجه الاب دي بالرغم من الحكايات المرعبه اللي بنسمعها عن زوجه الاب وبهدلتها في الاولاد
وهل عايشتم حد في المجتمع عاش تجربه مماثله بس ياريت ياجماعه تبقى حاجات واقعيه مش من التلفزيون ولا المجلات
بانتظار ردودكم وارائكم اترككم في امان الله
