سيداتي و سادتي لقد انتهت الان المسرحيه الهزليه والتي استمر عرضها لمده خمس سنوات ( دا بالنسبه للناس الجامده يعني .......) . أنا عاوز كل واحد يعمل فلاش باك علي الي أربع سنين اللي فاتوا و يقول هوا استفاد ايه .....
يمكن دا يدي انطباع للدكاتره عن مدي التطور الرهيب اللي حصل في كليتنا علي مدار خمس سنوات ............
بالنسبه ليا أنا استفدت حاجات مهمه جدا ....

1- امشي عدل( احفظ) , يحتار عدوك(الكليه ) فيك ...... اوعي في يوم تسأل نفسك ايه اللي أنا بذاكروا دا , ولا هستفيد منه في ايه ؟؟؟؟؟؟...لأ انتا كدا بتظلم نفسك .... هضيع وقتك و تبتدي تنفسن و باردوا مش هتوصل لأي حاجه .... فاحفظ و احفظ و احفظ , و روح كب الي انتا حفظته في الامتحان ( الي بيوهمونا انو بيقيس مدي فهمنا ) تطلع من الاوائل ان شاء الله ... عشان كدا كل ما كان الهارد بتاعك أكبر و رماتك متظبطه يبقأي متخفش علي نفسك

2- أن الالتصاق بالماضي هو العامل الذي يصنع الفارق ......... لازم تسأل نفسك ازاي يعني متعرفش زميلك اللي اتخرجوا سنه ألف و تسعمائه و سبعين كانوا بيدرسوا ايه ؟؟؟؟ ازاي هيكون بينا لغه حوار .؟؟؟؟؟؟... علشان كدا درسنا في الخمس سنين اللي فاتوا تاريخ الصيدله ... فنحن أمه تهتم بماضيها ................
3- اتعلمت اني اخد حبوب الضغط قبل ما نزل أي سكشن ........ طالب في بكالوريوس كليه العلوم الصيدليه والسموم ( اسم كليتنا حلو اوي علي فكره ... له هيبه كدا ) يروح سكشن المديسنال عشان يتيتر و يرجع البيت أو يروح سكشن التوكسو عشان يسمع كلمتين ملهموش أي لازمه ولا الأبليد تروح ترمي شويه حاجات بالماصه في التست تيوب وفي الأخر ترمي التست تيوب وتاخد غيابك و تمشي ولا سكشن البارا ....... بلاش أتكلم

مش عاوز أطول عليكوا ..... و نفسي أعرف كل واحد استفاد ايه من الكليه .... يمكن أنا اللي فاهم غلط

حاجه أخيره , أنا شايف ان التطور الوحيد الي حصل في كليتنا ... ان الدكاتره في الشفوي ما بيكلوش من كوك دوور , بقؤا بيكلوا من رمضان الكبابجي الوحيد .............