الاسلاك الشائكه

[summer breeze]

بسم الله الرحمن الرحيم

كل سنه وانتم جميعا طيبين يااعضاء منتدانا الغالي ويارب اجازه حلوه وجميله عليكم والترم التاني يبقى احلى من الاولاني يارب
ندخل بقى في موضوع النهارده على طول :::::::::::

الحقونيييييييييييييييي ابني مناعته ضعيفه ......ابني بيتدمر ........ابني ضاع خلاص .........

دي كانت صرخه الم انطلقت متاخره قوي من حلق ام وانحدرت على عنيها دمعه ممزوجه بحرقه وهي شايفه ابنها اغلى حاجه عندها بيروح منها وهي مش قادره تعمل اي حاجه ...........

طبعا المتوقع دلوقتي واللي اغلبنا رسمه في خياله ان السيده دي في مستشفى وبتصرخ مستنجده بالاطباء .....لكن مش هي دي حقيقه الموقف الام دي بتصرخ في القسم !!!!!!!!!!!! ايوه بتصرخ في قسم البوليس !!!!!!!!!!!!!!!!
وعشان نفهم تفاصيل الحكايه تعالوا ناخدها من البدايه
الام دي لما كانت بتقول ابني مناعته ضعيفه مكنتشي ابدا تقصد مناعته الصحيه (كريات دم بيضاء وحمراء وصفائح دمويه ) انما كانت تقصد مناعته الاجتماعيه بطل قصتنا دي مناعته الاجتماعيه زيرو والحاله دي طبعا مش راجعه لسبب وراثي ولا لانه قعد جنب زميله اللي في الفصل اللي عنده نقص في المناعه الاجتماعيه فعداه ونقله الفيروس وانما راجعه للاسلوب اللي اتربى بيه بطلنا
الولد دا اتربى باسلوب الاسلاك الشائكه كل حاجه في حياته عيب غلط ميصحش متعملشي كده عاوز الناس تقول عليك ولد قليل الادب ولد مش كويس او مش متربي من غير ياعيني حتى مايكون له الحق في الاعتراض او الدفاع عن اللي هو عمله او حتى محاوله فهم هو اللي عمله دا غلط ليه ؟؟؟؟؟؟؟؟؟
وكبر صاحبنا وكبرت معاه مخاوفه بيسمع حاجات كتيييير قوي من زمايله في المدرسه من جيرانه بيقرا في الصحف او بيشوف في التلفزيون نفسه يفهم نفسه يكتشف نفسه يسال بس للاسف مش قادر لان كل حاجه من دول في نظره مغلفه بسلك شائك ولو قرب منها علشان يكتشفها هيتخربش وهيتجرح وهينزف ودي طبعا كنايه عن اللي اهله هيعملوه فيه لو فكر انه يسال
وكمل بطلنا حياته بشخصيته الاجتماعيه الهشه دي لحد لما وقعه حظه العاثر فريسه لاصحاب السوء وكانت نقله جديده في حياته نقله جديده وجميله كمان لقى معاهم كل اللي كان بيتمناه بيتكلم وبيعرف وبيتعلم وبيسال لا والاحلى كمان انه لو سال بيلاقي اجابات مكنش بيدقق ابدا في الاجابه اللي بيسمعها هي صح او غلط لان سعادته بانه بيتعامل كبني ادم اكبر بكتير قوي من صحه الجواب .......وطبعا بقيه السيناريو انتم عارفينه انحرف ومشي في طريق الضياع ضاع الولد وضاعت عيلته معاه ووصلنا لاول سطرين في الحكايه وصلنا للام اللي بتبكي حزنا والما على الحاله اللي وصلها ابنها
ودلوقتي بقى بعد ماعرفنا اصل الحكايه وشفنا المشكله من البدايه في اكتر من سؤال محتاجين نسالهم
هل حد فينا قابل شاب او بنت منطبقه عليه الحاله دي ؟ وهل دي فعلا شخصيه موجوده في الواقع ولا دي شخصيه دراميه قوي مكانها التلفزيون والسينما ومش موجوده على ارض الواقع ؟
وياترى البطل او البطله دول جناه ومجرمين ولا ضحايا ومجني عليهم ولو كان بايدك الحكم عليهم تحملهم المسؤوليه كامله ؟
اخر سؤال بقى ايه رايك في استخدام كلمه عيب هل هي بديل اجتماعي لكلمه حرام ؟ولا مينفعشي يؤدوا نفس المعنى ؟

