حبيبتى لن انساك
حبيبتى لن أنساك
كعادة كل يوم طالعين من الراوند......
لكن لم يكن هذا اليوم كأى يوم...
اتصالات كتير على الموبايل...كلام غريب.... والكل بيسأل فين هديل..؟؟؟!!
فيه ايه يا جماعه ...بيقولوا هديل ماتت..
ماتت.... ازاى...؟؟؟؟!انا لسه مكلماها امبارح..!!!!!!!!!!!
حصلت حادثه على الطريق وهى رايحه الكليه.....
يا جماعه اتأكدوا الاول..انتو متأكدين...؟؟؟!
لكن كان القدر...انها كانت هديل
عارفين مين هديل؟؟؟؟خلونى أحكى لكم شويه عن هديل:....
هديل كلمه تساوى سباق...سباق مع الوقت...سباق مع الدنيا..سباق الثواب..سباق للجنه
سباق علشانك يا رب.........
فى المذاكره والتفوق تلاقيها من المتميزين ...وتساعد كل اللى حواليها انهم يبقوا زيها وأحسن منها كمان..تشرح لنا ،تفهمنا،تقول لنا هى سمعت ايه وذاكرت ايه...تشجعنا اننا ننزل مستشفى ونتعلم......
استحاله تسمع منها كلمة لأ على أى طلب
فى معاملتها مع الناس..قريبه من الكل..تحب تعرف كل البنات وتقرب منهم..القريب والبعيد.. سواء كنتى صديقه او زميله اكيد كلنا حسينا بطيبة قلبها وحبها للناس ولو من موقف
فى حبها لربنا ........كانت بتحبه اوى نفسها ترضيه أوى..نفسها توصل للناس قد ايه ربنا بيحبهم.. وانهم كمان لازم يحبوه ويقربوا له ...بتوصلها من جوه قلبها من غير شعارات ..بموقف ....بكلمه...بمشاعرها.
فى حبها للرسول....كانت دايما بتحب تنقل سيرته......تحاول تفهمها بجد وتعرفها للناس...كان شعارها دينا جميل وسيرتنا بجد تستاهل ان احنا نطبقها ...كتبت مواقف من السيره وكانت تتناقش معانا ازاى نطبقها فى واقعنا...وعلمتنا ازاى نستفيد من أى درس فى السيره ونطبقه فى حياتنا ...
جمعتنا على هدف واحد وهو الحب فى الله........
علمتنا ازاى نحب ربنا بجد...وازاى نعمل حاجه علشان الدين.......وازاى نكون فخورين بيه.....قضينا أيام من اجمل ما يكون...كان بيجمعنا شعار الحب فى الله
مع أهلها وفى بلدها هديل من صغرها وكل الناس بتحبها وتقدرها وتحترمها (مدرسين وزملاء) كانت مثال للبنت المتفوقه ،المؤدبه،المحترمه...اخواتها متعلقين بيها جدا...هى الاخت الكبيره.......وهى القدوة وهى اللى بتذاكر لهم وبتشرح لهم..
مع العائله دكتوره هديل كانت دايما موجوده مع أى حد بيتعب أو اى حد يروح المستشفى أو يسأل فى استشاره حتى لو مش عارفه بتساعد وتسأل.....المهم تخدم اللى قدامها
فى كليتها دايما هديل كان لها أثر فى كل مكان......عمرها ما قالت وانا مالى.....وهتعب نفسى ليه....تحاول تصلح خطأ اللى قدامها بكل حب....فكرت معاها ازاى ممكن نقدم اى مساعده لزملائنا عملنا اسرة فى الكليه بدأنا ب"معا لنصرة الحبيب"وكملنا مسيرتنا فى أسرة يلا يا شباب.عملت حاجات كتير فى الاسرة منها واخرها "حملة معلومه=حياه"كانت بتحاول فيها توصل كل اللى اتعلمته فى كورس الاسعافات الاوليه...ومع انها كانت بتتعب فى كل حاجه بتعملها فى الاسره الا ان اسمها كان اخر حاجه يهمها انه يظهر او الناس تعرفه.....المهم الفكره توصل.
