█◄ فكرتين حلوين ليا .. أدخل قول رأيك .. واحدة للأهلي و واحدة لمصر ►█
بسم الله الرحم الرحيم .. و
مساء الخير جميعاً ..,,
الحقيقة الفكرتين دول انا فكرت فيهم من حوالي سنة و نص .. و كنت كل يوم بتردد عشان اطرحهم .. و مع شوية تعديلات و تطوير .. أتمنى فعلاً انهم يخرجوا للنور و إن أي مسؤول يشوفهم او حتى يفكر فيهم .. هما مش هيكلفونا حاجه و ف نفس الوقت مفيدين جداً إن شاء الله .. الفكرتين واحده تخص النادي الأهلي ( و ممكن تطبق لأي نادي بس هتبقى صعبة و هتعرف ليه ) .. و الفكرة التانيه خاصة بمصر بصفة عامة و النظام الكروي ..,,
- الفكرة الأولى ( خاصة بالنادي الأهلي ) :
زي ما قولت .. الفكرة عندي من حوالي سنة و نص .. بس الحاجة ليها زادت جداً الفترة دي بسبب الأزمة الإقتصادية إللي ضربت العالم كله .. و خلت الاهلي يقلص تعاقداته بشكل كبير و ايضاً ميزانية فريق الكورة .. الفكرة تتلخص ف جولة لبطولات الأهلي ف كل محافظات مصر .. الدوري المصري العام .. و الكاف شامبيونز ليج .. و السوبر كب .. و غيره
هدف الجولة دي هي إتاحة الفرصة لمشجعي الأهلي ف كل مكان .. و أيضاً مشجعي باقي الفرق .. إلتقاط الصور التذكارية مع الكؤوس دي .. بسعر و ليكن 10 جنية للصورة أو زي ما يتم الإتفاق عليه .. و طبعاً في كتير من الاهلوية يحبوا يتصوروا مع الكؤوس دي .. هتبقى ذكرى جميلة و ممكن كل واحد يحتفظ بيها في ألبومه الخاص ]
مثال : بعثة من النادي الأهلي تطلع الإسكندرية مثلاً ( أو الإسماعيلية http://69.59.144.138/icon.aspx?i=icon_smile_big ) و معاها الكؤوس .. و طبعاً الجماهير بتبقى عارفه مسبقاً بالميعاد .. و يتم الحجز عن طريق تذاكر او كوبونات او ما شابه و ياخد سيريال نمبر عشان يدخل يجيب صورته من موقع النادي الاهلي و البعثة بالكؤوس تفضل ف المحافظة مثلاً اسبوع او اتنين .. لحد ما كل الراغبين يتصوروا ..
غير الفايدة المالية الرائعة إللي هتعود ع النادي الأهلي .. كمان كتير من المشجعين هيرتبطوا بالكؤوس دي .. و يحبوا يتصورا معاها تاني
بحسبة بسطة .. لو كل صورة ب 10 جنيه مثلاً .. لأي كأس .. ف إلتقاط 10 مليون صورة معناه 100 مليون جنيه صافي لخزينة الاهلي .. طبعاً الدخل ف اول مرة هيبقى الماكسيمم .. بس بعد كده برضو هيخش النادي دخل مش وحش عن طريق الصور ..
انا شخصياً واحد أحب جداً اتصور مع الكؤوس دي .. خاصة الكاف شامبيونزليج القديم .. العزيز على قلب كل أهلاوي [
قول رأيك ف الفكرة الأولى :
1- فكرة جميلة و ممكن تتنفذ و هتلاقي إقبال
2- فكرة حلوة .. بس جمهور الاهلي سلبي و مش هيدفع عشان يتصور
3- فكرة وحشة
__________________________________________________ __________________________________
- الفكرة التانيه ( خاصة بمنتخب مصر ) :
هي عامةً بخصوص الإحتراف .. كتير مننا شايفين ان الإحتراف مش استفدنا منه تقريباً .. و معظم اللعيبة إللي خرجوا محترفين مستواهم نزل و قعدوا إحتياطي .. طبعاً ده رأي انا بحترمه جداً بس إللي الناس لازم تعرفه إن إللي مصر بتعمله ده مش إحتراف .. ده تفطيس ..!!!
الاحتراف الحقيقي هو عبارة عن سلم إحترافي .. لازم اللعيب يبدأ من أوله .. من الأعمار الصغيرة .. من 16 لـ 21 سنة عشان يعتاد على أجواء الإحتراف و اللغة و الإلتزام و الكلام إللي كلكم عارفينه ده .. انما الإحتراف مش انك تطلع نجم سوبر من الدوري عندك لأوروبا .. انت كده مش استفدت حاجه لأنه بالفعل نجم و لعيب إمكانياته عليه و أوروبا مش هتضيف ليه كتير بالعكس ممكن تقلل منه .. يعني مثلاً دروجبا لما راح أوروبا مكنش هو دروجبا ده .. كان لعيب عادي و مستواه عادي و أوروبا و الأجواء الإحترافيه هي إللي عملت منه نجم و افضل لاعب افريقي .. و هكذا مع باقي نجوم افريقيا ..
يبقى إحنا لازم نتفق ان الإحتراف الحقيقي هو انك تخرج لعيبة صغيرة مغمروة بأعداد كبيرة .. يكبروا في أوروبا و يبقوا نجوم و بعدين يرجعوا يفيدوا منتخب مصر و الكورة المصرية .. زي ميدو كده بالرغم إنه معملش حاجه تقريباً للمنتخب .. بس نموذج للمشوار الإحترافي إللي لازم كل الناس تفهمه
الفكرة بإختصار .. ان القايمة بعد ما بقت 25 لعيب و طبعاً ده رقم قليل جداً لأي فريق محترم عاوز ينافس على اكتر من بطولة
و عشان نشجع الإحتراف .. انا اقترح ان قرار ينزل لأي نادي يخرج لاعبه للإحتراف الأوروبي بعقد بيع و ليس إعارة لأندية القسم الأول ف الدوريات .. الإسباني .. الإنجليزي .. الإيطالي .. الهولندي .. الفرنسي ــ يكسب مكان ف القايمة زيادة على ال 25 ..و بحد أقصى 5 أماكن !!
مثال .. نادي إنبي خرج المحمدي و عبد العزيز توفيق للإحتراف ف الدوريات المذكورة .. يبقى نادي إنبي دلوقتي قايمته تزيد لـ 27 لعيب + ال 5 الشباب
و في المقابل .. اي نادي يستقدم لاعب من الإحتراف من أي دوري أوروبي .. يخسر مكان ف القايمه و بحد أقصى 5 أماكن أيضاً
مثال .. نادي الأهلي استقدم محمد شوقي و عبد الظاهر السقا .. يخسر مكانين ف القايمة و تبقى قايمته 23 لاعب " أصلها ناقصة [
الحقيقة الفكرة دي لسه ماكتملتش و ممكن يكون فيها قصور شويه و عاوزه تعديل .. عشان كده إللي عنده أي إضافة يتفضل يقول
إيه رأيك ف الفكرة التانيه :
1- حلوة و هتشجع الأندية انها تخرج لعيبتها لأحتراف حقيقي
2- حلوة .. بس هيحصل فيها لعب كتير و تحايل
3 - مش حلوة
كده الفكرتين خلصوا
في آمان الله ..[
.,,