ده كان موضوع النهارده يارب يعجبكم وتتفاعلوا معاه بستنى ردودكم واراؤكم والى ان يحين اللقاء اترككم في رعايه الله وحفظه

[pharmacistina]

موضوع جميل جدااااا زي العادة منك يا سمر ..
أشكرك عليه جدااااا

هل حد فينا قابل شاب او بنت منطبقه عليه الحاله دي ؟ وهل دي فعلا شخصيه موجوده في الواقع ولا دي شخصيه دراميه قوي مكانها التلفزيون والسينما ومش موجوده على ارض الواقع ؟

أيوة طبعا شفت الشخصية دي وهي بالفعل موجودة .. أعتقد انها أكتر في مجتمع البنات منها عند الولاد .. لأن البنت تكثر حولها زراعة الأسلاك الشائكة ..

وياترى البطل او البطله دول جناه ومجرمين ولا ضحايا ومجني عليهم ولو كان بايدك الحكم عليهم تحملهم المسؤوليه كامله ؟

ضحايا في رأيي لأفكار غلط زرعها الأب و الأم فيهم من صغرهم ..
عيب و غلط و الناس تقول علينا ايه ..
كل حاجة عيب و غلط ..
حتى لو طفل اتكلم قدام الناس كتير تلاقي الأم تلومه ( عيب و ايه اللي انت قلته و ايه اللي انت عملته )
لااااااا .. عمر دي ما كانت التربية السليمة ..
لابد للأب و الأم انهم يفهموا أولادهم الصح و الغلط مقترن دايما بـ ( لماذا ) ..
عيب يا بنت تتأخري برا البيت لوحدك ؟؟
عشان بنخاف عليكي حد يضايقك ..

ليه عيب يا بنت انك تكوني على علاقة بشاب ( علاقة غير رسمية ) بدون علم أهلك ؟؟
لأن دة حرام ربنا نهانا عنه .. وعلشان العلاقة بين البنت و الشاب ليها نظام وقواعد ربنا حطهالنا .. علشان انتي غالية وعندك كرامة و دة شيء بيقلل منك ..

ليه يا ولد غلط انك تشرب سجاير وتروح سايبر مثلا تتفرج على حاجات مش كويسة ؟؟
علشان دة حرام و لأن العين بتشهد ع الانسان يوم القيامة .. علشان السجاير ضارة و هتتعب صحتك ..
علشان علشان ....
من قواعد التربية السليمة في رأيي ان الأب و الأم يقنعوا أولادهم بالصح ..
بدون أوامر مطلقة ..
لأن لو الأب و الأم بيعطوا أوامر ويجبروا الأبناء انهم يعملوها , مجرد ما ينطلق الابن أو البنت و يلاقي نفسه لوحده خلاص راحت الأسلاك الشائكة و انقطعت كلها ..
لو بنت أو ولد مثلا طلب يروح حفلة فيها رقص أو فيها حاجة الأب و الأم عارفين انها مش كويسة ..
أنا لو مكانهم هاخد البنت أو الابن و هروح معاهم .. هنتظر انهم بنفسهم يحكموا ع الوضع ..
و أنا متأكدة انهم لو متربيين ع القيم اللي انتي زرعتيها هيرفضوا الوضع الغلط من جواهم ..
مش انتي اللي تفرضي أوامرك عليهم ..
زي أب أو أم يلغي النت من بيته عشان يمنع أي حاجات وحشة ..
يا أب و يا أم مانتوش عايشين لولادكم العمر كله .. و مهما عملتوا من أسلاك شائكة هييجي يوم و تنتهي .. علموهم قيم و مبادئ منكم بيكتسبوها تساعدهم ع الحياة ..
المبادئ دي هي اللي تخلي البنت لو سافرت بعيد عن أهلها تفضل أخلاقها كويسة ..
وتخلي الشاب يرفض يشوف أي فيلم هابط ..
لو انغرس في الأطفال مبدأ ( الضمير ) ومبدأ ( مراقبة الله ) .. ما نخافش عليهم حتى لو سافروا فين .. ولا نخاف عليهم لو وسط ناس وحشين .. معاهم قيم ومبادئ ما نخافش عليهم ..