وقبل وفاتها كانت بتفكر فى حاجات كتيير منها:--
حملة غزه ونصرة غزه والمقاطعه وانها تعرف الناس بتاريخ فلسطين ...حتى بعد ما الحرب انتهت بدأت تعمل جروب على الياهو هوgaza heart وتعرف الناس باللى بيحصل......وكانت بتدخل على facebook و تبعت للناس ....وقالت لى هنعمل حمله كبيره نشجع الناس على المقاطعه ونفكرهم بغزه ونكررها كل فتره.
كانت عايزه تعمل معرض ادبى للاسره توصل فيه افكارها منها :-
خايف تقرب من ربنا ليه...ايه الحاجات اللى منعاك
ازاى تشوف ربنا فى كل حاجه بتحصل فى حياتنا.
كانت مجهزه ومتفقه مع اصحابها على جدول حفظ قرآن ..وتشجعهم يروحوا و يحفظوا
كانت متفقه مع اصحابها ينزلوا المستشفى ويشوفوا حالات cardio كتير ويذاكروا clinical وتشرح لهم اللى مش عارفينه
كانت عامله نوته لما تروح المستشفى تكتب فيها الحالات وعلاجها بسهوله وتوصلها باسلوب مبسط
كنا مظبطين اننا نروح ..زياره للجرحى الفلسطينيين فى معهد ناصر وكانت بتشجعنا وفعلا بدأنا نجهز للزياره ونشوف هنروح امتى وهنشترى لهم ايه..وكنا محتارين اوى نشترى لهم ايه..لغاية ليلة وفاتها اتفقنا نجيب لهم ورد وشهادة تقدير ...بس للاسف القدر كان اسبق من زيارتها للجرحى الفلسطينيين.
كانت متفقه انها (فى نفس اليوم اللى ربنا توفاها فيه) تروح مجمع الفردوس الخيرى لانهم محتاجين ناس تعلم الاسر المحتاجه ..
رحلت هديل...رحلت لكن لتبقى ...
رحلت لتعلمنا كيف يكون لنا هدف فى الحياه نعيش لأجله ونموت لأجله...
رحلت لتعلمنا كيف نترك اثر فى الناس ...نذكر به بعد رحيلنا ...
رحلت هديل زى ما قبلها رحلت دينا والله أعلم مين تانى هيموت فى دفعتنا ...
مستنين كم واحده تموت عشان نفوق من الغيبوبه دى ....لازم نلحق نفسنا قبل ما نكون احنا الرساله الجايه اللى هتفوق غيرنا .....وساعتها هيجى الندم وهيكون لسان حالنا ((رب ارجعون*لعلى اعمل صالحا فيما تركت))
وساعتها هيجى الرد ((كلا انها كلمة هو قائلها ومن ورائهم برزخ الى يوم يبعثون ))
ياريت كل واحده فينا تتخيل انها اللى كانت مكان هديل دلوقتى ...يا ترى كانت هتقول ((رب ارجعون))ولا كانت هتبقى فرحانه بمكانها فى الجنه....؟؟؟؟؟؟؟؟؟؟؟؟؟؟
ولو كنتى من اللى هيقولوا ((رب ارجعون)) ...طيب اعتبرى نفسك رجعتى خلاص ودى فرصتك الاخيره...
يا ترى هتستغليها ولا هتفضلى زى ما انتى كده لحد ما تموتى..؟؟؟وساعتها هيكون لسان حالك:-
((يا حسرتا على ما فرطت فى جنب الله))
واخيرا ..رحلت هديل ..رحلت لكن لتبقى....
رحلت حتى يطول فراقنا...
"ولكن لا ليس فراق ..وانما لقاء اخر ليس فى دنيا الغرور وانما فى دار الخلود ...سأظل انتظر لقاءنا الابدى وستظلى دوما فى وجدانى ....لن أتأخر دوما عن عمل يحسب فى ميزان حسناتك ...لن أبخل عليك بدعاء فى ظلمة ليل او ساعة افطار بعد صيام..."
زى ما كتبتى الكلام ده ووزعتيه على البنات بعد وفاة زميلتنا دينا ....
انا بكتب لك الكلام ده وبقولك :
لن انساك يا من علمتينى معنى الحياه
رد مع اقتباس
