امسك نفسك!!! نكتة كرة البنج بونج الحمرا

[ELANDALEEB]

نكته بقى مش تشيب الكتكوت بس لأ دى بتقتل وتحرق الدم وتوتر الاعصاب وتجيب شلل الاطفال
اتحدى اللى يقول انها حلوة ويالا بينا نقرأها

واحد محترم ربنا رزقه بولد وكان نفسه ربنا يرزقه بولد
قال أنا ان شاء الله هربيه أحسن تربيه وأدخله أحسن مدارس وهعملله كل اللى نفسه فيه
المهم الولد دخل المدرسة وماشاء الله أحسن ولد فى الفصل والمدرسين كلهم بيحبوه وآخر السنه طلع الأول على المدرسة، ابوه مبسوط قوى بيه، قال له ها يا حبيبى نفسك أجيبلك ايه هدية؟
الولد: أنا عايز كورة بنج بونج حمرا
أبوه: من عينيا يا حبيبى أجيبلك كوره بنج بونج حمرا
وتمر الأيام والولد يوصل سنة سادسة، وكالعادة يطلع الأول على المدرسة
الأب: ها ياحبيبى أؤمرنى نفسك أجيبلك ايه؟
الابن: أنا يا بابا نفسى فى كوره بنج بونج حمرا
الراجل استغرب بقاله خمس سنين كل سنه بيجيبله كوره بنج بونج حمرا لكن الأب قال يمكن لما يكبر يعقل ويطلب حاجات طبيعية زى باقى الأولاد.
الولد دخل أولى اعداى وماشاء الله باين عليه انه هيكون من العباقره وفعلا كالعاده نجح وطل الأول على المدرسة.
الأب: ها يا حبيبى أنا مبسوط منك قوى، نفسك أجيبلك ايه هدية؟
الابن: أنا يا بابا عايز كورة بنج بونج حمرا
الأب: يا حبيبى البيت اتملى كور بنج بونج حمرا، اطلب حاجه تانية
الابن: عشان خاطرى يا بابا أنا نفسى تجيبلى كرة بنج بونج حمرا
وتمر الأيام ويطلع الولد الأول على الشهادة الاعدادية فى المحافظ، طبعا أبوه من نفسه راح اشتراله كوره بنج بونج حمرا، الولد فرح بيها كأنه أول مره يجيب كورة بنج بونج حمرا
ودخل الولد ثانوى ولما طلع الأول على الجمهورية فى الثانوية العامة أبوه قال له:
الأب: ما شاء الله يا حبيبى كبرت وهتدخل كلية الهندسة، ده اليوم اللى بحلم بيه، أنا عايزك تختار أحسن نوع عربية وأنا هجيبهالك يا حبيبى
الابن: بصراحه يا بابا ومن غير ما تتنرفز أنا مش عايز غير كورة بنج بونج حمرا
الأب: بص يابنى انا احترت فيك، اللى يسمعك يقول مجنون، ايه حكاية الكوره البنج بونج الحمرا دى؟
الابن: يا بابا مش أنا دايما رافع راسك ومتقدم فى دراستى وبسمع الكلام، عشان خاطرى تجيبلى الحاجه اللى نفسى فيها، كوره بنج بونج حمرا
الأب: أمرى لله
وتمر الأيام والولد ينجح فى بكالوريوس الهندسة ويطلع بتقدير امتياز مع مرتبة الشرف ويتعين معيد فى الكلية.
الأب: اهى جت اللحظة اللى مستنيها من زمان
الابن: ده بفضل الله ثم بفضل رعايتك ليا يا والدى
الأب: ها انت كبرت وعقلت وانا عايز أجوزك
الابن: بصراحه يا بابا انا نفسى فى كورة بنج بونج حمرا
الأب: يابنى انت عايز تموتنى، البيت ماليان كور، طيب على شرط انى أجوزك وأجيبلك كورة بنج بونج حمرا اللى انت عايزها
وتمر الأيام والابن وهو راجع من الكلية تحصل له حادثة ونقلوه على المستشفى بين الحياة والموت، الخبر نزل على أهله زى الصاعقة وراحوله على المستشفى
الأب: ابنى حبيبى
الابن: الظاهر ان اجلى جه يا ولدى
الأب: (وهو فى منتهى الحزن وبيبكى) يابنى أرجوك قبل ما تموت نفسى أعرف حاجه
الابن: (بوهن شديد) ايه هى يا والدى
الأب: ايه سر حكاية الكوره البنج بونج الحمرا؟؟؟؟؟؟؟؟؟؟؟؟
الأبن: أنا هقوللك يا ولدى، حكاية الكوره البنج بونج الحمرا
الأب: ها قول
الابن: حكاية الكوره البنج بونج الحمرا
الأب: ها يابنى
الابن: حكاية الكوره البنج بونج الحمرا
وفجأة مات الابن

ههههههه اكيد عجبتكوا ومستنى ردودكوا وزى مااتفقنا اوعى حد يدعى عليا
لكم منى تحياتى
العندليب

[Yearning]

انا اول مره اعرف ان كوره البنج بونج في منها الوان غير الابيض
النكته دي بتفكرني بالنكته بتاعة البنزين خلص

[Larine_Resala]

لاحظ ان احنا حذرناك علشان كدة ماتلومش الا نفسك واستحمل بقى اللي هيجرالك

[sekoseko]

انا بقى اللى عايزة اعرف بجد ... ايه سر كرة البنج بونج الحمراء ؟!!

[mansalkaloid]

سمعتها قبل كده
بس متعتها الحقيقية فى انك تسمعها
هتكون امتع بكتيرمن انك تقرأ
هههههههههههههههههه
بتفكرنى بقصة الموتوسكل الاحمر والموتوسيكل الازرق

[ELANDALEEB]

ايه سر كرة البنج بونج الحمراء ؟!!

والله ياsekoseko سر كرة البنج بونج الحمرا مات مع موت الإبن وهو ايه هى دى بقى رخامة النكتة انك تبقى نفسك تعرف ايه النهاية وبرضه ماتوصلش لأى حاجه ههههههههه

وشكرا للجميع على المشاركة
العندليب

[ELANDALEEB]

بتفكرنى بقصة الموتوسكل الاحمر والموتوسيكل الازرق

شكرا يادكتور على المشاركة وياريت تحكي لنا نكتة الموتسكل الأحمر والموتوسيكل الأزرق لإنى بجد ماسمعتهاش قبل كدة
نحن فى انتظارك يادكتور
مع تحياتى
العندليب

[SmSm]

no comment

[sunshine]

[:|©؛°¨¨°؛©الصيدلى الذهبى©]

وده من ايه لامؤاخذه والا انت طول عمرك كده