اخر سؤال بقى ايه رايك فياستخدام كلمه عيب هل هي بديل اجتماعي لكلمه حرام ؟ولا مينفعشي يؤدوا نفس المعنى ؟

ينفع طبعا .. بل بالعكس كلمة حرام أفضل كتير للنهي من كلمة عيب ..
عارفة ليه ؟؟
لأن كلمة عيب = الخوف من الناس و كلامهم
كلمة حرام = الخوف من الله عز وجل
و الخوف من الله أبقى و أقوى من خوف الناس ..

شكرا ع الموضوع المميز جداا
معلش ع الاطالة و المشاركة ملخبطة مش عارفة في ايه متغير في المنتدى ..

==============



Gohary

[Pharmcist_girl]

لأن كلمة عيب = الخوف من الناس و كلامهم
كلمة حرام = الخوف من الله عز وجل
و الخوف من الله أبقى و أقوى من خوف الناس ..

..

اولا اشكرك د_سمر على الموضوع اللى للاسف موجود فى مجتمعنا بصورة وبنسبه عاليه

وفى البنات و الاولاد

وده عشان مفيش الحوار بين الوالدين و الابن او البنت وده قمه الغلط

و الضرب ساعات و الصوت العالى والتهزئ فى سن لا يقبل الابن او البنت فيه فكره انهم صغيرين وممكن يتهزؤا

الحوار الهادئ هو الحل

ثانيا الجملتين اللى قالتيهم د_فارستينا حلويييييين اوى بجد وياريت الناس تفكر كده

[Dr nour]

