هل سوء الظن حرص أم مرض؟؟؟!!!!!!!!!

[drH.M]

السلام عليكم ورحمة الله وبركاته

نفوس تتحطم...


بيوت تتهدم ..


وأسر تتشرد..


وصلات تتقطع...


وأعراض تتهم..


وصور مضيئة تشوه...


ومجتمعات تتردى، والسبب:


سوء الظن..!!!!!!!!.. الشك وسوء الظن مرض أم حرص؟!!


سوء الظن هل هو فعلاً من حسن الفطن ...؟!!


هل تلوّث المجتمع وخربت النفوس حتى يكون لسوء

الظن والشك بالآخرين خيار لا غنى عنه..؟!


هل سوء الظن مرض نفسي و داء اجتماعي أم ذكاء

اجتماعي محمود..و سلوك فطري عادي...؟!!


هل الشك فضيلة يحفظ للمرء خطوطه الخلفية أم أنه سوء نيّة وطويّة ..؟ّ


لماذا نشك بالآخرين، ويكون الشك والريبة أول ما يتبادر

إلينا حين نقيم سلوك الآخرين أو نفسر سلوكهم ...؟!


إلى أي درجة ينبغي أن يكون هناك هامش للشك

والحذر من الآخرين حتى لا نقع ضحايا غفلة ...؟!


هل حسن الظن وطيبة القلب تكفيان لبناء علاقة إنسانية مع الآخرين ..؟


وهل طيّب القلب محبوب أم مستغَلّ ومستغفَل من الآخرين ...؟


هل يجوز للمسلم أن يقع في عرض أخيه بحجة أن سوء الظن من حسن الفطن...؟!


لماذا لا نمتثل للخطاب الرباني الصريح:


(يَا أَيُّهَا الَّذِينَ آمَنُوا اجْتَنِبُوا كَثِيراً مِنَ الظَّنِّ إِنَّ بَعْضَ الظَّنِّ إِثْمٌ).


حفاظاً على علاقاتنا الإنسانية والاجتماعية...؟!


أين نحن من قول التمس لأخيك سبعين عذراً...؟!!

وخير الناس أعذرهم للناس...؟!
أرجو الرد في هذا الموضوع
منتظر ردودكو

[same7]

سوء الظن..!!!!!!!!.. الشك وسوء الظن مرض أم حرص؟!!

مرض لما اشك فى كل حاجه

سوء الظن هل هو فعلاً من حسن الفطن ...؟!!

مش مع كل الناس

هل تلوّث المجتمع وخربت النفوس حتى يكون لسوء الظن والشك بالآخرين خيار لا غنى عنه..؟!

لالالالالالا

هل سوء الظن مرض نفسي و داء اجتماعي أم ذكاء اجتماعي محمود..و سلوك فطري عادي...؟!!

مرض نفسى وداء اجتماعى

هل الشك فضيلة يحفظ للمرء خطوطه الخلفية أم أنه سوء نيّة وطويّة ..؟ّ

هو فقدان الثقه فى التعامل وعدم الاحساس بالامان

لماذا نشك بالآخرين، ويكون الشك والريبة أول ما يتبادرإلينا حين نقيم سلوك الآخرين أو نفسر سلوكهم ...؟!

صدقينى يا دكتوره لو جربتى مره تسوء الظن بحد بعديها لو ضميرك صاحى هتتعبى بجد
وجربى تانى تختلقى الاعذار طالما مش هتأثر عليكى بجد هتحسى براحه كبيره

إلى أي درجة ينبغي أن يكون هناك هامش للشك والحذر من الآخرين حتى لا نقع ضحايا غفلة ...؟!

الى درجه معقوله مع من تجبرك الدنيا للتعامل معهم
ومحوها عند التعامل مع الاخرين

هل حسن الظن وطيبة القلب تكفيان لبناء علاقة إنسانية مع الآخرين ..؟

بالتأكيد بالاضافه الى ذلك حسن المعامله والاحساس بالاخرين والحرص على مساعدة الغير

وهل طيّب القلب محبوب أم مستغَلّ ومستغفَل من الآخرين ...؟

مش مع كله برده
معالناس اللى تحب تتعامل معاهم بجد بتلاقى قبول وموده وحب بل تحسن للعلاقه الموجوده الى ابعد حدود
لكن مع الناس التانيه.....هناخد على دماغنا لغاية ما نقول بس

هل يجوز للمسلم أن يقع في عرض أخيه بحجة أن سوء الظن من حسن الفطن...؟!

لالالالالالالا

شكرا يا دكتوره بجد موضوع خطير

[pharmacistina]

الموضوع دة حاسة انه المفروض أوجهه لنفسي ..

أنا كتير ممكن أسيء الظن للأسف ..

بس عشان الواحد بيخاف من صداقة تكون خسايرها أكتر من أرباحها ..

أصبحت الثقة بتحتاج سنين عشان تتبني ..

سنين تتبني الثقة و تتهدم في ثانية بموقف ممكن يكون صدفة يكشف حاجات للواحد ..

كل دة لازم يخلي الواحد حذر جدااا ..

بس طبعا المفروض مش لدرجة سوء الظن لأنه حرام ..