ياهلا بمواضيعك الجميله اللى بتنور المنتدى ياسمر
التربيه دى شئ مهم جدا لأن
للتربية دور كبير في صياغة شخصية الانسان وترشيد سلوكه وتعزيز ذاته ، وليست اي تربية بامكانها فعل ذلك وانما التربية القائمة على قواعد سليمة .
وللاسف فان الاسر لا تربي ابناءها تربية رشيدة ، وانما كثيرا ما تكون خاطئة تؤدي الى نهايه مؤلمه
عندما نولد لا نعرف الصواب والخطأ لا نعرف شئ عن الحياه وعما يحيط بنا نريد ان نستكشف ونعرف ولكن تواجهنا مشكله كبيره ألا وهى مشكله العيب كلمه نسمعها كثيرا ونرددها لكل فعل نراه لا يتفق اما مع عادات والتى من الممكن ان تكون عادات موروثه من قديم الازل كما انها عادات خاطئه ولكننا تربينا بهذه الطريقه ونريد ان يكون ابنائنا نسخه مننا فى كل شئ والمضحك فى هذا اننا حتى نريد الطفل ان يفعل مايفعله البالغين وان يتصرف بحكمه شديده ونريد برمجته على فعل معين ونمط لا يقبل التغير مما ينتج عنه اننا نفقده الثقه بنفسه نثبط همته لمعرفه المزيد وهذا مايؤثر بالسلب على ابداعته هذا بالنسبه للطفل فما بالك بالشخص الأكبر سنا لأننا والحمد الله كلما كبر الشخص كلما فرضت عليه بعض القيود وكلما زادت كلمه عيب من غير مانفهمه ليه عيب وينتج عن ذلك غياب الحوار بين الوالدين وابنائهما لأن الابن قد ايقن انه لا فائده من النقاش فلن يصل به الى شئ بل بالعكس سوف تزداد معه الحده فى التعامل ورد الفعل لذلك يبحث عن اجابات لما يريد معرفته فى الخارج ومن الممكن بل من الشائع ان يصادف فى طريقه أصدقاء السوء اللذين يوصلون له المعلومه الخاطئه ولكنه فى هذه الحاله وكما ذكرتى لا يفكر هل هى صحيحه أم لا كل مايشغل باله هو المعرفه لبعض الأمور التى لم يعرفها والتى حينما أراد معرفتها وجد نفسه أمام حائل كبير مزعج اسمه العيب
والمشكله تزداد حده وتتفاقم حينما نصل الى مرحله المراهقه ففى هذه المرحله نجد التمرد والكل يريد تحطيم القيود التى أصابته بالمعاناه طوال حياته ليعلن عن نفسه ويتخلص من شخصيته المحطمه التى حطمتها هذه القيود
للأسف هذا مانفعله باينائنا بهذه التربيه التى يعتقد البعض انها الطريقه المثاليه فبهذه الطريقه كل مانفعله اننا نضع ابنائنا بأنفسنا أمام طريق الضياع فمن الأولى ان نحصنهم بالمعرفه ومساعدتهم على تكوين شخصيه سليمه قادره على تحمل المسئوليات والتمييز بين الصواب والخطأ فعلينا ان نحترم ابنائنا ونحترم عقولهم ونصل اليهم ليس بالامر ولكن بالعقل والتفاهم
ويكفينا ان نمتثل لأمر رسولنا الكريم
قال رسول الله صلى الله عليه وآله وسلم :
«أكرموا أولادكم وأحسنوا آدابهم»
«رحم الله عبداً أعان ولده على برّه بالاحسان إليه ، والتألف له ، وتعليمه وتأديبه»

هل حد فينا قابل شاب او بنت منطبقه عليه الحاله دي ؟ وهل دي فعلا شخصيه موجوده في الواقع ولا دي شخصيه دراميه قوي مكانها التلفزيون والسينما ومش موجوده على ارض الواقع ؟

طبعا الشخصيه دى شخصيه واقعيه وللأسف فى أشخاص كتير منطبق عليهم الحاله دى

وياترى البطل او البطله دول جناه ومجرمين ولا ضحايا ومجني عليهم ولو كان بايدك الحكم عليهم تحملهم المسؤوليه كامله ؟

طبعا ضحايا ومجنى عليهم والمسئوليه مشتركه بينهم وبين ابائهم

اخر سؤال بقى ايه رايك في استخدام كلمه عيب هل هي بديل اجتماعي لكلمه حرام ؟ولا مينفعشي يؤدوا نفس المعنى ؟

ليست بديل لكلمه حرام كما انهم لا يؤدوا نفس المعنى
وللمره التانيه بشكرك ياسمر على الموضوع المهم ده وآسفه على الاطاله (عاده فيا اعمل ايه)

========================



Gohary

[summer breeze]

موضوع جميل جدااااا زي العادة منك يا سمر ..
أشكرك عليه جدااااا

ربنا يخليكي يا فارماستينا دا بس من ذوقك والحمد لله ان الموضوع عجبك
بصراحه يافارماستينا رايك اكثر من رائع وبصراحه مش هقدر اني ازيد عليه حاجه بس انا هختار اكتر حاجه عجبتني وهعلق عليها

من قواعد التربية السليمة في رأيي ان الأب و الأم يقنعوا أولادهم بالصح ..
بدون أوامر مطلقة ..
لأن لو الأب و الأم بيعطوا أوامر ويجبروا الأبناء انهم يعملوها , مجرد ما ينطلق الابن أو البنت و يلاقي نفسه لوحده خلاص راحت الأسلاك الشائكة و انقطعت كلها ..

كلام سليم 100% لان لو فعلا الولد او البنت اقتنعوا ان الشيء دا غلط مش هيعملوه وهيبقى الرفض نابع من جواهم مش مجرد امتناع عن عمل الغلط بسبب خوفهم من اب او ام لانه طبيعي بمجرد مايغيب المانع هيعملوا الغلط
وعلى فكره ممكن يعملوا غلط وهما مبسوطين جدا لانه بيحسسهم بالتحرر من سلطه الاهل اللي خنقاهم دي

زي أب أو أم يلغي النت من بيته عشان يمنع أي حاجات وحشة ..

دي بقى نقطه مهمه قوي وفعلا والله في اباء وامهات بيعتمدوا ع الاسلوب دا في التعامل مع اولادهم بدعوى ان هما كده بيبعدوا عن الشر وبيغنوله ويقلك واحنا ليه اصلا نحطلهم نت ونقعد في قلق دا بيعمل دا بيسوي ما ناخدها من قاصرها ونتقي الشبهات او مثلا اب يقول مش هجيب لبنتي موبايل علشان اضمن انها مش هتكلم اولاد وناسي ان هيا فعلا لو في نيتها تعمل كده عندها مليون طريقه غير الموبايل

لأن كلمة عيب = الخوف من الناس و كلامهم

النقطه دي بقى انا هتكلم فيها ان شاء بس في ردي على نور اوكي ياجميل
وفي النهايه بشكرك على مشاركتك الرائعه واللي دايما تعطي الموضوع مذاق خاص تسلمي ياجميل ودمتي بالف خير

[summer breeze]

اولا اشكرك د_سمر على الموضوع اللى للاسف موجود فى مجتمعنا بصورة وبنسبه عاليه

وفى البنات و الاولاد

وده عشان مفيش الحوار بين الوالدين و الابن او البنت وده قمه الغلط

و الضرب ساعات و الصوت العالى والتهزئ فى سن لا يقبل الابن او البنت فيه فكره انهم صغيرين وممكن يتهزؤا

الحوار الهادئ هو الحل

ثانيا الجملتين اللى قالتيهم د_فارستينا حلويييييين اوى بجد وياريت الناس تفكر كده

اولا انا اللي بشكرك يا نانسي على ردك وتفاعلك مع الموضوع واكيد طبعا ان الحوار بين الوالدين والابناء دا هو الاساس في التربيه السويه بس عارفه والله احيانا الكلمه دي بتبقى مجرد شعارات بعض الاسر بتتمنظر بيها لكن الحقيقه بتبقى عكس ذلك انا في اول سنه في الكليه كان عندي زميله كانت دايما بتشتكي من النقطه دي تصوري باباها كان يتناقش معاها في المساله ويسمع رايها ويحسسها انه فعلا مقتنع باللي هي قالته لكن وقت الجد ووقت التنفيذ تلاقيه برضه بيعمل اللي في دماغه وكانت النهايه ان البنت فقدت اصلا الرغبه في الكلام معاه وبقت في حاله استسلام تام واقلها طب ياستي حاولي تاني معلشي يمكن المره دي يقتنع لكن للاسف هي فقدت الثقه في وجود حوار بينهم وان رايها ممكن يغير حاجه
بس في الاخر نرجع ونقول يارب تبقى هي دي فعلا الثقافه السائده في بيوتنا مش سياده الامر والنهي
مره تانيه بشكرك ع المشاركه الجميله وكل سنه وانتي طيبه

[summer breeze]

يادي النور والسرور يانور وانا اقول الموضوع منور ليه اتاري نور دخلت وكتبت رد وطبعا كما هي العاده الرد في منتهى الروعه يصعب عليا اعقب عليه او ازيد لكن انا بس هاخد اكتر حاجه عجبتني واعلق عليها