أشكرك ع الموضوع

[قناع الذهب]

انا بصراحة مبحبش سوء الظن لانة ممكن يخلينى اشك فى كل اللى حواليا وشايفة ان لازم الانسان يحسن ظنة باللى حوالية لحد ما يثبت لية العكس
وبعدين ربنا قال (انا عند ظن عبدى بى ان خيرا فخير وان شرا فشر ) فلازم كلنا نحسن ظننا بالله وبالناس ونبعد تماما عن سوء الظن

[chocolata]

الموضوع جميل جدا يادكتور اسمحلى اقول ان طالما عارفين ان الدنيا طريقين خير وشر يبقى دايما الشك وسوء الظن هيبقى جزء من تكويننا طبيعى نشك لكن كل ماهو مبالغ فيه بيبقى فيه ضرر الثقه الزايدة وكذلك الشك المتواصل واحيانا بتقوم حروب ودماء بتسفك ودمار بيحصل على ايه على ذرة شك بتتمكن من النفس عشام كده لازم يبقى فيه حذر وشك حتى فى اقرب الناس وفى الصديق قبل العدو لان الوضوح والصراحه عادوا عمله نادرة اليومين دول للاسف واحيانا الشك والحذر وسوء الظن بينفعنا وينقذنا

[نورهان 2009]

مش عارفه اقول ايه بس بصراحه موضوع جميل
والزمن اللي احنا فيه دلوقت محتاج شويه حرص مننا
يعني الاعتدال شويه لا نسؤ الظن قوي ولا نحسنه قوي

[lost*soul]

الى يتعامل مع الناس لازم يكون عنده سوء ظن ف كل الناس الى اول مرة يشوفهم

[same7]

الى يتعامل مع الناس لازم يكون عنده سوء ظن ف كل الناس الى اول مرة يشوفهم

اختلف مع الرأى ده وبشده

[Amira]

سوء الظن ده مرض اجتماعى وللاسف انتشر بطريقه مش طبيعيه

كل ماحد يعمل حاجه او يقول كلمه الشخص التانى ياخدها انه بيهزأه او بيتريق عليه

المفروض الواحد يفترض الاحسن حتى يثبت العكس

الواحد لو شك فى كل حد يبقابله مش هيعرف يتأقلم مع اى شخص

وهيبقى ورا كل تصرف الناس بتعمله قدامه سبب (اذا حد ضحك له يبقى عشان مصلحه& اذا هزر معاه يبقى بيتريق عليه كده يعنى)

خير الامور الوسط
الانسان يعامل الناس حلو بس بحرص (يعنى زى مايكون حطه فى اختبار لفتره )
لحد مايثبت له انه وحش فايبعد عنه او كويس فيثق فيه




شكرا على الموضوع بجد مهم و بقى منتشر جدا

[Dr nour]

موضوع مهم ويستحق الرد
بالنسبه لموضوع الطيبه وان الشخص دا ممكن يستغل من الآخرين
ان الانسان يكون طيب دا شئ محمود وكويس بس لازم نفرق بين الطيبه وانعدام الشخصيه انك تكون طيب ومتساهل فى تعاملاتك مع الآخرين وتلتمس ليهم الاعذار بس مع كل هذا بتعرف تحافظ على نفسك وعلى حقوقك ومش بتضيعها من وجهه نظرى دا هو التعربف الصحيح للطيبه اللى بنعتبرها ميزه فى الشخص دا وبنتمنى وجودها فى كل المحيطين بينا
لكن انك تكون متساهل فى حقك جدا لدرجه انك تضيع حقوقك وتسيب نفسك لاستغلال الأخرين ليك لأنك اصلا مش عارف ازاى تحافظ على حقك اظن ان دا مش طيبه أكتر منه انعدام شخصيه والشخص دا اكيد هيتعرض لاستغلال الآخرين واظن ان فى هذه الحاله دا شئ مذموم مش هنحب وجوده
_________________
وبالنسبه لموضوع الشك وسوء النيه فدا شئ صعب جدا مع وجوده بتبقى الحياه صعبه جدا والسعاده بتكون مختفيه يعنى ازاى هتعامل مع شخص وانا جوايا شك وسوء نيه لأى تصرف بيعمله هيبقى التعامل فى هذه الحاله صعب جدا طب لو كان الموضوع دا عام وان انا اكون بشك فى كل المحيطين يعنى أكون مريض بالشك وسوء النيه بالتالى هتبقى حياتى جحيم وكذلك حياه المحيطين بيا
للأسف فى حياتنا بنقابل ناس كتير منهم اللى بيديلنا درس اننا قد ايه اخطأنا فى الحكم عليه واعطيناله ثقه مش فى محلها الأمر اللى بيجعلنا نشك فى كل المحيطين بينا وبالتكرار بنكون سيئين النوايا بيهم جدا فلازم نتيقن اننا ممكن هنلاقى اناس فى طريقنا هيعلمونا الشك بس لازم نعرف ان مع ذلك هنقابل اشخاص صفاتهم متلائمه معانا وان من الظلم اننا نأخذهم بذنب لم يرتكبوه وان الخطأ هو خطأنا احنا فى اختيارنا لذلك المفروض اننا فى أول تعاملاتنا مع اشخاص جديده نكون حذرين لحد لما نعرف شخصيتهم ونقدر نقيم تقييم صحيح والتالى هيختفى سوء النيه والشك
انا آسفه جدا على الاطاله وبشكرك يادكتور على طرح الموضوع دا