عندما نولد لا نعرف الصواب والخطأ لا نعرف شئ عن الحياه وعما يحيط بنا نريد ان نستكشف ونعرف ولكن تواجهنا مشكله كبيره ألا وهى مشكله العيب كلمه نسمعها كثيرا ونرددها لكل فعل نراه لا يتفق اما مع عادات والتى من الممكن ان تكون عادات موروثه من قديم الازل كما انها عادات خاطئه ولكننا تربينا بهذه الطريقه ونريد ان يكون ابنائنا نسخه مننا فى كل شئ والمضحك فى هذا اننا حتى نريد الطفل ان يفعل مايفعله البالغين وان يتصرف بحكمه شديده ونريد برمجته على فعل معين ونمط لا يقبل التغير

الجزء دا بقى في نقطتين مهمين قوي اولهم هيا نقطه العيب المجتمع عمل بعبع كبير سماه العيب احيانا بيدخل في الحاجه العيب الحاجه الحرام دينيا فبدل ما نقول للولد حرام تكدب نقوله مش عيب عليك تكدب ويمكن المجتمع اخترع الكلمه دي علشان تبقى اعم شويه من كلمه حرام لتشمل ماهو ديني وماهو اجتماعي وبرضه ممكن علشان الناس اللي بتنسى ان ربنا شايفها وبتخاف من كلام الناس اكتر من خوفهم من ربنا لو قلتلهم حرام مش هيهمهم لكن لو قلتلهم عيب هيقفوا كده شويه ويرجعوا عن اللي في دماغهم او يعملوه في الخفاء بعيد عن اعين الناس
احنا صعب اننا نعمل ديليت لكلمه عيب من مجتمعنا لان اصلا الكلمه دي مرتبطه بالعرف وربنا سبحانه وتعالى لما امتدحنا قال (كنتم خير امه اخرجت للناس تامرون بالمعروف وتنهون عن المنكر ) والمعروف هو ماتعارف الناس على حسنه والمنكر هو ماتعارف الناس على قبحه يعني كلمه عيب دي اقرب في المفهوم الى المنكر عنها الى الحرام
تاني نقطه بقى حابه اعلق عليها هي نقطه اننا عاوزين اولادنا نسخه منا في كل شيء ودي ممكن تحتمل امرين ممكن يكون دا مجرد فرض سلطه من ولي الامر قلت لا يعني لا وهو كده يااما اخبط دماغك او انه بيبقى خوف من ان ابنه يعيش تجربه هو عاشها قبل كده وفشل فيها وعلشان كده بيمنع ابنه من خوض التجربه علشان خايف عليه يعاني من الفشل او الالم في الحاله دي العقل بيقول ان مش من حقه يمنع ابنه من خوض التجربه لانه مش بالضروري ان ابنه يفشل زي ماحصل معاه ممكن يكون ابنه افضل او اذكى او عنده ظروف احسن تؤهله للنجاح وبذلك مينفعشي يحرمه من التجربه بس من ناحيه تانيه من جهه القلب والمشاعر دا اب او ام بيخافوا على اولادهم من الهوا الطاير وصعب قوي عليه يتخيل ان ابنه يعيش لحظات اليمه زي اللي هو عاشها وهو بايده انه يمنع دا طبعا المساله معقده حبتين لكن في الاخر بتعتمد على شخصيه ولي الامر سواء اب او ام وكمان على شخصيه الابن هل هو من الشخصيات المتمرده او المطيعه

فمن الأولى ان نحصنهم بالمعرفه ومساعدتهم على تكوين شخصيه سليمه قادره على تحمل المسئوليات والتمييز بين الصواب والخطأ فعلينا ان نحترم ابنائنا ونحترم عقولهم ونصل اليهم ليس بالامر ولكن بالعقل والتفاهم

بصراحه مش هلاقي جمله اجمل من دي اختم بيها ميرسي كتير ليكي يانور ع المشاركه القيمه واجازه سعيده عليكي ياجميل